Numeros 21 - Jiñi Tsiji' bʌ Wen T'añ cha'añ Estudio

Tsa' mʌlbenti Arad, i rey Canaán

¹ Che' bʌ jiñi cananeo, jiñi rey ti Arad chumul bʌ ya' ti Neguev, tsi' yu'bi cha'añ woli i tilelob israelob ti jiñi bij i c'aba' Atarim, tsa' loq'ui majlel i contrajin israelob, tsi' cʌchʌ majlel cha'tiquil uxtiquil israelob.

² Jiñi cha'añ, jiñi israelob tsi' yʌc'ʌyob i t'añ ti' tojlel lac Yum: “Muq'uic a wʌc' tij c'ʌb lojon ili tejclum, che' jiñi mi caj c jisan lojon i tejclumob.”

³ Lac Yum tsi' yu'bibeyob i t'añ jiñi israelob, tsi' coltayob ti' tojlel jiñi cananeojob, tsi' jisayob yic'ot pejtelel i tejclum tac. Jiñi cha'añ tsi' yotsʌbeyob i c'aba' jiñi lum ti Horma.

I yejtal lucum melbil ti c'ʌnc'ʌn taq'uiñ

⁴ Ti wi'il tsi' techeyob i xʌmbal ya' ti wits i c'aba' Hor, tsi' xʌñʌyob majlel i bijlel jiñi Chʌchʌc bʌ Mar, cha'añ mi' xoyob i bijlel ya' ba'añ i lumal Edom. Pero ya' ti bij, jiñi israelob tsa' jiliyob i xuc'tʌlel,

⁵ tsa' cajiyob ti wulwul t'añ ti' contra Dios yic'ot ti' contra Moisés: “¿Chucoch tsa' pʌyʌyon lojon loq'uel ti Egipto cha'añ ma' wʌc'on lojon ti chʌmel ila ti' tiquiñal lum? Come ilayi ma'añic waj yic'ot ja', tsa'ix c'ojyi j c'ux lojon jiñi waj mach bʌ p'ʌtʌlic tic ñʌc' lojon.”

⁶ Jiñi cha'añ, lac Yum tsi' choco tilel ca'bʌl lucum am bʌ i venenojlel cha'añ mi' ch'ojob jiñi wiñicob x'ixicob, che' jiñi tsa' chʌmiyob ca'bʌl israelob.

⁷ Che' jiñi tsa' tiliyob wiñicob ba'añ Moisés, tsi' su'beyob: “Tsa'ix c taja lojon c mul cha'añ tsa' c cha'le lojon t'añ ti' contra lac Yum yic'ot ti a contra; c'ajtiben lac Yum ti wocol t'añ cha'añ mi' cha' loc'san ili lucum tac tic tojlel lojon.” Moisés tsa' caji i pejcan lac Yum cha'añ mi' coltañ jiñi israelob,

⁸ che' jiñi lac Yum tsi' su'be Moisés: “Melben i yejtal jontol bʌ lucum, joc'chocon ti' ñi' junts'ijt te'; majqui jach tsa' c'uxle ti lucum, mi tsi' q'uele i yejtal lucum, ma'añic mi' caj i chʌmel.”

⁹ Jiñi cha'añ Moisés tsi' melbe i yejtal lucum ti c'ʌnc'ʌn taq'uiñ, tsi' joc'choco ti' ñi' junts'ijt te', majqui jach tsa' c'uxle ti lucum che' bʌ tsi' q'uelbe i yejtal lucum melbil bʌ ti c'ʌnc'ʌn taq'uiñ, cuxul tsa' cʌle.

Jiñi israelob tsi' joyoyob i lum Moab

¹⁰ Ti wi'il tsa' loq'uiyob majlel jiñi israelob ya' ba' chumulob, tsa' c'otiyob ti chumtʌl ya' ti Obot.

¹¹ Ti wi'il tsa' cha' loq'uiyob ti Obot, tsa' c'otiyob ti chumtʌl ti Ije-abarim, ya' ti' tiquiñal lum am bʌ ti' tojel Moab, ya' ba' mi' pasel q'uiñ.

¹² Che' bʌ tsa' cha' loq'uiyob ya'i, tsa' c'otiyob ti chumtʌl ti joctʌl bʌ lum i c'aba' Zered.

¹³ Tsa' loq'uiyob ya'i, tsa' c'otiyob ti chumtʌl ti' junwejlel Arnón, ya' ba'añ i tiquiñal lum ba' jaxʌl i lum amorreojob. Jiñi Arnón ja' i cayajoñʌch i lumalob amorreojob yic'ot moabitajob.

¹⁴ Jiñi cha'añ che'ʌch mi' yʌjlel ti' juñilel ba' ts'ijbubil i guerra lac Yum: “Tsa' bʌ i mele ya' ti Chʌchʌc bʌ Mar, yic'ot ya' ti ja' am bʌ ti Arnón,

¹⁵ yic'ot ya' ti p'ʌtʌl bʌ ja' mu' bʌ i c'ʌlʌl c'otel ya' ti Ar, yic'ot mu' bʌ i c'ʌlʌl c'otel ya' ba' jaxʌl i lum Moab.”

¹⁶ Ti wi'il tsa' c'axiyob ti Beer: jiñʌch jiñi pozo ba' tsa' loq'ui ja', ba' tsi' su'be lac Yum jiñi Moisés: “Tempan wiñicob x'ixicob cha'añ mi cʌq'ueñob ja'.”

¹⁷ Jiñi cha'añ jiñi israelob tsi' c'ʌyiyob ili c'ay: “¡La' wʌjlic loq'uel ja' ya' ti pozo! ¡Cha'lenla c'ay cha'añ jiñi ja'!

¹⁸ Jiñʌch i loq'uib ja' tsa' bʌ i piquiyob wiñicob, jiñi tsa' bʌ i top'oyob jiñi yumʌlob ti jiñi tejclum, yic'ot i te' yic'ot i barajte'.” Tsi' cʌyʌyob i tiquiñal lum, tsa' majliyob ti Matana.

¹⁹ Che' bʌ tsa' loq'uiyob ti Matana, tsa' majliyob ti Nahaliel. Tsa' loq'uiyob ti Nahaliel, tsa' majliyob ti Bamot.

²⁰ Che' bʌ tsa' loq'uiyob ti Bamot, tsa' majliyob ya' ti joctʌl bʌ lum am bʌ ti' lumal Moab, tsa' c'otiyob ti' pam jiñi wits i c'aba' Pisga ba' tsiquilix i tiquiñal lum.

Tsa' mʌlbenti Sehón, i rey amorreojob

²¹ Jiñi cha'añ, jiñi israelob tsi' chocoyob majlel wiñicob ba'añ Sehón i rey jiñi amorreojob, tsi' su'beyob:

²² “Ac'ʌyon lojon ti ñumel ti a lum; ma'añic mi caj c ñumel lojon majlel ba'añ la' pʌc'ʌb, mi ya'ic ti la' ts'usubil, ma'añic mi caj c jap lojon la' wa'al ti la' pozo tac. Tojach mi caj c ñumel lojon ti ñoj bij, c'ʌlʌl jinto mij c'axel lojon ti la' lum.”

²³ Pero Sehón ma'añic tsi' yʌc'ʌyob ti c'axel israelob ya' ti' lum, pero tsa' jach caji i tempan i wiñicob cha'añ mi' loq'uel i contrajiñob jiñi israelob ya' ti' tiquiñal lum, tsa' c'oti i tajob ti Jahaza, ya'i tsi' cha'leyob guerra ti' contra israelob.

²⁴ Pero jiñi israelob tsi' laj jisayob ti espada. Tsa' ochi i laj ch'ʌmbeñob i lum c'ʌlʌl ti Arnón ja' c'ʌlʌl ti Jaboc ja' ba' jaxʌl i lumal jiñi amoñob, come ya' ba' jaxʌl i lum jiñi amoñob wen cʌntʌbil.

²⁵ Jiñi israelob tsi' laj ch'ʌmʌyob jiñi tejclum tac yic'ot tsa' ochiyob ti chumtʌl ya' ti' tejclum amorreojob ya' ti Hesbón yic'ot ti alʌ xchumtʌl tac.

²⁶ Come jiñi Hesbón jiñʌch i tejclum Sehón, i rey amorreojob, jiñi tsa' bʌ i cha'le guerra ti ñaxan ti' contra jiñi rey am bʌ ti Moab, che' bʌ tsi' laj chilbe ca'bʌl i lum c'ʌlʌl ti colem ja' i c'aba' Arnón.

²⁷ Jiñi cha'añ mi' yʌlob jiñi xc'ayob: “¡La' ti Hesbón! ¡La' cha' mejlic! La' cha' mejlic i tejclum Sehón.

²⁸ Come tsa' loq'ui c'ajc ti Hesbón, yic'ot tsa' letsi i c'ʌc'al i tejclum Sehón, jiñi tsa' bʌ i pulu Ar am bʌ ti Moab, yic'ot jiñi ñuqui wits tac am bʌ ti Arnón.

²⁹ ¡O'bol a bʌ, Moab! Tsa'ix jisʌntiyetla añet bʌ la ti Quemos. Tsa'ix puts'tesʌbentiyob majlel i yalobilob, yic'ot xch'oc bʌ i yalobilob tsa' pʌjyiyob majlel ti yam bʌ lum, ti' tojlel Sehón, i rey amorreojob.

³⁰ Pero joñonla tsa'ix lac jisʌbeyob i yumʌntel; tsa' jisʌnti Hesbón c'ʌlʌl ti Dibón, tsa' lac jisa c'ʌlʌl ti Nofa, yic'ot ti Medeba.”

Israel tsi' mʌlbe Og jiñi rey ti Basán

³¹ Che'ʌch tsa' ochiyob ti chumtʌl israelob ti' lum jiñi amorreojob.

³² Che' ja'el Moisés tsi' choco majlel wiñicob cha'añ mi' cʌmbeñob i lumal Jazer; che' jiñi tsi' ch'ʌmʌyob jiñi alʌ xchumtʌl tac, tsi' chocoyob loq'uel jiñi amorreojob ya' bʌ añob ya'i.

³³ Ti wi'il tsa' cha' sujtiyob tilel yic'ot tsa' cha' cajiyob ti letsel ti' bijlel Basán. Tsa' loq'ui tilel jiñi rey Og am bʌ ti Basán yic'ot pejtelel i soldadojob, cha'añ mi' contrajin israelob ya' ti Edrei.

³⁴ Jiñi cha'añ lac Yum tsi' su'be Moisés: “Mach a bʌc'ñañob, come tsa'ix cʌq'ueyet ti a c'ʌb jiñi rey yic'ot pejtelel jiñi año' bʌ ti' lumal yic'ot i lum. Mi caj a melben che' bajche' tsa' melbe Sehón i rey jiñi amorreojob chumulo' bʌ ti Hesbón.”

³⁵ Che'ʌch tsa' jisʌnti jiñi rey yic'ot pejtelel i yalobilob yic'ot pejtelel i wiñicob, ma'añic majqui tsa' cʌle mi juntiquilic che' cuxulob to; che' jiñi tsi' ch'ʌmbeyob i lum.