Numeros 7 - Jiñi Tsiji' bʌ Wen T'añ cha'añ Estudio

Majtañʌl cha'añ i yʌc'ol ti' wenta Dios jiñi pulʌntib

¹ Che' bʌ tsa'ix ujti i wa'chocon Moisés jiñi Tabernáculo, tsi' tsijca ti olivo aceite, tsi' sʌc-esa yic'ot pejtelel jiñi mu' bʌ i c'ʌjñel tac, che'ʌch tsi' tsijca ja'el jiñi pulʌntib yic'ot tsi' sʌc-esa pejtelel chuqui tac mi' c'ʌjñel.

² Che' jiñi, pejtelel jiñi ñuc taco' bʌ i ye'tel ti' tojlel israelob, jiñi yumʌlob ti' mojt ti' mojt tsa' bʌ i cha'leyob coltaya ti' chajpʌntel jiñi lista tac, tsi' lʌc'tesayob i bʌ,

³ tsi' ch'ʌmʌyob tilel majtañʌl tac ti' tojlel lac Yum: Wʌcp'ejl carreta tac yic'ot lajchʌncojt tat wacax; ti cha'cha'tiquil yumʌlob tsi' yʌc'ʌyob jump'ejl carreta yic'ot ti jujuntiquil tsi' yʌc'ʌyob jujuncojt tat wacax, tsi' yʌc'ʌyob ti' wenta lac Yum ya' ti Tabernáculo.

⁴ Lac Yum tsi' pejca Moisés, tsi' su'be:

⁵ “Yom ma' ch'ʌmbeñob jiñi majtañʌl cha'añ mi' c'ʌjñel ya' ti Tabernáculo ba' mi la' tempan la' bʌ. Aq'ueñob i c'ʌn jiñi levijob che' bajche' añob i ye'tel.”

⁶ Che' jiñi Moisés tsi' ch'ʌmʌ jiñi carreta tac yic'ot jiñi tat wacax, tsi' yʌq'ueyob jiñi levijob.

⁷ I yalobilob Gersón tsa' aq'uentiyob cha'cojt carreta yic'ot chʌncojt tat wacax, che' bajche' añob ti' wenta jiñi e'tel,

⁸ ixcu i yalobilob Merari tsa' aq'uentiyob chʌncojt carreta yic'ot waxʌccojt tat wacax, che' bajche' añob ti' wenta jiñi e'tel, che' bajche' tsi' su'bu ti melol Itamar, i yalobil bʌ jiñi motomaj Aarón.

⁹ Pero i yalobilob Coat ma'añic tsa' aq'uentiyob carreta tac, come añob ti' wenta cha'añ mi' q'uechob majlel ti' quejlab jiñi wen ch'ujul tac bʌ i bʌl jiñi Tabernáculo.

¹⁰ Jiñi ñuc bʌ yumʌlob tsi' ch'ʌmʌyob tilel majtañʌl tac ti jiñi jach bʌ q'uiñ che' bʌ tsa' ajq'ui ti' wenta Dios jiñi pulʌntib. Ti jujuntiquil tsi' yʌq'ueyob i majtañ lac Yum ya' ti pulʌntib.

¹¹ Lac Yum tsi' su'be Moisés: “Yom mi' yʌc'ob majtañʌl jiñi ñuco' bʌ i ye'tel, juntiquil yumʌl mi yʌc' i yofrenda ti jump'ejl q'uiñ, ti yijc'ʌlal mi yʌc' yam bʌ yumʌl, jiñʌch cha'añ i yʌc'ol ti' wenta lac Yum jiñi pulʌntib.”

¹² Jiñi yumʌl tsa' bʌ i yʌc'ʌ majtañʌl che' ti ñaxan bʌ q'uiñ jiñʌch Naasón i yalobil Aminadab, loq'uem bʌ ti' p'olbal Judá.

¹³ Jiñi ofrenda tsa' bʌ i yʌc'ʌ jiñʌch jump'ejl colem plato melbil bʌ ti sʌsʌc taq'uiñ am bʌ i yalel ti jump'ejl kilo yic'ot ojlil yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

¹⁴ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

¹⁵ yic'ot tsi' yʌc'ʌ juncojt alʌ tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b, cha'añ jiñi pulbil bʌ majtañʌl;

¹⁶ yic'ot juncojt i tat chivo cha'añ i ñusʌntel mulil;

¹⁷ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, jo'cojt tat tʌñʌme' yic'ot jo'cojt tat chivo yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Naasón i yalobil Aminadab.

¹⁸ Che' ti' cha'p'ejlel q'uiñ tsa' c'oti i yʌc' majtañʌl Natanael i yalobil Zuar, jiñʌch yumʌl ti' p'olbal Isacar.

¹⁹ Jiñi ofrenda tsa' bʌ i yʌc'ʌ jiñʌch jump'ejl colem plato melbil bʌ ti sʌsʌc taq'uiñ, am bʌ i yalel jump'ejl kilo yic'ot ojlil, yic'ot jump'ejl jarra melbil bʌ ti sʌsʌc taq'uiñ am bʌ ñumen ti ojlil kilo i yalel, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

²⁰ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

²¹ yic'ot tsi' yʌc'ʌ juncojt alʌ tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b, cha'añ jiñi pulbil bʌ majtañʌl;

²² yic'ot juncojt i tat chivo cha'añ i ñusʌntel mulil;

²³ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Natanael i yalobil Zuar.

²⁴ Che' ti' yuxp'ejlel q'uiñ jiñi Eliab i yalobil Helón, jiñi yumʌl ti' p'olbal Zabulón,

²⁵ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ am bʌ i yalel jump'ejl kilo yic'ot ojlil, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

²⁶ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

²⁷ tsi' yʌc'ʌ ja'el juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

²⁸ yic'ot juncojt i tat chivo cha'añ i ñusʌntel mulil,

²⁹ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Eliab i yalobil Helón.

³⁰ Che' ti' chʌmp'ejlel q'uiñ jiñi Elisur i yalobil Sedeur, jiñi yumʌl ti' p'olbal Rubén,

³¹ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ am bʌ i yalel jump'ejl kilo yic'ot ojlil, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti wen chʌmeñ bʌ juch'bil bʌ i ñich harina xajc'ubil bʌ yic'ot olivo aceite, cha'añ majtañʌl;

³² tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom.

³³ Tsi' yʌc'ʌ ja'el juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

³⁴ yic'ot juncojt i tat chivo cha'añ i ñusʌntel mulil;

³⁵ yic'ot jiñi majtañʌl cha'añ i ñʌch'tʌlel la' pusic'al jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Elisur i yalobil Sedeur.

³⁶ Che' ti' jo'p'ejlel q'uiñ jiñi Selumiel i yalobil Zurisadai, jiñi yumʌl ti' p'olbal Simeón,

³⁷ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ, añ i yalel jump'ejl kilo yic'ot ojlil, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

³⁸ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

³⁹ tsi' yʌc'ʌ ja'el juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁴⁰ yic'ot juncojt i tat chivo cha'añ i ñusʌntel mulil;

⁴¹ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Selumiel i yalobil Zurisadai.

⁴² Che' ti' wʌcp'ejlel q'uiñ jiñi Eliasaf i yalobil Deuel, jiñi yumʌl ti' p'olbal Gad,

⁴³ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ am bʌ i yalel jump'ejl kilo yic'ot ojlil yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

⁴⁴ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁴⁵ yic'ot tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil majtañʌl;

⁴⁶ yic'ot juncojt i tat chivo cha'añ i ñusʌntel mulil;

⁴⁷ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Eliasaf i yalobil Deuel.

⁴⁸ Che' ti' wucp'ejlel q'uiñ, Elisama i yalobil Amiud, jiñi yumʌl ti' p'olbal Efraín,

⁴⁹ tsa' tili i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ am bʌ i yalel ti jump'ejl kilo yic'ot ojlil yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti wen chʌmeñ bʌ juch'bil bʌ i ñich harina xajc'ubil bʌ yic'ot olivo aceite, cha'añ majtañʌl;

⁵⁰ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁵¹ tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁵² yic'ot juncojt i tat chivo cha'añ i ñusʌntel mulil;

⁵³ yic'ot jiñi majtañʌl cha'añ i ñʌch'tʌlel la' pusic'al jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Elisama i yalobil Amiud.

⁵⁴ Che' ti' waxʌcp'ejlel q'uiñ, jiñi Gamaliel i yalobil Pedasur, jiñi yumʌl ti' p'olbal Manasés,

⁵⁵ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ, am bʌ i yalel jump'ejl kilo yic'ot ojlil yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti wen chʌmeñ bʌ juch'bil bʌ i ñich harina xajc'ubil bʌ yic'ot olivo aceite, cha'añ majtañʌl;

⁵⁶ yic'ot junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁵⁷ yic'ot tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁵⁸ yic'ot juncojt i tat chivo cha'añ i ñusʌntel mulil;

⁵⁹ yic'ot jiñi majtañʌl cha'añ i ñʌch'tʌlel la' pusic'al jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Gamaliel i yalobil Pedasur.

⁶⁰ Che' ti' bolomp'ejlel q'uiñ, Abidán i yalobil Gedeoni, jiñi yumʌl ti' p'olbal Benjamín,

⁶¹ tsa' c'oti i yʌq'ueñ i majtañ lac Yum: Jiñʌch jump'ejl colem plato melbil bʌ ti sʌsʌc taq'uiñ am bʌ i yalel ti jump'ejl kilo yic'ot ojlil, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti wen chʌmeñ bʌ juch'bil bʌ i ñich harina xajc'ubil bʌ yic'ot olivo aceite, cha'añ majtañʌl;

⁶² yic'ot tsi' yʌc'ʌ junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁶³ yic'ot tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁶⁴ yic'ot juncojt i tat chivo cha'añ i ñusʌntel mulil;

⁶⁵ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Abidán i yalobil Gedeoni.

⁶⁶ Che' ti lujump'ejlel q'uiñ, Ahiezer i yalobil Amisadai jiñi yumʌl ti' p'olbal Dan,

⁶⁷ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ, am bʌ jump'ejl kilo yic'ot ojlil i yalel, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

⁶⁸ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁶⁹ yic'ot tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁷⁰ yic'ot juncojt i tat chivo cha'añ i ñusʌntel mulil;

⁷¹ yic'ot jiñi majtañʌl cha'añ i ñʌch'tʌlel la' pusic'al jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Ahiezer i yalobil Amisadai.

⁷² Che' ti' junlujump'ejlel q'uiñ Pagiel i yalobil Ocrán, jiñi yumʌl ti' p'olbal Aser,

⁷³ tsa' c'oti i yʌq'ueñ i majtañ lac Yum jiñʌch jump'ejl colem plato melbil bʌ ti sʌsʌc taq'uiñ, am bʌ jump'ejl kilo yic'ot ojlil i yalel, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

⁷⁴ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁷⁵ yic'ot tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁷⁶ yic'ot juncojt i tat chivo cha'añ i ñusʌntel mulil;

⁷⁷ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Pagiel i yalobil Ocrán.

⁷⁸ Che' ti' lajchʌmp'ejlel q'uiñ, Ahira i yalobil Enán, jiñi yumʌl ti' p'olbal Neftalí,

⁷⁹ tsa' c'oti i yʌq'ueñ i majtañ lac Yum: jiñʌch jump'ejl colem plato melbil bʌ ti sʌsʌc taq'uiñ, am bʌ jump'ejl kilo yic'ot ojlil i yalel, yic'ot jump'ejl jarra melbil bʌ ti sʌsʌc taq'uiñ am bʌ i yalel ñumen ti ojlil kilo, che' bajche' mi' tsijquel i yalel jiñi sʌsʌc taq'uiñ ya' ti Ch'ujul bʌ Ajñibʌl. Ti' cha'p'ejlel but'ul ti harina wen chʌmeñ bʌ juch'bil xajc'ubil bʌ yic'ot olivo aceite, cha'añ majtañʌl;

⁸⁰ tsi' yʌc'ʌ ja'el junts'ijt cuchara melbil bʌ ti oro am bʌ lujump'ejl i wʌcc'al (110) gramo i yalel, but'ul ti pom;

⁸¹ yic'ot tsi' yʌc'ʌ juncojt tat wacax, yic'ot tat tʌñʌme', yic'ot juncojt alʌ tʌñʌme' añ jaxto bʌ jump'ejl ja'b cha'añ jiñi pulbil bʌ majtañʌl;

⁸² yic'ot juncojt i tat chivo cha'añ i ñusʌntel mulil;

⁸³ yic'ot jiñi majtañʌl cha'añ i ñʌch'tʌlel la' pusic'al, jiñʌch cha'cojt tat wacax, yic'ot jo'cojt tat tʌñʌme', yic'ot jo'cojt tat chivo, yic'ot jo'cojt alʌ tʌñʌme' añ jaxto bʌ jujump'ejl ja'b. Pejtelel iliyi jiñʌch i yofrenda Ahira i yalobil Enán.

⁸⁴ Pejtelel ili majtañʌl tac jiñʌch tsa' i yʌc'ʌyob jiñi yumʌlob ti Israel che' bʌ tsa' ajq'ui ti' wenta Dios jiñi pulʌntib, jintacʌch iliyi: lajchʌmp'ejl (12) colem plato tac melbil bʌ ti sʌsʌc taq'uiñ, lajchʌmp'ejl (12) jarra melbil bʌ ti sʌsʌc taq'uiñ, lajchʌnts'ijt (12) cuchara melbil bʌ ti oro.

⁸⁵ Ti jujump'ejl plato añ tac i yalel ti jump'ejl kilo yic'ot ojlil, ti jujump'ejl jarra añ tac i yalel ñumen ti ojlil kilo; i yalel ti' pejtelel jiñi sʌsʌc taq'uiñ jiñʌch wucp'ejl i cha'c'al (27) kilo, che' bajche' mi' tsijquel i yalel ya' ti Ch'ujul bʌ Ajñibʌl.

⁸⁶ Jiñi lajchʌnts'ijt cuchara melbil bʌ ti oro but'ul bʌ ti pom, añ tac i yalel ti lujump'ejl i wʌcc'al (110) gramo ti jujunts'ijt cuchara, che' bajche' mi' tsijquel i yalel jiñi oro ya' ti Ch'ujul bʌ Ajñibʌl; ti' pejtelel jiñi cuchara tac melbil bʌ ti oro añ i yalel ti jump'ejl kilo yic'ot lujunc'al gramo.

⁸⁷ Pejtelel tsa' bʌ tsʌnsʌnti cha'añ mi' pulel jiñʌch lajchʌncojt alʌ tat wacax, yic'ot lajchʌncojt tat tʌñʌme', yic'ot lajchʌncojt alʌ tʌñʌme' añ tac bʌ jujump'ejl i ja'bilel, yic'ot yam bʌ i yofrenda yic'ot lajchʌncojt jiñi tat chivo cha'añ i ñusʌntel mulil.

⁸⁸ Pejtelel jiñi majtañʌl cha'añ i ñʌch'tʌlel la' pusic'al, jiñʌch chʌncojt i cha'c'al tat wacax yic'ot lujump'ejl i chʌnc'al tat tʌñʌme', yic'ot lujump'ejl i chʌnc'al tat chivo, yic'ot lujump'ejl i chʌnc'al alʌ tʌñʌme' am bʌ jujump'ejl i ja'bilel. Pejtelel iliyi jiñʌch majtañʌl tac tsa' bʌ aq'uenti Dios che' bʌ tsa' aq'uenti ti' wenta jiñi pulʌntib.

⁸⁹ Che' bʌ tsa' ochi Moisés ya' ti Tabernáculo ba' mi la' tempan la' bʌ cha'añ mi' pejcan Dios, tsi' yu'bi t'añ woli bʌ i loq'uel ya' ti' pam i majc jiñi Arca, ya' ti yojlil i yejtal jiñi cha'tiquil querubiñob. Che'ʌch tsi' cha'le t'añ Moisés yic'ot lac Yum.