1 Corintios 8 - Jiñi Tsiji' bʌ Wen T'añ cha'añ Estudio

4. I LIBREJLEL XÑOPT'AÑOB ( 8.1—11.1 ) We'elʌl aq'uebil bʌ dios tac melbil bʌ

¹ Wʌle, mic tsictesʌbeñetla isujmlel jiñi we'elʌl aq'uebil bʌ dios te' tac ti' majtañ, la cujil añ lac ña'tʌbal ti lac pejtelel. Lac ña'tʌbal mi' yʌq'ueñonla lac lon q'uel lac bʌ ti ñuc, pero laj c'uxbiya mi' ñijcañonla ti coltaya.

² Mi añ majqui mi' lon ña'tan ca'bʌlʌch i ña'tʌbal, maxto yujilic chuqui yom mi' ña'tan.

³ Pero mi añ majqui mi' c'uxbin Dios, cʌmbilʌch jiñi wiñic ti Dios.

⁴ ¿Yom ba mi laj c'ux we'elʌl aq'uebil bʌ dios te' tac ti' majtañ? La cujil ma'añic i c'ʌjñibal dios te' tac ti pañimil, come ma'añic yam bʌ Dios, juntiquil jach.

⁵ Anquese añ mu' bʌ i lon alob añ ca'bʌl dios mi ya' ti panchan o mi ti pañimil, che' bajche' añ ca'bʌl i diosob che' ja'el añ ca'bʌl yumʌlob,

⁶ pero ti lac tojlel añ juntiquil jach Dios, jiñʌch lac Tat. Ya' ch'oyol pejtelel chuqui tac añ, tsi' meleyonla cha'añ mi lac ñuq'uesan, yic'ot juntiquil jach lac Yum, jiñʌch Jesucristo, ti p'ʌtʌlel tsa' mejli pejtelel chuqui tac añ, yic'ot añonla ja'el cha'añ Cristo.

⁷ Mach laj yujilobic isujmlel jiñi t'añ, lamital mu' to i chʌn ña'tañob jiñi dios te' tac c'ʌlʌl wʌle che' mi' c'uxob jiñi we'elʌl, mi' c'uxob che' tilebixelob i pusic'al, c'uñob jax i ña'tʌbal jiñi cha'añ mi' sojquelob che' mi' c'uxob.

⁸ Mach cha'añic we'elʌl mi' q'uelonla ti uts'at Dios, mi woli lac tic' lac bʌ ti' c'uxol mach cha'añic ma'añix lac ñuclel, o mi woli laj c'ux mach ñumen uts'atoñicla, ma'añic mi' yʌq'ueñonla lac wenlel ti' tojlel Dios.

⁹ Chʌcʌ q'uele la' bʌ ame la' wʌc' ti yajlel jiñi mach bʌ xuc'ulic i pusic'al che' añ chuqui mi la' mel che' libre añetla.

¹⁰ Come mi tsi' q'ueleyet jiñi mach bʌ xuc'ulic i pusic'al che' buchulet ti mesa ya' ti' templo dios te' tac, come awujil uts'at jiñi we'elʌl, ¿mach ba muq'uic i ñijcʌyel i pusic'al jiñi mach bʌ xuc'ulic cha'añ mi' c'ux chuqui tac aq'uebil dios te'? Anquese mi' lon ña'tan mach uts'atic.

¹¹ Che' jiñi, cha'añ ti a ña'tʌbal mi caj i sajtel jiñi wiñic mach bʌ xuc'ulic. Cristo tsa' chʌmi cha'añ jiñi wiñic.

¹² Che' bajche' iliyi, ma' cha'len mulil ti' contra la quermañujob che' ma' lowben i ña'tʌbal jiñi mach bʌ xuc'ulic i pusic'al, ma' cha'len mulil ti' contra Cristo.

¹³ Jiñi cha'añ, mi cha'añ jach we'elʌl mi cʌc' ti yajlel quermañu, ma'añic mi caj j c'ux we'elʌl ti pejtelel ora cha'añ ma'añic mi cʌc' ti yajlel quermañu.