1 Corintios 12 - Jiñi Tsiji' bʌ Wen T'añ cha'añ Estudio

6. LAC MAJTAÑ TAC TI JIÑI ESPÍRITU ( 12.1—14.40 ) Laj c'ʌjñibal mu' bʌ i yʌq'ueñonla jiñi Espíritu

¹ Quermañujob, mach comic mi' ñajʌyel la' cha'añ isujmlel jiñi laj c'ʌjñibal tsa' bʌ aq'uentiyonla ti jiñi Espíritu.

² La' wujil che' sajtemetla tsa' pʌjyiyetla majlel ba'añ x'uma' dios tac, bajche' jach tsa' ñijcʌntiyetla.

³ Jiñi cha'añ mic su'beñetla mach cʌntesʌbilic ti' yEspíritu Dios majqui jach mi' yʌl chocbil ti Dios jiñi Jesús. Cojach jiñi cʌntesʌbil bʌ ti Ch'ujul bʌ Espíritu mi mejlel i pejcan Jesús ti' Yum.

⁴ Ti' chajp ti' chajp añ laj c'ʌjñibal tsa' bʌ aq'uentiyonla, pero juntiquil jach Espíritu.

⁵ Yic'ot ti' chajp ti' chajp añ la que'tel, pero juntiquil jach lac Yum.

⁶ Ti' chajp ti' chajp añ lac melbal, pero jiñi jach bʌ Dios mu' bʌ i ñijcañonla ti lac pejtelel.

⁷ Pero ti jujuntiquilonla aq'uebilonla laj c'ʌjñibal ti jiñi Espíritu cha'añ i wenlel pejtelelob.

⁸ Come juntiquil mi' yʌq'uentel ca'bʌl i ña'tʌbal cha'añ jiñi Espíritu cha'añ mi' su'b isujmlel jiñi t'añ. Yam bʌ mi' yʌq'uentel ca'bʌl i ña'tʌbal cha'añ jiñi jach bʌ Espíritu cha'añ mi' cha'len cʌntesa;

⁹ yam bʌ mi' yʌq'uentel i ñop Dios ti wen xuc'ul cha'añ jiñi jach bʌ Espíritu; yam bʌ mi' yʌq'uentel i c'ʌjñibal ti lajmesaya cha'añ jiñi jach bʌ Espíritu.

¹⁰ Yam bʌ mi' yʌq'uentel i pʌs i yejtal i p'ʌtʌlel Dios; yam bʌ mi' yʌq'uentel i c'ʌjñibal ti subt'añ, yam bʌ mi' yʌq'uentel i cʌn mi wen o mi jontol jiñi espíritujob, yam bʌ mi' yʌq'uentel i cha'len t'añ ti yan tac bʌ t'añ, yam bʌ mi' yʌq'uentel i ñusan isujmlel yan tac bʌ t'añ.

¹¹ Jiñi juntiquil jach bʌ Espíritu mi' yʌq'ueñonla lac mel pejtelel ili tac, ti' chajp ti' chajp mi' yʌq'ueñob i c'ʌjñibal wiñicob x'ixicob ti jujuntiquil che' bajche' yom Dios.

¹² Che' bajche' ti jump'ejl jach lac bʌc'tal, añ ca'bʌl chucbil tac bʌ, pero ti' pejtelel jiñi chucbil tac bʌ, anquese ca'bʌl, añ jach ti jump'ejl bʌc'talʌl. Che'ʌch ja'el i bʌc'tal Cristo yic'ot xñopt'añob,

¹³ come ti juntiquil jach bʌ Espíritu, che' bajche' ti ch'ʌmja' tsi' tem otsayonla ti jump'ejl jach i bʌc'tal Cristo, mi judío, mi griego, mi jiñi am bʌ ti' yum, mi jiñi mach bʌ añic ti' yum, tsa' aq'uentiyonla lac ch'ʌm jiñi jach bʌ Espíritu.

¹⁴ Come jiñi lac bʌc'tal mach junchajpic jach chuqui chucbil pero ca'bʌlʌch.

¹⁵ Jiñi la coc, mi tsi' yʌlʌ mach i cha'añic lac bʌc'tal come mach c'ʌbʌlic, ¿mach ba i cha'añic lac bʌc'tal che' jiñi?

¹⁶ Jiñi lac chiquin, mi tsi' yʌlʌ mach i cha'añic lac bʌc'tal come mach wutʌlic, ¿mach ba i cha'añic lac bʌc'tal che' jiñi?

¹⁷ Mi ti pejtelel lac bʌc'tal to'o lac wut jach añ, ¿bajche' mi la cu'bin t'añ che' jiñi? Mi ti pejtelel lac bʌc'tal to'o lac chiquin jach añ, ¿bajche' mi mejlel lac sic'?

¹⁸ Ti' chajp ti' chajp tsi' tempa Dios jiñi chucul tac bʌ ti lac bʌc'tal che' bajche' yom i pusic'al.

¹⁹ Mi to'ol c'ʌbʌl jach pejtelel lac bʌc'tal, ¿bajche' añ lac bʌc'tal che' jiñi?

²⁰ Pero isujm añ ca'bʌl chucul tac bʌ ti lac bʌc'tal anquese jump'ejl jach lac bʌc'tal.

²¹ Jiñi lac wut mach mejlic i su'ben laj c'ʌb ma'añic i c'ʌjñibal. Che' ja'el lac jol mach mejlic i su'ben la coc ma'añic i c'ʌjñibal.

²² Pero jiñi chucul tac bʌ ti lac bʌc'tal mach bʌ p'ʌtʌlic yilal, ñumen añ i c'ʌjñibal.

²³ Jiñi chucul tac bʌ ti lac bʌc'tal mach bʌ bej uts'atic mi laj q'uel, ñumen mi la cʌq'uen i t'ojlʌwib; jiñi mach bʌ i t'ojolic ti q'uelol mi lac mos ti pisil.

²⁴ Jiñi i t'ojol bʌ ti q'uelol ma'añic chuqui yom mi' yʌq'uentel. Che' bʌ tsi' tempa lac bʌc'tal Dios, tsi' yʌq'ue ñumen i c'ʌjñibal jiñi mach bʌ ñuquic ti q'uelol.

²⁵ Che' jiñi, ma'añic mi' contrajiñob i bʌ jiñi chucul tac bʌ ti lac bʌc'tal, mi' tem cʌntañob i bʌ.

²⁶ Mi tsi' taja wocol jump'ejl chucul bʌ ti lac bʌc'tal, mi la cu'bin i c'uxel ti pejtelel lac bʌc'tal, mi tsi' taja i ñuclel jump'ejl chucul bʌ ti lac bʌc'tal, tijicña mi la cu'bin ti pejtelel lac bʌc'tal.

²⁷ Jatetla i bʌc'taletla Cristo, ti jujuntiquiletla ochemetla ti' bʌc'tal Cristo.

²⁸ Dios tsi' wa'choco ti' tojlel xñopt'añob, ñaxan jiñi apóstolob, wi'il subt'añob, wi'il xcʌntesajob, wi'il jiñi mu' bʌ i pʌsob i yejtal i p'ʌtʌlel Dios, yic'ot jiñi am bʌ i c'ʌjñibal ti ts'ʌcaya, yic'ot jiñi am bʌ i c'ʌjñibal ti coltaya, yic'ot jiñi am bʌ i ye'tel ti yumʌl, yic'ot jiñi mu' bʌ i cha'leñob t'añ ti yan tac bʌ t'añ.

²⁹ ¿Apóstolob ba ti pejtelelob? ¿Subt'añob ba ti pejtelelob? ¿Xcʌntesajob ba ti pejtelelob? ¿Mu' ba i pʌsob i yejtal i p'ʌtʌlel Dios ti pejtelelob?

³⁰ ¿Am ba i c'ʌjñibal ti ts'ʌcaya ti pejtelelob? ¿Mu' ba i cha'leñob t'añ ti yan tac bʌ t'añ ti pejtelelob? ¿Mu' ba i loc'beñob isujmlel yan tac bʌ t'añ ti pejtelelob?

³¹ Pero cha'lenla wersa la' taj jiñi ñumen wen bʌ la' c'ʌjñibal. Mi caj c pʌsbeñetla jump'ejl bij ñumen ts'ʌcʌl bʌ.