1 Corintios 2 - Jiñi Tsiji' bʌ Wen T'añ cha'añ Estudio

Mi' sujbel Cristo tsa' bʌ ch'ijle ti cruz

¹ Jiñi cha'añ quermañujob, che' bʌ tsa' c'otiyon ba'añetla ma'añic tsa' c pejcayetla ti to'ol ch'ejl jach bʌ t'añ yic'ot c bajñel ña'tʌbal che' bʌ tsa' c su'beyetla i t'añ Dios,

² come tsa' cʌlʌ tic pusic'al ma'añic chuqui mi caj c ña'tan ti la' tojlel, cojach Jesucristo tsa' bʌ ch'ijle ti cruz.

³ Che' bʌ ya'añon yic'otetla wen c'uñon jax, wen tsiltsilñayon cha'añ bʌq'uen.

⁴ Che' bʌ tsa' c cha'le t'añ yic'ot che' bʌ tsa' c cha'le subt'añ, ma'añic tsa' j c'ʌñʌ c bajñel t'añ tilem jach bʌ tic ña'tʌbal, pero jiñʌch jiñi Espíritu tsa' bʌ i pʌsʌ i p'ʌtʌlel,

⁵ cha'añ che' jiñi, la' xuc'tʌlel mach ch'oyolic ti wiñicob x'ixicob, pero ch'oyolʌch ti' p'ʌtʌlel Dios.

I tsictesʌbal i yEspíritu Dios

⁶ Mic su'b lojon i ña'tʌbal Dios ti' tojlelob jiñi tsa'ix bʌ i ch'ʌmbeyob isujm i t'añ Dios, ma'añic mic su'b lojon i ña'tʌbal pañimil, mi jiñic jax i ña'tʌbal yumʌlob yujil jach bʌ jilel,

⁷ pero mic su'b lojon i ña'tʌbal Dios mach bʌ tsictiyemic ti yam bʌ ora, jiñi mucul bʌ i ña'tʌbal Dios tsa' bʌ i wʌn wa'choco che' bʌ maxto añic pañimil, cha'añ mi' yʌq'ueñonla lac ñuclel.

⁸ Jiñi yumʌlob ti pañimil ma'añic tsi' cʌñʌyob i ña'tʌbal Dios mi juntiquilic, come tsa'ic i cʌñʌyob, che' jiñi ma'añic tsi' ch'ijiyob ti cruz lac Yum am bʌ i ñuclel.

⁹ Come ts'ijbubil: “Jiñi mach bʌ q'uelbilic ti' wut wiñicob, jiñi mach bʌ u'bibilic ti' chiquin wiñicob, jiñi mach bʌ añic tsi' ña'tayob wiñicob ti' pusic'al, jiñʌch tsa' bʌ i chajpa Dios cha'añ mi yʌq'ueñob jiñi mu' bʌ i c'uxbiñob”, che'en.

¹⁰ Pero Dios tsi' laj tsictesʌbeyonla ti' p'ʌtʌlel jiñi Espíritu, come jiñi Espíritu mi' laj ch'ʌmben isujmlel jiñi wocol tac bʌ ti' ch'ʌmbentel isujm.

¹¹ Come ¿am ba juntiquil wiñic mu' bʌ mejlel i cʌmben i pusic'al yam bʌ wiñic? ¿Mach ba jiñic jach i ch'ujlel jiñi wiñic mi' ña'tan chuqui añ ti' bajñel pusic'al? Che' ja'el, ma'añic majqui mi' cʌmben i ña'tʌbal Dios, cojach i yEspíritu Dios.

¹² Ma'añic tsa' aq'uentiyonla i ña'tʌbal pañimil, pero tsa' aq'uentiyonla jiñi Espíritu ch'oyol bʌ ti Dios cha'añ mi lac ña'tan chuqui woli' yʌq'ueñonla Dios.

¹³ Jiñʌch mu' bʌ c su'b lojon, jiñi t'añ mu' bʌ c su'b lojon mach tilemic ti wiñicob ca'bʌl bʌ i ña'tʌbal ti pañimil, pero jiñi Espíritu tsi' yʌq'ueñon lojon jiñi t'añ cha'añ mic tsictesʌbeñob jiñi mu' bʌ i jac'beñob jiñi Espíritu.

¹⁴ Pero jiñi mach bʌ añic Espíritu yic'ot, ma'añic mi' ch'ʌmben isujm jiñi ch'oyol bʌ ti' yEspíritu Dios, come mi' yʌl tonto jax; mach mejlic i ch'ʌmben isujm, come cojach jiñi Espíritu mi' yʌq'ueñonla lac ch'ʌmben isujm.

¹⁵ Pero jiñi am bʌ i cha'añ jiñi Espíritu, mux i mejlel i laj ch'ʌmben isujm. Ma'añic majqui mi' cʌmben i pusic'al jiñi wiñic.

¹⁶ ¿Majqui tsi' cʌmbe i ña'tʌbal lac Yum? ¿Majqui mi caj i cʌntesan? Pero joñonla añ lac cha'añ i ña'tʌbal Cristo.