1 Corintios 13 - Jiñi Tsiji' bʌ Wen T'añ cha'añ Estudio

¹ Muq'uic c cha'len t'añ ti' t'añ tac wiñicob yic'ot ti' t'añ ángelob, mi ma'añic j c'uxbiya, tsintsiñayon bajche' tsucul taq'uiñ, lajalon bajche' campana mu' bʌ i jajts'el.

² Añic j c'ʌjñibal ti subt'añ yic'ot c ña'tʌbal ti pejtelel isujmlel mach bʌ tsictiyemic ti yam bʌ ora, yic'ot pejtelel ña'tʌbalʌl ti pañimil, muq'uic c ñop Dios ti xuc'ul bʌ c pusic'al cha'añ mic tʌts' wits, pero mi ma'añic j c'uxbiya, ma'añic j c'ʌjñibal.

³ Muq'uic c laj pucbeñob c chu'bʌañ cha'añ mic we'san jiñi p'ump'uño' bʌ, muq'uic cʌc' c bʌ ti pulel cha'añ mij coltañob, mi ma'añic j c'uxbiya, ma'añic chuqui que'tel.

⁴ Jiñi yujil bʌ c'uxbiya jal mi' cuchben i mul yaño' bʌ, wen uts i pusic'al. Jiñi yujil bʌ c'uxbiya mach tsʌytsʌyñayic i pusic'al che' mi' q'uel i wenlel i pi'ʌlob. Jiñi yujil bʌ c'uxbiya ma'añic mi' su'b i bʌ ti ñuc, ma'añic mi' chañ-esan i bʌ ti' tojlel i pi'ʌlob.

⁵ Mach lecojic i melbal, ma'añic mi' sajcan chuqui yom ti' bajñel pusic'al. Ma'añic mi' bʌc' mich'an, ma'añic mi' lot ti' pusic'al i contrajintel.

⁶ Mach tijicñayic mi' yu'bin che' añ jontolil. Pero tijicña mi' yu'bin cha'añ jiñi isujm bʌ.

⁷ Mi' ñusan pejtelel wocol, mi' ñop pejtelel chuqui tac isujm, mi' cha'len pijtaya ti' xuc'tʌlel i pusic'al, mi' cuch ti uts'at pejtelel chuqui tac mi' yujtel.

⁸ Mach jilic c'uxbiya ti pejtelel ora; mi' caj ti ujtel i c'ʌjñibal jiñi wʌn albil bʌ t'añ, mi' caj ti jilel yan tac bʌ t'añ yic'ot mi' caj ti jilel i ña'tʌbal pañimil.

⁹ Lamital cʌmbil tac lac cha'añ yic'ot lamital mi lac tsictesan ti subt'añ.

¹⁰ Pero che' mi' tilel jiñi ts'ʌcʌl bʌ, che' jiñi mi' caj ti jilel jiñi mach bʌ ts'ʌcʌlic.

¹¹ Che' alobon to tsa' c cha'le t'añ che' bajche' alob, tsa' c ña'ta che' bajche' alob, tsa' c ch'ʌmbe isujm che' bajche' alob, pero che' bʌ tsa' ochiyon ti wiñic, tsa' j cʌyʌ c mel che' bajche' alob.

¹² Come wʌle mi lac yʌxña q'uel Cristo che' bajche' ti espejo, pero che' mi' tilel mi caj laj q'uelben i wut. Wʌle woli c yʌxña cʌn, pero ti wi'il bʌ ora mi caj c wen cʌn che' bajche' Dios mi' cʌñon.

¹³ Wʌle añ to lac cha'añ uxchajp: I xuc'tʌlel lac pusic'al ti Dios, lac pijtaya yic'ot laj c'uxbiya. Pero jiñi ñumen ñuc bʌ jiñʌch c'uxbiya.