Numeros 8 - Jiñi Tsiji' bʌ Wen T'añ cha'añ Estudio

Aarón mi' ts'ʌ'b jiñi c'ajc tac

¹ Lac Yum tsi' pejca Moisés, tsi' su'be:

² “Yom ma' pejcan Aarón, su'ben: Che' bʌ ma' ts'ʌ'b jiñi c'ajc am bʌ wucp'ejl i yajñib, yom mi' pʌs i c'ʌc'al ti' tojel a wut”.

³ Che'ʌch tsi' mele Aarón: Tsi' ts'ʌ'bʌ jiñi c'ajc tac tsolol bʌ ti' yajñib, che' bajche' tsi' su'be Moisés jiñi lac Yum.

⁴ I yajñib jiñi c'ajc tac, melbil ti puro oro yic'ot jats'bil ti martillo c'ʌlʌl ti yoc yic'ot c'ʌlʌl ba' jaxʌl i xʌc' tac. Che' bajche' lac Yum tsi' pʌsbe Moisés, che'ʌch tsa' mejli i yajñib jiñi c'ajc tac.

I sʌc-esʌntel jiñi levijob

⁵ Lac Yum tsi' pejca Moisés, tsi' su'be:

⁶ “Pʌyʌ loq'uel jiñi levijob ti' tojlel israelob cha'añ ma' sʌc-esañob.

⁷ Jiñʌch bajche' mi caj a sʌc-esañob: tsijcañob ti jiñi ja' cha'añ i ñusʌntel mulil yic'ot ac'ʌ ti jujchintel i tsutsel i bʌc'tal; mi caj i wuts'ob i pislel, che' jiñi sʌc-esʌbilobix.

⁸ Ti wi'il mi caj i pʌyob tilel juncojt tat wacax, yic'ot majtañʌl bʌ harina wen chʌmeñ bʌ juch'bil xajc'ubil bʌ yic'ot olivo aceite, ixcu jatet mi caj a pʌy tilel yam bʌ tat wacax cha'añ i ñusʌntel mulil.

⁹ Mi caj a pʌyob tilel jiñi levijob ti Tabernáculo ba' mi la' tempan la' bʌ, yic'ot mi caj a tempan pejtelel israelob.

¹⁰ Che' bʌ tsa'ix a pʌyʌ tilel jiñi levijob tic tojlel, jiñi israelob mi caj i sʌts'ob i c'ʌb ti' tojlel jiñi levijob.

¹¹ Che' jiñi, jiñi Aarón mi caj i yʌc' jiñi levijob ti' wenta lac Yum che' bajche' majtañʌl mu' bʌ i yʌc'ob israelob, che' jiñi mi caj i melbeñoñob que'tel.

¹² Ti wi'il jiñi levijob mi caj i yʌc'ob i c'ʌb ya' ti' jol jiñi cha'cojt tat wacax: Juncojt mi caj a wʌc' cha'añ i ñusʌntel mulil, jiñi yam bʌ mi caj a pulbeñon tic majtañ, cha'añ mi' ñusʌbentelob i mul jiñi levijob.

¹³ Ti wi'il mi caj a wʌc'ob jiñi levijob ti' tojlel Aarón yic'ot i yalobilob, cha'añ ma' wʌc'ob che' bajche' c majtañ.

¹⁴ Che'ʌch mi caj a pʌy loq'uel jiñi levijob ti' tojlel israelob, che' jiñi c cha'añobix mi' cʌytʌl jiñi levijob.

¹⁵ Ti wi'il mi caj i yochelob jiñi levijob cha'añ mi' cha'leñob e'tel ti jiñi Tabernáculo ba' mi la' tempan la' bʌ. Che' bʌ sʌc-esʌbilobix, mi caj a wʌq'ueñon che' bajche' c majtañ.

¹⁶ Come ti' pejtelelob jiñi levijob c cha'añobʌch, i q'uexolobʌch ñaxan bʌ alʌlob tsa' bʌ i yilayob pañimil ti' tojlel israelob; tsa' c pʌyʌ jiñi levijob cha'añ mi' yajñelob tic tojlel i wenta jiñi ñaxan bʌ alʌlob ti Israel.

¹⁷ Come c cha'añobʌch pejtelel ñaxan bʌ i yalobilob israelob yic'ot ñaxan bʌ i yal alʌc'ʌl tac; c'ʌlʌl ti jiñi q'uiñ che' bʌ tsa' c tsʌnsa pejtelel jiñi ñaxan bʌ alʌlob ti' lumal Egipto, tsa' c sʌc-esayob cha'añ mi' yajñelob tic tojlel.

¹⁸ Jiñi cha'añ c cha'añobʌch pejtelel jiñi levijob, i q'uexolobʌch pejtelel jiñi ñaxan bʌ i yalobilob israelob.

¹⁹ Joñon tsa' cʌc'ʌyob jiñi levijob ti' wenta Aarón yic'ot i yalobilob che' bajche' i majtañob cha'añ mi' cha'leñob e'tel ti jiñi Tabernáculo ba' mi la' tempan la' bʌ yic'ot cha'añ mi yʌq'ueñoñob c majtañ tac cha'añ i mul israelob, cha'añ ma'añic mi' tajob wocol jiñi israelob che' ba' ora mi' lʌc'tesañob i bʌ ti jiñi Ch'ujul bʌ Ajñibʌl.”

²⁰ Jiñi Moisés yic'ot Aarón yic'ot pejtelel jiñi israelob, tsi' melbeyob jiñi levijob che' bajche' tsi' yʌc'ʌ mandar lac Yum ti' tojlel Moisés; che'ʌch tsa' melbentiyob jiñi levijob ti' tojlel israelob.

²¹ Jiñi levijob tsi' sʌc-esayob i bʌ yic'ot tsi' wuts'uyob i pislel. Ti wi'il Aarón tsi' yʌc'ʌyob che' bajche' i majtañ lac Yum, yic'ot tsi' tsʌnsa tat wacax cha'añ mi' sʌc-esʌntelob.

²² Ti wi'il tsa' cajiyob ti tilel jiñi levijob cha'añ mi' melob i ye'tel ti jiñi Tabernáculo ba' mi' tempañob i bʌ ti' tojlel Aarón yic'ot ti' tojlel i yalobilob. Che' bajche' tsi' yʌc'ʌ mandar lac Yum ti' tojlel Moisés cha'añ jiñi levijob, che'ʌch tsi' meleyob.

²³ Ti wi'il tsi' pejca lac Yum Moisés, tsi' su'be:

²⁴ “Che' añix jo'p'ejl i cha'c'al (25) i ja'bilel jiñi levijob, mi caj i yochelob i melob i ye'tel ya' ti Tabernáculo ba' mi la' tempan la' bʌ.

²⁵ Jinto che' añix lujump'ejl i yuxc'al (50) i ja'bilel mux i cʌyob i ye'tel, ma'añix ba' ora mi' chʌn cha'len i ye'tel.

²⁶ Mi' mejlel i coltañ i pi'ʌlob ti cʌntaya ti jiñi Tabernáculo ba' mi la' tempan la' bʌ, pero ma'añix mi' chʌn mel i ye'tel. Che'ʌch mi caj a mel ti' tojlel jiñi levijob cha'añ i ye'tel.”