Numeros 30 - Jiñi Tsiji' bʌ Wen T'añ cha'añ Estudio

Mandar cha'añ xuc'ul tac bʌ t'añ

¹ Moisés tsi' pejca jiñi ñuc taco' bʌ i ye'tel ti jujunmojt israelob, tsi' su'beyob: “Jiñʌch iliyi tsa' bʌ i yʌlʌ lac Yum:

² Che' añ juntiquil mu' bʌ i yʌc' xuc'ul bʌ i t'añ tic tojlel o che' mi' wa'chocon i t'añ cha'añ chuqui mi caj i mel che' bajche' tsi' ña'ta ti' pusic'al, ma'añic mi caj i jem i t'añ; mi caj i ts'ʌctesan che' bajche' tsi' yʌlʌ.”

³ “Che' añ juntiquil xch'oc añ to bʌ ti' wenta i tat, mi tsi' yʌc'ʌ xuc'ul bʌ i t'añ tic tojlel o mi tsi' ch'ʌmʌ ti' wenta cha'añ mi' ts'ʌctesan jiñi aq'uebil bʌ ti' wenta,

⁴ mi jiñi i tat jiñi xch'oc yujil jiñi xuc'ul bʌ i t'añ i yalobil tsa' bʌ i mele o jiñi e'tel mu' bʌ caj i mel che' bajche' tsi' ña'ta ti' pusic'al, mi ma'añic chuqui tsi' yʌlʌ i tat, pejtelel jiñi xuc'ul bʌ i t'añ tsa' bʌ i yʌc'ʌ jiñi xch'oc xuc'ul mi yajñel yic'ot pejtelel tsa' bʌ i yʌlʌ cha'añ mi' mel che' bajche' tsi' ña'ta ti' pusic'al, xuc'ul mi' yajñel.

⁵ Pero mi tsi' tiq'ui i tat che' ba' ora mi yu'bin, che' jiñi ma'añix mi' chʌn ts'ʌctesan jiñi xch'oc jiñi xuc'ul bʌ i t'añ tsa' bʌ i yʌc'ʌ yic'ot jiñi tsa' bʌ i yʌlʌ cha'añ mi caj i mel che' bajche' tsi' ña'ta ti' pusic'al. Joñon mi caj c ñusʌben, come i tat tsi' tiq'ui.”

⁶ “Pero mi ñujpuñemix jiñi x'ixic, mi tsi' yʌc'ʌ xuc'ul bʌ i t'añ tic tojlel o mi tsi' yʌlʌ cha'añ añ chuqui mi caj i mel,

⁷ che' mi yu'bin i ñoxi'al pero mi ma'añic tsi' tiq'ui, che' jiñi xuc'ulʌch jiñi t'añ tsa' bʌ i yʌc'ʌ, yic'ot jiñi tsa' bʌ i yʌlʌ cha'añ mi caj i mel che' bajche' tsi' ña'ta ti' pusic'al, xuc'ul mi yajñel.

⁸ Pero mi' ñoxi'al tsi' tiq'ui che' bʌ tsi' yu'bibe i t'añ i yijñam, che' jiñi, mi' jilel i c'ʌjñibal jiñi xuc'ul bʌ t'añ tsa' bʌ i mele yic'ot jiñi tsa' bʌ i yʌlʌ cha'añ mi caj i mel che' bajche' tsi' ña'ta ti' pusic'al. Joñon mi caj c ñusʌben.”

⁹ “Pero pejtelel xuc'ul bʌ t'añ mu' bʌ i mel me'ba' x'ixic o cʌybil bʌ x'ixic tsa' bʌ i yʌlʌ cha'añ mi' mel che' bajche' tsi' ña'ta ti' pusic'al, xuc'ulʌch mi yajñel jiñi t'añ.”

¹⁰ “Mi añ juntiquil x'ixic mu' bʌ i yʌc' xuc'ul bʌ i t'añ ti yotot i ñoxi'al, yic'ot che' bʌ tsa'ix i wa'choco i t'añ cha'añ mi caj i mel che' bajche' tsi' ña'ta ti' pusic'al,

¹¹ che' mi yu'bin i ñoxi'al pero mi ma'añic tsi' tiq'ui, che' jiñi xuc'ulʌch jiñi t'añ tsa' bʌ i yʌc'ʌ, yic'ot pejtelel tsa' bʌ i yʌlʌ cha'añ mi caj i mel che' bajche' tsi' ña'ta ti' pusic'al, xuc'ul mi yajñel.

¹² Pero che' mi yu'bin i ñoxi'al mi tsi' jisʌbe i c'ʌjñibal jiñi tsa' bʌ i mele jiñi x'ixic, pejtelel jiñi xuc'ul bʌ t'añ tsa' bʌ i yʌc'ʌ yic'ot jiñi tsa' bʌ i yʌlʌ cha'añ mi' mel che' bajche' tsi' ña'ta ti' pusic'al, mi' jilel i c'ʌjñibal, come i ñoxi'al tsi' jisʌbe i c'ʌjñibal, ixcu Joñon mi caj c ñusʌben.”

¹³ “Pejtelel xuc'ul bʌ t'añ yic'ot pejtelel wa'chocobil bʌ t'añ wocol bʌ ti' melol, jiñi i ñoxi'al mi caj i yʌl cha'añ che'ʌch mi caj i yujtel, o mi' jisʌben i c'ʌjñibal.

¹⁴ Pero mi ma'añic chuqui tsi' yʌlʌ i ñoxi'al ti jujump'ejl q'uiñ, yom mi yʌl cha'añ uts'at tsi' q'uele pejtelel jiñi xuc'ul bʌ i t'añ jiñi x'ixic yic'ot jiñi tsa' bʌ i yʌlʌ cha'añ mi caj i mel; uts'at tsi' q'uele jiñi wiñic, come ma'añic chuqui tsi' yʌlʌ ti jiñi q'uiñ che' bʌ tsi' yu'bi.

¹⁵ Pero mi tsi' wi'il jisʌbe i c'ʌjñibal jiñi xuc'ul bʌ t'añ tsa' bʌ i yʌc'ʌ jiñi x'ixic che' bʌ wʌn yujilix, che' jiñi i ñoxi'al añ ti' wenta i mul i yijñam.”

¹⁶ Jiñʌch i mandar lac Yum tsa' bʌ i su'be Moisés cha'añ x'ixicob año' bʌ ti' wenta i ñoxi'al, yic'ot xch'octacob añob to bʌ ti' wenta i tat.