1 Corintios 3 - Jiñi Tsiji' bʌ Wen T'añ cha'añ Estudio

X'e'telonla i cha'añ Dios

¹ Che' jiñi quermañujob, ma'añic tsa' mejli c pejcañetla che' bajche' mic pejcan jiñi mu' bʌ i jac'beñob i yEspíritu Dios, come mu' to la' jac'ben i tsuculel la' pusic'al, come alʌlet to la ti Cristo.

² Tsa' cʌq'ueyetla la' jap leche, ma'añic tsa' cʌq'ueyetla we'elʌl, come maxto mejlic la' c'ux, c'ʌlʌl wʌle mach mejliquetla,

³ come woli to la' jac'ben i tsuculel la' pusic'al. Woli la' tsʌjyuben la' bʌ la' wenlel, woliyetla ti leto, yic'ot woli la' t'ox la' bʌ ti t'añ. Che' jiñi, ¿mach ba wolic la' jac'ben i tsuculel la' pusic'al? ¿Mach ba lajalic woli la' cha'len che' bajche' i cha'año' bʌ pañimil?

⁴ Come juntiquil mi' yʌl: “Ti isujm i cha'añon Pablo”. Yam bʌ mi' yʌl: “I cha'añon Apolos”. ¿Mach ba wolic la' jac'ben i tsuculel la' pusic'al?

⁵ ¿Majqui jiñi Pablo che' jiñi yic'ot majqui jiñi Apolos? X'e'telon jach lojon tsa' bʌ cʌq'ueyet la' ñop Dios cha'añ ti' p'ʌtʌlel lac Yum tsa' bʌ i yʌq'ueyon lojon ti jujuntiquil.

⁶ Joñon tsa' c cha'le pac', Apolos tsi' mulu; pero Dios tsi' yʌc'ʌ ti colel.

⁷ Che' jiñi mach ñuquic jiñi mu' bʌ i cha'len pac' yic'ot jiñi mu' bʌ i mul, cojach Dios mu' bʌ i yʌc' ti colel.

⁸ Jiñi mu' bʌ i cha'len pac' yic'ot jiñi mu' bʌ i mul junlajalob jach, anquese ti jujuntiquil mi caj i yʌq'ueñtelob i chobejtʌbal che' bajche' añ i ye'tel.

⁹ Come joñon lojon x'e'telon jach lojon i cha'añ Dios, jatetla i choletla Dios, i yototetla Dios.

¹⁰ Che' bajche' tsa' aq'uentiyon i yutslel i pusic'al Dios, tsa' c ts'ajquibe i c'ʌclib otot che' bajche' juntiquil wen yujil bʌ i wa'chocontel otot, yam bʌ mi' wa'chocon i ye'tel ti' pam i c'ʌclib; pero ti jujuntiquil la' i q'uel bajche' mi' wa'chocon i ye'tel ti' pam.

¹¹ Come ma'añic majqui mi mejlel i yʌq'ueñ yam bʌ i c'ʌclib otot, jiñi laj c'ʌclib jiñʌch Jesucristo.

¹² Mi añ majqui mi' c'ʌn oro, mi sʌsʌc taq'uiñ, mi c'ax wen bʌ xajlel, o mi te', mi jam, mi tiquin pimel cha'añ mi' wa'chocon otot ti' pam jiñi i c'ʌclib,

¹³ mi caj i tsictiyel bajche' yilal i ye'tel jujuntiquil wiñic ti jiñi q'uiñ che' mi' yʌjq'uel ti tsictiyel, mi caj i tsictiyel ti c'ajc mi weñʌch i ye'tel jujuntiquil wiñic.

¹⁴ Mi ma'añic tsa' jili ti c'ajc i ye'tel tsa' bʌ i wa'choco ti' pam, mi caj i yʌq'uentel i chobejtʌbal.

¹⁵ Mi tsa' puli i ye'tel ma'añix i chobejtʌbal, come sajtem i ye'tel, pero mi caj i coltʌntel jiñi wiñic che' bajche' juntiquil tsa' bʌ i yʌlʌ pulel ti c'ajc.

¹⁶ ¿Mach ba la' wujilic cha'añ i templojetla Dios yic'ot i yEspíritu Dios mi' chumtʌl la' wic'ot?

¹⁷ Mi añ majqui mi' jisʌben i templo Dios, Dios mi caj i jisan jiñi wiñic x'ixic, come jatetʌchla jiñi ch'ujul bʌ i Templo Dios.

¹⁸ Mach la' lon lotin la bʌ. Mi añ ti la' tojlel mu' bʌ i lon al ti' pusic'al añ ca'bʌl i ña'tʌbal ila ti pañimil, la' i q'uel i bʌ che' ma'añic chuqui yujil, cha'añ che' jiñi mi mejlel i taj wen bʌ i ña'tʌbal.

¹⁹ Come Dios mi' q'uel ti tonto i ña'tʌbal jiñi pañimil che' bajche' ts'ijbubil: “Dios mi' tsictesan lolom jach jiñi año' bʌ ca'bʌl i ña'tʌbal che' mayajax woli' melob”, che'en.

²⁰ Ts'ijbubil ja'el: “Lac Yum yujil lolom jach chuqui mi' yʌlob ti' bajñel pusic'al jiñi año' bʌ ca'bʌl i ña'tʌbal”, che'en.

²¹ Jiñi cha'añ mach yomic mi la' lon q'uel ti ñuc wiñicob x'ixicob, come laj la' cha'añʌch pejtelel chuqui tac añ:

²² mi Pablo, mi Apolos, mi Pedro, mi jiñi pañimil yic'ot chuqui woli' yujtel wʌle yic'ot chuqui mi' caj ti ujtel che' cuxuletla yic'ot che' mi la' chʌmel, laj la' cha'añʌch.

²³ Jatetla i cha'añetla Cristo. Jiñi Cristo i cha'añʌch Dios.