Numeros 36 - Jiñi Tsiji' bʌ Wen T'añ cha'añ Estudio

Mandar cha'añ x'ixicob mu' bʌ i ñujpuñelob año' bʌ i lum

¹ Jiñi ñuc taco' bʌ i ye'tel loq'uemo' bʌ ti' p'olbal Galaad i yalobil Maquir i yalobil Manasés, loq'uemo' bʌ ti' p'olbal José, tsa' tiliyob ba'añ Moisés yic'ot ti' tojlel jiñi ñuc taco' bʌ i ye'tel ti' tojlel israelob,

² tsi' yʌlʌyob: —Lac Yum tsi' su'beyet cha'añ ti yajcaya ti alas yom mi' t'oxbentelob i lum jiñi israelob. Che' ja'el lac Yum tsi' su'beyet cha'añ yom mi' yʌq'ueñtelob i lum jiñi xch'oc bʌ i yalobilob Zelofehad jiñi c pi'ʌl bʌ lojon.

³ Pero mi tsa' ñujpuñiyob jiñi xch'octacob yic'ot israelob año' bʌ ti yam bʌ junmojt c pi'ʌlob lojon, che' jiñi mi' caj i c'axel ti' wenta jiñi lum jiñi yam bʌ junmojt c pi'ʌlob lojon woli bʌ i ñujpuñel yic'ot jiñi xch'octacob, che' jiñi mux caj i t'ox jilel c lum lojon.

⁴ Che' mi' c'otel i ja'bilel i tijicñʌyel jiñi israelob, i lum jiñi xch'octacob i yalobilo' bʌ Zelofehad mi caj i yʌq'ueñtelob ti' wenta i pi'ʌlob ti' lumal i ñoxi'al, che' jiñi mi caj i junyajlel chijlel jiñi lum tsa' bʌ aq'uenti c tat lojon.

⁵ Jiñi cha'añ Moisés tsi' su'be israelob che' bajche' tsi' su'be lac Yum: —Uts'at che' bajche' woli i yʌlob i yalobilob José.

⁶ Jiñʌch iliyi tsa' bʌ i yʌlʌ lac Yum cha'añ xch'oc bʌ i yalobilob Zelofehad: “La' i cha'leñob ñujpuñel majqui jach yom yic'otob pero ya' jach ti' tojlel i pi'ʌlob loq'uemo' ti' p'olbal José,

⁷ cha'añ jiñi lum am bʌ ti' wenta jujunmojt israelob ma'añic mi' c'axel ti' wenta yam bʌ junmojt israelob, come jujuntiquil Israel wersa yom mi' chumtʌl ya' ti' lum i tat.

⁸ Pejtelel x'ixicob año' bʌ i lum ti Israel, wersa yom mi' cha'leñob ñujpuñijel yic'ot i pi'ʌlob lajal bʌ i ñojte'elob, cha'añ che' jiñi ma'añic mi' chijlelob i lum tsa' bʌ aq'uenti ti' tojlel i tatob,

⁹ yic'ot cha'añ ma'añic mi' pam ñumel jiñi la' lum ti' tojlel yam bʌ i p'olbal israelob, come ti' mojt ti' mojt aq'uebiletla la' lum, jiñi cha'añ ya' jach yom mi' cʌytʌl ti la' wenta, mach mejlic ti c'axel ti' wenta jiñi lum yam bʌ junmojt israelob.”

¹⁰ I yalobilob Zelofehad tsi' meleyob che' bajche' lac Yum tsi' su'be Moisés,

¹¹ jiñi cha'añ Maala, Tirsa, Hogla, Milca, yic'ot Noa jiñʌch i yixic'alob Zelofehad, tsa' ñujpuñiyob yic'ot i yalobilob i yumijel.

¹² Tsa' ñujpuñiyob yic'ot i yalobilob Manasés loq'uemo' bʌ ti' p'olbal José, che'ʌch tsa' cʌle i lumob ti p'olbal i tat.

¹³ Jiñʌch jiñi mandar tac yic'ot i su'bal tsa' bʌ i yʌc'ʌ lac Yum ti' tojlel Moisés yic'ot ti' tojlel israelob che' ya' to añob ti' lum Moab am bʌ ti' t'ejl Jordán ja', ti' tojel Jericó.