1 Corintios 16 - Jiñi Tsiji' bʌ Wen T'añ cha'añ Estudio

I YUJTIBAL T'AÑ ( 16.1-24 ) Ofrenda cha'añ i coltʌntel i cha'año' bʌ Dios

¹ Cha'añ jiñi ofrenda mu' bʌ la' tempan cha'añ i coltʌntel i cha'año' bʌ Dios, jatetla melela che' bajche' tsa' c su'beyob jiñi xñopt'añob mu' bʌ i tempañob i bʌ ya' ti Galacia.

² Ti jiñi ñaxan bʌ q'uiñ ti jujump'ejl semana, ti jujuntiquiletla, parte yom mi la' wʌc' lamital la' taq'uiñ tsa' bʌ la' taja ti la' we'tel mi oñ o mi mach oñic, lotola, cha'añ tempʌbilix che' mij c'otel ba'añetla.

³ Che' c'otemoñix mi caj c choc majlel wiñicob año' bʌ i cha'añ carta ba' mi' tsictesan cha'añ yajcʌbilobʌch cha'añ jiñi mi' ch'ʌmob majlel jiñi ofrenda ya' ti Jerusalén.

⁴ Mi wersa yom mic majlel ja'el, mi' mejlel c majlel yic'otob.

Baqui tsi' ña'ta majlel Pablo

⁵ Yom mic ñumel ti Macedonia, che' bʌ tsa'ix ñumiyon ya'i, mi caj majlel c jula'tañetla.

⁶ Tic'ʌl ya' mic poj cʌytʌl ba'añetla cha'añ mic ñusan i yorajlel tsʌñal, cha'añ mi la' majlel quic'ot ya' baqui mic majlel.

⁷ Come mach comic che' orajach mic ñumel ba'añetla, com poj jalijel quic'otetla mi che' yom lac Yum.

⁸ Mi caj j cʌytʌl ti Éfeso c'ʌlʌl ti' yorajlel i q'uiñilel Pentecostés.

⁹ Come tsa' jambentiyon colem puerta ba' mi mejlel c wen cha'len e'tel anquese ca'bʌl j contrajob.

¹⁰ Mi tsa' c'oti Timoteo, ch'ʌmʌla ti la' wenta cha'añ mi' yajñel ti uts'at la' wic'ot, come mi' cha'len i ye'tel lac Yum lajal bajche'on.

¹¹ Jiñi cha'añ, mach yomic mi la' q'uel ti lolom mi juntiquileticla, yom mi la' coltañ cha'añ mi' cha' sujtel tilel ti' ñʌch'tʌlel i pusic'al wʌ' ba'añon, come woli c pijtan yic'ot yaño' bʌ la quermañujob.

¹² Cha'añ jiñi la quermañu Apolos, ca'bʌl tsa' c su'be ti wocol t'añ cha'añ mi' majlel yic'ot la quermañujob ya' ba'añetla pero ma'añic tsi' jac'ʌ majlel; pero mi caj i majlel ba'añetla che' mi tajben i yorajlel.

I yujtibal i yutslel i t'añ

¹³ Yom yʌxʌl la' woj, yom chʌn xuc'ul la' pusic'al mi la' ñop, yom mi la' ch'ejl-esan la' bʌ yic'ot yom mi la' p'ʌt-esan la' bʌ.

¹⁴ Ti pejtelel chuqui tac mi la' mel, melela yic'ot c'uxbiya.

¹⁵ La' wujil quermañujob, jiñi ñaxaño' bʌ tsa' bʌ i ñopoyob Dios ya' ti Acaya, jiñobʌch Estéfanas yic'ot jiñi año' bʌ ti' yotot, tsa'ix i yʌc'ʌyob i bʌ cha'añ mi' coltañob i cha'año' bʌ Dios.

¹⁶ Mic su'beñetla ti wocol t'añ, cha'añ mi la' wotsan la' bʌ yic'otob jiñi mu' bʌ i melob che' bajche' jiñi, pejtelel mu' bʌ i cha'leñob e'tel cha'añ mi' coltañ i cha'año' bʌ Dios.

¹⁷ Tijicñayon cha'añ tsa' tili Estéfanas yic'ot Fortunato yic'ot Acaico, come uts'at che' wʌ' añob jiñi uxtiquil anquese mach wʌ'ic añetla,

¹⁸ come tsi' ñuq'uesʌbeyoñob c pusic'al yic'ot la' pusic'al ja'el. Q'uelela ti ñuc jiñi wiñicob mu' bʌ i melob che' bajche' jiñi.

¹⁹ Jiñi xñopt'añob mu' bʌ i tempañob i bʌ ti Asia mi' yʌq'ueñetla cortesía. Che' ja'el Aquila yic'ot Priscila yic'ot jiñi xñopt'añob mu' bʌ i tempañob i bʌ ti' yotot, mi' wen aq'ueñetla cortesía ti lac Yum.

²⁰ Ti pejtelel la quermañujob mi' yʌq'ueñetla cortesía. Che' mi la' wʌq'uen la' bʌ cortesía ts'ujts'un la' bʌ ti' sʌclel la' pusic'al.

²¹ Joñon Pablojon woli c ts'ijbubeñetla ili cortesía tij c'ʌb.

²² Jiñi mach bʌ añic mi' c'uxbin lac Yum Jesucristo la' chojquic ti Dios. ¡Tal lac Yum!

²³ La' ajñic i yutslel i pusic'al lac Yum Jesucristo la' wic'ot.

²⁴ Mij c'uxbiñetla ti la' pejtelel ti Cristo Jesús. [Amén.]