1 Corintios 6 - Jiñi Tsiji' bʌ Wen T'añ cha'añ Estudio

Meloñel ti' tojlel mach bʌ xñopt'añic

¹ Ixcu jatetla che' mi la' contrajin la bʌ yic'ot yaño' bʌ, ¿yom ba mi la' majlel la' mel la' bʌ ba'añ jiñi año' bʌ i ye'tel mach bʌ i cʌñʌyic Dios? ¿Mach ba yomic mi la' mel la' bʌ ti' tojlel i cha'año' bʌ Dios?

² ¿Mach ba la' wujilic cha'añ i cha'año' bʌ Dios mi caj i melob i cha'año' bʌ pañimil? Mi jatetla mi caj la' mel i cha'año' bʌ pañimil, ¿mach ba mejlic la' mel jiñi mu' bʌ i cha'leñob leto ti la' tojlel?

³ ¿Mach ba la' wujilic mi caj lac mel ángelob? Jiñi cha'añ ñumen mi mejlel lac mel wiñicob ila ti pañimil.

⁴ Mi añ ti la' wenta cha'añ mi la' melob cha'añ chuqui tac woli ti ujtel ti ili ora, ¿chucoch che' jiñi mi la' chocob majlel ba'añ wiñicob mach bʌ la quermañujobic cha'añ mi' melob i bʌ?

⁵ Mic su'beñetla iliyi cha'añ mi la' cha'len quisin. ¿Mach ba añic mi juntiquilic la quermañu yujil bʌ meloñel ti la' tojlel?

⁶ Jiñi la quermañujob che' mi' contrajiñob i bʌ, mi' majlelob ti meloñel ti' tojlel jiñi año' bʌ i ye'tel mach bʌ añic mi' ñopob Dios.

⁷ Isujm añix la' sajtemal che' jiñi, come woli la' contrajin la' bʌ ti' tojlel jiñi sajtemo' bʌ. ¿Chucoch ma'añic mi la' cuchben i mul la' wermañu che' mi' techbeñetla wocol? ¿Chucoch ma'añic mi la' ñusʌben che' mi' chilbeñetla la' chu'bʌañ?

⁸ Pero jatetla mi la' mel chuqui mach tojic, mi la' cha'len xujch', mi la' contrajin la' wermañujob.

⁹ ¿Mach ba la' wujilic cha'añ ma'añic mi caj i yochelob ti' yumʌntel Dios jiñi mach bʌ tojobic? Mach mi la' lon jac' la' lotintel. Ma'añic mi caj i yochelob ti' yumʌntel Dios jiñi mu' bʌ i cha'leñob ts'i'lel, mi jiñic mu' bʌ i c'uxbiñob dios tac melbil bʌ, mi jiñic mu' bʌ i tajob i yixic, mi jiñic mach bʌ añic mi' tic'ob i colosojlel i pusic'al, mi jiñic wiñicob mu' bʌ i wʌlʌc pi'leñob i bʌ,

¹⁰ mi jiñic xujch'ob, mi jiñic xchʌclelob, mi jiñic xyʌc'ʌjelob, mi jiñic xp'ajoñelob, mi jiñic xlotob, ma'añic mi caj i yochelob ti' yumʌntel Dios.

¹¹ Lamitaletla che'ʌch tsa' la' mele, pero wʌle pocbiletixla ti' c'aba' lac Yum Jesucristo, che' ja'el wolix la' q'uejlel ti toj cha'añ ti' c'aba' lac Yum Jesucristo yic'ot cha'añ ti yEspíritu lac Dios.

Tsictesanla i ñuclel Dios ti la' bʌc'tal

¹² Mi mejlel c mel pejtelel chuqui com, mach tic'biloñic, pero mach uts'atic mi tsa' c mele ti pejtelel. Chuqui jach com c mel, mi mejlel c mel, pero ma'añic mi caj c mel ame ñʌm-ac c pusic'al.

¹³ Uts'at we'elʌl cha'añ lac ñʌc'. Jiñi lac ñʌc' i yajñibʌch we'elʌl, pero Dios mi caj i jisan lac ñʌc' yic'ot we'elʌl. Jiñi lac bʌc'tal mach cha'añic ts'i'lel, i cha'añʌch lac Yum. Lac Yum mi caj i coltañ lac bʌc'tal.

¹⁴ Dios tsa' bʌ i teche ch'ojyel lac Yum mi caj i techonla ch'ojyel ja'el ti' p'ʌtʌlel.

¹⁵ ¿Mach ba la' wujilic i cha'añʌch Cristo la' bʌc'tal? ¿Yom ba mij c'ʌn c bʌc'tal che' i cha'añix Cristo cha'añ mi cʌq'uen xts'i'lel x'ixic? Mach yomic.

¹⁶ ¿Mach ba la' wujilic jiñi mu' bʌ i pi'len juntiquil xts'i'lel x'ixic, jump'ejl jach i bʌc'tal yic'ot? Come ¿mach ba añic mi yʌl jiñi wen t'añ: “Jiñi cha'tiquil mi' yochelob ti juntiquil jach?” Che'en.

¹⁷ Jiñi mu' bʌ i yajñel yic'ot lac Yum mi' yochel ti jump'ejl jach i pusic'al yic'ot.

¹⁸ Puts'tanla ts'i'lel. Jiñi mu' bʌ i cha'len ts'i'lel ñumen mi' tic'lan i bʌc'tal bajche' jiñi mu' bʌ i cha'len yan tac bʌ mulil.

¹⁹ ¿Mach ba la' wujilic cha'añ la' bʌc'tal i templojʌch jiñi Ch'ujul bʌ Espíritu tsa' bʌ i yʌq'ueyetla Dios mu' bʌ i yajñel ti la' pusic'al? Come mach la' bajñel wentajic la' bʌ.

²⁰ Come tsa' mʌjñiyetla, tojbiletla, jiñi cha'añ tsictesanla i ñuclel Dios ti la' bʌc'tal [yic'ot ti la' ch'ujlel, come i cha'añʌch Dios.],