Numeros 6 - Jiñi Tsiji' bʌ Wen T'añ cha'añ Estudio

Jiñi xuc'ul bʌ i t'añ nazareojob

¹ Lac Yum tsi' pejca Moisés, tsi' su'be:

² “Yom ma' su'beñob israelob: Jiñi wiñic o x'ixic mu' bʌ i yʌc' i t'añ ti' tojlel lac Yum cha'añ mi' yotsan i bʌ ti nazareo,

³ mach mejlic i jap paj-esʌbil bʌ i ya'lel ts'usub mi lembal. Mach mejlic i jap vinagre melbil bʌ ti' ya'lel ts'usub, mi yic'otic vinagre xʌbʌl bʌ ti lembal, mi junchajpic paj-esʌbil bʌ i ya'lel ts'usub, mi yomic mi' mʌc' ujtel to bʌ i tujq'uel i wut ts'usub mi jiñic tiquiñix bʌ.

⁴ Ti pejtelel ja'bil mach tsepbilic i tsutsel i jol, mach mejlic i wis jap chuqui tac melbil ti ya'lel ts'usub, mi' bʌq'uic mi i sujlic, mach mejlic i c'ux.

⁵ Ti pejtelel i yorajlel che' mi' melbeñon que'tel ti nazareo, mach mejlic ti sejt'el i tsutsel i jol jinto mi' ts'ʌctiyel i yorajlel che' bajche' sʌc-esʌbil tic tojlel, ch'ujul mi caj i yajñel yic'ot mi caj i yʌc' ti colel i tsutsel i jol.

⁶ Che' bajche' jalel ora tsi' yʌc'ʌ i bʌ tic wenta, mach mejlic i ñochtan xchʌmel.

⁷ Anquese i tat i ña' mi ch'itoñ bʌ o xch'oc bʌ i yeran tsa' chʌmi, mach mejlic i lʌc'tesan i bʌ ti' tojlel, come i yejtal i sʌc-esʌntel tic tojlel ya'añ ti' tsutsel i jol.

⁸ C'ʌlʌl che' bʌ tsi' yʌc'ʌ i bʌ tic wenta, sʌcʌch yom mi yajñel tic tojlel.”

⁹ “Mi añ majqui tsa' chʌmi ti' t'ejl, che' jiñi mi' bi'b-añ i tsutsel i jol tsa' bʌ i yʌc'ʌ ti colel tic tojlel, jiñi cha'añ che' ti' wucp'ejlel q'uiñ mi caj i tsep i tsutsel i jol cha'añ i sʌc-esʌntel.

¹⁰ Che' ti' waxʌcp'ejlel q'uiñ yom mi' pʌy tilel cha'cojt xpurwoc o cha'cojt x'ujcuts ti' tojlel jiñi motomaj ya' ti ti' jiñi Tabernáculo ba' mi la' tempan la' bʌ.

¹¹ Jiñi motomaj mi caj i yʌc' juncojt cha'añ i ñusʌntel mulil, Jiñi yam bʌ mi caj i pul, che' jiñi mi caj i yʌc' ti ñusʌbentel i mul cha'añ ti' caj jiñi tsa' bʌ chʌmi ti' t'ejl. Ti jiñi q'uiñ mi caj i cha' sʌc-esʌntel i tsutsel i jol:

¹² mi' caj i sʌc-esʌntel tic tojlel cha'añ mi' ts'ʌctesan i ye'tel ti nazareo che' bajche' jayp'ejl q'uiñ tsi' wʌn ña'ta, mi' caj i pʌy tilel juncojt tʌñʌme' am bʌ jump'ejl i ja'bilel cha'añ mi' ñusʌbentel i mul. Jiñi ñaxan bʌ q'uiñ tac che' bʌ tsa' ochi ti nazareo ma'añix mi' ch'ʌjmel ti' wenta, come tsa' bi'b-esʌnti.”

¹³ “Jiñʌch mandar che' bajche' yom mi' mel juntiquil nazareo che' mi' ts'ʌctiyel i q'uiñilel cha'añ mi' loq'uel ti' ye'tel: Mi caj i tilel ti ti' jiñi Tabernáculo ba' mi la' tempan la' bʌ,

¹⁴ mi caj i yʌq'ueñon juncojt tʌñʌme' am bʌ jump'ejl i ja'bilel, mach bʌ wis añic i bi'bi'lel mi i c'am-ʌjel cha'añ c majtañ mu' bʌ i pulel yic'ot mi caj i yʌq'ueñon xch'oc tʌñʌme' am bʌ jump'ejl i ja'bilel, mach bʌ wis añic i bi'bi'lel mi i c'am-ʌjel cha'añ mi' ñusʌbentel i mul yic'ot mi caj i yʌq'ueñon juncojt tat tʌñʌme' c'oc' bʌ, cha'añ c majtañ mu' bʌ i yʌq'ueñ i ñʌch'tʌlel i pusic'al.

¹⁵ Che' ja'el yom jump'ejl alʌ chiquib pan mach bʌ añic i levadurajlel, melbil bʌ ti harina xajc'ubil bʌ yic'ot olivo aceite; yic'ot woch' mach bʌ añic i levadurajlel bombil bʌ ti olivo aceite yic'ot majtañʌl melbil bʌ ti trigo, yic'ot japbil bʌ majtañʌl tac.

¹⁶ Jiñi motomaj mi' caj i yʌq'ueñon pulbil bʌ c majtañ cha'añ i ñusʌbentel i mul.

¹⁷ Ti wi'il mi caj i yʌq'ueñon jiñi tat tʌñʌme' cha'añ mi' taj i ñʌch'tʌlel i pusic'al yic'ot jiñi pan mach bʌ añic i levadurajlel am bʌ ti alʌ chiquib; che' ja'el jiñi motomaj mi caj i yʌq'ueñon c majtañ melbil bʌ ti trigo yic'ot japbil tac bʌ.

¹⁸ Jiñi cha'añ jiñi nazareo mux caj i set' i tsutsel i jol ya' ti ti' jiñi Tabernáculo ba' mi la' tempan la' bʌ, mi caj i tempan i tsutsel i jol aq'uebilix bʌ ti' wenta Dios, mi caj i yotsan ti c'ajc ba' woli ti pulel jiñi tat tʌñʌme' mu' bʌ i yʌq'ueñ i ñʌch'tʌlel i pusic'al.

¹⁹ Ti wi'il jiñi motomaj mi caj i ch'ʌmben loq'uel jiñi pojpobilix bʌ i ya' jiñi tat tʌñʌme' yic'ot jump'ejl pan mach bʌ añic i levadurajlel am bʌ ti jiñi alʌ chiquib yic'ot mi' caj i yʌq'ueñ junq'uejl woch' ti' c'ʌb jiñi nazareo che' set'bilix i tsutsel i jol ac'bil bʌ tic wenta.

²⁰ Jiñi motomaj mi caj i yʌq'ueñon che' bajche' jʌmts'ubil bʌ majtañʌl tic tojlel, jiñʌch ch'ujul bʌ, mu' bʌ i yʌq'uentel jiñi motomaj jiñʌch i jʌmts'ubil bʌ i bʌc'tal i tajñ yic'ot i ya' jiñi tat tʌñʌme'. Ti wi'il jiñi nazareo muq'uix i mejlel i jap i ya'lel ts'usub.”

²¹ “Iliyi jiñʌch jiñi mandar tac cha'añ jiñi nazareo tsa' bʌ i yʌc'ʌ xuc'ul bʌ i t'añ tic tojlel che' bajche' mi' mejlel i cha'añ. Che' bajche' mi yʌc' i t'añ che'ʌch mi caj i ts'ʌctesan, che' bajche' añ jiñi mandar cha'añ nazareo.”

Bendición mu' bʌ i yʌc' motomaj

²² Lac Yum tsi' pejca Moisés, tsi' su'be:

²³ “Pejcan Aarón temel yic'ot i yalobilob, su'beñob: Che'ʌch yom mi la' wʌq'ueñob bendición israelob:

²⁴ La' i yʌq'ueñet i yutslel lac Yum yic'ot la' i cʌntañet.

²⁵ La' i q'uelet lac Yum ti' tijicñʌyel i pusic'al yic'ot la' i p'untañet.

²⁶ La' i q'uelet lac Yum ti uts'at yic'ot la' i yʌq'ueñet i ñʌch'tʌlel a pusic'al.”

²⁷ “Che'ʌch mi caj i su'bob ti ñuc j c'aba' ti' tojlel israelob, che' jiñi, joñon mi caj cʌq'ueñob i yutslel c t'añ.”