Numeros 17 - Jiñi Tsiji' bʌ Wen T'añ cha'añ Estudio

I barajte' Aarón

¹ Lac Yum tsi' pejca Moisés, tsi' su'be:

² “Su'beñob israelob cha'añ mi' ch'ʌmob tilel jujunts'ijt i barajte' jiñi ñuc taco' bʌ i ye'tel ti jujunmojt i p'olbal Israel. Yom lajchʌnts'ijt barajte' ti' pejtelel, che' bajche' añob ti jujunmojt i p'olbal Israel. Mi caj a wotsʌben i c'aba' ya' ti' jujunts'ijt te',

³ mi caj a ts'ijbuben i c'aba' Aarón ya' ti' barajte' Leví, come ti jujuntiquil yumʌl loq'uemo' bʌ ti jujunmojt i p'olbal Israel laj añob i barajte'.

⁴ Yom mi la' wotsan jiñi lajchʌnts'ijt barajte' ya' ti' mal Tabernáculo ba' mi la' tempan la' bʌ ya' ti' tojel jiñi Arca, ba' mi caj c pʌs c bʌ ti la' tojlel.

⁵ Mi' cajel ti ñich i barajte' jiñi wiñic yajcʌbil bʌ c cha'añ, che'ʌch mi' cajel c ñʌch'chocoñob ti wulwul t'añ jiñi israelob ti la' contra.”

⁶ Moisés tsi' pejca pejtelel israelob yic'ot pejtelel jiñi año' bʌ i ye'tel tsa' aq'uentiyob barajte'; jujunts'ijt barajte' tsa' aq'uentiyob cha'añ mi' tsictiyel loq'uemob ti' p'olbal jujunmojt israelob: ti' pejtelel añ lajchʌnts'ijt barajte'. Jiñi i barajte' Aarón ya'añ yic'ot i barajte' yaño' bʌ.

⁷ Moisés tsi' yʌc'ʌ jiñi barajte' tac ti' tojlel lac Yum ya' ti Tabernáculo ba' lotol jiñi Mandar.

⁸ Che' ti yijc'ʌlal tsa' cha' c'oti Moisés ya' ti Tabernáculo ba' lotol jiñi Mandar, tsi' q'uele i barajte' Aarón i p'olbal bʌ Leví tsa'ix yax-a, añix i ñich yic'ot añix i buts tac yic'ot tsi' yʌc'ʌ i wut i c'aba' almendra.

⁹ Che' jiñi Moisés tsi' loc'sa pejtelel jiñi barajte' tac tsa' bʌ i yʌc'ʌyob ti' tojlel lac Yum ti' wut pejtelel israelob; tsi' q'ueleyob ti pejtelel, ti jujuntiquil tsi' cha' ch'ʌmʌyob i barajte'.

¹⁰ Lac Yum tsi' su'be Moisés: “Cha' otsan i barajte' Aarón ya' ti Arca, cha'añ mi' lojtel che' bajche' i yejtal cha'añ jiñi mu' bʌ i ñusañob t'añ. Che'ʌch mi cajel a wʌc'ob ti ñʌjch'el cha'añ ma'añic mi' chʌn cha'leñob wulwul t'añ tic tojlel, cha'añ ma'añic mi' chʌmelob.”

¹¹ Moisés tsi' mele che' bajche' lac Yum tsi' su'be: che'ʌch tsi' mele.

¹² Che' jiñi, jiñi israelob tsi' su'beyob Moisés: “¡Woli c chʌmel lojon! ¡Sajtemon lojon! ¡Tic pejtelel sajtemon lojon!

¹³ Majqui jach mi' lʌc'tesan i bʌ, jiñi mu' bʌ i c'otel ya' ti' tabernáculo lac Yum, mi' cajel ti chʌmel. ¿Mu' ba i cajel c laj jilel lojon?”