Numeros 27 - Jiñi Tsiji' bʌ Wen T'añ cha'añ Estudio

Xch'oc bʌ i yalobilob Zelofehad

¹ Tsi' lʌc'tesayob i bʌ jiñi xch'oc bʌ i yalobilob Zelofehad i yalobil bʌ Hefer, i yalobil bʌ Galaad, i yalobil bʌ Maquir, i yalobil bʌ Manasés, i pi'ʌlob Manasés i yalobil bʌ José. I c'aba' jiñi xch'octacob jiñʌch Maala, Noa, Hogla, Milca, yic'ot Tirsa.

² Tsa' tiliyob ti' tojlel Moisés yic'ot ti' tojlel jiñi motomaj Eleazar, ti' tojlel jiñi año' bʌ ñuc bʌ i ye'tel yic'ot ti' tojlel pejtelel israelob, che' ya'añob ti ti' jiñi Tabernáculo ba' mi' tempañob i bʌ, tsi' yʌlʌyob:

³ “Jiñi c tat lojon tsa' chʌmiyob ya' ti' tiquiñal lum. Ma'añic tsi' yotsayob i bʌ che' bʌ tsi' contrajiyob lac Yum jiñi Coré, pero cha'añʌch i bajñel mul tsa' chʌmi, yic'ot ma'añic ch'itoñ bʌ i yalobilob.

⁴ ¿Chucoch tsa' yajpi i c'aba' jiñi c tat lojon ti' tojlel i pi'ʌlob? ¿Cha'añ jach ba ma'añic ch'itoñ bʌ i yalobilob? Aq'ueñon lojon c lum ja'el yic'ot i yerañob c tat lojon.”

⁵ Moisés tsa' majli i c'ajtiben lac Yum mi che'ʌch yom.

⁶ Lac Yum tsi' jac'be Moisés:

⁷ “Uts'atʌch che' bajche' woli' yʌlob jiñi xch'oc bʌ i yalobilob Zelofehad. Mi caj a wʌq'ueñob i lum ti' tojlel i yerañob i tat, yic'ot mi caj a wʌq'ueñob ja'el jiñi lum i cha'añ bʌ i tat.

⁸ Jiñi israelob mi caj a su'beñob: Che' añ majqui mi' chʌmel che' ma'añic ch'itoñ bʌ i yalobilob, mi caj i yʌq'uentel jiñi lum xch'oc bʌ i yalobil.

⁹ Mi ma'añic xch'oc bʌ i yalobil, yom mi' cʌytʌl ti' wenta i yeran;

¹⁰ mi ma'añic i yerañob, mi' cʌytʌl ti' wenta i yeran i tat.

¹¹ Mi ma'añic i yeran i tat, mi' cʌytʌl ti' wenta i ñajti cʌñʌ bʌ, che' jiñi i cha'añix jiñi lum.” Ili mandar cha'añ lum, i cha'añobʌch israelob, che' bajche' lac Yum tsi' su'be Moisés.

Josué, jiñʌch i q'uexol Moisés

¹² Lac Yum tsi' su'be Moisés: —Letsen ti ili wits i c'aba' Abarim, ya'i mi caj a ñajti q'uel jiñi lum woli bʌ cʌq'uen israelob.

¹³ Che' bʌ ujtemix a q'uel, mi caj a pʌjyel majlel ba'añ a ñojte'elob, che' bajche' tsa' pʌjyi majlel Aarón a wʌscun.

¹⁴ Come tsa' ñusʌbeyon c t'añ ya' ti' tiquiñal lum i c'aba' Zin, ba' tsi' contrajiyoñob jiñi israelob, che' ma'añic tsa' wʌc'ʌ ti cʌjñel cha'añ ch'ujulon ti' tojlel israelob che' bʌ tsa' loq'ui ja' ti xajlel. Jiñʌch jiñi ja' ya' ba' tsi' cha'leyob contra t'añ ya' ti Cades, ti' tiquiñal lum i c'aba' Zin.

¹⁵ Che' jiñi Moisés tsi' jac'be lac Yum:

¹⁶ —C Yum, i Dioset bʌ pejtelel wiñicob x'ixicob, yom ma' wa'chocon juntiquil wiñic ti' tojlel israelob

¹⁷ mu' bʌ i loq'uel majlel yic'ot mu' bʌ i yochel tilel ti' tojlelob, mu' bʌ i loc'sañob yic'ot mu' bʌ i yotsañob majlel, cha'añ i tejclum lac Yum ma'añic mi' yajñelob che' bajche' tʌñʌme' mach bʌ añic xcʌntaya i cha'añ.

¹⁸ Lac Yum tsi' su'be Moisés: —Pʌyʌ Josué i yalobil bʌ Nun, wiñic am bʌ i cha'añ quEspíritu ti' pusic'al, ac'ʌ a c'ʌb ti' jol.

¹⁹ Pʌyʌ majlel ba'añ jiñi motomaj Eleazar ti' wut pejtelel israelob cha'añ ma' wʌq'uen i ye'tel ti' wutob.

²⁰ Aq'uen a ñuclel ti ye'tel, cha'añ pejtelel jiñi israelob mi' jac'beñob i t'añ.

²¹ Jiñʌch mu' bʌ caj i wa'tʌl ti' tojlel jiñi motomaj Eleazar yic'ot mi caj i yu'bin ti Urim bajche' com c mel. Ti' t'añ Josué mi caj i loq'uelob yic'ot ti' t'añ mi caj i yochelob; Josué yic'ot pejtelel israelob temel mi caj i yajñelob.

²² Moisés tsi' mele che' bajche' tsi' su'be lac Yum, jiñi cha'añ tsi' pʌyʌ majlel Josué ba'añ jiñi motomaj Eleazar ti' wut pejtelel israelob.

²³ Tsi' yʌc'ʌ i c'ʌb ti' jol, tsi' wa'choco ti' ye'tel che' bajche' lac Yum tsi' su'be.