Numeros 28 - Jiñi Tsiji' bʌ Wen T'añ cha'añ Estudio

Majtañʌl ti jujump'ejl q'uiñ

¹ Lac Yum tsi' pejca Moisés, tsi' su'be:

² “Su'beñob jiñi israelob: Mi caj la' ch'ʌmbeñon tilel c majtañ tac che' ti yorajlel, jiñi waj yic'ot c majtañ mu' bʌ la' pulbeñon xojocña bʌ i yujts'il mi cu'bin.”

³ “Che' ja'el mi caj a su'beñob: Jiñi pulbil bʌ majtañʌl mu' bʌ caj la' wʌq'ueñon jiñʌch iliyi: Cha'cojt tʌñʌme' mach bʌ i p'ajomalic añ jaxto bʌ jump'ejl i ja'bilel; jiñʌch pulbil bʌ majtañʌl cha'añ jujump'ejl q'uiñ.

⁴ Mi caj la' wʌc' juncojt tʌñʌme' che' ti sʌc'ajel, jiñi yam bʌ juncojt mi caj la' wʌc' che' mi' bʌjlel q'uiñ;

⁵ jiñi trigo bʌ majtañʌl, yom cha'p'ejl kilo wen juch'bil bʌ harina xajc'ubil bʌ yic'ot jump'ejl litro aceite loq'uem bʌ ti wen pets'bil bʌ i wut olivo.

⁶ Jiñʌch pulbil bʌ majtañʌl xojocña bʌ i yujts'il tsa' bʌ su'bentiyetla ya' ti wits i c'aba' Sinaí, che' bajche' pulbil bʌ i majtañ lac Yum.

⁷ Jiñi lʌmʌl bʌ majtañʌl, jiñʌch jump'ejl litro vino cha'añ jujuncojt tʌñʌme'. Jiñi vino mi caj la' bec' ya' ti Ch'ujul bʌ Ajñibʌl ti' tojlel lac Yum.

⁸ Mi caj la' tsʌnsan yam bʌ juncojt che' wolix ti bʌjlel q'uiñ; lajal mi caj la' wʌc' jiñi majtañʌl che' bajche' tsa' la' wʌc'ʌ che' ti sʌc'ajel yic'ot jiñi lʌmʌl bʌ majtañʌl. Jiñʌch pulbil bʌ c majtañ xojocña bʌ mi cu'bin.

Jiñi majtañʌl ti jujump'ejl semana yic'ot ti jujump'ejl uw

⁹ Che' ti' yorajlel c'aj-o, mi caj la' wʌq'ueñon cha'cojt tʌñʌme' am bʌ jump'ejl i ja'bilel mach bʌ i p'ajomalic, yic'ot jiñi trigo bʌ majtañʌl yom chʌmp'ejl kilo wen juch'bil bʌ harina xajc'ubil bʌ yic'ot olivo aceite, yic'ot lʌmʌl bʌ majtañʌl.

¹⁰ Jiñʌch jiñi pulbil bʌ majtañʌl yom bʌ mi' yʌjq'uel ti jujunyajl i yorajlel c'aj-o, che' ja'el yom mi la' wʌc' jiñi pulbil bʌ majtañʌl ti jujump'ejl q'uiñ yic'ot jiñi lʌmʌl bʌ majtañʌl.”

¹¹ “Che' ti' tejchibal tac jujump'ejl uw, mi caj la' wʌc' ti pulbil bʌ c majtañ cha'cojt tat wacax yic'ot juncojt tat tʌñʌme' yic'ot wuccojt tʌñʌme' am bʌ jujump'ejl i ja'bilel mach bʌ i p'ajomalic;

¹² yic'ot jiñi majtañʌl bʌ trigo cha'añ jujuncojt alʌ tat wacax, yom wʌcp'ejl kilo wen juch'bil bʌ harina xajc'ubil bʌ yic'ot olivo aceite; yic'ot jiñi majtañʌl bʌ trigo cha'añ jiñi tat tʌñʌme', yom chʌmp'ejl kilo harina wen chʌmeñ bʌ juch'bil xajc'ubil bʌ yic'ot olivo aceite,

¹³ yic'ot jiñi majtañʌl bʌ trigo mu' bʌ caj i yʌjq'uel cha'añ jujuncojt tʌñʌme', yom cha'p'ejl kilo harina wen chʌmeñ bʌ juch'bil xajc'ubil bʌ yic'ot olivo aceite. Jiñʌch pulbil bʌ c majtañ xojocña bʌ mi cu'bin.

¹⁴ Jiñi vino mu' bʌ i yʌjq'uel che' bajche' majtañʌl, yom cha'p'ejl litro cha'añ jujuncojt alʌ tat wacax, ojlil i cha'p'ejl litro cha'añ jujuncojt tat tʌñʌme' yic'ot jump'ejl litro cha'añ jujuncojt tʌñʌme'. Iliyi jiñʌch pulbil bʌ c majtañ yom bʌ mi' cʌq'uentel ti jujump'ejl uw c'ʌlʌl ti' jump'ejlel ja'b.

¹⁵ Che' ja'el mi caj la' wʌq'ueñon juncojt i tat chivo cha'añ i ñusʌntel mulil, yic'ot jiñi pulbil bʌ majtañʌl mu' bʌ la' wʌq'ueñon ti jujump'ejl q'uiñ yic'ot lʌmʌl bʌ majtañʌl.”

Majtañʌl tac cha'añ ch'ujul bʌ q'uiñijel tac

¹⁶ “Pero ti jiñi ñaxan bʌ uw, che' ti' chʌnlujump'ejlel tsic, jiñʌch i Pascua la' Yum,

¹⁷ yic'ot che' ti' jo'lujump'ejlel q'uiñ ti ili uw mi caj la' mel ch'ujul bʌ q'uiñijel: wucp'ejl q'uiñ mach yomic mi la' c'ux jiñi waj am bʌ i levadurajlel.

¹⁸ Ti jiñi ñaxan bʌ q'uiñ yom ch'ujul bʌ tempa bʌ: mach yomic mi la' cha'len e'tel.

¹⁹ Mi caj la' wʌq'ueñon pulbil tac bʌ c majtañ: Cha'cojt alʌ tat wacax, juncojt tat tʌñʌme', yic'ot wuccojt tʌñʌme' añ jaxto bʌ jump'ejl i ja'bilel, mach bʌ i p'ajomalic.

²⁰ Jiñi majtañʌl bʌ harina xajc'ubil bʌ yic'ot olivo aceite, yom wʌcp'ejl kilo cha'añ jujuncojt alʌ tat wacax, yic'ot yom chʌmp'ejl kilo cha'añ jiñi tat tʌñʌme',

²¹ yic'ot yom cha'p'ejl kilo cha'añ jujuncojt tʌñʌme', wuccojt tʌñʌme' ti' pejtelel.

²² Che' ja'el yom juncojt tat chivo cha'añ i tojol la' mul cha'añ uts'at mi la' wajñel yic'oton.

²³ Mi caj la' wʌc' ili majtañʌl yic'ot jiñi pulbil bʌ majtañʌl mu' bʌ la' wʌc' ti jujump'ejl sʌc'ajel ti jujump'ejl q'uiñ.

²⁴ Che' ja'el mi caj la' wʌc' ti jujump'ejl q'uiñ c'ʌlʌl ti wucp'ejlel q'uiñ, waj cha'añ i bʌl ñʌc'ʌl yic'ot majtañʌl mu' bʌ i pulel, xojocña bʌ mi cu'bin, yic'ot ja'el jiñi majtañʌl mu' bʌ i laj pulel ti jujump'ejl q'uiñ yic'ot jiñi lʌmʌl bʌ majtañʌl.

²⁵ Che' ti' wucp'ejlel q'uiñ, yom mi yujtel ch'ujul bʌ tempa bʌ, mach yomic mi la' cha'len e'tel.”

²⁶ “Che' ja'el, che' mi la' melben i q'uiñilel ñaxan bʌ i wut la' pʌc'ʌb, yom mi la' wʌq'ueñon jiñi ñaxan bʌ i wut la' pʌc'ʌb tac che' ti q'uiñijel mu' bʌ la' mel ti' wucp'ejlel semana, yom ch'ujul bʌ tempan bʌ, mach yomic mi la' cha'len e'tel.

²⁷ Mi caj la' wʌq'ueñon pulbil bʌ c majtañ xojocña bʌ mi cu'bin, yom cha'cojt alʌ tat wacax, yic'ot juncojt tat tʌñʌme', yic'ot wuccojt tʌñʌme' añ jaxto bʌ jujump'ejl i ja'bilel.

²⁸ Jiñi c majtañ bʌ harina wen chʌmeñ bʌ juch'bil xajc'ubil bʌ yic'ot olivo aceite, yom wʌcp'ejl kilo cha'añ jujuncojt alʌ tat wacax yic'ot chʌmp'ejl kilo cha'añ jiñi tat tʌñʌme',

²⁹ yic'ot cha'p'ejl kilo cha'añ jujuncojt jiñi wuccojt tʌñʌme'.

³⁰ Che' ja'el yom juncojt tat chivo cha'añ i ñusʌntel la' mul.

³¹ Mi caj la' wʌc' pejtelel ili majtañʌl, yic'ot jiñi pulbil bʌ majtañʌl mu' bʌ la' wʌq'ueñon ti jujump'ejl q'uiñ yic'ot jiñi majtañʌl tac, yic'ot jiñi lʌmʌl tac bʌ majtañʌl. Jiñi alʌc'ʌl tac mu' bʌ caj la' wʌc' mach yomic i p'ajomal.”