1 Corintios 5 - Jiñi Tsiji' bʌ Wen T'añ cha'añ Estudio

2. PABLO TSI' TOJ-ESA XÑOPT'AÑOB ( 5.1—6.20 ) Juntiquil tsa' bʌ i cha'le ts'i'lel

¹ Isujm woli' yʌlob cha'añ añ juntiquil ti la' tojlel woli bʌ ti ts'i'lel, ñumen leco bajche' mi' melob jiñi sajtemo' bʌ, come jiñi wiñic wolix i yajñel yic'ot i majaña'.

² Jatetla chañ mi la' lon mel la' bʌ. ¿Mach ba yomic mi la' wu'bin la' ch'ijiyemlel cha'añ i mul ili wiñic? ¿Mach ba yomic mi la' choc loq'uel ti la' tojlel jiñi tsa' bʌ i mele bajche' jiñi?

³ Isujm mach ya'ic añon la' wic'ot tic bʌc'tal, pero ya'añon ti espíritu, tsa'ix c ña'ta bajche' yom mi' mejlel jiñi am bʌ i mul.

⁴ Che' temel añetla ya'ʌch añon quic'otetla yu'bil, come ya'añ i p'ʌtʌlel lac Yum Jesucristo, ti' c'aba' lac Yum Jesucristo mic su'beñetla,

⁵ la' poj chojquic loq'uel ti la' tojlel jiñi wiñic cha'añ mi' yajñel ti' wenta Satanás, cha'añ mi' yu'bin wocol, cha'añ mi' jisʌntel i tsucul pusic'al, cha'añ mi' coltʌntel i ch'ujlel ti' q'uiñilel lac Yum.

⁶ Mach weñic mi la' q'uel la' bʌ ti ñuc. ¿Mach ba la' wujilic che' bajche' ts'ita' levadura mi' laj paj-esan ti' junc'ojlel caxlan waj?

⁷ Chocola loq'uel jiñi tsucul bʌ la' melbal come tsijib melbiletixla, come jiñi lac Tʌñʌme' cha'añ Pascua jiñʌch Cristo tsa' bʌ ajq'ui ti chʌmel cha'añonla.

⁸ Jiñi cha'añ la' lac mel q'uiñijel ti uts'at, mach yic'otic tsucul bʌ levadura, jiñʌch jontolil yic'ot mulil, yom jiñi isujm bʌ waj mach bʌ añic i levadurajlel, jiñʌch i sʌclel lac pusic'al.

⁹ Tsa' c ts'ijbubeyetla ti juñ cha'añ mach yomic mi la' tempan la' bʌ yic'ot jiñi mu' bʌ i cha'leñob ts'i'lel.

¹⁰ Isujm, mach mejlic la' junyajlel loq'uel ti' tojlel i cha'año' bʌ pañimil mu' bʌ i cha'leñob ts'i'lel, mu' bʌ i chʌcleñob i chu'bʌañ, mu' bʌ i cha'leñob xujch', mu' bʌ i c'uxbiñob i diosob tac, muq'uic la' junyajlel loq'uel ti' tojlelob, che' jiñi, ma'añoñixla ti pañimil.

¹¹ Mic ts'ijbubeñetla wʌle, mach mi la' ñochtan mi juntiquilic, anquese mi' su'b i bʌ ti la quermañu, mi woli ti ts'i'lel, mi añ i chʌclel, mi woli' c'uxbin yam bʌ dios tac, mi woli' i cha'len p'ajoñel, mi woli ti yʌc'ʌjel, mi woli ti xujch', mach mi la' cha'len we'el yic'ot,

¹² come ¿am ba que'tel cha'añ mic mel jiñi mach bʌ ochemobic? ¿Mach ba la' wentajic mi la' mel jiñi ochemo' bʌ?

¹³ Come Dios mi caj i mel jiñi mach bʌ ochemobic. Chocola loq'uel ti la' tojlel jiñi xjontolil.