Numeros 9 - Jiñi Tsiji' bʌ Wen T'añ cha'añ Estudio

I q'uiñilel Pascua

¹ Lac Yum tsi' pejca Moisés ya' ti colem bʌ i tiquiñal lum i c'aba' Sinaí, che' ti ñaxan bʌ uw che' wolix i tejchel i cha'p'ejlel ja'b i loq'uelob ti Egipto, tsi' su'be:

² “Jiñi israelob mi caj i chajpañob i q'uiñilel Pascua che' ti yorajlel tac.

³ Mi caj la' mel che' ti' chʌnlujump'ejlel q'uiñ (14) ti jiñi ñaxan bʌ uw che' ti ic'ajel, che' mi' c'otel tac i yorajlel; mi caj la' mel che' bajche' yom melol yic'ot che' bajche' añ jiñi mandar cha'añ i q'uiñilel Pascua.”

⁴ Jiñi cha'añ Moisés tsi' su'be israelob cha'añ mi' chajpañob i q'uiñilel jiñi Pascua.

⁵ Tsi' meleyob jiñi q'uiñijel ya' ti colem bʌ i tiquiñal lum i c'aba' Sinaí che' ti' chʌnlujump'ejlel (14) q'uiñ ti jiñi ñaxan bʌ uw che' wolix i yic'an; che'ʌch tsi' meleyob jiñi israelob che' bajche' lac Yum tsi' yʌq'ue mandar Moisés.

⁶ Pero añob cha'tiquil uxtiquil bi'bi'o' bʌ cha'añ tsi' tʌlʌyob xchʌmel, jiñi cha'añ ma'añic tsa' mejli i melob i q'uiñilel Pascua ti jiñi bʌ ora. Jiñi wiñicob, ti jiñi jach bʌ q'uiñ tsa' c'otiyob ba'añ Moisés yic'ot Aarón,

⁷ tsi' yʌlʌyob: —Joñon lojon bi'bi'on lojon cha'añ tsa' c tʌlʌ lojon xchʌmel. ¿Chucoch tic'bilon lojon cha'añ mi cʌq'uen lojon i majtañ lac Yum che' i yorajlelix woli i yʌc'ob pejtelel israelob?

⁸ Moisés tsi' jac'beyob: —Pijtanla, mu' to caj cu'bin chuqui mi yʌl lac Yum cha'añetla.

⁹ Che' jiñi lac Yum tsi' su'be Moisés:

¹⁰ “Pejcan jiñi israelob, su'beñob: Mi añ jatetla o la' walobilob bi'bi' cha'añ tsa' ajñi ba'añ xchʌmel, o mi ñajt añob ti xʌmbal che' ti' yorajlel, muc'ʌch i mejlel i melob i q'uiñilel Pascua tic tojlel.

¹¹ Mi caj i melob che' ti' chʌnlujump'ejlel q'uiñ che' ti' cha'p'ejlel uw, che' ti ic'ajel; mi caj i c'uxob jiñi tʌñʌme' yic'ot waj mach bʌ añic i levadurajlel yic'ot ch'aj bʌ pimel.

¹² Mach yomic mi la' cʌyben i bʌc'tal jiñi we'elʌl cha'añ mi' c'uxtʌl ti yijc'ʌlal. Mach yomic mi' c'ʌsbentel i bʌquel. Che'ʌch yom mi' melob i q'uiñilel Pascua che' bajche' yom melol.

¹³ Pero mi añ wiñic mu' bʌ i to'ol cʌy i bʌ che' sʌcʌch, che' ma'añic ba' tsa' majli cha'añ jach mach yomic i mel i q'uiñilel Pascua, che' jiñi mi caj i chojquel loq'uel ti' tojlel c tejclumob. Añ ti' wenta i mul jiñi wiñic come ma'añic tsi' yʌc'ʌ i bʌ che' bajche' ofrenda che' ti' yorajlel mi' cha'leñob q'uiñijel tic tojlel.”

¹⁴ “Mi añ wiñic chumul bʌ la' wic'ot mach bʌ i lumalic, mi mux i mel Pascua ja'el, lajal yom mi' melob che' bajche' jatetla, cha'añ junsujm jach jiñi q'uiñijel mi la' mel yic'ot jiñi xjula'ob yic'ot jiñi ya'ʌch bʌ chumulob la' wic'ot.”

Jiñi tocal ti' pam Tabernáculo

¹⁵ Ti jiñi jach bʌ q'uiñ che' bʌ tsa' ujti i wa'chocoñob jiñi Tabernáculo, jiñi tocal tsi' moso jiñi Tabernáculo. Che' ti ic'ajel chʌcxowan tsi' pʌsʌ i bʌ che' bajche' c'ajc ya' ti' pam jiñi Tabernáculo c'ʌlʌl ti sʌc'ajel.

¹⁶ Che'ʌch tsa' ajñi ti pejtelel ora: jiñi tocal tsi' moso ti q'uiñil, pero che' ti ac'ʌlel chʌcxowan tsi' pʌsʌ i bʌ che' bajche' c'ajc.

¹⁷ Pero che' bʌ tsa' caji ti letsel majlel jiñi tocal am bʌ ya' ti' pam jiñi Tabernáculo, jiñi israelob tsi' techeyob i xʌmbal; ya' ba' tsa' wa'le jiñi tocal, ya' tsa' wa'leyob ja'el, ya'i tsi' wa'chocoyob jiñi pisil bʌ otot tac.

¹⁸ Lac Yum tsi' su'beyob baqui ora yom mi' techob i xʌmbal, yic'ot lac Yum tsi' su'beyob baqui ora yom mi' cʌyob i xʌmbal cha'añ mi' wa'chocoñob pisil bʌ i yotot; che' bajche' jayp'ejl q'uiñ ya'añ jiñi tocal ti' pam jiñi Tabernáculo, ya'ʌch yom mi yajñelob.

¹⁹ Che' bʌ tsa' jal-a ca'bʌl q'uiñ jiñi tocal ya' ti' pam jiñi Tabernáculo, che' jiñi, jiñi israelob tsi' meleyob che' bajche' tsi' yʌc'ʌ i t'añ lac Yum, ma'añic tsi' cha'leyob xʌmbal.

²⁰ Yic'ot che' bʌ cha'p'ejl uxp'ejl jach q'uiñ ya'añ jiñi tocal ya' ti' pam jiñi Tabernáculo, ti' t'añ lac Yum tsa' chumleyob yic'ot ti' t'añ lac Yum tsi' cha' techeyob i xʌmbal.

²¹ Che' bʌ jiñi tocal tsi' cʌyʌ i xʌmbal ti ic'ajel c'ʌlʌl ti sʌc'ajel, che' ti sʌc'ajel jiñi tocal tsi' cha' teche i xʌmbal, jiñi israelob tsi' techeyob i xʌmbal ja'el; mi jump'ejl jach q'uiñ ya'añ jiñi tocal, mi ti ac'ʌlel tsa' cha' caji ti xʌmbal, jiñi israelob mi' cha' techob i xʌmbal ja'el.

²² Mi cha'p'ejl q'uiñ, mi jump'ejl uw, mi jump'ejl ja'b ya'añ jiñi tocal ti' pam jiñi Tabernáculo, ya' tsa' jal-ayob jiñi israelob ti' t'ejl jiñi Tabernáculo, ma'añic tsi' ñijcayob i bʌ. Pero che' bʌ tsa' caji ti xʌmbal jiñi tocal, tsa' cajiyob ti xʌmbal ja'el jiñi israelob.

²³ Ti' mandar lac Yum tsa' jal-ayob yic'ot ti' mandar lac Yum tsi' techeyob i xʌmbal. Che'ʌch tsi' jac'beyob i mandar lac Yum jiñi israelob, che' bajche' lac Yum tsi' wʌn su'be Moisés.