Numeros 33 - Jiñi Tsiji' bʌ Wen T'añ cha'añ Estudio

I xʌmbal israelob tsa' bʌ tejchi ti Egipto c'ʌlʌl ti Jordán ja'

¹ Pejtelel iliyi jiñʌch ba' tsi' xʌñʌyob ñumel jiñi israelob che' bʌ tsa' loq'uiyob ti Egipto ti' mojt ti' mojt, ba' ora Moisés yic'ot Aarón tsi' pʌyʌyob loq'uel.

² Moisés tsi' ts'ijba pejtelel ya' ba' tsa' tejchiyob ti xʌmbal jiñi israelob che' bajche' tsi' yʌc'ʌ mandar lac Yum. Jiñʌch ba' tsa' ñumiyob tac majlel.

³ Che' ti' jo'lujump'ejlel tsic ti jiñi ñaxan bʌ uw tsa' loq'uiyob ti Ramesés. Che' ñumeñix jump'ejl q'uiñ i q'uiñilel Pascua, tsa' loq'uiyob jiñi israelob yic'ot i ch'ejlelob i pusic'al ti' wut pejtelel egiptojob,

⁴ che' woli to i mucob jiñi ñaxan bʌ i yalobilob jiñi egiptojob tsa' bʌ tsʌnsʌntiyob ti lac Yum; ti jim bʌ ora lac Yum tsi' jisʌbeyob i diosob.

⁵ Tsa' loq'uiyob ti Ramesés jiñi israelob, tsa' c'otiyob ti jijlel ya' ti Sucot.

⁶ Tsa' loq'uiyob ti Sucot, tsa' c'otiyob ti jijlel ti Etam ya' ba' jaxʌl i tiquiñal lum.

⁷ Tsa' loq'uiyob ti Etam, tsa' majliyob ti' tojel Pi-hahirot am bʌ ti' tojel Baal-zefón, ya' tsa' jijliyob ti' tojel Migdol.

⁸ Tsa' loq'uiyob ti Pi-hahirot, tsa' c'axiyob ti mar, tsa' c'otiyob ti' tiquiñal lum. Uxp'ejl q'uiñ tsi' xʌñʌyob ñumel i tiquiñal lum am bʌ ti Etam, tsa' c'otiyob ti jijlel ti Mara.

⁹ Tsa' loq'uiyob ti Mara, tsa' c'otiyob ti Elim ya' baqui añ lajchʌmp'ejl i loq'uib cuxul bʌ ja' yic'ot lujuntejc i chʌnc'al xañ; ya'i tsa' jijliyob.

¹⁰ Tsa' loq'uiyob ti Elim, tsa' c'otiyob ti jijlel ya' ti' t'ejl jiñi Chʌchʌc bʌ mar.

¹¹ Tsa' loq'uiyob ba'añ jiñi Chʌchʌc bʌ mar, tsa' c'otiyob ti jijlel ti' tiquiñal lum am bʌ ti Sin.

¹² Tsa' loq'uiyob ti' tiquiñal lum ti Sin, tsa' c'otiyob ti jijlel ya' ti Dofca.

¹³ Tsa' loq'uiyob ti Dofca, tsa' c'otiyob ti jijlel ti Alús.

¹⁴ Tsa' loq'uiyob ti Alús. Tsa' c'otiyob ti jijlel ya' ti Refidim, ya' ba' ma'añic tsi' tajayob ja' cha'añ mi' japob.

¹⁵ Tsa' loq'uiyob ya' ti Refidim. Tsa' c'otiyob ti jijlel ti' tiquiñal lum i c'aba' Sinaí.

¹⁶ Tsa' loq'uiyob ti' tiquiñal lum ya' ti Sinaí, tsa' c'otiyob ti jijlel ti Kibrot-hataava.

¹⁷ Tsa' loq'uiyob ya' ti Kibrot-hataava, tsa' c'otiyob ti jijlel ti Hazerot.

¹⁸ Tsa' loq'uiyob ya' ti Hazerot, tsa' c'otiyob ti jijlel ti Ritma.

¹⁹ Tsa' loq'uiyob ya' ti Ritma, tsa' c'otiyob ti jijlel ti Rimón-peres.

²⁰ Tsa' loq'uiyob ya' ti Rimón-peres, tsa' c'otiyob ti jijlel ti Libna.

²¹ Tsa' loq'uiyob ya' ti Libna, tsa' c'otiyob ti jijlel ti Rissa.

²² Tsa' loq'uiyob ya' ti Rissa, tsa' c'otiyob ti jijlel ti Ceelata.

²³ Tsa' loq'uiyob ya' ti Ceelata, tsa' c'otiyob ti jijlel ti wits i c'aba' Sefer.

²⁴ Tsa' loq'uiyob ya' ti wits i c'aba' Sefer, tsa' c'otiyob ti jijlel ti Harada.

²⁵ Tsa' loq'uiyob ya' ti Harada, tsa' c'otiyob ti jijlel ti Macelot.

²⁶ Tsa' loq'uiyob ya' ti Macelot, tsa' c'otiyob ti jijlel ti Tahat.

²⁷ Tsa' loq'uiyob ya' ti Tahat, tsa' c'otiyob ti jijlel ti Tara.

²⁸ Tsa' loq'uiyob ya' ti Tara, tsa' c'otiyob ti jijlel ti Mitca.

²⁹ Tsa' loq'uiyob ya' ti Mitca, tsa' c'otiyob ti jijlel ti Hasmona.

³⁰ Tsa' loq'uiyob ya' ti Hasmona, tsa' c'otiyob ti jijlel ti Moserot.

³¹ Tsa' loq'uiyob ya' ti Moserot, tsa' c'otiyob ti jijlel ti Bene-jaacán.

³² Tsa' loq'uiyob ya' ti Bene-jaacán, tsa' c'otiyob ti jijlel ti wits i c'aba' Gidgad.

³³ Tsa' loq'uiyob ya' ti Gidgad, tsa' c'otiyob ti jijlel ti Jotbata.

³⁴ Tsa' loq'uiyob ya' ti Jotbata, tsa' c'otiyob ti jijlel ti Abrona.

³⁵ Tsa' loq'uiyob ya' ti Abrona, tsa' c'otiyob ti jijlel ti Ezión-geber.

³⁶ Tsa' loq'uiyob ya' ti Ezión-geber, tsa' c'otiyob ti jijlel ti' tiquiñal lum i c'aba' Zin, jiñʌch Cades.

³⁷ Tsa' loq'uiyob ti Cades, tsa' c'otiyob ti jijlel ti wits i c'aba' Hor ba' jaxʌl i lum Edom.

³⁸ Che' ya'añob ti wits i c'aba' Hor, tsa' letsi majlel jiñi motomaj Aarón che' bajche' tsi' su'be lac Yum, ya'i tsa' chʌmi Aarón, che' añix cha'c'al ja'b i loq'uelob ti Egipto jiñi israelob ti jiñi ñaxan bʌ tsic che' ti' jo'p'ejlel uw.

³⁹ Aarón tsa' chʌmi che' añix uxp'ejl i wucc'al (123) i ja'bilel ya' ti wits i c'aba' Hor.

⁴⁰ Jiñi cananeo, yumʌl bʌ ti Arad, chumul bʌ ti Neguev ti' lumal Canaán, tsi' yu'bi cha'añ tsa'ix c'oti israelob.

⁴¹ Tsa' loq'uiyob ti wits i c'aba' Hor, tsa' c'otiyob ti jijlel ti Zalmona.

⁴² Tsa' loq'uiyob ti Zalmona, tsa' c'otiyob ti jijlel ti Punón.

⁴³ Tsa' loq'uiyob ti Punón, tsa' c'otiyob ti jijlel ti Obot.

⁴⁴ Tsa' loq'uiyob ti Obot, tsa' c'otiyob ti jijlel ti Ije-abarim ya' ti' ñup' jiñi Moab.

⁴⁵ Tsa' loq'uiyob ti Ije-abarim, tsa' c'otiyob ti jijlel ya' ti Dibon-gad.

⁴⁶ Tsa' loq'uiyob ti Dibon-gad, tsa' c'otiyob ti jijlel ti Almón-diblataim.

⁴⁷ Tsa' loq'uiyob ti Almón-diblataim, tsa' c'otiyob ti jijlel ti wits i c'aba' Abarim, am bʌ ti' tojel Nebo.

⁴⁸ Tsa' loq'uiyob ti wits i c'aba' Abarim, tsa' c'otiyob ti jijlel ti' lum Moab am bʌ ti' t'ejl Jordán ja', ti' tojel Jericó.

⁴⁹ Ti yujtibal tsa' jijliyob ya' ti' t'ejl Jordán ja' c'ʌlʌl ti Bet-jemisot c'ʌlʌl ti Abel-sitim am bʌ ti' lum Moab.

I cayajonlel yic'ot i t'oxol lum ti Canaán

⁵⁰ Lac Yum tsi' pejca Moisés ya' ti' lum Moab am bʌ ti' t'ejl Jordán ja' ti' tojel Jericó, tsi' su'be:

⁵¹ “Pejcañob jiñi israelob, su'beñob: Che' bʌ tsa'ix c'axiyetla ti Jordán ja' yic'ot che' bʌ tsa'ix ochiyetla ya' ti' lum Canaán,

⁵² mi caj la' choc loq'uel pejtelel jiñi ya' bʌ chumulob, mi caj la' laj jembeñob i yejtal i diosob melbil tac bʌ ti xajlel, yic'ot pejtelel i yejtal tac melbil bʌ ti tsucul taq'uiñ, yic'ot mi caj la' junyajlel jisʌben i yajñib tac ba' mi' ch'ujutesañob i diosob.

⁵³ Mi caj la' choc loq'uel pejtelel jiñi ya' bʌ chumulob cha'añ mi la' chumtʌl ya'i, tsa'ix cʌq'ueyetla jiñi lum cha'añ mi la' ch'ʌm ti la' wenta.

⁵⁴ Mi caj la' t'oxben la' bʌ jiñi lum ti yajcaya ti alas che' bajche' jaymojt xchumtʌl. Jiñi ca'bʌlo' bʌ, yom ñuc mi' la' wʌq'uen i lum, jiñi mach bʌ ca'bʌlobic i p'isol jach mi' caj la' wʌq'uen i lum; ya' ba' mi la' taj jiñi lum ti yajcaya ti alas, ya'i mi caj la' chumtʌl ti' mojt ti' mojt.

⁵⁵ Pero mi ma'añic tsa' la' choco loq'uel jiñi wiñicob ti la' tojlel, che' jiñi, jiñi wiñicob tsa' bʌ la' cʌyʌyob cʌlel mi caj i tic'lañetla che' bajche' sajlte' ti la' wut yic'ot che' bajche' ch'ix mu' bʌ i joch'etla ti la' bʌc'tal, che'ʌch mi caj i tic'lañetla ti jiñi lum ba' mi caj la' chumtʌl.

⁵⁶ Che' ja'el, mi caj c melbeñetla che' bajche' tsa' c ña'ta c melbeñob.”