Numeros 32 - Jiñi Tsiji' bʌ Wen T'añ cha'añ Estudio

Rubén yic'ot Gad tsa' chumleyob ti' pasibal q'uiñ ya' ti Jordán

¹ Jiñi i yalobilob Rubén yic'ot i yalobilob Gad tsa' wen p'ojliyob i wacax. Jiñi cha'añ tsa' caji i ña'tañob i majlel ya' ti' lum Jazer yic'ot Galaad, come tsi' q'ueleyob uts'atax mi' colel wacax ya'i.

² Jiñi cha'añ i yalobilob Gad yic'ot i yalobilob Rubén, tsa' majliyob ba'añ Moisés yic'ot ba'añ motomaj Eleazar yic'ot ti' tojlel jiñi ñuco' bʌ i ye'tel ti' tojlel israelob, tsi' su'beyob:

³ —Atarot, Dibón, Jazer, Nimra, Hesbón, Eleale, Sebam, Nebo yic'ot Beón,

⁴ jiñʌch jiñi lum tsa' bʌ i yʌc'ʌ lac Yum ti' wenta israelob. Jiñʌch wen bʌ lum cha'añ mi' p'ojlel wacax, ili a wiñicob añob i wacax ja'el.

⁵ Jiñi cha'añ, mi uts'at ma' q'uelon lojon, aq'ueñon lojon ili lum cha'añ mic ch'ʌm lojon, mach ma' pʌyon lojon majlel ti junwejl Jordán ja'.

⁶ Pero Moisés tsi' jac'beyob i yalobilob Rubén yic'ot i yalobilob Gad: —¿Mu' ba i bajñel majlelob ti guerra la' pi'ʌlob, che' mi la' cʌytʌl jatetla ilayi?

⁷ ¿Chucoch mi la' techben tilel bixel bʌ i pusic'al jiñi israelob cha'añ ma'añic mi yochelob ti jiñi lum tsa' i yʌq'ueyob lac Yum?

⁸ Come che'ʌch tsi' meleyob la' ñojte'elob, che' bʌ tsa' c chocoyob majlel ti Cades-barnea cha'añ mi' majlel i q'uelob jiñi lum.

⁹ Tsa' letsiyob majlel c'ʌlʌl ti jiñi ja' i c'aba' Escol; che' bʌ tsa'ix i wen q'ueleyob jiñi lum, tsi' techbeyob tilebixel bʌ i pusic'al jiñi israelob cha'añ ma'añic mi' majlelob ti jiñi lum tsa' bʌ i yʌq'ueyob lac Yum.

¹⁰ Jiñi cha'añ lac Yum tsa' wen mich'a, tsi' wa'choco i t'añ, tsi' yʌlʌ:

¹¹ “Jiñi wiñicob tsa' bʌ loq'uiyob ti Egipto año' bʌ jujunc'al i ja'bilel c'ʌlʌl ti' ñoxlel, ma'añic mi caj i q'uelob jiñi lum tsa' bʌ c wʌn su'beyob ti xuc'ul bʌ c t'añ jiñi Abraham, Isaac, yic'ot Jacob, come mach xuc'ulobic i pusic'al tic tojlel,

¹² cojach Caleb i yalobil Jefone jiñi cenezeo yic'ot Josué i yalobil Nun, come xuc'ulob i pusic'al tic tojlel.”

¹³ Jiñi cha'añ lac Yum tsi' mich'le jiñi israelob, tsi' yʌc'ʌyob ti joy xʌmbal ñumel cha'c'al ja'b ti' tiquiñal lum, jinto tsa' laj jiliyob jiñi wiñicob tsa' bʌ i cha'leyob jontolil ti' tojlel lac Yum.

¹⁴ Wʌle jatetla, i p'olbalet bʌ la xjontolilob, lajal la' wom la' mel che' bajche' la' ñojte'elob cha'añ mi la' wutsi p'olben i mich'ajel lac Yum ti' tojlel israelob.

¹⁵ Mi tsa' la' tʌts'ʌ la' bʌ ti' tojlel lac Yum, mi caj i cha' cʌyetla ti' tiquiñal lum yic'ot mi caj la' wʌc' ti jisʌntel pejtelel ili tejclum.

¹⁶ Che' jiñi tsi' cha' su'beyob Moisés: —Mi caj c mel lojon corral ilayi cha'añ c tʌñʌme' lojon yic'ot tejclum tac ba' mi' cajelob ti chumtʌl calobil lojon.

¹⁷ Pero joñon lojon mi caj c chajpan lojon c bʌ cha'añ guerra cha'añ mic majlel lojon ti ora ti' tojel i wut pejtelel israelob, jinto mi' tajob i lumil i chumlibob, pero jiñi calobilob lojon mi' cʌytʌlob ba' wen melbil bʌ tejclum tac cha'añ ma'añic mi' mejlelob ti ochel yam bʌ wiñicob.

¹⁸ Ma'añic mi caj c sujtel lojon ti cotot jinto che' bʌ tsa'ix i tajayob ba' mi' chumtʌlob pejtelel israelob.

¹⁹ Ma'añix mi caj c chʌn c'ajtin lojon ili lum am bʌ ti junwejl Jordán ja', mi jiñic ya' to bʌ añ ti junwejl, come añix c lum lojon ti' tojel i pasibal q'uiñ am bʌ ti ili junwejl Jordán ja'.

²⁰ Jiñi cha'añ Moisés tsi' jac'beyob: —Mi che'ʌch mi caj la' mel, mi muc'ʌch caj la' majlel ti' tojel lac Yum ti guerra,

²¹ mi muc'ʌch la' laj c'axel majlel ti' tojel lac Yum ya' ti Jordán ja' che' chajpʌbiletla cha'añ guerra, c'ʌlʌl jinto mi' laj choc loq'uel lac Yum i contrajob,

²² che' bʌ añix ti' wenta lac Yum jiñi lum, che' jiñi muq'uix la' mejlel ti sujtel. Che' jiñi librejix mi la' wajñel ti' tojlel lac Yum yic'ot ti' tojlel israelob; che' jiñi la' cha'añix ili lum ti' wut lac Yum.

²³ Pero mi mach che'ic tsa' la' mele, che' jiñi añ la' mul ti' tojlel lac Yum, yic'ot yom mi la' ña'tan cha'añ jiñi la' mul mi caj i yʌq'uetla ti wocol.

²⁴ Melela jiñi tejclum tac cha'añ walobilob yic'ot corral tac cha'añ la' tʌñʌme' tac, pero melela che' bajche' tsa' la' wʌc'ʌ la' t'añ.

²⁵ Jiñi i yalobilob Gad yic'ot i yalobilob Rubén tsi' jac'beyob Moisés: —A wiñicon lojon, mi caj c mel lojon che' bajche' tsa' wʌlʌ.

²⁶ Jiñi calobil lojon, yic'ot quijñam lojon, yic'ot c wacax lojon yic'ot cʌlac' lojon, ya' mi caj i yajñelob ti' tejclum tac Galaad.

²⁷ Pero joñon lojon mi caj c chajpan lojon c bʌ cha'añ guerra, mi caj j c'axel lojon ti junwejl Jordán ja' ti' tojel lac Yum, cha'añ mic cha'len lojon guerra che' bajche' ma' wʌc' a t'añ.

²⁸ Che' jiñi Moisés tsi' yʌq'ue ti' wenta jiñi motomaj Eleazar, yic'ot Josué i yalobil Nun, yic'ot jiñi año' bʌ i ye'tel ti jujunmojt i p'olbal Israel.

²⁹ Tsi' yʌlʌ Moisés: —Mi i yalobilob Gad yic'ot i yalobilob Rubén mi' c'axelob la' wic'ot ti junwejl Jordán ja', cha'añ mi' majlelob ti guerra ti' tojel lac Yum, che' bʌ tsa'ix la' ch'ʌmʌ ti lac wenta jiñi lum, che' jiñi mux la' wʌq'ueñob i lum Galaad;

³⁰ pero mi ma'añic tsa' c'axiyob la' wic'ot che' chajpʌbilob cha'añ guerra, che' jiñi mi caj la' tem chumtʌl la' wic'ot, ya' ti' lum Canaán.

³¹ I yalobilob Gad yic'ot i yalobilob Rubén tsi' jac'ʌyob: —Mi caj c mel lojon jiñi tsa' i yʌlʌ lac Yum.

³² Joñon lojon mi caj j c'axel lojon ti' tojel i wut lac Yum che' chajpʌbilon lojon cha'añ guerra ya' ti' lum Canaán, pero jiñi lum mu' bʌ c ch'ʌm lojon jiñʌch jiñi wʌ' bʌ añ ti ili junwejl Jordán ja'.

³³ Jiñi cha'añ Moisés tsi' yʌq'ueyob i lum i p'olbal Gad, yic'ot i p'olbal Rubén yic'ot ojlil i p'olbal Manasés i yalobil bʌ José, ya' ti lum ba' tsi' cha'le i yumʌntel Sehón i yum amorreojob, yic'ot ba' tsi' cha'le yumʌntel Og jiñi yumʌl ti Basán; jiñi lum temel yic'ot i tejclum tac yic'ot ti' joytʌlel, jiñʌch yom mi yʌl tejclum tac am bʌ ti' joytʌlel.

³⁴ I yalobilob Gad tsi' meleyob jiñi tejclum tac i c'aba' Dibón, Atarot, Aroer,

³⁵ Atarot-sofán, Jazer, Jogbeha,

³⁶ Bet-nimra, yic'ot Bet-arán, jiñʌch ñuc bʌ tejclum tac wen ts'ajquibil bʌ; tsi' melbeyob i mʌjquil i tʌñʌme'ob.

³⁷ I yalobilob Rubén tsi' meleyob tejclum tac i c'aba' Hesbón, Eleale, Quiriataim,

³⁸ Nebo, Baal-meón tsa' bʌ i q'uextʌbeyob i c'aba', yic'ot Sibma; tsi' yotsʌbeyob tsiji' bʌ i c'aba' jiñi tejclum tac tsa' bʌ i wa'chocoyob.

³⁹ I yalobilob Maquir i yalobil bʌ Manasés tsa' majliyob ti Galaad, tsi' ch'ʌmʌyob jiñi lum yic'ot tsi' chocoyob loq'uel jiñi amorreojob ya' bʌ chumulob.

⁴⁰ Jiñi cha'añ Moisés tsi' yʌq'ue i lum Maquir i p'olbal bʌ Manasés ya' ti Galaad, ya'i tsa' chumleyob.

⁴¹ Che' ja'el Jair i yalobil Manasés, tsi' ch'ʌmʌ ch'och'oc tac bʌ xchumtʌl, tsi' yotsʌbe i c'aba' Havot-jair.

⁴² Che' ja'el Noba tsi' ch'ʌmʌ Kenat yic'ot ch'och'oc tac bʌ xchumtʌl, tsi' yotsʌbe i bajñel c'aba' ti Noba.