Numeros 19 - Jiñi Tsiji' bʌ Wen T'añ cha'añ Estudio

I sʌc-esʌntel jiñi bi'bi'o' bʌ

¹ Lac Yum tsi' pejca Moisés yic'ot Aarón, tsi' su'beyob:

² “Jiñʌch c mandar mu' bʌ c su'b: Yom ma' su'beñob israelob cha'añ mi' pʌybeñetob tilel juncojt chʌchʌc bʌ ña'al wacax, mach bʌ añic i c'am-ʌjel yic'ot i lojwemal, maxto bʌ añic c'ʌmbil ti e'tel.

³ Yom mi la' wʌq'uen jiñi motomaj Eleazar cha'añ mi' pʌy majlel ti ti' jiñi tejclum, cha'añ ya'i mi cajel i tsʌnsʌntel ti' tojel i wut.

⁴ Jiñi cha'añ Eleazar jiñi motomaj mi caj i ts'aj i c'ʌb ya' ti' ch'ich'el wacax, wucyajl mi caj i tsijcan ti ch'ich' ya' ti' tojel jiñi Tabernáculo ba' mi la' tempan la' bʌ.

⁵ Ti wi'il che' ya'añ jiñi motomaj mi caj i yʌc' ti pulel jiñi xña'a wacax, yic'ot i pʌchʌlel, yic'ot i bʌc'tal, yic'ot i ch'ich'el, yic'ot i ta'.

⁶ Ti wi'il jiñi motomaj mi caj i ch'ʌm ch'ujte' yic'ot hisopo yic'ot chʌchʌc bʌ pisil, mi caj i choc ochel ya' ti' mal jiñi c'ajc ba' woli ti pulel jiñi xña'a wacax.

⁷ Jiñi motomaj mi caj i wuts' i pislel, che' ja'el mi caj i cha'len ts'ʌmel, ti wi'il mi caj i yochel ya' ti tejclum ba' tempʌbilob. Pero jiñi motomaj bi'bi' to mi' cʌytʌl tic wut c'ʌlʌl mi yic'an.

⁸ Che' ja'el jiñi tsa' bʌ i pulu jiñi ña'al wacax, mi caj i wuts' i pislel, mi caj i cha'len ts'ʌmel ja'el. Pero bi'bi' to mi' cʌytʌl tic wut c'ʌlʌl mi yic'an.

⁹ Jiñi wiñic mach bʌ bi'bi'ic tic wut mi caj i tempʌben i tʌñʌl jiñi ña'al wacax cha'añ mi' majlel i much'chocon ya' ti' junwejlel tejclum ba' jochol pañimil; mi caj i lotob jiñi israelob cha'añ mi yotsañob ti ja' cha'añ mi' c'ʌn i sʌc-esañob i bʌ; jiñi majtañʌl jiñʌch cha'añ i ñusʌntel mulil.

¹⁰ Jiñi mu' bʌ i tempʌben i tʌñʌl jiñi ña'al wacax wersa yom mi' wuts' i pislel yic'ot bi'bi' to mi' cʌytʌl tic wut c'ʌlʌl mi yic'an. Jiñʌch xuc'ul bʌ c mandar ti pejtelel ora ti' tojlel israelob yic'ot ti' tojlelob jiñi ñajt bʌ ch'oyolob ya' bʌ chumulob la' wic'ot.”

¹¹ “Majqui jach mi' tʌlben i bʌc'tal chʌmeñ bʌ lac pi'ʌl, bi'bi' mi' cʌytʌl tic wut wucp'ejl q'uiñ.

¹² La' i sʌc-esan i bʌ ti ja' che' ti yuxp'ejlel q'uiñ, che' ti' wucp'ejlel q'uiñ sʌc-esʌbilix, pero mi ma'añic tsi' sʌc-esa i bʌ che' ti yuxp'ejlel q'uiñ, che' jiñi, ti' wucp'ejlel q'uiñ bi'bi' to.

¹³ Pejtelel mu' bʌ i tʌlben i bʌc'tal xchʌmel, wersa mi' sʌc-esan i bʌ, mi ma'añic tsi' sʌc-esa i bʌ, mi' bi'b-esan c tabernáculo. Jiñi wiñic mi caj i chojquel loq'uel ti' tojlel Israel, come ma'añic tsi' c'ʌñʌ jiñi ja' mu' bʌ i sʌc-esan. Bi'bi' mi' cʌytʌl, jiñi i bi'bi'lel mi' yajñel ti' tojlel.”

¹⁴ “Iliyi jiñʌch mandar che' añ majqui mi' chʌmel ti pisil bʌ otot: majqui jach mi yochel ti jiñi pisil bʌ otot yic'ot pejtelel jiñi ya' bʌ añob ti' mal, bi'bi' mi' cʌytʌl tic wut c'ʌlʌl ti' wucp'ejlel q'uiñ.

¹⁵ Pejtelel p'ejt mach bʌ mʌcbilic, o mi ts'ita' bexel i majc, bi'bi' tic wut.”

¹⁶ “Majqui jach mi' tʌl wiñic tsʌnsʌbil ti machit che' ya'añ ti bij yic'ot jiñi yan tac bʌ xchʌmel, mi' bʌquel wiñic, mi mucoñibʌl, wucp'ejl q'uiñ bi'bi' mi' cʌytʌl tic wut”.

¹⁷ “Jiñi bi'bi'o' bʌ la' i ch'ʌmob i tʌñʌl jiñi ña'al wacax tsa' bʌ puli cha'añ i tojol mulil, la' i yotsañob ti ja' ti jump'ejl poc' luchbil bʌ tilel ti ja' woli bʌ ti ajñel.

¹⁸ Ti wi'il juntiquil wiñic mach bʌ bi'bi'ic mi caj i ch'ʌm hisopo cha'añ mi' ts'aj ya' ti ja', che' jiñi mi' caj i tsijcan jiñi pisil bʌ otot, yic'ot pejtelel mu' bʌ i c'ʌjñel ya' ti' mal jiñi otot, yic'ot ti' tojlel wiñicob año' bʌ ya' ti' mal jiñi otot, yic'ot pejtelel jiñi tsa' bʌ i tʌlbe i bʌquel xchʌmel, mucoñibʌl o xchʌmel, mi tsʌnsʌbil o che' jach tsa' chʌmi.

¹⁹ Jiñi wiñic mach bʌ añic i bi'bi'lel tic wut, la' i tsijcan ti ja' jiñi bi'bi' bʌ che' ti yuxp'ejlel q'uiñ yic'ot che' ti wucp'ejlel q'uiñ. Che' bʌ tsa'ix ts'ʌctiyi wucp'ejl q'uiñ i sʌc-esʌntel jiñi wiñic mi caj i wuts' i pislel, mi' cajel ti ts'ʌmel, che' jiñi cha' sʌquix che' mi yic'an.

²⁰ Che' añ juntiquil bi'bi' bʌ mach bʌ añic tsi' sʌc-esa i bʌ, mi' cajel i chojquel loq'uel ti Israel, come tsi' bi'b-esa c tabernáculo; come ma'añic tsa' tsijcʌnti ti jiñi ja' cha'añ sʌc-esaya, jiñi cha'añ bi'bi'.

²¹ Jiñi cha'añ yom mi' jajq'uel ili mandar ti pejtelel ora. Che' ja'el jiñi mu' bʌ i tsijcan ti ja' cha'añ sʌc-esaya, wersa mi' wuts' i pislel ja'el. Che' añ majqui mi' tʌl jiñi ja' cha'añ sʌc-esaya, bi'bi' mi' cʌytʌl c'ʌlʌl mi yic'an.

²² Pejtelel mu' bʌ i tʌl jiñi bi'bi' bʌ, bi'bi' mi' yajñel ja'el; jiñi mu' bʌ i tʌl jiñi bi'bi' bʌ wiñic, bi'bi' mi' cʌytʌl c'ʌlʌl mi yic'an.”