Numeros 3 - Jiñi Tsiji' bʌ Wen T'añ cha'añ Estudio

I tsicol yic'ot i ye'tel jiñi levijob

¹ Ti jiñi q'uiñ che' bʌ lac Yum tsi' pejca Moisés ya' ti wits i c'aba' Sinaí, tsa' tsictiyi i c'aba' i p'olbalob Aarón yic'ot Moisés.

² I c'aba'ob i yalobilob Aarón jiñobʌch: Nadab jiñʌch ñaxan bʌ i yalobil, Abiú, Eleazar yic'ot Itamar.

³ Jiñobʌch i yalobilob Aarón mulbilo' bʌ ti olivo aceite yic'ot sʌc-esʌbilo' bʌ cha'añ mi' melob i ye'tel ti motomaj.

⁴ Pero Nadab yic'ot Abiú tsa' chʌmiyob ti' tojlel lac Yum che' bʌ tsi' yotsayob yam bʌ c'ajc che' ya'añob ti' tiquiñal lum ya' ti Sinaí. Ma'añic i yalobilob Nadab yic'ot Abiú. Cojach tsa' cʌleyob Eleazar yic'ot Itamar cha'añ mi' cha'leñob i ye'tel ti motomaj temel yic'ot i tat.

⁵ Lac Yum tsi' pejca Moisés, tsi' su'be:

⁶ “Yom ma' pʌyob tilel i p'olbalob Leví cha'añ mi' tilelob i coltañ Aarón.

⁷ Mi caj i coltañob Aarón yic'ot pejtelel israelob che' ya'añob ti Tabernáculo ba' mi' tempañob i bʌ. Añob ti' wenta jiñi e'tel ya' ti Tabernáculo.

⁸ Mi caj i cʌntañob pejtelel chuqui tac mi' c'ʌjñel ya' ti Tabernáculo ba' mi' tempañob i bʌ, yic'ot pejtelel aq'uebilo' bʌ ti' wenta ti' tojlel i yalobilob Israel. Añob ti' wenta cha'añ mi' melbeñob i ye'tel lac Yum ya' ti Tabernáculo.

⁹ Mi caj a wʌc'ob levijob ti' tojlel Aarón yic'ot i yalobilob, come jiñobʌch jiñi wa'chocobilo' bʌ ti' tojlel i yalobilob Israel.

¹⁰ Cojach Aarón yic'ot i yalobilob mi caj a wʌq'ueñob ti' wenta cha'añ mi' cha'leñob motomajintel. Mi tsi' yotsa i bʌ ti motomaj joch wiñic, mi caj i chʌmel.”

¹¹ Lac Yum tsi' pejca Moisés, tsi' su'be:

¹² “Awilan tsa' c yajca jiñi levijob ti' tojlel israelob, i q'uexolobʌch jiñi ascuñʌlo' bʌ i yalobilob israelob; jiñi cha'añ c cha'añʌch jiñi levijob,

¹³ come c cha'añʌch pejtelel jiñi ñaxan bʌ alʌlob ti Israel. C'ʌlʌl ti jiñi q'uiñ che' bʌ tsa' c tsʌnsa pejtelel jiñi ñaxan bʌ alʌlob ti Egipto, tsa' c yajca cha'añ que'tel pejtelel ñaxan bʌ alʌlob ti Israel yic'ot ñaxan bʌ i yal alʌc'ʌl. C cha'añobʌch. Joñon, la' Yumon.”

¹⁴ Lac Yum tsi' pejca Moisés ya' ti colem bʌ i tiquiñal lum i c'aba' Sinaí, tsi' su'be:

¹⁵ “Yom ma' tsic jiñi levijob che' bajche' jaytiquil añob ti' mojt ti' mojt, yom ma' wotsan ti juñ pejtelel ch'itoñ bʌ i yalobilob añobix bʌ jump'ejl uw c'ʌlʌl ti' ñoxlel.”

¹⁶ Che' jiñi Moisés tsi' ts'ijbubeyob i c'aba' ti juñ che' bajche' lac Yum tsi' su'be.

¹⁷ Jiñʌch i c'aba' i yalobilob Leví: Gersón, Coat yic'ot Merari.

¹⁸ I c'aba' i yalobilob Gersón ti' mojt ti' mojt jiñʌch: Libni yic'ot Simei.

¹⁹ I yalobilob Coat ti' mojt ti' mojt jiñʌch: Amram, Izhar, Hebrón yic'ot Uziel.

²⁰ I yalobilob Merari ti' mojt ti' mojt jiñʌch: Mahli yic'ot Musi. Iliyi jiñʌch i p'olbal Leví che' bajche' jaytiquil i yalobilob ti' mojt ti' mojt.

²¹ I p'olbal Gersón jiñobʌch Libni yic'ot Simei.

²² Pejtelel ch'itoñ bʌ i yalobilob tsa' bʌ tsijquiyob añobix bʌ jump'ejl uw c'ʌlʌl ti' ñoxlel, jiñʌch 7,500.

²³ Pejtelel i yalobilob Gersón tsa' aq'uentiyob i chumlib ti' pat jiñi Tabernáculo ba' mi' bʌjlel q'uiñ.

²⁴ Jiñi yumʌl ti jiñi xchumtʌl tac cha'añ i yalobilob Gersón jiñʌch Eliasaf i yalobil Lael.

²⁵ I yalobilob Gersón añob ti' wenta cha'añ mi' cʌntañob jiñi Tabernáculo ba' mi' tempañob i bʌ, mi' q'uelob jiñi otot tac yic'ot i majc tac, yic'ot jiñi pisil joc'ol bʌ ti ti' jiñi Tabernáculo ba' mi' tempañob i bʌ,

²⁶ yic'ot jiñi pisil am bʌ ya' ti ti' jiñi patio yic'ot am bʌ ti' joytʌlel jiñi Tabernáculo, yic'ot jiñi am bʌ ya' ti pulʌntib; yic'ot pejtelel i ch'ajñal tac añ tac bʌ i c'ʌjñibal cha'añ jiñi e'tel.

²⁷ I p'olbalob Coat: jiñʌch Amram, Izhar, Hebrón yic'ot Uziel.

²⁸ Pejtelel jiñi ch'itoñob bʌ i p'olbal tsa' bʌ tsijquiyob, añobix bʌ jump'ejl uw c'ʌlʌl ti' ñoxlel, jiñʌch 8,600. Añob ti' wenta cha'añ mi' cʌntañob jiñi Ch'ujul bʌ Ajñibʌl.

²⁹ Pejtelel i yalobilob Coat tsa' aq'uentiyob i chumlib ya' ti' tojel jiñi Tabernáculo ya' ti sur.

³⁰ Jiñi yumʌl ti jiñi xchumtʌlob ti' tojlel i yalobilob Coat jiñʌch Elizafán i yalobil Uziel.

³¹ Añob ti' wenta i p'olbalob Coat cha'añ mi' cʌntañob jiñi Arca, yic'ot jiñi mesa, yic'ot i yajñib ba' mi' ts'ʌjbel c'ajc, yic'ot jiñi pulʌntib tac, yic'ot ch'ujul tac bʌ e'tijibʌl, jiñi pisil yic'ot pejtelel mu' bʌ i c'ʌjñel tac.

³² Jiñi ñuc bʌ yumʌl ti' tojlel jiñi levijob jiñʌch Eleazar i yalobil jiñi motomaj Aarón, wa'chocobil ti' yum jiñi año' bʌ ti' wenta jiñi Ch'ujul bʌ Ajñibʌl.

³³ Pejtelel i yalobilob Merari jiñʌch Mahli yic'ot Musi.

³⁴ Ti' pejtelel jiñi ch'itoñob tsa' bʌ tsijquiyob añobix bʌ jump'ejl uw c'ʌlʌl ti' ñoxlel, jiñʌch 6,200 wiñicob.

³⁵ I yum pejtelel i p'olbal Merari jiñʌch Zuriel i yalobil Abihail. Tsa' chumleyob ti' t'ejl Tabernáculo ya' ti norte.

³⁶ Añob ti' wenta i yalobilob Merari cha'añ mi' wen cʌntañob i tablajlel yic'ot i cucujlel, i chumte'lel yic'ot i yoyel jiñi Tabernáculo, yic'ot pejtelel mu' bʌ i c'ʌjñel tac cha'añ jiñi e'tel,

³⁷ añ ti' wenta ja'el i postejlel jiñi patio yic'ot i c'ʌclib ba' mi' wa'tʌl jiñi poste tac yic'ot i te'el tac yic'ot i ch'ajñal tac.

³⁸ Jiñi mu' bʌ caj i chumtʌlob ya' ti' tojel Tabernáculo ba' mi tempañob i bʌ ti' tojel ba' mi' pasel q'uiñ, jiñobʌch Moisés, Aarón yic'ot i yalobilob, añob ti' wenta i cʌntʌntel jiñi Ch'ujul bʌ Ajñibʌl ti' c'aba' jiñi israelob. Mi tsa' ochi joch wiñic ya' ti Tabernáculo, mi caj i chʌmel.

³⁹ Ti' pejtelelob jiñi levijob tsa' bʌ i tsiquiyob Moisés yic'ot Aarón cha'añ ti' mandar lac Yum, ti' pejtelel ch'itoñob añobix bʌ jump'ejl uw c'ʌlʌl ti' ñoxlel, jiñʌch 22,000.

Tsa' tsijquiyob jiñi ñaxan bʌ alʌlob

⁴⁰ Lac Yum Dios tsi' su'be Moisés: “Yom ma' tsic pejtelel ñaxan bʌ tsi' yilayob pañimil ch'itoñ bʌ i yalobilob Israel añobix bʌ jump'ejl uw c'ʌlʌl ti' ñoxlel, yom ma' ts'ijban i c'aba'ob.

⁴¹ Jiñi levijob c cha'añobʌch, i q'uexolobʌch pejtelel ñaxan bʌ alʌlob ti Israel. C cha'añʌch ja'el i yʌlac'ob jiñi levijob, i q'uexolobʌch jiñi ñaxan tac bʌ i yʌlac' israelob. Joñon, la' Yumon.”

⁴² Che' jiñi Moisés tsa' caji i tsic pejtelel jiñi ñaxan bʌ alʌlob ti Israel che' bajche' lac Yum tsi' su'be.

⁴³ Pejtelel jiñi ñaxan bʌ alʌlob, ch'itoño' bʌ tsa' bʌ ts'ijbubentiyob i c'aba' jiñi añobix bʌ jump'ejl uw c'ʌlʌl ti' ñoxlel, jiñʌch 22,273.

⁴⁴ Ti wi'il lac Yum tsi' pejca Moisés, tsi' su'be:

⁴⁵ “Yom ma' pʌy jiñi levijob ti' q'uexol jiñi ñaxan bʌ alʌlob ti Israel, pʌyʌ ja'el i yʌlac' levijob cha'añ i q'uexol i yʌlac' israelob; jiñi levijob c cha'añobʌch. Joñon, la' Yumon.

⁴⁶ Pero cha'añ i q'uexol jiñi 273 ñaxan bʌ alʌlob ñumeñix che' bajche' jiñi levijob,

⁴⁷ mi caj a ch'ʌm jo'p'ejl siclo cha'añ jujuntiquil, che' bajche' añ i tojol jiñi taq'uiñ ya' ti Ch'ujul bʌ Ajñibʌl.

⁴⁸ Jiñi taq'uiñ mi caj a wʌq'uen Aarón yic'ot i yalobilob, cha'añ jiñi i ñumelix bʌ ti' tojlel israelob.”

⁴⁹ Che' jiñi Moisés tsi' ch'ʌmʌ jiñi taq'uiñ cha'añ i tojol jiñi i ñumelix bʌ ti jiñi 273 ch'itoñob tsa' bʌ tsijquiyob ti Israel.

⁵⁰ Ti pejtelel jiñi taq'uiñ tsa' bʌ tempʌyi cha'añ jiñi ñaxan bʌ alʌlob ti' tojlel israelob, jiñʌch 1,365 siclo che' bajche' añ i tojol jiñi taq'uiñ ti jiñi Ch'ujul bʌ Ajñibʌl.

⁵¹ Ti wi'il Moisés tsi' yʌq'ue Aarón yic'ot i yalobilob jiñi taq'uiñ che' bajche' lac Yum tsi' su'be.