Numeros 2 - Jiñi Tsiji' bʌ Wen T'añ cha'añ Estudio

Jiñi yumʌlob ti jujunmojt i p'olbal israelob

¹ Lac Yum tsi' pejca Moisés yic'ot Aarón, tsi' su'beyob:

² “Pejtelel jiñi israelob la' chumlecob ti' joytʌlel jiñi Tabernáculo ba' mi la' tempan la' bʌ ti' mojt ti' mojt ti' t'ejl i bandera, yom mi' wa'chocoñob pisil bʌ i yotot ti' joytʌlel jiñi Tabernáculo ba' mi la' tempan la' bʌ.”

³ “Mi caj i chumtʌlob ti' tojel i pasibal q'uiñ, ya' ba'añ i bandera Judá, che' bajche' t'oxbilob ti' mojt ti' mojt jiñi soldadojob. Jiñi am bʌ i ye'tel ti' tojlel i yalobilob Judá jiñʌch Naasón i yalobil Aminadab.

⁴ Jiñi soldadojob tsa' bʌ tsijquiyob: jiñʌch 74,600 wiñicob.

⁵ Lʌc'ʌl jach mi' chumtʌl i p'olbalob Isacar ti' t'ejl Judá. Jiñi yumʌl ti' p'olbal Isacar jiñʌch Natanael i yalobil Zuar.

⁶ Ti pejtelel i soldadojob tsa' bʌ tsijquiyob, jiñʌch 54,400.

⁷ Che' ja'el mi caj i chumtʌlob i p'olbal Zabulón. Jiñi yumʌl ti' p'olbal Zabulón jiñʌch Eliab i yalobil Helón.

⁸ Ti' pejtelel jiñi soldadojob tsa' bʌ tsijquiyob, jiñʌch 57,400.

⁹ Pejtelel ts'ijbubilo' bʌ i c'aba' ya' bʌ añob ba' chumul Judá, añob 186,400 jiñobʌch mu' bʌ caj i majlelob ti guerra che' bajche' t'oxbilob ti' mojt ti' mojt jiñi soldadojob.”

¹⁰ “Jiñi bandera ba' chumul Rubén ya' mi' caj i yajñel ti sur, che' bajche' t'oxbilob ti' mojt ti' mojt jiñi soldadojob. Jiñi yumʌl ti' p'olbal Rubén jiñʌch Elisur i yalobil Sedeur.

¹¹ Ti' pejtelel jiñi soldadojob tsa' bʌ tsijquiyob, jiñʌch 46,500.

¹² Mi caj i chumtʌlob lʌc'ʌl ti t'ejl i p'olbal Simeón. Jiñi yumʌl ti' p'olbal Simeón jiñʌch Selumiel i yalobil Zurisadai.

¹³ Ti' pejtelel jiñi soldadojob tsa' bʌ tsijquiyob, jiñʌch 59,300.

¹⁴ Che' ja'el ya' mi caj i chumtʌlob i p'olbal Gad. Jiñi yumʌl ti' p'olbal Gad jiñʌch Eliasaf i yalobil Reuel.

¹⁵ Ti' pejtelel jiñi soldadojob añob 45,650 tsa' bʌ tsijquiyob.

¹⁶ Ti' pejtelel jiñi ts'ijbubilo' bʌ i c'aba' ya' ba' chumul Rubén añob 151,450 jiñʌch i cha'mojtlel jiñi mu' bʌ caj i majlelob ti guerra che' bajche' añ ti' mojt ti' mojt jiñi soldadojob.”

¹⁷ “Wi'ilix mi' cajelob ti majlel levijob woli bʌ i ch'ʌmob majlel jiñi Tabernáculo. Che'ʌch mi' cajelob ti xʌmbal ti' mojt ti' mojt che' bajche' añob ya' ba' tsa' jijliyob. Ti jujunmojt añob i bandera.”

¹⁸ “Ya' ti' tojel i bʌjlibal q'uiñ ba' chumul Efraín ya'añ i bandera, che' bajche' añob ti' mojt ti' mojt jiñi soldadojob. Jiñi yumʌl ti' p'olbal Efraín jiñʌch Elisama i yalobil Amiud.

¹⁹ Ti' pejtelel jiñi soldadojob tsa' bʌ tsijquiyob, jiñʌch 40,500.

²⁰ Ya' mi caj i tem ajñelob yic'ot i p'olbal Manasés. Jiñi yumʌl ti' p'olbal Manasés jiñʌch Gamaliel i yalobil Pedasur.

²¹ Ti' pejtelel jiñi soldadojob tsa' bʌ tsijquiyob, jiñʌch 32,200.

²² Che' ja'el ya' mi caj i chumtʌlob yic'ot i p'olbal Benjamín. Jiñi yumʌl ti' p'olbal Benjamín jiñʌch Abidán i yalobil Gedeoni.

²³ Ti' pejtelel jiñi soldadojob tsa' bʌ tsijquiyob, jiñʌch 35,400.

²⁴ Ti' pejtelel jiñi ts'ijbubilo' bʌ i c'aba' ya' ba' chumul Efraín jiñobʌch 108,100 wiñicob. Jiñʌch i yuxmojtlel bʌ mi' loq'uelob majlel che' bajche' añob ti' mojt ti' mojt jiñi soldadojob.”

²⁵ “I bandera Dan ya' mi caj i yajñel ti norte, che' bajche' t'oxbil ti' mojt ti' mojt jiñi soldadojob. Jiñi yumʌl ti' p'olbal Dan jiñʌch Ahiezer i yalobil Amisadai.

²⁶ Ti' pejtelel jiñi soldadojob tsa' bʌ tsijquiyob, jiñʌch 62,700.

²⁷ Mi caj i chumtʌlob i p'olbal Aser ti' t'ejl Dan. Jiñi yumʌl ti' p'olbal Aser jiñʌch Pagiel i yalobil Ocrán.

²⁸ Ti' pejtelel jiñi soldadojob tsa' bʌ tsijquiyob, jiñʌch 41,500.

²⁹ Che' ja'el i p'olbal Neftalí, mi caj i chumtʌlob ti yam bʌ junwejl i t'ejl Dan. Jiñi yumʌl ti' p'olbal Neftalí jiñʌch Ahira i yalobil Enán.

³⁰ Ti' pejtelel jiñi soldadojob tsa' bʌ tsijquiyob, jiñʌch 53,400.

³¹ Ti' pejtelel jiñi tsicbilo' bʌ tsa' bʌ tem chumleyob yic'ot Dan jiñʌch 157,600, wi'il patix tsa' majliyob yic'ot jiñi israelob.”

³² Jiñobʌch pejtelel i yalobilob Israel tsa' bʌ tsijquiyob ti' mojt ti' mojt. Ti' pejtelelob añob 603,550 soldadojob.

³³ Pero jiñi levijob ma'añic tsa' ch'ʌjmiyob ti tsic yic'ot jiñi israelob, che' bajche' lac Yum tsi' su'be Moisés.

³⁴ Che'ʌch tsi' meleyob jiñi israelob che' bajche' tsi' yʌlʌ lac Yum ti' tojlel Moisés. Che'ʌch tsa' chumleyob ti' t'ejl tacob i bandera; che'ʌch ja'el tsi' cha'leyob xʌmbal majlel jujuntiquil yic'ot i pi'ʌlob ti' mojt ti' mojt.