1 Corintios 9 - Jiñi Tsiji' bʌ Wen T'añ cha'añ Estudio

Jiñi mu' bʌ mejlel i c'ajtin apóstol

¹ ¿Mach ba apóstoloñic? ¿Mach ba librejoñic? ¿Mach ba tsa'ic j q'uele Jesús lac Yum? ¿Mach ba jateticla i wut que'tel ti lac Yum?

² I tajol yaño' bʌ mi' yʌlob mach apóstoloñic, pero ti la' tojlel jiñʌchi come jatetla i sellojlel que'tel ti lac Yum.

³ Cha'añ jiñi mu' bʌ i contrajiñoñob mic su'beñob che' bajche' iliyi:

⁴ ¿Mach ba mejlic cʌq'uentel lojon chuqui mij c'ux yic'ot chuqui mic jap lojon?

⁵ Yic'ot ja'el ¿mach ba mejlic c pʌy lojon majlel quijñam che' bajche' mi' melob yaño' bʌ apóstolob yic'ot i yijts'iñob lac Yum yic'ot Pedro?

⁶ Cojach joñon quic'ot Bernabé, ¿mach ba mejlic j cʌy lojon c mel yam bʌ e'tel che' woliyon lojon ti subt'añ?

⁷ ¿Am ba juntiquil soldado mu' bʌ i cha'len e'tel ti' bajñel taq'uiñ? Jiñi mu' bʌ i pʌc' ts'usubil, ¿mach ba añic mi' c'uxben i wut? Jiñi mu' bʌ i cʌntan i yʌlac', ¿mach ba añic mi' japben i leche?

⁸ ¿Jim ba i t'añ jach wiñicob mu' bʌ c su'b? ¿Mach ba che'ic mi' yʌl jiñi mandar ja'el?

⁹ Come ts'ijbubil ti' mandar Moisés: “Mach a cʌchben i yej tat wacax mu' bʌ i t'uchtʌben loq'uel i wut trigo”. ¿Cojach ba tat wacax mi' cʌntan Dios?

¹⁰ ¿Mach ba wolic i cʌntañonla? Jiñi cha'añ tsa' ts'ijbubentiyonla ili t'añ: “Jiñi mu' bʌ i top' lum, la' i pijtan jiñi mu' bʌ caj ti colel, jiñi mu' bʌ i jats' loq'uel i wut trigo añ i pijtaya cha'añ mi caj i yʌq'uentel lamital i wut”.

¹¹ Mi tsa'ix j cʌntesayetla cha'añ mi la' p'ʌt-an, ¿mach ba yomic mi la' wʌq'ueñon lojon ts'ita' la' chu'bʌañ?

¹² Mi tsa' la' wʌq'ueyob yaño' bʌ ¿mach ba ñumen la' wentajic cha'añ mi la' wʌq'ueñon lojon? Ma'añic tsa' c'ajtibeyet lojon, come mij cuch lojon chuqui tac wocol ame mic mʌctʌben lojon i wen t'añ Cristo.

¹³ ¿Mach ba la' wujilic jiñi mu' bʌ i cha'leñob e'tel ti templo mi' c'uxob jiñi ac'bil bʌ ti templo, jiñi mu' bʌ i yʌq'ueñob i majtañ Dios ya' ti pulʌntib mi' c'uxob chuqui ac'bil ya'i?

¹⁴ Che' ja'el tsi' yʌc'ʌ mandar lac Yum cha'añ mi' yʌq'ueñtelob jiñi subt'añob pejtelel chuqui tac yom cha'añ i bʌc'tal, come mi' su'bob jiñi wen t'añ.

¹⁵ Pero ma'añic tsa' j c'ajtibeyetla chuqui yom tic tojlel anquese añ que'tel, ma'añic mic ts'ijban jiñi juñ cha'añ mi la' wʌq'ueñon chuqui yom cha'añ c bʌc'tal, ame jilic c ñuclel ti jiñi wen t'añ, ñumen uts'at mi tsa' chʌmiyon.

¹⁶ Anquese mic su'b jiñi wen t'añ, mach mejlic c su'b c bʌ ti ñuc, come wersa ñijcʌbil c pusic'al cha'añ mic su'b, mi caj c taj wocol mi ma'añic mic su'b.

¹⁷ Jiñi cha'añ, mi ti pejtelel c pusic'al mic su'b, añ c chobejtʌbal; mi mach comic c su'b jiñʌch c sajtemal, come tsa' aq'uentiyon jiñi e'tel.

¹⁸ ¿Chuqui c chobejtʌbal che' jiñi? Jiñʌch che' mic su'b i wen t'añ Cristo ti chejachi, jiñi cha'añ ma'añic mij c'ajtin c tojol cha'añ jiñi wen t'añ.

¹⁹ Jiñi cha'añ ma'añic wiñic mu' bʌ c yuman, tic bajñel pusic'al tsa'ix cʌc'ʌ c bʌ ti x'e'tel i cha'añ pejtelel wiñicob cha'añ mi' ñopob ca'bʌlob.

²⁰ Ti' tojlel israelob lajal mic mel c bʌ bajche' israelob cha'añ mi' ñopob, ti' tojlel gentilob mu' bʌ i jac'ob mandar (anquese mach chʌn cʌchʌloñix ti jiñi mandar) lajal mic mel c bʌ bajche' jiñi mu' bʌ i jac'ob mandar, cha'añ mi' ñopob.

²¹ Ti' tojlel wiñicob mach bʌ añic mi' cʌñob Dios lajal mic mel c bʌ bajche' jiñi mach bʌ añic mi' cʌñob Dios, cha'añ mi' ñopob. (Pero ti pejtelel c pusic'al woli c jac'ben i mandar Cristo).

²² Ti' tojlel wiñicob mach bʌ xuc'ulic mi' ñopob, mi cajñel bajche' juntiquil mach bʌ p'ʌtʌlic cha'añ mi' ñopob jiñi mach bʌ añobic i p'ʌtʌlel, lajal mic mel c bʌ bajche' pejtelel wiñicob cha'añ mij coltañob che' bajche' jaytiquil mi' mejlel.

²³ Che'ʌch mic mel cha'añ mi' cʌñob jiñi wen t'añ, cha'añ mic taj c wenlel ja'el ti jiñi wen t'añ quic'ot jiñi mu' bʌ i ñopob.

²⁴ ¿Mach ba la' wujilic jiñi mu' bʌ i cha'leñob ajñel ti' tojlel xq'uelojelob mi' cha'leñob ajñel ti pejtelelob, pero cojach juntiquil mi' taj i majtañ? Cha'lenla ajñel jatetla che' bajche' jiñi mu' bʌ i taj i majtañ.

²⁵ Pejtelel mu' bʌ i cha'leñob ajñel mi' bajñel cʌntañob i bʌ cha'añ mi' yʌq'ueñtelob i corona mu' bʌ i jilel, joñonla mi laj cʌntan lac bʌ cha'añ mi la cʌq'uentel corona mach bʌ añic mi' jilel.

²⁶ Jiñi cha'añ mic cha'len ajñel che' bajche' juntiquil yujil bʌ baqui mi' majlel, ma'añic mic cha'len cujoñel che' bajche' wiñic tuch'law bexlaw bʌ i c'ʌb.

²⁷ Mic tic' c bʌc'tal cha'añ mi' wersa jac'beñon, ame mic chilbentel j c'ʌjñibal che' bʌ tsa'ix c su'beyob wiñicob jiñi wen t'añ.