Numeros 26 - Jiñi Tsiji' bʌ Wen T'añ cha'añ Estudio

Tsa' tsijqui israelob che' ya'añob ti Moab

¹ Che' lajmeñix jiñi chʌmel, lac Yum tsa' caji i pejcan Moisés yic'ot Eleazar, i yalobil jiñi motomaj Aarón, tsi' su'be:

² “Tsiquiyob pejtelel israelob, añobix bʌ junc'al i ja'bilel c'ʌlʌl ti' ñoxlel, che' bajche' jaytiquil añob ti' mojt ti' mojt, ti' pejtelel muq'uix bʌ i mejlelob ti majlel ti guerra.”

³ Moisés yic'ot jiñi motomaj Eleazar tsi' cha'leyob t'añ yic'ot israelob che' ya'añob ti' lum Moab, ya' ti' t'ejl Jordán ja' am bʌ ti' tojel Jericó, tsi' su'beyob:

⁴ “Ts'ijbubenla i c'aba' ti juñ pejtelel wiñicob añobix bʌ junc'al i ja'bilel c'ʌlʌl ti' ñoxlel, che' bajche' lac Yum tsi' su'be Moisés.” Jiñi israelob tsa' bʌ loq'uiyob ti' lumal Egipto, jiñobʌch:

⁵ Rubén: jiñʌch ascuñʌl bʌ i yalobil Israel; i p'olbal Rubén jiñobʌch: Enoc yic'ot i pi'ʌlob mu' bʌ i pejcʌntelob ti enoquitajob; Falú yic'ot i pi'ʌlob mu' bʌ i pejcʌntelob ti faluitajob;

⁶ Hezrón yic'ot i pi'ʌlob mu' bʌ i pejcʌntelob ti hezronitajob; Carmi yic'ot i pi'ʌlob mu' bʌ i pejcʌntelob ti carmitajob.

⁷ Ti' pejtelel jiñi rubenitajob tsa' bʌ ochiyob ti juñ jiñʌch 43,730.

⁸ I yalobilob Falú jiñʌch: Eliab.

⁹ I yalobilob Eliab jiñobʌch: Nemuel, Datán yic'ot Abiram. Jiñi Datán yic'ot Abiram jiñobʌch jiñi tsa' bʌ i temeyob i t'añ yic'ot Coré temel yic'ot i pi'ʌlob, che' bʌ tsi' contrajiyob Moisés yic'ot Aarón, che' bʌ Coré tsi' contraji lac Yum.

¹⁰ Jiñi lum tsi' cawa i yej yilal, tsi' mʌsayob temel yic'ot Coré; che'ʌch tsa' jiliyob jiñi junmojt, che' bʌ tsa' puliyob ti c'ajc jiñi lujunc'al yic'ot lujuntiquil i yuxc'al (250) wiñicob, cha'añ mi' cʌñob pañimil.

¹¹ Pero i yalobilob Coré ma'añic tsa' chʌmiyob.

¹² I yalobilob Simeón ti' mojt ti' mojt jiñobʌch: Nemuel yic'ot i pi'ʌlob mu' bʌ i pejcʌntelob ti nemuelitajob; Jamín yic'ot i pi'ʌlob mu' bʌ i pejcʌntelob ti jaminitajob; Jaquín yic'ot i pi'ʌlob mu' bʌ i pejcʌntelob ti jaquinitajob;

¹³ Zera yic'ot i pi'ʌlob mu' bʌ i pejcʌntelob ti zeraítajob; Saúl yic'ot i pi'ʌlob mu' bʌ i pejcʌntelob ti saulitajob.

¹⁴ Ti' pejtelel jiñi simeonitajob jiñʌch 22,200.

¹⁵ I yalobilob Gad ti' mojt ti' mojt jiñobʌch: Zefón yic'ot i pi'ʌlob mu' bʌ i pejcʌntelob ti zefonitajob; Hagui yic'ot i pi'ʌlob mu' bʌ i pejcʌntelob ti haguitajob; Suni yic'ot i pi'ʌlob mu' bʌ i pejcʌntelob ti sunitajob;

¹⁶ Ozni yic'ot i pi'ʌlob mu' bʌ i pejcʌntelob ti oznitajob; Eri yic'ot i pi'ʌlob mu' bʌ i pejcʌntelob ti eritajob;

¹⁷ Arod yic'ot i pi'ʌlob mu' bʌ i pejcʌntelob ti aroditajob; Areli yic'ot i pi'ʌlob mu' bʌ i pejcʌntelob ti arelitajob.

¹⁸ Ti' pejtelel i p'olbal Gad tsa' bʌ ochiyob ti juñ jiñʌch 40,500.

¹⁹ I yalobilob Judá jiñobʌch: Er yic'ot Onán; jiñi Er yic'ot Onán tsa' chʌmiyob ya' ti' lumal Canaán.

²⁰ I yalobilob Judá, ti' mojt ti' mojt jiñobʌch: Sela yic'ot i pi'ʌlob mu' bʌ i pejcʌntelob ti selaítajob; Fares yic'ot i pi'ʌlob mu' bʌ i pejcʌntelob ti faresitajob; Zera yic'ot i pi'ʌlob mu' bʌ i pejcʌntelob ti zeraítajob.

²¹ I yalobilob Fares jiñobʌch: Hezrón yic'ot i pi'ʌlob mu' bʌ i pejcʌntelob ti hezronitajob; Hamul yic'ot i pi'ʌlob mu' bʌ i pejcʌntelob ti hamulitajob.

²² Ti' pejtelel i p'olbal Judá tsa' bʌ ochiyob ti juñ, jiñʌch 76,500.

²³ I yalobilob Isacar ti' mojt ti' mojt jiñobʌch: Tola yic'ot i pi'ʌlob mu' bʌ i pejcʌntelob ti tolaítajob; Fúa yic'ot i pi'ʌlob mu' bʌ i pejcʌntelob ti funitajob;

²⁴ Jasub yic'ot i pi'ʌlob mu' bʌ i pejcʌntelob ti jasubitajob; Simrón yic'ot i pi'ʌlob mu' bʌ i pejcʌntelob ti simronitajob.

²⁵ Ti' pejtelel i p'olbal Isacar tsa' bʌ ochiyob ti juñ jiñʌch 64,300.

²⁶ I yalobilob Zabulón ti' mojt ti' mojt jiñobʌch: Sered yic'ot i pi'ʌlob mu' bʌ i pejcʌntelob ti sereditajob; Elón yic'ot i pi'ʌlob mu' bʌ i pejcʌntelob ti elonitajob; Jahleel yic'ot i pi'ʌlob mu' bʌ i pejcʌntelob ti jahleelitajob.

²⁷ Ti' pejtelel jiñi zabulonitajob tsa' bʌ ochiyob ti juñ, jiñʌch 60,500.

²⁸ I yalobilob José ti' mojt ti' mojt: Jiñobʌch: Manasés yic'ot Efraín.

²⁹ I yalobil Manasés jiñʌch Maquir yic'ot i pi'ʌlob mu' bʌ i pejcʌntelob ti maquiritajob; yic'ot i yalobil Maquir jiñʌch Galaad yic'ot i pi'ʌlob mu' bʌ i pejcʌntelob ti galaaditajob.

³⁰ I yalobilob Galaad jiñobʌch: Jezer yic'ot i pi'ʌlob mu' bʌ i pejcʌntelob ti jezeritajob; Helec yic'ot i pi'ʌlob mu' bʌ i pejcʌntelob ti helequitajob;

³¹ Asriel yic'ot i pi'ʌlob mu' bʌ i pejcʌntelob ti asrielitajob; Siquem yic'ot i pi'ʌlob mu' bʌ i pejcʌntelob ti siquemitajob;

³² Semida yic'ot i pi'ʌlob mu' bʌ i pejcʌntelob ti semidaítajob; Hefer yic'ot pi'ʌlob mu' bʌ i pejcʌntelob ti heferitajob.

³³ Zelofehad i yalobil bʌ Hefer ma'añic ch'itoño' bʌ i yalobil cojach xch'octaco' bʌ. I c'aba'ob jiñi xch'octaco' bʌ i yalobilob Zelofehad, jiñobʌch: Maala, Noa, Hogla, Milca yic'ot Tirsa.

³⁴ Ti pejtelel i p'olbal Manasés tsa' bʌ ochiyob ti juñ jiñʌch 52,700.

³⁵ I yalobilob Efraín ti' mojt ti' mojt jiñobʌch: Sutela yic'ot i pi'ʌlob mu' bʌ i pejcʌntelob ti sutelaítajob; Bequer yic'ot i pi'ʌlob mu' bʌ i pejcʌntelob ti bequeritajob; Tahán yic'ot i pi'ʌlob mu' bʌ i pejcʌntelob ti tahanitajob.

³⁶ I yalobil Sutela jiñʌch Erán yic'ot i pi'ʌlob mu' bʌ i pejcʌntelob ti eranitajob.

³⁷ Ti' pejtelel i p'olbal Efraín tsa' bʌ ochiyob ti juñ jiñʌch 32,500. Jiñobʌch i yalobilob José ti' mojt ti' mojt.

³⁸ I yalobilob Benjamín ti' mojt ti' mojt jiñobʌch: Bela yic'ot i pi'ʌlob mu' bʌ i pejcʌntelob ti belaítajob; Asbel yic'ot i pi'ʌlob mu' bʌ i pejcʌntelob ti asbelitajob; Ahiram yic'ot i pi'ʌlob mu' bʌ i pejcʌntelob ti ahiramitajob;

³⁹ Sufám yic'ot i pi'ʌlob mu' bʌ i pejcʌntelob ti sufamitajob; Hufam yic'ot i pi'ʌlob mu' bʌ i pejcʌntelob ti hufamitajob.

⁴⁰ I yalobilob Bela jiñobʌch: Ard yic'ot Naamán; Ard yic'ot i pi'ʌlob mu' bʌ i pejcʌntelob ti arditajob; Naamán yic'ot i pi'ʌlob mu' bʌ i pejcʌntelob ti naamitajob.

⁴¹ Ti' pejtelel i p'olbal Benjamín ti' mojt ti' mojt tsa' bʌ ochiyob ti juñ, jiñʌch 45,600.

⁴² I yalobilob Dan ti' mojt ti' mojt jiñobʌch: Súham yic'ot i pi'ʌlob mu' bʌ i pejcʌntelob ti suhamitajob. Jiñobʌch i p'olbal i yalobilob Dan.

⁴³ Ti pejtelel jiñi suhamitajob tsa' bʌ ochiyob ti juñ jiñʌch 64,400.

⁴⁴ I yalobilob Aser ti' mojt ti' mojt jiñobʌch: Imna yic'ot i pi'ʌlob mu' bʌ i pejcʌntelob ti imnitajob; Isúi yic'ot i pi'ʌlob mu' bʌ i pejcʌntelob ti isuitajob; Bería yic'ot i pi'ʌlob mu' bʌ i pejcʌntelob ti beriaítajob.

⁴⁵ I yalobilob Bería jiñobʌch: Heber yic'ot i pi'ʌlob mu' bʌ i pejcʌntelob ti heberitajob; Malquiel yic'ot i pi'ʌlob mu' bʌ i pejcʌntelob ti malquielitajob.

⁴⁶ I c'aba' jiñi xch'oc bʌ i yalobil Aser jiñʌch Sera.

⁴⁷ Ti' pejtelel i p'olbal Aser jiñi tsa' bʌ ochiyob ti juñ jiñʌch 53,400.

⁴⁸ I yalobilob Neftalí ti' mojt ti' mojt jiñobʌch: Jahzeel yic'ot i pi'ʌlob mu' bʌ i pejcʌntelob ti jahzeelitajob; Guni yic'ot i pi'ʌlob mu' bʌ i pejcʌntelob ti gunitajob;

⁴⁹ Jezer yic'ot i pi'ʌlob mu' bʌ i pejcʌntelob ti jezeritajob; Silem yic'ot i pi'ʌlob mu' bʌ i pejcʌntelob ti silemitajob.

⁵⁰ Ti' pejtelel i p'olbal Neftalí che' bajche' añob ti' mojt ti' mojt tsa' bʌ ochiyob ti juñ, jiñʌch 45,400.

⁵¹ Ti pejtelel jiñi wiñicob ti Israel tsa' bʌ ts'ijbubentiyob i c'aba' ti juñ jiñʌch: 601,730.

Mandar cha'añ che' bajche' i t'oxol jiñi lum

⁵² Lac Yum tsi' pejca Moisés tsi' su'be:

⁵³ “Mi caj i t'oxtʌl jiñi lum cha'añ mi' ch'ʌmob che' bajche' jaytiquilob ti jujunmojt tsa' bʌ ochiyob i c'aba' ti juñ.

⁵⁴ Jiñi ñumen ca'bʌlo' bʌ, ñuc ma' wʌq'ueñob jiñi lum; jiñi ts'ita'ob jach bʌ, i p'isol jach mi' tajob ja'el. Ti jujunmojt yom mi yʌq'ueñtelob i lum che' bajche' jaytiquil ts'ijbubilob i c'aba' ti juñ.

⁵⁵ Pero cha'añ ti' t'oxtʌl jiñi lum mi caj i cha'leñob yajcaya ti alas; mi caj i ch'ʌmob jiñi lum che' bajche' jaytiquil ts'ijbubilob i c'aba' ti jujunmojt xchumtʌl.

⁵⁶ Mi caj i cha'leñob yajcaya ti alas jiñi mu' bʌ caj i ch'ʌm ti ñuc i lum yic'ot jiñi mu' bʌ caj i ch'ʌm ti ch'och'oc.”

I tsicol i p'olbal Leví

⁵⁷ I yalobilob Leví tsa' bʌ ochiyob ti juñ ti' mojt ti' mojt, jiñobʌch: Gersón yic'ot i pi'ʌlob mu' bʌ i pejcʌntelob ti gersonitajob; Coat yic'ot i pi'ʌlob mu' bʌ i pejcʌntelob ti coatitajob; Merari yic'ot i pi'ʌlob mu' bʌ i pejcʌntelob ti meraritajob.

⁵⁸ I pi'ʌlob levijob, jiñobʌch: libnitajob, hebronitajob, mahlitajob, musitajob, coreítajob. Amram i yalobilʌch Coat.

⁵⁹ I yijñam Amram jiñʌch i c'aba' Jocabed, xch'oc bʌ i yalobil Leví, tsa' bʌ i yila pañimil ti Egipto. Amram yic'ot Jocabed tsi' yʌc'ʌyob ti pañimil i yalobilob jiñobʌch: Aarón, Moisés yic'ot i chich i c'aba' María.

⁶⁰ I yalobilob Aarón, jiñobʌch: Nadab, Abiú, Eleazar yic'ot Itamar.

⁶¹ Pero Nadab yic'ot Abiú tsa' chʌmiyob che' bʌ tsi' yotsayob yam bʌ c'ajc ti' tojlel lac Yum ya' ti pulʌntib.

⁶² Ti' pejtelel ch'itoñ bʌ i yalobilob jiñi levijob añobix bʌ jump'ejl uw c'ʌlʌl ti' ñoxlel tsa' bʌ ts'ijbubentiyob i c'aba' ti juñ, jiñobʌch 23,000; come ma'añic tsa' ch'ʌjmiyob ti tsic yic'ot yaño' bʌ i pi'ʌlob ti Israel, come ma'añic mi caj i tajob i lum ti' tojlel israelob.

Caleb yic'ot Josué cuxulob to c'ʌlʌl che' bʌ tsa' loq'uiyob ti Egipto

⁶³ Jiñobʌch tsa' bʌ tsijquiyob ti' tojlel Moisés yic'ot jiñi motomaj Eleazar che' bʌ ya'añob ti' lum Moab, ti' t'ejl Jordán ja', am bʌ ti' tojel Jericó.

⁶⁴ Ili wiñicob maxto añic tsa' tsijquiyob ti' tojlel Moisés yic'ot jiñi motomaj Aarón che' bʌ tsi' tsiquiyob jiñi israelob ya' ti tiquiñal lum i c'aba' Sinaí.

⁶⁵ Come lac Yum tsi' wʌn alʌ ti' tojlelob: “Mi caj i chʌmelob ya' ti' tiquiñal lum,” jiñi cha'añ ma'añic tsa' cʌle mi juntiquilic, cojach Caleb i yalobil Jefone yic'ot Josué i yalobil Nun.