1 Corintios 10 - Jiñi Tsiji' bʌ Wen T'añ cha'añ Estudio

Tic'ojel cha'añ i ch'ujutesʌntel dios te'

¹ Quermañujob, mach comic mi' ñajʌyel ti la' pusic'al bajche' tsa' ajñiyob pejtelel lac ñojte'el che' bʌ tsi' toj-esayob majlel Dios ti tocal, ti pejtelelob tsa' ñumiyob majlel ti yojlil mar;

² ti' pejtelelob tsa' aq'uentiyob ch'ʌmja' ti tocal yic'ot ti' pejtelelob tsa' ñumiyob ti mar.

³ Ti pejtelelob tsi' c'uxuyob jiñi jach bʌ we'elʌl,

⁴ yic'ot ti pejtelelob tsi' japʌyob ja' aq'uebilo' bʌ ti Dios, come tsi' japʌyob ja' loq'uem bʌ ti jiñi Xajlel tsa' bʌ i cha'le xʌmbal majlel yic'otob. Jiñi Xajlel jiñʌch Cristo.

⁵ Pero ca'bʌl lac ñojte'el mach uts'atobic ti' wut Dios, jiñi cha'añ tsa' chʌmiyob ti colem bʌ i tiquiñal pañimil.

⁶ Che'ʌch tsa' ujti cha'añ mi laj cʌñ chuqui mach weñic, cha'añ ma'añic mi lac mulan jontolil che' bajche' tsi' mulayob.

⁷ Mach la' ch'ujutesan dios tac melbil bʌ, che' bajche' yaño' bʌ, come ts'ijbubil: “Jiñi wiñicob x'ixicob tsa' buchleyob cha'añ mi' cha'leñob we'el uch'el, ti wi'il tsa' ch'ojyiyob ti son”, che'en.

⁸ Mach yomic mi la' cha'len ts'i'lel che' bajche' tsi' cha'leyob lamital, tsa' chʌmiyob uxp'ejl i cha'c'al ti mil ti jump'ejl jach q'uiñ.

⁹ Yic'ot ja'el mach yomic mi la quilʌben i pusic'al lac Yum che' bajche' tsi' cha'leyob lamital, tsa' jisʌntiyob ti lucum tac.

¹⁰ Mach la' cha'len wulwul t'añ ti la' pusic'al che' bajche' tsi' cha'leyob jiñi tsa' bʌ jisʌntiyob cha'añ jiñi Ángel yujil bʌ tsʌnsa.

¹¹ Che'ʌch tsa' ujtiyob cha'añ laj cʌntesʌntel, tsa' ts'ijbunti cha'añ lac tic'ol joñonla cuxulonto bʌ la ti ili ora che' lʌc'ʌlix i jilibal.

¹² Jiñi cha'añ jiñi mu' bʌ i q'uel i bʌ ti xuc'ul, la' i cʌntan i bʌ ame yajlic.

¹³ Ma'añic mi junchajpic la' pʌyol ti mulil mach bʌ añic tsi' yu'biyob yaño' bʌ, pero xuc'ul i pusic'al Dios, ma'añic mi' yʌq'ueñetla la' taj la' pʌyol ti mulil mach bʌ mejlic la' cuch; che' mi la' pʌjyel ti mulil, Dios mi' yʌq'ueñetla la' p'ʌtʌlel cha'añ mi la' cuch, che' jiñi mi mejlel la' loq'uel ba' pʌybilet ti mulil.

¹⁴ Jiñi cha'añ c'uxbibilet bʌ la, mach yomic mi la' ch'ujutesan dios tac melbil bʌ.

¹⁵ Che'ʌch mic pejcañetla, come mi la' ña'tan pañimil, ña'tanla bajche' yom mi la' jac'.

¹⁶ Che' mi lac tem ch'ʌm jiñi vaso che' mi lac su'ben Dios wocolix i yʌlʌ, ¿mach ba wolic lac tem taj lac wenlel ti' ch'ich'el Cristo? Che' mi lac tem c'ux jiñi waj mu' bʌ lac xut', ¿mach ba wolic lac tem taj lac wenlel ti' bʌc'tal Cristo?

¹⁷ Anquese ca'bʌlonla, lajalonla bajche' junq'uejl waj, jump'ejl i bʌc'talonla Cristo, come ti pejtelelonla mi laj c'ux jiñi junq'uejl waj.

¹⁸ Ña'tanla bajche' mi' melob israelob. Jiñi mu' bʌ i c'uxob jiñi we'elʌl mu' bʌ i yʌq'ueñob Dios ti' majtañ, ¿mach ba muq'uic i tem tajob i wenlel ti' tojlel pulʌntib?

¹⁹ ¿Chuqui isujmlel c t'añ, che' jiñi? ¿Am ba i c'ʌjñibal dios tac melbil bʌ? ¿Am ba i c'ʌjñibal jiñi aq'uebil bʌ dios tac melbil bʌ?

²⁰ Pero jiñi sajtemo' bʌ, che' mi' yʌc'ob i majtañ ti pulʌntib, woli' yʌq'ueñob xi'bajob, ma'añic mi' yʌq'ueñob Dios, mach comic mi la' tem ajñel yic'ot xi'bajob.

²¹ Mach mejlic mi la' jap ti' vaso lac Yum mi woli la' jap ti' vaso xi'bajob; mach mejlic la' c'ux waj ti' mesa lac Yum mi woli la' c'ux waj ti' mesa xi'bajob.

²² ¿Mu' ba lac techben i mich'ajel lac Yum? ¿Ñumen p'ʌtʌlon ba la bajche' lac Yum?

Melela chuqui tac wen cha'añ mi' tsictiyel i ñuclel Dios

²³ Pejtelel jiñi la com bʌ lac mel mi mejlel lac mel, pero mach uts'atic mi tsa' lac mele ti pejtelel; come ma'añic i c'ʌjñibal ti pejtelel cha'añ mi' xuc'chocoñonla.

²⁴ Mach i lon sʌclan i bajñel wenlel mi juntiquilic, la' i ña'tan i wenlel yaño' bʌ.

²⁵ C'uxula jiñi mu' bʌ i choñob ti choño we'elʌl, mach la' c'ajtibeñob mi aq'uebilix dios tac melbil bʌ, ame tejchic t'añ ti la' pusic'al.

²⁶ Come i cha'añ lac Yum jiñi lum yic'ot pejtelel i bʌl.

²⁷ Mi tsi' pʌyʌyetla ti' yotot jiñi mach bʌ wolic i ñop Dios, cucula mi la' wom majlel, c'uxula chuqui tac mi' yʌq'ueñetla, mach la' c'ajtiben mi aq'uebil dios tac melbil bʌ, ame tejchic t'añ ti la' pusic'al.

²⁸ Pero mi añ majqui mi' su'beñetla: Tsa'ix aq'uenti dios tac melbil bʌ, mi che'en, mach mi la' c'ux ame tejchic t'añ ti' pusic'al jiñi tsa' bʌ i su'beyetla, [jiñi lum i cha'añʌch lac Yum yic'ot pejtelel i bʌl.],

²⁹ woli c taj ti' t'añ i pusic'al jiñi yaño' bʌ, mach a pusic'alic. ¿Chucoch mi' q'uejlel ti mulil jiñi mu' bʌ c mel ti jump'ejl c pusic'al che' woli ti t'añ i pusic'al yam bʌ?

³⁰ Mi tsa' j c'uxu ti' yutslel c pusic'al, ¿chucoch mi j q'uejlel ti xmulil cha'añ jiñi tsa' bʌ j c'uxu che' bʌ tsa' c su'be Dios wocolix i yʌlʌ?

³¹ Mi añ chuqui mi la' c'ux, che' jiñi, mi añ chuqui mi la' jap, mi añ yam bʌ chuqui mi la' mel, melela ti pejtelel cha'añ mi' tsictiyel i ñuclel Dios.

³² Mach mi la' wʌc' ti yajlel judíojob, mi gentilob, mi xñopt'añob i cha'año' bʌ Dios.

³³ Joñon ja'el woli c ñop c mel chuqui uts'at ti' wut pejtelel wiñicob ti pejtelel chuqui mic mel, ma'añic mic sʌclan c bajñel wenlel, mic sʌclan i wenlel yaño' bʌ cha'añ mi' coltʌntelob ca'bʌlob.