Numeros 16 - Jiñi Tsiji' bʌ Wen T'añ cha'añ Estudio

I jontolil Coré

¹ Jiñi Coré i yalobil Izhar, i yalobil bʌ Coat, i yalobil bʌ Leví, tsi' laja i t'añ yic'ot Datán yic'ot Abiram i yalobilob Eliab, yic'ot On i yalobil Pelet, loq'uemo' bʌ ti' p'olbal Rubén, tsi' tempayob wiñicob,

² tsa' caji i contrajiñob Moisés temel yic'ot lujunc'al yic'ot lujuntiquil i yuxc'al (250) wiñicob israelo' bʌ, ñuc taco' bʌ i ye'tel ti' tojlel israelob, yajcʌbilo' bʌ cha'añ mi' cʌntañob wiñicob.

³ Che' jiñi tsi' tempayob i bʌ ti' contra Moisés yic'ot Aarón, tsi' su'beyob: —¡Jasʌlix chuqui woli la' mel! Come ti pejtelel israelob laj ch'ujulob yic'ot ya'ʌch añ lac Yum ti' tojlelob. ¿Chucoch mi la' chʌn otsan la' bʌ ti yumʌl ti' tojlel i cha'año' bʌ lac Yum?

⁴ Che' bʌ tsi' yu'bi Moisés, tsi' ñucchoco i bʌ ti lum.

⁵ Che' jiñi tsi' su'be Coré yic'ot pejtelel jiñi woli bʌ i tsajcañob, tsi' su'beyob: —Ijc'ʌl to mi caj i tsictesan lac Yum majqui i cha'año' bʌ yic'ot majqui jiñi ch'ujulo' bʌ, yic'ot mi caj i tsictesan majqui jiñi mu' bʌ caj i lʌc'tesan i bʌ ti' tojlel. Jiñi mu' bʌ i yajcan, jiñʌch mu' bʌ caj i yʌq'ueñ i majtañ.

⁶ Jiñi cha'añ yom mi la' mel bajche' iliyi: Jatet Coré yic'ot pejtelel a pi'ʌlob, ch'ʌmʌla tilel pom,

⁷ yom mi la' wotsʌben i c'ʌc'al, pulbenla lac Yum jiñi pom che' ti sʌc'ajel. Jiñi wiñic mu' bʌ i yajcan lac Yum Dios, jiñʌch ch'ujul bʌ wiñic; jasʌlix chuqui woli la' mel i p'olbalet bʌ la Leví.

⁸ Moisés tsi' su'be Coré: —U'binla wʌle i yalobilet bʌ la Leví:

⁹ ¿Mu' ba la' q'uel ti lolom che' bʌ Dios tsi' yajcayetla ti' tojlel pejtelel israelob cha'añ mi la' wajñel ti' tojlel Dios cha'añ mi' la' melben i ye'tel ti' Tabernáculo yic'ot cha'añ mi la' wajñel ti' tojlel israelob cha'añ mi la' mel la' we'tel ti' tojlelob?

¹⁰ Tsa'ix i pʌyʌyet cha'añ lʌc'ʌl ma' wajñel, temel yic'ot a pi'ʌlob i yalobilo' bʌ Leví, ¿ixcu wʌle la womix ja'el la' we'tel ti motomaj?

¹¹ Jiñi cha'añ, jatet yic'ot jiñi woli bʌ i tsajcañetob wolix la' tempan la' bʌ cha'añ mi la' contrajin lac Yum; come ¿majqui jiñi Aarón cha'añ mi la' contrajin ti wulwul t'añ?

¹² Ti wi'il Moisés tsi' choco ti pʌyol Datán yic'ot Abiram, i yalobilob Eliab. Pero tsi' jac'ʌyob: —Ma'añic mic majlel lojon ya'i.

¹³ ¿Mach ba añic a mul ma' wu'bin che' bʌ tsa' pʌyʌyon lojon loq'uel ya' ti lum ba'añ leche yic'ot cha'b, cha'añ ma' wʌc'on lojon ti chʌmel ila ti colem bʌ i tiquiñal lum yic'ot ja'el awomix cha'añ mic yumañet lojon?

¹⁴ Yic'ot ma'añic tsa' pʌyʌyon lojon tilel ba'añ leche yic'ot cha'b, mi añic tsa' wʌq'ueyon lojon lum mi ts'usubilic. ¿Mu' ba cajel a mʌcbeñob i wut ili wiñicob? ¡Ma'añic mi caj c majlel lojon!

¹⁵ Jiñi cha'añ Moisés tsa' wen mich'a, tsi' su'be lac Yum Dios: —¡Mach a ch'ʌmbeñob a majtañ mu' bʌ i yʌq'ueñetob! Mi juncojtic burro tsa' c ch'ʌmbeyob, mi añic chuqui leco tsa' c melbeyob mi juntiquilic.

¹⁶ Ti wi'il Moisés tsi' su'be Coré: —Jatet yic'ot jiñi woli bʌ i tsajcañetob, ijc'ʌl yom mi la' majlel ti' tojlel lac Yum; mux i majlel Aarón ja'el.

¹⁷ Ti jujuntiquiletla yom mi la' ch'ʌm majlel pom ti' yajñib, che' jiñi yom mi la' lʌc'tesan la' bʌ ti' tojlel lac Yum ti jujuntiquiletla yic'ot i yajñib la' pom. Yom lujunc'al yic'ot lujump'ejl i yuxc'al (250) i yajñib pom ti' pejtelel. Jatet, yic'ot Aarón, ti jujuntiquiletla mi caj la' ch'ʌm majlel i yajñib pom.

¹⁸ Tsi' ch'ʌmʌyob ti jujuntiquil jiñi pom ti yajñib, tsi' yotsayob c'ajc yic'ot jiñi pom. Tsa' wa'leyob ya' ti ti' jiñi Tabernáculo ba' mi' tempañob i bʌ, temel yic'ot Moisés yic'ot Aarón.

¹⁹ Ya'ix añob pejtelel israelob tsa' bʌ i pʌyʌyob tilel Coré. Tsa' wa'leyob ti' tojel i wut Moisés ti ti' jiñi Tabernáculo ba' mi' tempañob i bʌ; che' jiñi tsa' tsictiyi i ñuclel lac Yum ti' tojlelob.

²⁰ Lac Yum tsi' pejca Moisés yic'ot Aarón, tsi' su'beyob:

²¹ —¡Yom mi la' tʌts' la' bʌ ti' tojlel ili wiñicob, come mi caj c jisañob ti ora jach!

²² Pero tsi' ñucchocoyob i bʌ, tsi' yʌlʌyob: —C Dios, C Dios, jatet mu' bʌ a wʌq'ueñob i ch'ujlel pejtelel wiñic ¿mach ba juntiquilic jach wiñic jiñi tsa' bʌ i cha'le mulil? ¿Chucoch woli a laj mich'leñob ti pejtelelob?

²³ Lac Yum tsi' pejca Moisés, tsi' su'be:

²⁴ —Pejcan jiñi israelob, su'beñob: Tʌts'ʌ la' bʌ ya' ba' chumulob Coré, Datán yic'ot Abiram.

²⁵ Che' jiñi Moisés tsa' majli ba'añ Datán yic'ot Abiram. Jiñi xñoxob ti Israel tsa' caji i tsʌcleñob majlel.

²⁶ Moisés tsi' su'be pejtelel israelob: —Tʌts'ʌ la' bʌ ti ora ti' tojlel ili jontol bʌ wiñicob, yic'ot mach yomic mi la' wis tʌl chuqui añ i cha'añob, cha'añ ma'añic mi la' chʌmel yic'otob cha'añ pejtelel i mulob.

²⁷ Tsi' tʌts'ʌyob i bʌ wiñicob x'ixicob ti' tojel pisil bʌ i yotot Coré, Datán yic'ot Abiram; ixcu Datán yic'ot Abiram tsa' loq'uiyob ti ti' i yotot temel yic'ot i yijñamob yic'ot i yalobilob.

²⁸ Moisés tsi' yʌlʌ: —Ti ili ora mi caj la' ña'tan chocbilon tilel i cha'añ lac Yum cha'añ mic mel jiñi que'tel, mach tic bajñel pusic'alic tsa' c ña'ta c mel.

²⁹ Mi' che' jach mi' chʌmelob ili wiñicob che' bajche' mi' chʌmelob pejtelel wiñicob, che' jiñi mach Diosic jiñi tsa' bʌ i chocoyon tilel.

³⁰ Pero mi añ chuqui ñuc tsi' pʌsʌ lac Yum, mi tsi' cala i bʌ jiñi lum cha'añ mi' mujlañob ti pejtelelob yic'ot pejtelel i chu'bʌañob, mi cuxulob to mi' ju'belob ochel ti' yajñib chʌmeño' bʌ, tsiquil che' jiñi, cha'añ ili wiñicob tsi' techbeyob i mich'ajel lac Yum.

³¹ Che' bʌ Moisés tsa'ix ujti i laj al pejtelel ili t'añ, tsa' tsijli jiñi lum ya' ba' wa'alob.

³² Tsi' cala i bʌ jiñi lum, jiñi wiñicob x'ixicob woli bʌ i tsajcañob Coré tsa' laj yajliyob ochel ya' ti' mal jiñi lum yic'ot i yototob yic'ot i chu'bʌañob.

³³ Cuxulob to tsa' laj ju'biyob ti' yajñib chʌmeño' bʌ yic'ot pejtelel i chu'bʌañob; tsi' cha' ñup'u i bʌ jiñi lum; ma'añix chʌn tsiquil jiñi wiñicob ba' tsa' majliyob.

³⁴ Che' bʌ tsi' yu'bibeyob c'am bʌ i yoñel, pejtelel israelob año' bʌ ti' joytʌlel tsa' puts'iyob, tsi' yʌlʌyob: “¡Ma' mecu mujlʌyiconla ja'el ti jiñi lum!”

³⁵ Che' ja'el lac Yum tsi' choco ju'bel c'ajc cha'añ mi' pulob jiñi lujunc'al yic'ot lujuntiquil i yuxc'al (250) wiñicob woli bʌ i pulob pom.

³⁶ Lac Yum tsi' pejca Moisés, tsi' su'be:

³⁷ “Su'ben Eleazar i yalobil jiñi motomaj Aarón cha'añ mi' loc'san ti c'ajc i yajñib tac pom, la' i tʌts' majlel ya' ba' woli ti lejmel jiñi c'ajc, come ch'ujulix tic wut

³⁸ jiñi i yajñib tac pom tsa' bʌ i c'ʌñʌyob jiñi wiñicob tsa' bʌ jiliyob cha'añ i mul. Jiñi i yajñib tac pom mi caj la' mel ti welel bʌ c'ʌnc'ʌn taq'uiñ cha'añ mi la' tep' jiñi pulʌntib, come ch'ujul i yajñib tac pom tsa' bʌ i c'ʌñʌyob i yʌq'ueñoñob c majtañ. Jiñʌch i yejtal cha'añ mi' ña'tan israelob chuqui tsa' ujti”.

³⁹ Jiñi motomaj Eleazar tsa' caji i tempan i yajñib tac jiñi pom melbil bʌ ti c'ʌnc'ʌn taq'uiñ tsa' bʌ i c'ʌñʌyob jiñi tsa' bʌ puliyob ti c'ajc, che' jiñi tsi' sutq'uiyob ti welel bʌ c'ʌnc'ʌn taq'uiñ cha'añ mi' tep'ob jiñi pulʌntib.

⁴⁰ Jiñʌch i yejtal cha'añ mi' ña'tañob pejtelel israelob, cha'añ mach yomic mi yochel joch wiñic mach bʌ i p'olbalic Aarón cha'añ mi' pulbeñon pom, ame che'ic mi' jilelob che' bajche' tsa' ujti Coré yic'ot jiñi tsa' bʌ i tsajcayob, come che'ʌch tsi' wʌn alʌ lac Yum ti' tojlel Moisés.

⁴¹ Che' ti yijc'ʌlal, pejtelel jiñi israelob tsa' cajiyob ti wulwul t'añ ti' contra Moisés yic'ot Aarón, tsi' yʌlʌyob: “Jatetla tsa'ix la' wʌc'ʌ ti chʌmel i tejclum lac Yum.”

⁴² Che' bʌ woli' tempañob i bʌ ti' contra Moisés yic'ot Aarón, tsi' q'ueleyob jiñi Tabernáculo ba' mi' tempañob i bʌ, tsi' q'ueleyob cha'añ mosbil ti tocal, che' jiñi tsa' tsictiyi i ñuclel lac Yum.

⁴³ Che' jiñi Moisés yic'ot Aarón tsa' majliyob ya' ti Tabernáculo ba' mi' tempañob i bʌ,

⁴⁴ che' jiñi lac Yum tsi' su'be Moisés:

⁴⁵ “¡Tʌts'ʌ la' bʌ ti' tojlel ili wiñicob, come ti jumuc' mi caj c jisañob!” Pero Moisés yic'ot Aarón tsi' ñucchocoyob i bʌ.

⁴⁶ Moisés tsi' su'be Aarón: “Ch'ʌmʌ i yajñib pom ti ora, otsan jiñi ñich c'ajc am bʌ ya' ti pulʌntib yic'ot otsan pom; cucu ti ora ba'añ israelob, c'ajtin i ñusʌbentelob i mul, come tsa'ix mich'a lac Yum, jiñi cha'añ tsa'ix tejchiyob ti chʌmel.”

⁴⁷ Che' jiñi Aarón tsi' ch'ʌmʌ i yajñib pom che' bajche' tsi' su'be Moisés, ti ajñel tsa' majli ba'añ israelob; tsi' q'uele woliyobix ti chʌmel. Tsi' yotsa pom ya' ti yajñib ba' mi' pulel cha'añ mi' ñusʌbentelob i mul.

⁴⁸ Ti wi'il tsa' wa'le Aarón ya' ti' yojlil jiñi chʌmeño' bʌ yic'ot jiñi cuxulob to bʌ, che' jiñi tsa' lajmi jiñi chʌmel.

⁴⁹ Ti jim bʌ q'uiñ tsa' chʌmiyob chʌnlujump'ejl mil, yic'ot jo'lujunc'al i cha'bajc' (14,700) wiñicob, ixcu ilayi mach tsicbilobic jiñi tsa' bʌ jisʌntiyob yic'ot Coré che' bʌ tsi' ts'a'leyob Dios.

⁵⁰ Ti wi'il, tsa' cha' sujti majlel Aarón ba'añ Moisés ti ti' jiñi Tabernáculo ba' mi' tempañob i bʌ che' bʌ lajmeñix jiñi chʌmel.