Numeros 22 - Jiñi Tsiji' bʌ Wen T'añ cha'añ Estudio

3. TI' JOCTɅLEL MOAB ( 22.1—36.13 ) Balac tsi' choco ti pʌyol Balaam

¹ Jiñi israelob tsi' techeyob i xʌmbal, tsa' c'otiyob ti jijlel ti' lum Moab lʌc'ʌl bʌ ti Jordán, ya' ti' tojel Jericó.

² Tsi' q'uele Balac i yalobil Zipor pejtelel chuqui tsi' mele israelob ti' tojlel amorreojob,

³ che' jiñi tsa' wen cajiyob ti bʌq'uen jiñi año' bʌ ti Moab cha'añ ti' caj jiñi israelob wen ca'bʌlob. Tsa' wen caji i melob i pusic'al jiñi año' bʌ ti Moab cha'añ ti' caj jiñi israelob,

⁴ jiñi cha'añ tsi' su'beyob jiñi xñoxob año' bʌ ti Madián: “Wʌle jiñi israelob mi caj i jisañonla yic'ot pejtelel chuqui añ lac cha'añ ti lac joytʌlel, che' bajche' mi' xop c'ux jam jiñi tat wacax.” Balac i yalobil Zipor, che' rey ti Moab,

⁵ tsi' choco majlel wiñicob ti Pector ba'añ Balaam i yalobil Beor, am bʌ ti' t'ejl colem ja' i c'aba' Éufrates ya' ba' chumul i p'olbalob, cha'añ mi' pʌyob tilel Balaam. Jiñi wiñicob tsi' su'beyob: “Junmojt wiñicob x'ixicob tsa' bʌ loq'uiyob tilel ti Egipto, woli' mʌctañob ca'bʌl lum, tsa'ix juliyob ti chumtʌl tic tojel lojon.

⁶ Awocolic, yom ma' tilel ti ora cha'añ ma' ch'ʌc jiñi wiñicob x'ixicob, come ñumen p'ʌtʌlob tic tojlel lojon; tic'ʌl che' jiñi muc'ʌch i mejlel c mʌlben lojon cha'añ mic choc lojon loq'uel ti ili lum, come cujil muc'ʌch i taj i wenlel jiñi mu' bʌ a wʌq'uen i yutslel a t'añ, yic'ot jiñi mu' bʌ a ch'ʌc mi caj i taj wocol.”

⁷ Jiñi xñoxob año' bʌ i ye'tel ti Moab yic'ot ti Madián tsa' majliyob ba'añ Balaam yic'ot majtañʌl cha'añ ch'ʌcojel. Tsa' c'otiyob ba'añ Balaam, tsi' su'beyob i t'añ Balac.

⁸ Balaam tsi' jac'beyob: —Cʌlen to la wʌle ti ili ac'ʌlel, ijc'ʌl to mic su'beñetla chuqui mi' tsictesʌbeñon Dios. Jiñi cha'añ tsa' poj cʌleyob ti jiñi ac'ʌlel ti' yotot Balaam.

⁹ Che' jiñi tsa' tili Dios i pejcan Balaam, tsi' c'ajtibe: —¿Majquiyob ili wiñicob wʌ' bʌ añob a wic'ot?

¹⁰ Balaam tsi' jac'be Dios: —Jiñʌch chocbilo' bʌ tilel i cha'añ Balac i yalobil Zipor, i yum moabitajob, tsa' tili i su'beñoñob ili t'añ:

¹¹ “Junmojt wiñicob x'ixicob tsa' bʌ loq'uiyob tilel ti Egipto, woli' mʌctañob ca'bʌl lum. Awocolic, yom ma' tilel ti ora cha'añ ma' ch'ʌc jiñi wiñicob x'ixicob; tic'ʌl che' jiñi muq'uix i mejlel j contrajin lojon cha'añ mic choc lojon loq'uel.”

¹² Che' jiñi Dios tsi' su'be Balaam: —Mach yomic ma' majlel a wic'otob, mach a ch'ʌc c wiñicob come tsa'ix cʌq'ueyob i yutslel c t'añ.

¹³ Che' ti wen sʌc'ajel tsa' ch'ojyi Balaam, tsi' su'be i yaj e'telob Balac: —Cha' cucuxla ti sujtel ti la' lumal, come Dios mach yomic i chocon majlel la' wic'ot.

¹⁴ Jiñi ñuco' bʌ i ye'tel ti Moab tsa' cha' sujtiyob ba'añ Balac, tsi' su'beyob: —Balaam ma'añic tsi' jac'ʌ tilel quic'ot lojon.

¹⁵ Balac tsi' cha' choco majlel yam bʌ wiñicob año' bʌ i ye'tel, ñumen ca'bʌlobix yic'ot ñumen ñucobix bʌ i ye'tel che' bajche' ti ñaxan,

¹⁶ tsa' c'otiyob ti yotot Balaam, tsi' su'beyob: —Che'ʌch tsi' yʌlʌ Balac i yalobil Zipor: “Ti wocol t'añ mic su'beñet, wersa yom ma' tilel ba'añon,

¹⁷ come isujm mi caj c wen p'iset tic wenta yic'ot mi caj cʌq'ueñet pejtelel chuqui ma' c'ajtibeñon. Jiñi cha'añ la' ti ora cha'añ ma' ch'ʌc jiñi israelob.”

¹⁸ Pero Balaam tsi' jac'be i yaj e'telob Balac: —Anquese Balac mi' yʌq'ueñon jump'ejl i yotot but'ul bʌ ti oro yic'ot ti plata, mach mejlic c ñusʌben i t'añ Dios, jiñi c Yum, cha'añ mic mel chuqui ch'och'oc o chuqui ñuc.

¹⁹ Pero, ti wocol t'añ mic su'beñetla, c'aja la' woj ila ti cotot ti ili ac'ʌlel, cha'añ mic ña'tan chuqui mi' cha' su'beñon Dios.

²⁰ Ti jim bʌ ac'ʌlel tsi' pʌsʌ i bʌ Dios ti' tojlel Balaam, tsi' su'be: “Mi tsa' tiliyob ili wiñicob cha'añ mi' pʌyetob majlel, ch'ojyen, cucu yic'otob; pero cojach mi caj a mel jiñi mu' bʌ c su'beñet.”

Jiñi ángel yic'ot i ña'al i burro Balaam

²¹ Che' ti yijc'ʌlal wen se'bto tsa' ch'ojyi Balaam, tsa' caji i letsʌben i monturajlel i ña'al i burro, che' jiñi tsa' majli yic'ot jiñi ñuco' bʌ i ye'tel ch'oyolo' bʌ ti Moab.

²² Pero tsa' wen mich'a lac Yum come tsa' majli Balaam yic'otob, jiñi cha'añ i yángel lac Yum tsa' majli i mʌctañ ti bij che' bajche' i contra. C'ʌchʌl woli' majlel Balaam ti' ña'al i burro yic'ot woli' majlel cha'tiquil i yaj e'telob.

²³ Jiñi i ña'al burro tsi' q'uele i yángel lac Yum ya' ti bij, chucbil i cha'añ espada bots'bilix i cha'añ ti yotot, jiñi cha'añ tsi' tʌts'ʌ i bʌ ya' ti bij, tsa' ochi majlel ti mate'el. Che' jiñi Balaam tsa' caji i jats' i ña'al burro cha'añ mi' cha' c'otel ya' ti bij.

²⁴ Pero i yángel lac Yum tsa' wa'le ya' ti' bij ñumen bʌ ti' yojlil ts'usubil am bʌ i ts'ajquil ti jujunwejl.

²⁵ Che' bʌ tsi' cha' q'uele i yángel lac Yum jiñi i ña'al burro, tsi' ñʌp'choco i bʌ ti' ñʌc' ti jiñi ts'ajc, ya'i tsi' ñet'be i yoc Balaam. Jiñi cha'añ Balaam tsi' cha' jats'ʌ i ña'al i burro.

²⁶ I yángel lac Yum tsa' majli i mʌctañ ya' ba' wen lʌts'ʌl jiñi bij ba' ma'añic tsa' mejli i wis tʌts' i bʌ mi ti' ñoj mi ti' ts'ej.

²⁷ Che' bʌ tsi' cha' q'uele i yángel lac Yum jiñi ña'al burro, tsa' pʌcle ti lum che' c'ʌchʌl to Balaam, jiñi cha'añ tsa' mich'a, tsa' caji i jats' i ña'al burro ti te'.

²⁸ Che' jiñi lac Yum tsi' yʌc'ʌ ti t'añ i ña'al burro, tsa' caji i su'ben Balaam: —¿Chuqui tsa' c tumbeyet che' uxyajlix tsa' jats'ʌyon?

²⁹ Balaam tsi' su'be i ña'al burro: —Woli jach a wajleñon. ¡Añic quespada tij c'ʌb, wʌle jach mic tsʌnsañet!

³⁰ Jiñi i ña'al burro tsi' su'be Balaam: —¿Mach ba a cha'añoñic? Ti pejtelel ora tsa' c'ʌxtayon c'ʌlʌl che' bʌ tsa' ochiyon ti a wenta c'ʌlʌl ti ili q'uiñ. ¿Am ba ba' ora tsa' c mele chuqui jontol ti a tojlel? —Ma'añic —che'en Balaam.

³¹ Jiñi cha'añ lac Yum tsi' jambe i wut Balaam cha'añ mi' q'uel i yángel lac Yum ya' bʌ wa'al ti ojlil bij, chucbil ti' c'ʌb bots'bil bʌ espada ti yotot. Balaam tsi' p'isi ti' wenta, tsi' ñucchoco i bʌ ti lum.

³² I yángel lac Yum tsi' su'be: —¿Chucoch uxyajl tsa' jats'ʌ i ña'al a burro? Joñon tsa' loq'ui c mʌctañet, come jiñi a bijlel mach tojic tic tojlel.

³³ Jiñi i ña'al burro tsi' q'ueleyon, jiñi cha'añ uxyajl tsi' tʌts'ʌ i bʌ tic tojlel. Machic tsi' tʌts'ʌ i bʌ tic tojlel, tsa'ix c tsʌnsayet a che'ic jiñi, pero cuxul tsa' j cʌyʌ i ña'al burro.

³⁴ Jiñi cha'añ Balaam tsi' su'be i yángel lac Yum: —Tsa'ix c taja c mul, come ma'añic tsa' c ña'ta mi wʌ' wa'alet ti bij cha'añ ma' mʌctañon; pero wʌle, mi mach uts'atic ma' q'uel, mux c cha' sujtel majlel.

³⁵ Pero i yángel lac Yum tsi' jac'be Balaam: —Cucu a wic'ot jiñi wiñicob; pero jiñi jach mi caj a su'b jiñi c t'añ mu' bʌ caj c su'beñet. Che' jiñi Balaam tsa' majli yic'ot i wiñicob Balac.

³⁶ Che' bʌ tsi' yu'bi Balac cha'añ wolʌch i tilel Balaam, tsa' loq'ui tilel i taj ya' ti tejclum i c'aba' Moab am bʌ ti ti' jiñi colem ja' i c'aba' Arnón, ya' ba' jaxʌl i lumob.

³⁷ Balac tsi' su'be Balaam: —¿Mach ba añic tsa' c chocoyet ti pʌyol? ¿Chucoch ma'añic tsa' tiliyet ba'añon? ¿Mach ba mejlic cʌq'ueñet ca'bʌl a ñuclel?

³⁸ Balaam tsi' jac'be Balac: —Q'uele, wʌ'ix añon ti a tojlel; pero ma'añic c bajñel p'ʌtʌlel cha'añ mic cha'len t'añ. Jiñi jach mu' bʌ i su'beñon c Dios, mi' mejlel cʌl.

³⁹ Ti wi'il tsa' majli Balaam yic'ot Balac, tsa' c'otiyob ti Quiriat-huzot.

⁴⁰ Balac tsi' yʌc'ʌ ti tsʌnsʌntel ca'bʌl tat wacax yic'ot tʌñʌme' tac, tsi' chocbeyob majlel Balaam yic'ot i yaj e'telob Balac.

Balaam tsi' yʌq'ue i yutslel i t'añ israelob

⁴¹ Che' ti yijc'ʌlal, Balac tsi' pʌyʌ letsel Balaam c'ʌlʌl ti Bamot-baal, ba' tsa' mejli i q'uel lamital israelob.