1 Corintios 7 - Jiñi Tsiji' bʌ Wen T'añ cha'añ Estudio

3. WOCOL CHA'AÑ XÑUJPUÑIJEL ( 7.1-40 )

¹ Woli c ña'tan chuqui tsa' la' ts'ijbubeyon. Uts'at mi ma'añic mi' pʌy i yijñam wiñic.

² Pero cha'añ ti' caj añ ca'bʌl mu' bʌ i tajob i yixic, jiñi cha'añ la' i pʌy i yijñam jujuntiquil wiñic, la' i taj i ñoxi'al jujuntiquil x'ixic.

³ Jiñi wiñic la' i pi'len i yijñam ti uts'at, che' ja'el i yijñam la' i pi'len i ñoxi'al ti uts'at.

⁴ Jiñi x'ixic mach i bajñel cha'añic i bʌc'tal, come mi' yuman i ñoxi'al, che' ja'el i ñoxi'al mach i bajñel cha'añic i bʌc'tal, come mi' yuman i yijñam.

⁵ Mach la' cʌy la' pi'len la' bʌ, cojach mi la' wom ti la' cha'ticlel cha'añ mi la' wʌc' la' bʌ ti oración, che' mi' yujtel oración yom mi la' cha' pi'len la' bʌ ame i pʌyetla ti mulil Satanás che' ma'añic i p'ʌtʌlel la' pusic'al.

⁶ Che'ʌch mic su'b cha'añ mij coltañetla, mach ti mandaric woli c su'b.

⁷ Come mi cʌl uts'at mi lajalob pejtelel wiñicob che' bajche' joñon, pero ti jujuntiquil añ i c'ʌjñibal aq'uebil bʌ i cha'añ Dios, juntiquil añ junchajp i c'ʌjñibal, yam bʌ añ yam bʌ i c'ʌjñibal.

⁸ Mic su'ben jiñi maxto bʌ ñujpuñemobic yic'ot ja'el jiñi me'ba' x'ixicob cha'añ uts'at mi' chʌn ajñelob che' bajche' joñon.

⁹ Mi mach mejlic i bajñel ajñelob ti uts'at, la' i cha'leñob ñujpuñijel, ñumen uts'at mi' cha'leñob ñujpuñijel, pero mach uts'atic mi' jac'ob i colosojlel i pusic'al.

¹⁰ Mic su'beñob jiñi ñujpuñijemo' bʌ, pero mach c mandaric woli c su'b, i mandarʌch lac Yum: Jiñi x'ixic mach i cʌy i ñoxi'al;

¹¹ mi tsi' cʌyʌ i ñoxi'al x'ixic la' ajñic ti' bajñelil, mi mach yomic ajñel ti' bajñelil, la' i cha' uts-esañob i bʌ yic'ot i ñoxi'al, che' ja'el jiñi wiñic mach i choc loq'uel i yijñam.

¹² Jiñʌch mu' bʌ c su'b joñon, ma'añic tsi' su'bu lac Yum: Mi ma'añic mi' ñop lac Yum i yijñam juntiquil la quermañu, mach i choc loq'uel i yijñam che' yom to ajñel jiñi x'ixic yic'ot.

¹³ Mi ma'añic mi' ñop lac Yum i ñoxi'al juntiquil hermana, mach i cʌy i ñoxi'al che' yom to ajñel jiñi wiñic yic'ot.

¹⁴ Come jiñi wiñic mach bʌ añic mi' ñop lac Yum, mi' poj q'uejlel ti sʌc ti Dios che' woli' yajñel yic'ot i yijñam woli bʌ i ñop lac Yum; jiñi x'ixic mach bʌ añic mi' ñop lac Yum, mi' poj q'uejlel ti sʌc ti Dios che' woli' yajñel yic'ot i ñoxi'al mu' bʌ i ñop. Mi mach che'iqui, mach sʌquic mi' q'uejlel la' walobilob, wʌle ch'ujul mi' q'uejlelob.

¹⁵ Pero mi yom loq'uel majlel jiñi mach bʌ añic mi' ñop lac Yum, la' loq'uic, che' jiñi juntiquil la quermañu mi wiñic mi x'ixic mach chʌn añix ti' p'ʌtʌlel i pi'ʌl mi tsa' loq'ui, come Dios tsi' pʌyʌyonla cha'añ ñʌch'ʌl mi la cajñel.

¹⁶ Hermana, ¿mach ba a wujilic? Tic'ʌl mi mejlel a coltañ a ñoxi'al cha'añ mi' ñop. Quermañu, ¿mach ba a wujilic? Tic'ʌl mi mejlel a coltañ a wijñam cha'añ mi' ñop.

¹⁷ Ti jujuntiquil wiñic la' ajñic che' bajche' tsa' aq'uenti i c'ʌjñibal ti lac Yum che' bajche' Dios tsi' pʌyʌ ti jujuntiquil. Che'ʌch mij cʌntesan xñopt'añob baqui jach mi' tempañob i bʌ.

¹⁸ Mi añ majqui mi' pʌjyel ti Dios che' tsepbilix i pʌchʌlel, che'ʌch yom mi' yajñel. Mi añ majqui mi' pʌjyel che' mach tsepbilic i pʌchʌlel, mach i yʌc' i bʌ ti tsepol.

¹⁹ Come ma'añic chuqui mi' cha'len mi tsepbil o mi mach tsepbilic lac pʌchʌlel. Pero Dios yom cha'añ mi lac jac'ben i mandar.

²⁰ Ti jujuntiquil la' ajñic che' bajche' tsi' taja Dios che' bʌ tsi' pʌyʌ.

²¹ ¿Tsa' ba pʌjyiyet che' añet ti a yum? Mach a mel a pusic'al. Pero mi tsa' mejliyet ti loq'uel ti' tojlel a yum ñumen uts'at.

²² Come lac Yum tsa' bʌ i pʌyʌ jiñi am bʌ ti' yum, tsa'ix i yʌc'ʌ ti libre, pero jiñi tsa' bʌ pʌjyi che' libre añ, tsa'ix ochi ti' wenta cha'añ mi' yuman Cristo.

²³ Tsa' mʌjñiyetla, tojbiletla; ña'tanla mach chʌn i cha'añetixla wiñicob.

²⁴ Quermañujob, ti jujuntiquiletla ajñenla ti' tojlel Dios che' bajche' añetla che' bʌ tsi' pʌyʌyetla.

²⁵ Ma'añic tsa' aq'uentiyon mandar ti lac Yum cha'añ mic su'beñob xch'octacob, cojach mic su'b chuqui woli c ña'tan tic pusic'al, come lac Yum ti' yutslel i pusic'al tsi' yʌc'ʌyon ti ajñel ti xuc'ul.

²⁶ Añ ca'bʌl wocol ti ili ora, jiñi cha'añ mi cʌl uts'at mi che' jach mi' yajñelob wiñicob che' bajche' añob.

²⁷ Mi añ a wijñam, mach a ñop a cʌy. Mi ma'añic a wijñam, mach a sajcan a wijñam.

²⁸ Mi tsa' pʌyʌ a wijñam, mach mulilic, che' ja'el jiñi xch'oc mi tsi' taja i ñoxi'al, mach mulilic. Pero jiñi mu' bʌ i pʌyob i bʌ, wersa mi caj i yu'biñob wocol ti pañimil, mach comic mi la' taj ili wocol.

²⁹ Mic su'beñetla quermañujob, poj jumuc' jach wʌ'añonla. Jiñi cha'añ jiñi año' bʌ i yijñam la' i melbeñob i ye'tel lac Yum che' bajche' jiñi mach bʌ añobic i yijñam;

³⁰ jiñi mu' bʌ i cha'leñob uq'uel che'ʌch mi caj i yajñelob bajche' jiñi mach bʌ añic mi' cha'leñob uq'uel; jiñi tijicñayo' bʌ che'ʌch mi caj i yajñelob bajche' jiñi mach bʌ tijicñayobic; jiñi mu' bʌ i cha'leñob mʌñoñel che'ʌch mi caj i yajñelob bajche' jiñi mach bʌ añobic i chu'bʌañ,

³¹ yic'ot jiñi mu' bʌ i tajob i wenlel ila ti pañimil che'ʌch yom mi i yajñelob bajche' jiñi mach bʌ añic mi' tajob i wenlel, come pejtelel chuqui tac mi laj q'uel ti pañimil jilel jach woli.

³² Mach comic mi la' mel la' pusic'al. Jiñi mach bʌ añic i yijñam mi' chʌn ña'tan lac Yum cha'añ mi' mel chuqui mi' mulan lac Yum;

³³ pero jiñi am bʌ i yijñam mi' chʌn ña'tan i ye'tel ti pañimil cha'añ tijicña mi' q'uel i yijñam.

³⁴ Che' ja'el mach lajalic x'ixic am bʌ i ñoxi'al yic'ot xch'oc mach bʌ añic i ñoxi'al. Jiñi mach bʌ añic i ñoxi'al mi' chʌn ña'tan lac Yum cha'añ sʌc mi' yajñel i bʌc'tal yic'ot i ch'ujlel; pero jiñi x'ixic am bʌ i ñoxi'al mi' ña'tan i ye'tel ti pañimil cha'añ tijicña mi' yu'bin i ñoxi'al.

³⁵ Mic su'b jiñi t'añ cha'añ mij coltañetla, mach cha'añic mi la' chujquel ti yac, pero cha'añ mi la' mel chuqui wen yic'ot chuqui toj, cha'añ ma'añic chuqui mi' mʌctañetla ti' wen tsajcʌntel lac Yum.

³⁶ Mi añ wiñic mu' bʌ i ña'tan mach uts'atic woli' cha'len che' ma'añic mi' sijin i yalobil c'ʌlʌl mi' ñox-an, mi wersa yom i sijin, la' i yʌc' ti ñujpuñel i yalobil che' bajche' yom i pusic'al. Mach mulilic. La' i cha'len ñujpuñijel.

³⁷ Pero jiñi xuc'ul bʌ i pusic'al mach bʌ yomic i sijin i yalobil, come tsi' ña'ta i cʌntan i yalobil che' mach wersajic mi' sijin, uts'at mi' mel.

³⁸ Jiñi mu' bʌ i sijin i yalobil uts'at mi' mel, pero jiñi mach bʌ añic mi' sijin ñumen uts'at mi' mel.

³⁹ Jiñi x'ixic añ ti' wenta i ñoxi'al che' cuxul to, mi tsa' chʌmi i ñoxi'al mi mejlel i cha' cha'len ñujpuñel mi yom, pero yom yic'ot wiñic ochem bʌ ti lac Yum.

⁴⁰ Mi cʌl, ñumen tijicña jiñi x'ixic mi che' jach mi yajñel ti' bajñelil; cujil ja'el, añʌch quic'ot i yEspíritu Dios.