Numeros 23 - Jiñi Tsiji' bʌ Wen T'añ cha'añ Estudio

¹ Balaam tsi' su'be Balac: —Melbeñon wucp'ejl pulʌntib ilayi, yic'ot chajpʌbeñon wuccojt alʌ tat wacax, yic'ot wuccojt tat tʌñʌme'.

² Balac tsa' caji i mel che' bajche' tsi' su'be Balaam, temel tsi' yʌc'ʌyob jujuncojt alʌ tat wacax yic'ot jujuncojt tat tʌñʌme' ti jujump'ejl pulʌntib.

³ Che' jiñi Balaam tsi' su'be Balac: —Wa'i' ti' t'ejl jiñi majtañʌl woli bʌ a wʌc', joñon mic majlel; tic'ʌl mux i tilel i tajon lac Yum; chuqui jach mi' su'beñon lac Yum, mu' to c su'beñet. Tsa' majli Balaam ti jump'ejl wits ba' jochol.

⁴ Che' jiñi tsa' tili lac Yum i taj Balaam, tsi' su'be: —Wucp'ejl pulʌntib tsa' c wa'chocobeyet, ti jujump'ejl pulʌntib tsa' c pulu juncojt alʌ tat wacax yic'ot tat tʌñʌme'.

⁵ Lac Yum tsi' yʌq'ue t'añ ti yej Balaam, tsi' su'be: —Cha' cucu ba'añ Balac, su'ben jiñi t'añ tsa' bʌ c su'beyet.

⁶ Balaam tsa' cha' majli ba'añ Balac, tsi' taja ti' t'ejl pulʌntib ba' tsi' puluyob majtañʌl, temel yic'ot jiñi ñuco' bʌ i ye'tel ti Moab.

⁷ Jiñi cha'añ Balaam tsa' caji ti alt'añ: “Ti Aram tsi' pʌyʌyon tilel Balac, rey bʌ ti Moab, c'ʌlʌl ya' ti wits ti' tojel i pasibal q'uiñ. ¡La', cha'añ ma' ch'ʌc Jacob; la', cha'añ ma' wʌq'uen wocol israelob!

⁸ ¿Chucoch mi caj c ch'ʌcob che' bʌ Dios ma'añic woli i yʌq'ueñob wocol? ¿Chucoch mi caj cʌq'ueñob wocol che' bʌ lac Yum ma'añic woli' i yʌq'ueñob wocol?

⁹ Come ya' ti' pam jiñi chañ tac bʌ xajlel mi' mejlel j q'uelob, ya' ti chañ tac bʌ wits mi' mejlel j q'uelob; jiñʌch jump'ejl tejclum chumul bʌ ti' bajñelil, yic'ot ma'añic mi' xʌbob i bʌ yic'ot yam bʌ tejclum tac.

¹⁰ ¿Majqui mi' mejlel i tsicben i p'olbal Jacob o i tsicol lamital israelob? La' chʌmicon che' bajche' mi' chʌmelob jiñi tojo' bʌ, yic'ot la' jilicon che' bajche' mi' jilelob ja'el.”

¹¹ Che' jiñi Balac tsi' su'be Balaam: —¿Chuqui tsa' mele tic tojlel? Tsa' c pʌyʌyet tilel cha'añ ma' ch'ʌc j contrajob, pero jatet tsa'ix a wʌq'ueyob i yutslel a t'añ.

¹² Balaam tsi' jac'ʌ, tsi' su'be: —¿Mach ba jiñic jach yom mi cʌl jiñi t'añ mu' bʌ i su'beñon lac Yum?

¹³ Jiñi cha'añ tsi' su'be Balac: —Ti wocol bʌ t'añ mic su'beñet cha'añ yom ma' majlel quic'ot ti yam bʌ wits ba' mi' mejlel a q'uel lamital, anquese mach ti' pejtelelobix ma' taj a q'uel jiñi israelob; ya'i mi caj a ch'ʌcob.

¹⁴ Che' jiñi Balac tsi' pʌyʌ majlel Balaam ya' ti jamil i c'aba' Zofim, ya' ti' pam jiñi chañ bʌ wits i c'aba' Pisga. Ya'i tsi' mele wucp'ejl pulʌntib, tsi' yʌc'ʌ jujuncojt alʌ tat wacax yic'ot tat tʌñʌme' ti jujump'ejl jiñi pulʌntib.

¹⁵ Che' jiñi Balaam tsi' su'be Balac: —Wa'i' ti' t'ejl ili pulʌntib ba' woli a wʌc' pulbil bʌ majtañʌl, joñon mic majlel cu'bin chuqui mi' yʌl Dios ya'i.

¹⁶ Lac Yum tsa' tili i taj Balaam, tsi' su'be chuqui yom mi' yʌl, tsi' yʌlʌ: —Cha' cucux ba'añ Balac, su'ben che' bajche' iliyi.

¹⁷ Balaam tsa' c'oti i taj Balac yic'ot jiñi año' bʌ i ye'tel ti Moab, wa'alob ti' t'ejl ba'añ jiñi pulbil bʌ majtañʌl. Balac tsi' c'ajtibe: —¿Chuqui tsi' yʌlʌ lac Yum?

¹⁸ Che' jiñi Balaam tsa' caji ti alt'añ: “Balac, ch'ojyen yic'ot u'bin ili t'añ; ñʌch'tʌbeñon c t'añ i yalobilet bʌ Zipor:

¹⁹ Mach lajalic Dios bajche' wiñic yujil bʌ lot, mi i yalobilic wiñic mu' bʌ i q'uextan i t'añ. ¿Am ba chuqui mi yʌl mach bʌ añic mi' mel? ¿Am ba xuc'ul bʌ i t'añ mach bʌ añic mi' ts'ʌctesan?

²⁰ Tsa' su'bentiyon cha'añ mi cʌq'ueñob i yutslel c t'añ jiñi israelob; Dios tsi' yʌq'ueyob i yutslel i t'añ, jiñi cha'añ mach mejlic j q'uextan.

²¹ Dios ma'añic mi' tajbeñob i mul i p'olbal Jacob, yic'ot ma'añic mi' q'uelbeñob i jontolil jiñi israelob. Lac Yum, i Dios, ya'añ yic'otob, mi' ñuq'uesañob che' bajche' Rey.

²² Dios tsi' pʌyʌyob loq'uel ti Egipto, come p'ʌtʌl che' bajche' xmate'el wacax.

²³ Come ma'añic xch'ʌcojelob mu' bʌ mejlel i contrajin Jacob, mi jiñic mu' bʌ i to'ol ña'tʌbeñob isujmlel pañimil mi' mejlel i contrajin Israel. Che' bajche' wʌle, mi caj i yʌjlel ti' tojlel Jacob jiñi Israel: ¡Chuqui tsi' mele Dios!

²⁴ Jiñi israelob, mi' tejchelob che' bajche' bajlum, che' bajche' bajlum mi' chijtan i colojm. Ma'añic mi caj i pʌctʌl jinto mi' chuc i colojm, yic'ot jinto mi' japben i ch'ich'el jiñi tsa' bʌ i p'ul tsʌnsa.”

²⁵ Jiñi cha'añ Balac tsi' su'be Balaam: —Mi ma'añic ma' ch'ʌcob, mach a wʌq'ueñob i yutslel a t'añ ja'el.

²⁶ Balaam tsi' jac'ʌ, tsi' su'be Balac: —¿Mach ba tsa'ic c su'beyet cha'añ pejtelel jiñi t'añ mu' bʌ i su'beñon lac Yum, jiñi jach mi caj c su'b?

²⁷ Ti wi'il Balac tsi' cha' su'be Balaam: —Ti wocol t'añ mic su'beñet, conla ti yam bʌ ajñibʌl, tic'ʌl ya'i, Dios mi caj i q'uel ti uts'at cha'añ ma' ch'ʌcob jiñi israelob.

²⁸ Balac tsi' pʌyʌ majlel Balaam ti' pam chañ bʌ wits i c'aba' Peor, am bʌ ti' tojel i tiquiñal lum.

²⁹ Jiñi cha'añ Balaam tsi' su'be Balac: —Melbeñon ilayi wucp'ejl pulʌntib, yic'ot chajpʌbeñon wuccojt alʌ tat wacax yic'ot wuccojt tat tʌñʌme'.

³⁰ Balac tsi' mele che' bajche' tsi' su'be Balaam, tsi' yʌc'ʌ juncojt alʌ tat wacax yic'ot juncojt tat tʌñʌme' ti jujump'ejl pulʌntib.