Numeros 20 - Jiñi Tsiji' bʌ Wen T'añ cha'añ Estudio

Ja' tsa' bʌ loq'ui ti xajlel

¹ Che' ti ñaxan bʌ uw, tsa' c'otiyob pejtelel israelob ya' ti' tiquiñal lum i c'aba' Zin, ya' tsa' cajiyob ti chumtʌl ti Cades. Ya'i tsa' chʌmi María, yic'ot ya'i tsa' mujqui.

² Cha'añ ti' caj ma'añic ja', tsa' caji i tempañob i bʌ israelob cha'añ mi' contrajiñob Moisés yic'ot Aarón.

³ Jiñi israelob tsa' cajiyob ti a'leya ti' contra Moisés, tsi' yʌlʌyob: “¡Uts'at tsa'ic chʌmiyon lojon yic'ot c pi'ʌlob tsa' bʌ chʌmiyob ti' tojlel lac Yum!

⁴ ¿Chucoch tsa' pʌyʌyon lojon tilel ila ti' tiquiñal lum cha'añ mic chʌmel lojon wʌ'i temel yic'ot cʌlac' lojon?

⁵ ¿Chucoch tsa' pʌyʌyon lojon loq'uel ti Egipto, cha'añ ma' pʌyon lojon tilel ti ili lum ba' mach i t'ojolix? Añiquixto i c'ʌjñibal ili lum cha'añ mic cha'len lojon pac', mi yujilic to colel higuera te', mi ts'usub, mi te' mu' bʌ i yʌc' i wut che' bajche' alaxax, mi añic to ja' cha'añ mi' jajpel.”

⁶ Moisés yic'ot Aarón tsi' tʌts'ʌyob i bʌ ti' tojlel i pi'ʌlob, tsa' majliyob ti ti' jiñi Tabernáculo ba' mi' tempañob i bʌ, tsi' ñucchocoyob i bʌ. Che' jiñi tsa' tsictiyi i ñuclel lac Yum ti' tojlelob.

⁷ Lac Yum tsi' su'be Moisés:

⁸ “Ch'ʌmʌ a barajte', tempanla pejtelel israelob, jatet yic'ot a weran Aarón, pejcanla jiñi xajlel ti' wutob pejtelel israelob. Ti jiñi xajlel mi' caj i loq'uel tilel ja'; che'ʌch mi caj a loc'sʌbeñob ja' jiñi israelob ti jiñi xajlel, che' jiñi mi caj a wʌq'ueñob i jap ja' jiñi israelob yic'ot i yʌlac'ob.”

⁹ Che' jiñi Moisés tsi' ch'ʌmʌ jiñi barajte' lotol bʌ ti' tojlel lac Yum, che' bajche' tsi' su'be.

¹⁰ Moisés yic'ot Aarón tsi' tempayob tilel israelob ya' ba'añ jiñi xajlel. Moisés tsi' su'beyob: “¡Wʌle, u'binla c t'añ, xñusa t'añob! ¿Yom ba mic loc'sʌbeñet lojon ja' ti ili colem xajlel?”

¹¹ Che' jiñi Moisés tsi' letsa i c'ʌb, tsi' jats'ʌ cha'yajl jiñi xajlel ti' barajte'. Tsa' caji ti loq'uel tilel ca'bʌl ja', che' jiñi tsi' japʌyob jiñi israelob yic'ot i yʌlac'ob.

¹² Pero lac Yum tsi' su'be Moisés yic'ot Aarón: “Cha'añ ti' caj ma'añic tsa' la' ñopoyon yic'ot ma'añic tsa' la' wʌc'ʌ ti cʌjñel cha'añ ch'ujulon ti' tojlel israelob, jiñi cha'añ, ma'añic mi caj la' wochel yic'ot israelob ti jiñi lum tsa' bʌ cʌq'ueyob.”

¹³ Jiñʌch jiñi ja' ya' ba' tsi' cha'leyob contra t'añ, come jiñi israelob tsi' contrajiyob lac Yum, pero lac Yum tsi' yʌc'ʌ i bʌ ti cʌjñel ti' tojlelob cha'añ ch'ujulʌch.

Edom tsi' mʌcta cha'añ mi' c'axel israelob

¹⁴ Che' ya' to añob ti Cades, Moisés tsi' choco majlel wiñicob año' bʌ i ye'tel cha'añ mi' pejcañob jiñi rey am bʌ ti Edom yic'ot ili t'añ: “Che'ʌch woli i yʌl Israel a pi'ʌl bʌ: A wujilʌch pejtelel jiñi wocol tsa' bʌ c ñusa lojon:

¹⁵ Awujil bajche' c tat lojon tsa' ju'biyob majlel ti Egipto, yic'ot bajche' jayp'ejl ja'b tsa' ajñiyon lojon ti Egipto, yic'ot bajche' jiñi egiptojob tsi' p'ump'un tic'layon lojon yic'ot c tat lojon.

¹⁶ Che' jiñi tsa' caji c pejcan lojon lac Yum, tsi' yu'bibeyon lojon c t'añ, tsi' choco tilel juntiquil ángel cha'añ mi' pʌyon lojon loq'uel ti Egipto. Wʌle wʌ'ix añon lojon ti Cades, lʌc'ʌl bʌ tejclum ba' jaxʌl la' lumal.

¹⁷ Ti wocol bʌ t'añ mij c'ajtibeñet lojon cha'añ ma' wʌc'on lojon ti ñumel ti la' lum. Ma'añic mi caj j c'axel lojon ti pʌc'ʌbʌl mi ti ts'usubil, ma'añic mi caj c jap lojon la' wa'al am bʌ ti la' pozo; tojach mi caj c ñumel lojon majlel ya' ti ñoj bij, ma'añic mi caj majlel lojon mi tic ts'ejic lojon mi tic ñojic lojon, c'ʌlʌl jinto mic ñusan lojon la' lum.”

¹⁸ Edom tsi' jac'be: —Ma'añic mi caj la' ñumel tic lum lojon; mi tsa' ñumiyetla, mi caj c loq'uel j contrajiñetla ti guerra.

¹⁹ Jiñi israelob tsi' yʌlʌyob: —Mi caj c majlel ya' ti colem bij, mi tsa' c japʌ lojon la' wa'al yic'ot cʌlac' lojon, muq'uix c toj lojon. Cojach com lojon cha'añ ma' wʌc'on lojon ti ñumel ti coc lojon.

²⁰ Pero i rey Edom tsi' jac'ʌ: —Ma'añic mi caj la' ñumel ilayi. Jiñi i rey Edom tsi' tempa ca'bʌl wiñicob yic'ot yan tac bʌ tejclum cha'añ mi' cha'leñob guerra ti' contra Israel.

²¹ Come Edom ma'añic tsi' yʌc'ʌyob ti c'axel israelob ya' ti' lum, jiñi cha'añ wersa tsi' xoyoyob i bijlel.

Aarón tsa' chʌmi ti wits i c'aba' Hor

²² Che' jiñi pejtelel israelob tsa' loq'uiyob ti Cades, tsa' majliyob ti wits i c'aba' Hor.

²³ Lac Yum tsi' pejca Moisés yic'ot Aarón ya' ti wits i c'aba' Hor, ya' ba' jaxʌl i lum jiñi Edom, tsi' su'beyob:

²⁴ “Aarón muq'uix caj i chʌmel, ma'añic mi caj i yochel ti jiñi lum tsa' bʌ cʌq'ue israelob, come tsa' la' ñusʌbeyon c t'añ ya' ti ja' ba' tsi' cha'leyob contra t'añ israelob.

²⁵ Pʌyʌ majlel Aarón yic'ot i yalobil i c'aba' Eleazar ya' ti wits i c'aba' Hor;

²⁶ jochben i bujc Aarón cha'añ ma' lʌpben Eleazar i yalobil, come Aarón muq'uix caj i chʌmel ya' ti wits.”

²⁷ Moisés tsi' mele che' bajche' tsi' su'be lac Yum. Tsa' letsiyob majlel ti wits i c'aba' Hor ti' tojel i wut pejtelel israelob.

²⁸ Ti wi'il Moisés tsa' caji i jochben i bujc Aarón, che' jiñi tsi' xojbe Eleazar i yalobil Aarón. Aarón tsa' chʌmi ya' ti' pam jiñi chañ bʌ wits, pero Moisés yic'ot Eleazar tsa' cajiyob ti ju'bel tilel ya' ti wits.

²⁹ Che' bʌ tsi' yu'biyob jiñi israelob cha'añ tsa'ix chʌmi Aarón, tsa' caji i yuc'tañob lujump'ejl i cha'c'al (30) q'uiñ.