Numeros 34 - Jiñi Tsiji' bʌ Wen T'añ cha'añ Estudio

¹ Lac Yum tsi' pejca Moisés, tsi' su'be:

² “Su'beñob jiñi israelob: Che' ochemetixla ti' lum Canaán, jiñʌch jiñi lum mu' bʌ caj la' ch'ʌm ti pejtelel ora. I cayajonlel jiñʌch iliyi:”

³ “Ya' ti sur mi' tejchel ti' tiquiñal lum i c'aba' Zin c'ʌlʌl ya' ba' jaxʌl i lum Edom, yic'ot ya' jaxʌl ti' junwejlel jiñi Tsaj bʌ Mar, ti' tojel i pasibal q'uiñ.

⁴ Ili cayajon xotocña mi' ñumel ti' witsilel Acrabim, mi' ñumel majlel c'ʌlʌl ti Zin; mi' c'ʌlʌl c'otel ti Cades-barnea ya' ti sur, mi' ñumel majlel c'ʌlʌl ti Hasar-adar, mi' c'ʌlʌl c'otel ti Asmón.

⁵ Xotocña mi' majlel ili cayajon, mi' tejchel ti Asmón c'ʌlʌl ti ja' am bʌ ti Egipto, c'ʌlʌl mi' c'otel ti joloñel ya' ti mar.”

⁶ “La' cayajon am bʌ ti' tojel i bʌjlibal q'uiñ jiñʌch jiñi Colem bʌ mar; ili cayajon jiñʌch cayajon ti' bʌjlibal q'uiñ.”

⁷ “Jiñi la' cayajon am bʌ ti norte jiñʌch iliyi: mi' tejchel ya' ti Colem mar tojach mi' majlel c'ʌlʌl ti wits i c'aba' Hor.

⁸ Ti jiñi wits i c'aba' Hor tojach mi' majlel c'ʌlʌl ti yochibal Hamat, ya'i mi' majlel la' cayajon c'ʌlʌl ti Zedad.

⁹ Ti wi'il mi caj la' majlel c'ʌlʌl ti Zifrón, ya' jaxʌl ti Hazar-enán. Iliyi jiñʌch ba' jaxʌl la' lum ti norte.”

¹⁰ “Jiñi la' cayajon ti' tojel i pasibal q'uiñ, mi' tejchel ti Hazar-enán tojach mi' ñumel majlel c'ʌlʌl ti Sefam.

¹¹ Ili cayajon mi' ju'bel majlel ti Sefam c'ʌlʌl ti Ribla, ya' ti' pasibal q'uiñ ti' tojel Aín. Mi' ju'bel majlel la' cayajon c'ʌlʌl mi' c'otel ti ti' mar Cineret am bʌ ti' pasibal q'uiñ.

¹² Ti wi'il ili cayajon mi' ju'bel majlel ti Jordán ja' c'ʌlʌl mi yujtel ti Tsaj bʌ Mar:” “Iliyi jiñʌch la' lum yic'ot ba' jaxʌl tac ti' joytʌlel.”

¹³ Moisés tsi' su'be jiñi israelob: “Jiñʌch ili lum mu' bʌ caj la' t'oxben la' bʌ ti yajcaya ti alas, che' bajche' tsi' yʌc'ʌ mandar lac Yum cha'añ mi yʌq'uentel jiñi bolonmojt i p'olbal Israel yic'ot jiñi ojlil i p'olbal Manasés,

¹⁴ come i p'olbalob Rubén yic'ot i p'olbalob Gad temel yic'ot i pi'ʌlob, yic'ot ojlil i p'olbal Manasés, tsa'ix i ch'ʌmʌyob i lum.

¹⁵ Jiñi ojlil i yuxmojt i yalobilob Israel tsa'ix i tajayob i lum ya' ti junwejl Jordán ja' ya' ti' tojel Jericó ya' ba' mi' pasel q'uiñ.”

¹⁶ Lac Yum tsi' pejca Moisés, tsi' su'be:

¹⁷ Jiñobʌch i c'aba' jiñi wiñicob mu' bʌ caj i t'oxob jiñi lum: Jiñi motomaj Eleazar yic'ot Josué i yalobil Nun.

¹⁸ Che' ja'el yom mi la' yajcan juntiquil am bʌ i ye'tel loq'uem bʌ ti jujunmojt israelob cha'añ mi' pʌsben i pi'ʌlob baqui mi caj i ch'ʌmob i lum.

¹⁹ Jiñobʌch i c'aba'ob: “I p'olbal Judá, jiñʌch Caleb i yalobil Jefone.

²⁰ I p'olbal Simeón jiñʌch Semuel i yalobil Amiud.

²¹ I p'olbal Benjamín jiñʌch Elidad i yalobil Quislón.

²² I p'olbal i yalobilob Dan jiñʌch ñuc bʌ yumʌl i c'aba' Buqui i yalobil Jogli.

²³ I yalobilob José: loq'uemo' bʌ ti' p'olbal Manasés, jiñʌch ñuc bʌ yumʌl i c'aba' Haniel i yalobil Efod,

²⁴ yic'ot i p'olbal i yalobilob Efraín, jiñʌch ñuc bʌ yumʌl i c'aba' Kemuel i yalobil Siftán.

²⁵ I p'olbal i yalobilob Zabulón, jiñʌch ñuc bʌ yumʌl i c'aba' Elisafán i yalobil Parnac.

²⁶ I p'olbal i yalobilob Isacar, jiñʌch ñuc bʌ yumʌl i c'aba' Paltiel i yalobil Azán.

²⁷ I p'olbal i yalobilob Aser, jiñʌch ñuc bʌ yumʌl i c'aba' Ahiud i yalobil Selomi.

²⁸ I p'olbal i yalobilob Neftalí, jiñʌch ñuc bʌ yumʌl i c'aba' Pedael i yalobil Amiud.”

²⁹ Jiñʌch bajche' tsi' yʌc'ʌ mandar lac Yum cha'añ mi' t'oxbentelob i lum cha'añ mi' ch'ʌmob jiñi israelob ya' ti' lum Canaán.