Numeros 25 - Jiñi Tsiji' bʌ Wen T'añ cha'añ Estudio

Jiñi israelob añob ti Baal-peor

¹ Che' ya'añob israelob ti Sitim, tsa' cajiyob ti ts'i'lel yic'ot jiñi xch'octaco' bʌ i yalobilob jiñi año' bʌ ti Moab,

² che' ja'el tsa' pʌjyiyob israelob che' bʌ tsi' pulbeyob i majtañ i dios tac; jiñi israelob tsi' cha'leyob we'el, uch'el yic'ot tsi' ñocchocoyob i bʌ ti' tojlel i dioste'ob.

³ Che'ʌch tsa' caji i ch'ujutesañob Baal-peor jiñi israelob, jiñi cha'añ lac Yum tsa' mich'a ti' tojlel israelob.

⁴ Lac Yum tsi' su'be Moisés: “Tempan pejtelel xñoxob año' bʌ ñuc bʌ i ye'tel ti' tojlel israelob cha'añ ma' jich'ob tic tojlel che' ti q'uiñil, cha'añ mi' lajmel c mich'ajel ti' tojlel israelob.”

⁵ Moisés tsi' su'be jiñi juezob ti Israel: “Tsʌnsanla pejtelel wiñicob am bʌ ti la' wenta tsa' bʌ i ch'ujutesayob Baal-peor.”

⁶ Juntiquil Israel tsi' pʌyʌ tilel juntiquil x'ixic ch'oyol bʌ ti Madián ya' ba'añ i pi'ʌlob, ti' wut Moisés yic'ot ti' wut pejtelel israelob, che' bʌ woliyob ti uq'uel jiñi israelob ya' ti ti' jiñi Tabernáculo ba' mi' tempañob i bʌ.

⁷ Che' bʌ tsi' q'uele Finees i yalobil Eleazar, i yalobil jiñi motomaj Aarón, tsa' ch'ojyi ti' tojlel israelob, tsi' chucu junts'ijt lanza ti' c'ʌb,

⁸ tsi' tsajca majlel jiñi wiñic Israel bʌ c'ʌlʌl ti' mal i yotot, tsi' sʌl jec'beyob i ñʌc' ti' cha'ticlelob, jiñi wiñic Israel bʌ yic'ot jiñi x'ixic. Che' jiñi tsa' tijq'uiyob ti chʌmel jiñi israelob.

⁹ Jiñi tsa' bʌ chʌmiyob cha'añ ti' caj jiñi wocol jiñʌch chʌmp'ejl i cha'c'al ti mil (24,000) wiñicob.

¹⁰ Che' jiñi lac Yum tsi' pejca Moisés, tsi' su'be:

¹¹ “Finees i yalobil Eleazar, i yalobil bʌ jiñi motomaj Aarón, tsa'ix i yʌc'ʌ ti lajmel c mich'ajel ti' tojlel israelob, come tsi' pʌsʌ i mich'ajel ti' tojlelob che' bajche' joñon; jiñi cha'añ ma'añix tsa' c chʌn jisa israelob tic mich'ajel.

¹² Jiñi cha'añ su'ben Finees: Joñon woli cʌc' xuc'ul bʌ c t'añ ti' tojlel cha'añ ñʌch'ʌl mi caj cajñel yic'ot.

¹³ Mi caj cotsan ti motomaj yic'ot i yalobilob ti pejtelel ora, jiñi xuc'ul bʌ c t'añ cha'añ i motomajil xuc'ulʌch, come tsi' pʌsʌ i mich'ajel cha'añon yic'ot tsi' yʌc'ʌ i tojol mulil cha'añ israelob.”

¹⁴ I c'aba' jiñi wiñic tsa' bʌ tsʌnsʌnti yic'ot jiñi x'ixic loq'uem bʌ ti madián, jiñʌch Zimri i yalobil Salu, am bʌ i ye'tel ti' p'olbal Simeón.

¹⁵ I c'aba' jiñi x'ixic tsa' bʌ tsʌnsʌnti loq'uem bʌ ti Madián, jiñʌch Cozbi, xch'oc bʌ i yalobil Zur, ñuc bʌ i ye'tel ti Madián.

¹⁶ Lac Yum tsi' pejca Moisés, tsi' su'be:

¹⁷ “Cha'lenla guerra ti' tojlel jiñi madiañob yic'ot laj tsʌnsanla,

¹⁸ come tsi' socoyob ca'bʌl israelob ti mayajax bʌ t'añ cha'añ mi' ch'ujutesañob Baal-peor, yic'ot che' bajche' tsi' mele Cozbi xch'oc bʌ i yalobil jiñi ñuc bʌ i ye'tel ti Madián, x'ixic bʌ i yerañob, tsa' bʌ tsʌnsʌnti che' bʌ woli ti chʌmel israelob cha'añ ti' caj i ch'ujutesʌntel Baal-peor.”