Numeros 18 - Jiñi Tsiji' bʌ Wen T'añ cha'añ Estudio

I coltʌntel ti bʌl i ñʌc' jiñi motomajob yic'ot levijob

¹ Lac Yum tsi' su'be Aarón: “Jatet yic'ot a walobilob yic'ot jiñi año' bʌ ti a wotot, añ ti la' wenta cha'añ mi la' c'ajtin i ñusʌntel mi tsi' cha'leyob mulil jiñi israelob ti jiñi Ch'ujul bʌ Ajñibʌl; ixcu jatet yic'ot a walobilob añ ti la' wenta mi la' c'ajtin i ñusʌntel mi tsa' la' cha'le mulil che' añ la' we'tel ti motomaj.

² Su'ben i lʌc'tesañob i bʌ ja'el a pi'ʌlob ti a tojlel cha'añ mi' tempañob i bʌ a wic'ot, jiñi i p'olbalo' bʌ Leví i ñojte'el a tat, la' i coltañetob ti a we'tel; jatet yic'ot a walobilob mi cajel la' mel la' we'tel ya' ti tabernáculo ba' lotol jiñi Mandar.

³ Muq'uix i jac'beñetob pejtelel chuqui ma' su'beñob yic'ot muq'uix i cʌntañob jiñi Tabernáculo, pero mach mejlic i lʌc'tesañob i bʌ ti' tojlel pejtelel jiñi ch'ujul tac bʌ mu' bʌ i c'ʌjñel ya' ti Ch'ujul bʌ Ajñibʌl ame chʌmicob, ame chʌmiquetla ja'el.

⁴ Mi' cajel i comol melob e'tel a pi'ʌlob a wic'ot, ti jujuntiquil mi' cajel i ch'ʌmob ti' wenta i ye'tel ya' ti Tabernáculo ba' mi la' tempan la' bʌ, pero mach yomic mi' lʌc'tesan i bʌ ti la' tojlel jiñi mach bʌ añic i ye'tel la' wic'ot.

⁵ Cojach jatetla motomajet bʌ la, añ ti la' wenta jiñi e'tel ti Ch'ujul bʌ Ajñibʌl yic'ot ya' ti' pulʌntib, cha'añ ma'añic mi' chʌn tilel i mich'ajel lac Yum ti' contra israelob.

⁶ Come joñon tsa' c yajca la' pi'ʌlob i yalobilo' bʌ Leví loq'uemo' bʌ ti' tojlel israelob, tsa' bʌ aq'uentiyetla che' bajche' la' majtañ ti lac Yum cha'añ mi' melob i ye'tel ya' ti Tabernáculo ba' mi la' tempan la bʌ.

⁷ Pero jatet yic'ot a walobilob, mi caj la' ch'ʌm ti la' wenta la' motomajintel yic'ot pejtelel e'tel tac ya' ti pulʌntib, ya' ti' mal juntsajl pisil, mi cajel la' mel la' we'tel. Joñon tsa' cʌq'ueyetla la' c'ʌjñibal cha'añ ili e'tel che' bajche' la' majtañ; mi tsi' lʌc'tesa i bʌ wiñic mach bʌ añic i ye'tel la' wic'ot, mi' cajel ti chʌmel.”

⁸ Lac Yum tsi' su'be Aarón: “Joñon tsa' cʌq'ueyet ti a wenta i cʌntʌntel jiñi c majtañ tac. Pejtelel sʌc-esʌbil bʌ i yalobilob israelob, tsa'ix cʌq'ueyet yic'ot a walobilob, come motomajetla. Jiñʌch xuc'ul bʌ c mandar ti pejtelel ora.

⁹ A cha'añʌch pejtelel jiñi ch'ujul bʌ majtañʌl mach bʌ añic mi' pulel ti c'ajc: pejtelel jiñi majtañʌl mu' bʌ cʌq'uentel, pejtelel majtañʌl mu' bʌ i yʌc'ob, pejtelel majtañʌl cha'añ mulil yic'ot majtañʌl tac cha'añ jontolil, ch'ujulʌch ti' pejtelel cha'añet yic'ot cha'añ a walobilob.

¹⁰ Ya' jach ti Ch'ujul bʌ Ajñibʌl mi' mejlel la' c'ux; cojach wiñicob mi' mejlel i c'uxob. Jiñʌch ch'ujul bʌ majtañʌl cha'añetla.”

¹¹ “Che' ja'el pejtelel iliyi a cha'añʌch: majtañʌl jʌmts'ubil bʌ mu' bʌ i yʌq'ueñoñob israelob; tsa'ix cʌq'ueyet jatet yic'ot ch'itoñ yic'ot xch'oc bʌ a walobilob, jiñʌch xuc'ul bʌ mandar. Majqui jach sʌc-esʌbil ti a wotot, mi' mejlel i c'ux.

¹² Jiñi olivo aceite yic'ot jiñi tsiji' bʌ i ya'lel ts'usub yic'ot trigo, pejtelel jiñi wen yajcʌbil tac bʌ, jiñi ñaxan tac bʌ i wut pʌc'ʌbʌl, mu' bʌ i yʌjq'uel ti' tojlel lac Yum, la' cha'añʌch tsa' cʌq'ueyetla.

¹³ Pejtelel jiñi ñaxan tac bʌ i wut pʌc'ʌbʌl mu' bʌ i ch'ʌmbeñoñob tilel wiñicob, a cha'añʌch. Majqui jach sʌc-esʌbilob ya' ti a wotot mi mejlel i c'uxob.

¹⁴ Pejtelel chuqui tac mi' wʌn alob cha'añ mi yʌq'ueñoñob jiñi israelob, a cha'añʌch.”

¹⁵ “Pejtelel ñaxan bʌ mi yilan pañimil, mi wiñic mi alʌc'ʌl mu' bʌ i yʌq'ueñoñob, la' cha'añʌch. Pero yom ma' ch'ʌmben i tojol jiñi ñaxan bʌ alʌl, che' ja'el jiñi ñaxan bʌ i yal alʌc'ʌl mach bʌ sʌquic tic tojlel.

¹⁶ Che' jump'ejlix uw i yilan pañimil yom ma' c'ajtiben i tojol che' bajche' jo'p'ejl siclo che' bajche' añ i tojol ya' ti ch'ujul bʌ ajñibʌl, jiñʌch junc'al geras.

¹⁷ Pero mach yomic ma' ch'ʌmben i tojol ñaxan tac bʌ i yal wacax, yic'ot ñaxan tac bʌ i yal tʌñʌme', yic'ot ñaxan tac bʌ i yal chivo, come ch'ujulʌch. Mi caj a c'ʌmben i ch'ich'el cha'añ ma' tsijcan jiñi pulʌntib, ixcu i lewil mi caj a pul cha'añ c majtañ, jiñʌch xojocña bʌ i yujts'il tic tojlel.

¹⁸ Jiñi i bʌc'tal a cha'añʌch, yic'ot ja'el i bʌc'tal i tajñ jiñi jʌmts'ubil bʌ majtañʌl tic tojlel yic'ot jiñi ñoj bʌ i ya'.

¹⁹ Pejtelel jiñi ch'ujul tac bʌ majtañʌl mu' bʌ i yʌq'ueñoñob jiñi israelob, tsa'ix cʌq'ueyet ti a wenta, yic'ot ti' tojlel jiñi ch'itoñ bʌ yic'ot xch'oc bʌ la' walobilob, jiñʌch c mandar ti pejtelel ora. Jiñʌch jump'ejl xuc'ul bʌ c t'añ ti pejtelel ora am bʌ i yʌts'mil cha'añet yic'ot cha'añ a p'olbal.”

²⁰ Lac Yum tsi' su'be Aarón: Ma'añic mi caj c t'oxbeñetla i lumob jiñi israelob mi muq'uic caj cʌq'ueñetla chuqui añ i cha'añob. Joñon la' cha'añon yic'ot la' lumon ti' tojlel israelob.

²¹ Joñon tsa' cʌq'ueyob levijob pejtelel jiñi diezmo tac mu' bʌ i ch'ʌmob tilel jiñi israelob, i wentajlel i lum cha'añ woli' melob que'tel ti Tabernáculo ba' mi la' tempan lac bʌ.

²² Mach yomic mi yochelob israelob ya' ti Tabernáculo ba' mi' tempañob i bʌ, cha'añ ma'añic mi' tajob i mul ame chʌmicob.

²³ Pero añ ti' wenta jiñi levijob cha'añ mi' melob jiñi e'tel ya' ti Tabernáculo ba' mi' tempañob i bʌ, mi tsi' tajayob i mul añob ti' wenta jiñi levijob cha'añ mi' c'ajtiñob i ñusʌntel. Mach yomic mi' yʌq'ueñtelob i lum jiñi levijob ti' tojlel israelob, jiñʌch c mandar ti pejtelel ora cha'añ la' walobilob.

²⁴ Come tsa'ix cʌq'ueyob ti' wenta levijob jiñi diezmo tac mu' bʌ i yʌc'ob israelob tic tojlel, jiñi cha'añ tsa'ix c su'beyob: “Mach yomic mi la' taj la' lum yic'otob jiñi israelob.”

²⁵ Lac Yum tsi' su'be Moisés:

²⁶ Pejcan jiñi levijob, mi caj a su'beñob: Che' mi la' wʌq'uentel jiñi diezmo tac tsa'ix bʌ cʌq'ueyetla ti la' wenta, yom mi la' loc'ben i diezmojlel jiñi diezmo tac mu' bʌ i ch'ʌmob tilel israelob, cha'añ mi la' wʌq'ueñon che' bajche' jʌmts'ubil bʌ c majtañ.

²⁷ Mi caj j q'uel ili la' diezmo che' bajche' i wut la' pʌc'ʌb yic'ot i ya'lel la' ts'usub.

²⁸ Che'ʌch mi caj la' wʌc' ja'el la' wofrenda loq'uem bʌ ti pejtelel jiñi diezmo tac mu' bʌ i ch'ʌmob tilel israelob; mi' cajel la' wʌq'uen Aarón jiñi motomaj jiñi ofrenda c cha'añ bʌ.

²⁹ Ti pejtelel jiñi majtañʌl mu' bʌ la' wʌq'uentel, mi' cajel la' loc'sʌbeñon c cha'añ bʌ; jiñi ñumen wen tac bʌ ti jiñi c majtañ mi' cajel la' loc'san cha'añ mi cʌq'uentel.

³⁰ Che' ja'el mi' cajel a su'beñob: “Che' bʌ tsa'ix la' loc'o jiñi ñumen wen bʌ ya' ti majtañʌl, i wentajlel la' wofrenda levijet bʌ la, lajal mi caj i q'uejlel che' bajche' i wut la' pʌc'ʌb yic'ot i ya'lel la' ts'usub.

³¹ Jiñi mu' bʌ i cʌytʌl, muq'uix i mejlel la' c'ux baqui jach la' wom, jatetla yic'ot la' walobilob, come jiñʌch la' tojol cha'añ la' we'tel mu' bʌ la' mel ya' ti Tabernáculo ba' mi la' tempan la' bʌ.

³² Ma'añic la' mul che' mi la' wʌc' jiñi ñumen wen bʌ i diezmojlel jiñi diezmo mu' bʌ i yʌc'ob israelob; che'ʌch yom cha'añ ma'añic mi la' bi'b-esan jiñi i majtañ lac Yum mu' bʌ i yʌc'ob israelob, ame chʌmiquetla.”