Numeros 4 - Jiñi Tsiji' bʌ Wen T'añ cha'añ Estudio

I ye'tel jiñi levijob

¹ Lac Yum tsi' pejca Moisés yic'ot Aarón, tsi' su'beyob:

² “Ya' ti' tojlel levijob yom ma' tsic jaytiquil wiñicob año' bʌ ti xchumtʌl tac i p'olbalo' bʌ Coat,

³ am bʌ lujump'ejl i cha'c'al (30) i ja'bilel, c'ʌlʌl ti lujump'ejl i yuxc'al (50), jiñobʌch mu' bʌ i mejlel i yochelob ti e'tel ya' ti Tabernáculo ba' mi la' tempan la' bʌ.”

⁴ “I ye'tel i yalobilob Coat ya' ti Tabernáculo ba' mi la' tempan la' bʌ, ya' ti jiñi c'ax Ch'ujul bʌ Ajñibʌl, jiñʌch iliyi:

⁵ Che' mi' cajelob ti xʌmbal jiñi israelob, Aarón yic'ot i yalobilob mi caj i tilelob cha'añ mi' ticob jiñi joc'ol bʌ pisil ya' ti Ch'ujul bʌ Ajñibʌl. Mi caj i c'ʌñob jiñi pisil cha'añ mi' mosob jiñi Arca.

⁶ Mi caj i c'ʌñob i pʌchʌlel cojtom cha'añ mi' mosob jiñi pisil, ti wi'il mi caj i mosob jiñi pʌchi ti azul bʌ pisil, che' jiñi mi caj i yotsʌbeñob i te'el tac.

⁷ Mi caj i tasiñob ti azul bʌ pisil jiñi mesa. Ya'i mi caj i yʌc'ob jiñi plato tac yic'ot cuchara tac yic'ot i yajñib pom, yic'ot vaso tac, yic'ot jiñi ch'ujul bʌ waj mu' bʌ i yajñel ti pejtelel ora.

⁸ Che' ja'el mi caj i mosob ti chʌchʌc bʌ pisil, ti wi'il mi' cha' mosob jiñi pisil ti' pʌchʌlel cojtom. Che' jiñi mi caj i yotsʌbeñob i te'el tac.

⁹ Mi caj i c'ʌñob azul bʌ pisil cha'añ mi' mosob i te'el i yajñib jiñi c'ajc tac yic'ot i yajñib jiñi c'ajc tac, yic'ot jiñi mu' bʌ i c'ʌn i yʌpbeñob i c'ʌc'al, yic'ot i yajñib olivo aceite yic'ot alʌ plato tac.

¹⁰ Che' jiñi yom mi' c'ʌñob i pʌchʌlel cojtom cha'añ mi' mosob pejtelel jiñi mu' bʌ i c'ʌjñel, che' jiñi mi caj i yotsʌbeñob i te'el tac cha'añ mi' ch'ʌmob majlel.”

¹¹ “Mi caj i c'ʌñob azul bʌ pisil cha'añ mi' mosob jiñi pulʌntib melbil bʌ ti oro, yic'ot mi caj i mosob ti' pʌchʌlel cojtom, che' jiñi mi caj i yotsʌbeñob i te'el tac.

¹² Mi caj i ch'ʌmob pejtelel e'tijibʌl tac mu' bʌ i c'ʌjñel ya' ti Ch'ujul bʌ Ajñibʌl, mi caj i pixob ti azul bʌ pisil yic'ot mi caj i pixob ti' pʌchʌlel cojtom, che' jiñi mi caj i yotsʌbeñob i te'el cha'añ mi' ch'ʌmob majlel.

¹³ Mi caj i loc'sʌbeñob i tʌñʌl c'ajc ya' ti pulʌntib yic'ot mi caj i mosob jiñi pulʌntib ti chʌccojan bʌ pisil.

¹⁴ Mi caj i yʌc'ob ya' ti' pam jiñi pulʌntib pejtelel jiñi e'tijibʌl tac mu' bʌ i c'ʌjñel, che' bajche' jiñi wechel tac bʌ lata, yic'ot jiñi rocol bʌ i ñi' tsucu taq'uiñ, yic'ot jiñi lecho' ñich c'ajc, yic'ot jiñi taza tac, yic'ot pejtelel mu' bʌ i c'ʌjñel ya' ti pulʌntib. Mi caj i mosob ti' pʌchʌlel cojtom, che' jiñi mi caj i yotsʌbeñob i te'el tac.

¹⁵ Ti wi'il Aarón yic'ot i yalobilob, che' bʌ tsa'ix ujti i mosob jiñi Ch'ujul bʌ Ajñibʌl yic'ot pejtelel mu' bʌ i c'ʌjñel ya' ti Ch'ujul bʌ Ajñibʌl, che' muq'uix cajel i techob i xʌmbal jiñi israelob, mi caj i tilelob i yalobilob Coat cha'añ mi' ch'ʌmob majlel, pero mach yomic mi' tʌlob jiñi ch'ujul tac bʌ, ame chʌmicob. Jiñi e'tel mu' bʌ caj i melob i p'olbalob Coat jiñʌch cha'añ mi' ch'ʌmob majlel jiñi Tabernáculo ba' mi la' tempan la' bʌ.

¹⁶ Pero añ ti' wenta Eleazar i yalobil motomaj Aarón cha'añ mi' q'uel jiñi olivo aceite am bʌ ya' ti lámpara, yic'ot jiñi pom, yic'ot jiñi majtañʌl tac, yic'ot jiñi olivo aceite mu' bʌ i c'ʌjñel cha'añ bojñibʌl. Mi caj i cʌntan jiñi Tabernáculo yic'ot pejtelel chuqui añ ti' mal yic'ot pejtelel jiñi mu' bʌ i c'ʌjñel ti jiñi Ch'ujul bʌ Ajñibʌl.”

¹⁷ Lac Yum tsi' pejca Moisés yic'ot Aarón, tsi' su'beyob:

¹⁸ “Mach yomic mi la' wʌc' ti jilel i yalobilob Coat ti' tojlel jiñi levitajob.

¹⁹ Cha'añ ma'añic mi' chʌmelob che' mi' lʌc'tesañob i bʌ ba'añ jiñi ch'ujul tac bʌ mu' bʌ i c'ʌjñel ya' ti Tabernáculo, mi caj la' mel che' bajche' iliyi: Aarón yic'ot i yalobilob mi caj i pʌsbeñob i ye'tel ti jujuntiquil chuqui jiñi mu' bʌ caj i melob.

²⁰ Mach yomic mi' yochelob i yalobilob Coat i q'uel che' woli la' mos jiñi c'ax ch'ujul tac ti jiñi Ch'ujul bʌ Ajñibʌl, ame chʌmicob.”

²¹ Lac Yum tsi' pejca Moisés, tsi' su'be:

²² “Yom ma' tsic ja'el i p'olbal Gersón i p'olbal bʌ Leví ti jujump'ejl xchumtʌl.

²³ Mi caj a ch'ʌmob ti tsic wiñicob añobix bʌ lujump'ejl i cha'c'al (30) i ja'bilel c'ʌlʌl ti lujump'ejl i yuxc'al (50) i ja'bilel; jiñobʌch pejtelel muq'uix bʌ i mejlelob ti ochel ti e'tel ti Tabernáculo ba' mi la' tempan la' bʌ.”

²⁴ “Jiñʌch e'tel mu' bʌ caj i melob Gersón yic'ot i yalobilob:

²⁵ Mi' caj i ch'ʌmob majlel jiñi pisil tac yic'ot i pʌchʌlel cojtom yic'ot jiñi pisil am bʌ ti ti' jiñi Tabernáculo ba' mi la' tempan la' bʌ,

²⁶ che' ja'el mi caj i ch'ʌmob majlel jiñi pisil i cha'añ bʌ patio, yic'ot i cha'añ bʌ i ti' jiñi patio am bʌ ti' joytʌlel Tabernáculo. Mi caj i ch'ʌmob majlel jiñi pulʌntib yic'ot pejtelel i ch'ajñal tac, yic'ot e'tijibʌl tac cha'añ mi' c'ʌñob.

²⁷ Aarón yic'ot i yalobilob mi caj i yʌq'ueñob i ye'tel i yalobilob Gersón. Jiñobʌch mu' bʌ caj i su'beñob cha'añ mi' wen cʌntañob jiñi woli bʌ i ch'ʌjmel majlel.

²⁸ Añ ti' wenta Itamar i yalobil jiñi motomaj Aarón cha'añ mi' q'uel bajche' mi' melob i ye'tel i yalobilob Gersón ya' ti Tabernáculo ba' mi la' tempan la' bʌ.”

²⁹ “Yom ma' tsic pejtelel i yalobilob Merari ti' mojt ti' mojt che' bajche' añob i ñojte'el.

³⁰ Mi caj a ch'ʌmob ti tsic wiñicob añobix bʌ lujump'ejl i cha'c'al (30) i ja'bilel c'ʌlʌl ti lujump'ejl i yuxc'al (50) i ja'bilel; jiñobʌch pejtelel muq'uix bʌ i mejlelob ti ochel ti e'tel ti Tabernáculo ba' mi la' tempan la' bʌ.

³¹ I ye'telob mu' bʌ i melob ya' ti Tabernáculo ba' mi la' tempan la' bʌ jiñʌch cha'añ mi' ch'ʌmob majlel i tablajlel jiñi Tabernáculo yic'ot i te'el tac, yic'ot i postejlel tac yic'ot i c'ʌclib tac,

³² yic'ot pejtelel i postejlel patio am bʌ ti' joytʌlel, yic'ot i buchlib tac jiñi poste, yic'ot i bajte'lel yic'ot i ch'ajñal, yic'ot pejtelel jiñi yan tac bʌ mu' bʌ i c'ʌjñel yic'ot pejtelel mu' bʌ i c'ʌjñibʌyel cha'añ jiñi e'tel. Yom ma' wʌq'uen i cuch ti' chajp ti' chajp jujuntiquil wiñic cha'añ mi' ña'tañob chuqui mi caj i cuchob majlel.

³³ Jiñʌch ili e'tel mu' bʌ caj i melob i yalobilob Merari ya' ti Tabernáculo ba' mi la' tempan la' bʌ. Añ ti' wenta Itamar i yalobil Aarón jiñi motomaj cha'añ mi' q'uelbeñob i ye'tel.”

³⁴ Jiñi cha'añ Moisés yic'ot Aarón, yic'ot jiñi yumʌlob wa'chocobilo' bʌ ti jujunmojt, tsi' tsiquiyob i p'olbal Coat, che' bajche' t'oxbilob tac.

³⁵ Tsa' tejchi i tsijquelob che' añobix lujump'ejl i cha'c'al (30) i ja'bilel c'ʌlʌl ti lujump'ejl i yuxc'al (50) i ja'bilel, pejtelel jiñi muq'uix bʌ i mejlel i cha'leñob e'tel ti Tabernáculo ba' mi la' tempan la' bʌ.

³⁶ Jiñi chucbilo' bʌ i c'aba' jiñobʌch 2,750.

³⁷ Jiñobʌch i yalobilob Coat mu' bʌ i cha'leñob e'tel ya' ti Tabernáculo ba' mi la' tempan la' bʌ. Moisés yic'ot Aarón tsi' tsiquiyob che' bajche' tsi' su'beyob lac Yum Dios ti mandar.

³⁸ Che' ja'el tsa' tsijquiyob i p'olbal Gersón che' bajche' añob ti' mojt ti' mojt.

³⁹ Tsa' tejchi i tsijquelob che' añobix lujump'ejl i cha'c'al (30) i ja'bilel c'ʌlʌl ti lujump'ejl i yuxc'al (50) i ja'bilel, pejtelel jiñi muq'uix bʌ i mejlel i cha'leñob e'tel ti Tabernáculo ba' mi la' tempan la' bʌ.

⁴⁰ Jiñi chucbilo' bʌ i c'aba' jiñobʌch 2,630.

⁴¹ Jiñobʌch i yalobilob Gersón chucbilo' bʌ i c'aba' mu' bʌ i cha'leñob e'tel ya' ti Tabernáculo ba' mi la' tempan la' bʌ. Moisés yic'ot Aarón tsi' tsiquiyob che' bajche' tsi' yʌc'ʌ mandar lac Yum.

⁴² Che' ja'el tsa' tsijqui pejtelel i yalobilob Merari che' bajche' añob ti' mojt ti' mojt.

⁴³ Tsa' tejchi i tsijquelob che' añobix lujump'ejl i cha'c'al (30) i ja'bilel c'ʌlʌl ti lujump'ejl i yuxc'al (50) i ja'bilel, pejtelel jiñi muq'uix bʌ i mejlel i cha'leñob e'tel ya' ti Tabernáculo ba' mi la' tempan la' bʌ.

⁴⁴ Jiñi chucbilo' bʌ i c'aba' jiñʌch 3,200.

⁴⁵ Jiñobʌch i yalobilob Merari tsa' bʌ i tsiquiyob Moisés yic'ot Aarón, che' bajche' tsi' yʌc'ʌ mandar lac Yum Dios.

⁴⁶ Che' jiñi Moisés yic'ot Aarón yic'ot jiñi yumʌlob ti Israel tsi' melbeyob i listajlel pejtelel jiñi levijob che' bajche' jaytiquilob ti' mojt ti' mojt.

⁴⁷ Tsa' tejchi i tsijquelob che' añobix lujump'ejl i cha'c'al (30) i ja'bilel c'ʌlʌl ti lujump'ejl i yuxc'al (50) i ja'bilel, pejtelel jiñi mu' bʌ i cha'leñob e'tel ya' ti Tabernáculo ba' mi la' tempan la' bʌ, yic'ot jiñi mu' bʌ i ch'ʌmob majlel jiñi Tabernáculo ba' mi la' tempan la' bʌ,

⁴⁸ ti' pejtelelob jiñi tsa' bʌ tsijquiyob añob 8,580.

⁴⁹ Che' bajche' lac Yum tsi' su'be Moisés, che'ʌch tsi' mele. Tsi' tsiquiyob che' bajche' añob i ye'tel ti' chajp ti' chajp.