1 Corintios 4 - Jiñi Tsiji' bʌ Wen T'añ cha'añ Estudio

I ye'tel jiñi Apóstolob

¹ La' i ña'tañob wiñicob x'e'telon jach lojon i cha'añ Cristo, xcʌntayajon lojon cha'añ isujmlel Dios mach bʌ tsictiyemic ti yam bʌ ora.

² Jiñi cha'añ, ti jujuntiquil jiñi xcʌntaya wersa yom xuc'ul mi' pʌs i bʌ ti' ye'tel i yum.

³ Ma'añic mic mel c pusic'al cha'añ chuqui mi' yʌlob wiñicob, mi jatetla o mi yaño' bʌ, mi woli la' wʌl uts'aton o mach uts'atoñic, joñon ja'el ma'añic mic bajñel su'b c bʌ ti wen.

⁴ Anquese ma'añic woli ti t'añ c pusic'al, ma'añic mic su'b c bʌ ti uts'at, jiñi mu' bʌ i q'uelon, mu' bʌ caj i melon jiñʌch lac Yum.

⁵ Jiñi cha'añ mach mi la' su'b mi uts'at o mi mach uts'atobic wiñicob x'ixicob che' maxto i yorajlelic, jinto mi' tilel lac Yum mi caj i tsictesan jiñi mucul tac bʌ mach bʌ tsictiyemic yic'ot mi caj i tsictesan chuqui woli i ña'tan lac pusic'al. Che' jiñi ti jujuntiquil wiñicob x'ixicob mi caj i tsictesʌbentel i ñuclel ti Dios.

⁶ Jiñi cha'añ quermañujob, tsa'ix j tajbe i c'aba' Apolos yic'ot j c'aba' cha'añ mij cʌntesañetla, come c'ux mi cubiñetla, cha'añ mi la' ñop ti joñon lojon bajche' yom mi la' wajñel che' bajche' ts'ijbubil, ame ti' cajic juntiquil mi caj la' q'uel ti lolom jiñi yaño' bʌ.

⁷ Come ¿majqui tsi' yʌq'ueyetla la' c'ʌjñibal ti' chajp ti' chajp? ¿Mach ba aq'uebileticla ti la' majtañ jach? Mi aq'uebilet jach la, ¿chucoch ñuc mi la' q'uel la' bʌ che' bajche' mach aq'uebileticla ti la' majtañ?

⁸ Mi la' lon al jasʌlix la' cʌntesʌntel ti Dios, ca'bʌlix la' ña'tʌbal. Che' mach ya'ic añon lojon la' wic'ot mi la' lon mel la' bʌ che' bajche' reyetla. Uts'at, aja reyeticla cha'añ che' jiñi temel mi lac cha'len yumʌntel.

⁹ Come mic ña'tan Dios tsi' yʌc'ʌyon lojon ti wi'il pat che' bajche' chucbil bʌ wiñicob mu' bʌ caj i tsʌnsʌntelob, come tsi' yʌc'ʌyon lojon ti pañimil ba' mic wajlentel lojon ti' tojlel wiñicob x'ixicob yic'ot ángelob.

¹⁰ Tonto mij q'uejlel lojon cha'añ c'ux mi cu'bin lojon Cristo, pero jatetla ca'bʌl la' ña'tʌbal ti Cristo; c'uñon lojon, pero jatetla p'ʌtʌletla, añ la' ñuclel, pero ts'a'lebilon lojon.

¹¹ C'ʌlʌl wʌle mi cu'bin lojon wi'ñal yic'ot tiquinti', pits'ilon lojon, mic poch'intel lojon yic'ot ma'añic xuc'ul bʌ chumlibʌl baqui mic chumtʌl lojon.

¹² Mic cha'len lojon wersa e'tel tij c'ʌb, jiñi mu' bʌ i p'ajon lojon mic pejcan lojon ti wen bʌ t'añ, jiñi mu' bʌ i tic'lañon lojon, mij cuchben lojon.

¹³ Jiñi mu' bʌ i to'ol aloñ lojon, mic pejcan lojon ti uts bʌ t'añ, mij q'uejlel lojon c'ʌlʌl wʌle che' bajche' misujelʌl, che' bajche' i bi'bi'lel pejtelel chuqui tac mi' chojquel.

¹⁴ Ma'añic woli c ts'ijban ili t'añ cha'añ mi cʌq'uetla ti quisin, pero cha'añ mic xic'beñetla ti uts'at che' bajche' calobiletla mu' bʌ j c'uxbin.

¹⁵ Añic la' cha'añ lujump'ejl mil xcʌntesajob ti Cristo, juntiquil jach la' tat, come ti Cristo Jesús joñon tsa' c teche j cʌntesañetla ti jiñi wen t'añ.

¹⁶ Jiñi cha'añ ti wocol t'añ mic su'beñetla, melela che' bajche' mic mel.

¹⁷ Jiñi cha'añ tsa' c choco majlel Timoteo ba'añetla, jiñʌch c'uxbibil bʌ calobil yic'ot xuc'ul bʌ i pusic'al ti lac Yum, jiñʌch mu' bʌ caj i yʌq'ueñetla la' cha' ña'tan che' bajche' woli c ñop Cristo, che' bajche' mij cʌntesan xñopt'añob ti pejtelel pañimil baqui jach mi' tempañob i bʌ.

¹⁸ Lamitaletla ñuc mi la' q'uel la' bʌ cha'añ woli la' lon al ma'añix ba ora mic caj c chʌn tilel ba'añetla.

¹⁹ Pero mach jalix mi caj j c'otel ba'añetla mi che' yom lac Yum, mi caj j q'uel mi añ i p'ʌtʌlel jiñi mu' bʌ i lon q'uelob i bʌ ti ñuc o mi to'ol t'añ jach woliyob.

²⁰ Come mach to'ol t'añic jach i yumʌntel Dios pero añ ca'bʌl i p'ʌtʌlel.

²¹ ¿Chuqui la' wom? ¿La' wom ba mic ch'ʌm tilel asiyal ba'añetla o la' wom ba mic tilel yic'ot c'uxbiya yic'ot i yutslel c pusic'al?