Numeros 15 - Jiñi Tsiji' bʌ Wen T'añ cha'añ Estudio

Mandar tac cha'añ ofrenda

¹ Lac Yum tsi' pejca Moisés, tsi' su'be:

² “Yom ma' su'ben israelob: Che' bʌ ochemetixla ya' ti la' lum mu' bʌ caj cʌq'ueñetla cha'añ mi la' chumtʌl,

³ mi mux la' wʌq'ueñon pulbil tac bʌ c majtañ, yic'ot tsʌnsʌbil tac bʌ c majtañ, mi i ña'al wacax tac o mi tʌñʌme' tac, mi cha'añ tsa' la' wʌc'ʌ xuc'ul bʌ la' t'añ o cha'añ tilem bʌ ti la' pusic'al, o cha'añ mi la' wʌq'ueñon che' ti yorajlel la' q'uiñijel tac xojocña bʌ i yujts'il tic tojlel,

⁴ che' jiñi, jiñi mu' bʌ i ch'ʌmbeñon tilel c majtañ, la' i ch'ʌmbeñon tilel cha'p'ejl kilo jiñi wen chʌmeñ bʌ juch'bil bʌ i ñich harina xajc'ubil bʌ yic'ot jump'ejl litro olivo aceite.

⁵ Che' mi la wʌq'ueñon pulbil bʌ o tsʌnsʌbil bʌ c majtañ, yom mi la' wʌq'ueñon jump'ejl litro vino cha'añ jujuncojt tʌñʌme'.

⁶ Cha'añ jujuncojt tat tʌñʌme' mu' bʌ la' wʌq'ueñon, yom yic'ot chʌmp'ejl kilo jiñi wen chʌmeñ bʌ juch'bil bʌ i ñich harina xajc'ubil bʌ yic'ot cha'p'ejl litro olivo aceite;

⁷ yic'ot yom cha'p'ejl litro vino cha'añ mi' mujlel jiñi majtañʌl. Jiñʌch c majtañ pulbil bʌ xojocña bʌ i yujts'il tic tojlel.

⁸ Che' mi' la' wʌq'ueñon tat wacax che' bajche' pulbil bʌ o tsʌnsʌbil c majtañ, cha'añ woli la' wʌc' xuc'ul bʌ la' t'añ o mi majtañʌl cha'añ i ñʌch'tʌlel la' pusic'al,

⁹ yom mi la wʌc' yic'ot jiñi tat wacax wʌcp'ejl kilo jiñi wen chʌmeñ bʌ juch'bil bʌ i ñich harina xajc'ubil bʌ yic'ot cha'p'ejl litro olivo aceite;

¹⁰ yic'ot yom cha'p'ejl litro vino cha'añ mi' mujlel jiñi majtañʌl. Jiñʌch c majtañ pulbil bʌ xojocña bʌ i yujts'il tic tojlel.

¹¹ Che'ʌch yom mi la' mel che' mi la' wʌq'ueñon jujuncojt c majtañ, mi tat wacax o mi tat tʌñʌme', mi alʌ tat tʌñʌme' o mi alʌ tat chivo.

¹² Che' bajche' jaycojt mi la' wʌq'ueñon jiñi alʌc'ʌl, che'ʌch mi caj la' mel ti jujuncojt.

¹³ Pejtelel israelob, che'ʌch mi caj i melob cha'añ mi yʌq'ueñoñob pulbil bʌ c majtañ xojocña bʌ i yujts'il tic tojlel.”

¹⁴ “Mi añ juntiquil ñajt bʌ ch'oyol ya' bʌ chumul la' wic'ot, o majqui jach añix bʌ ora chumul la' wic'ot, mi yom i yʌq'ueñon c majtañ xojocña bʌ i yujts'il, lajal yom mi' melob che' bajche' mi la' mel, che'ʌch yom ti pejtelel ora.

¹⁵ Pejtelel chumulo' bʌ ti jiñi lum junlajal mi caj i jac'ob c mandar, jiñi israelob yic'ot jiñi ñajt bʌ ch'oyol ya' bʌ chumul la' wic'ot. Jiñʌch c mandar cha'añetla yic'ot cha'añ la' walobilob ti pejtelel ora; junlajaletla tic tojlel yic'ot jiñi ñajt bʌ ch'oyol.

¹⁶ Jump'ejl jach mandar yic'ot jump'ejl jach c su'bal cha'añetla yic'ot cha'añ jiñi ñajt bʌ ch'oyol ya' bʌ chumul la' wic'ot.”

¹⁷ Lac Yum tsi' pejca Moisés, tsi' su'be:

¹⁸ “Pejcan jiñi israelob, su'beñob: Ba' ora tsa'ix ochiyetla ti jiñi lum ba' woli c pʌyetla majlel,

¹⁹ che' mi cajel la' c'uxben i wut jiñi la' pʌc'ʌb tac, yom mi la' wʌq'ueñon c majtañ.

²⁰ Ti jiñi ñaxan bʌ xajc'ubil i wut trigo mi caj la' ch'ʌm tilel junq'uejl waj cha'añ c majtañ; jiñʌch majtañʌl cha'añ ñaxan bʌ i wut la' trigo, che'ʌch mi caj la' mel.

²¹ Ti jiñi ñaxan bʌ i wut pʌc'ʌbʌl mi caj la' wʌq'ueñon c majtañ, che'ʌch mi caj i mel la' walobilob ja'el.”

²² “Ba ora mi la' cʌy la' ts'ʌctesan pejtelel ili c mandar tsa' bʌ c su'be Moisés,

²³ baqui tac jach bʌ c mandar tsa' bʌ cʌc'ʌ ti' tojlel Moisés, c'ʌlʌl ba' ora tsa' cʌc'ʌ c mandar cha'añetla ti pejtelel ora,

²⁴ mi jiñi mulil tsa' bʌ i mele jiñi tejclum che' mach tsajilic i cha'añ, pejtelel israelob yom mi' yʌq'ueñoñob juncojt tat wacax cha'añ pulbil bʌ c majtañ xojocña bʌ i yujts'il, temel yom mi' yʌq'ueñoñob yic'ot majtañʌl melbil bʌ ti harina yic'ot vino cha'añ mi' mujlel jiñi majtañʌl, yic'ot yom mi' yʌq'ueñoñob ja'el juncojt tat chivo cha'añ i ñusʌntel mulil.

²⁵ Che' jiñi, jiñi motomaj mi caj i yʌc' jiñi majtañʌl cha'añ pejtelel israelob, che' jiñi mux i ñusʌbentelob i mul, come jiñi mulil tsa' bʌ i meleyob mach tsajilobic i cha'añ. Mi caj i yʌq'ueñoñob c majtañ mu' bʌ i pulel cha'añ i sajtemalob.

²⁶ Che' jiñi muq'uix i ñusʌbentelob pejtelel israelob yic'ot mach bʌ israelobic chumulo' bʌ yic'otob, come jiñʌch mulil mach bʌ tsajilic i cha'añ tsi' meleyob.”

²⁷ “Mi añ juntiquil tsa' bʌ i cha'le mulil che' mach tsajilic i cha'añ, mi caj i yʌc' juncojt chivo añ jaxto bʌ jump'ejl i ja'bilel cha'añ i ñusʌntel jiñi mulil.

²⁸ Jiñi motomaj mi caj i yʌc' ti ñusʌntel i mul jiñi tsa' bʌ i cha'le mulil tij contra che' mach tsajilic i cha'añ, che' jiñi mux i cha' ajñel ti uts'at yic'oton, yic'ot mux i ñusʌbentel i mul.

²⁹ Junlajal jach jiñi mandar che' mi la' cha'len mulil che' mach tsajilic la' cha'añ jatetla israelet bʌ la o jiñi ñajt bʌ ch'oyol ya' bʌ chumul la' wic'ot.”

³⁰ “Pero majqui jach mi' mel chuqui yom cha'añ mi' bajñel su'b i ñuclel, mi Israel o mi jiñi ñajt bʌ ch'oyol; wolix i ts'a'leñon, jiñi wiñic yom mi' chojquel loq'uel ti' tojlel i pi'ʌlob ti' lumal.

³¹ Come ma'añic tsi' jac'ʌ c t'añ. Tsa' jach i ñusa c mandar. Jiñi wiñic wersa mi' chojquel loq'uel cha'añ mi' bajñel cʌytʌl ti' wenta i mul.”

I tojol i mul xñusa mandar ti' yorajlel c'aj-o

³² Che' ya' añob pejtelel israelob ya' ti colem bʌ i tiquiñal lum, tsi' tajayob juntiquil wiñic woli bʌ ti xot' si' che' ti' yorajlel c'aj-o.

³³ Jiñi wiñic tsa' bʌ i tajayob che' woli ti xot' si' tsi' pʌyʌyob tilel ba'añ Moisés, ba'añ Aarón, yic'ot ba'añ pejtelel israelob.

³⁴ Tsi' yotsayob ti mʌjquibʌl, come maxto tsiquilic chuqui mi caj i tumbentel.

³⁵ Jiñi cha'añ lac Yum tsi' su'be Moisés: “Wersa mi' tsʌnsʌntel jiñi wiñic, julula ti xajlel jatetla israelob ya' ti junwejl i ti' tejclum.”

³⁶ Che' jiñi tsi' pʌyʌyob loq'uel ti tejclum cha'añ mi' julob ti xajlel jinto tsa' chʌmi jiñi wiñic che' bajche' lac Yum tsi' su'be Moisés.

I ch'ʌjlil i ti' bujcʌl tac

³⁷ Lac Yum tsi' pejca Moisés, tsi' su'be:

³⁸ “Su'beñob israelob: Yom mi la' joch' i ti' la' bujc, jatetla yic'ot la' walobilob ti pejtelel ora. Che' ja'el yom mi la' wʌc' jujunt'ujm yʌjyʌx puy ya' ti' ti'ti'il.

³⁹ Che' mi' la' q'uel i ch'ʌjlil i ti' la' bujc yom mi la' c'ajtesan ti la' pusic'al pejtelel c mandar. Che' jiñi ts'ʌcʌl mi caj la' chʌn mel, ma'añix mi caj la' jac'ben jiñi mu' bʌ la' bajñel ña'tan la' pusic'al yic'ot mu' bʌ i q'uel la' wut, come jiñʌch mu' bʌ i yʌq'uetla ti ts'i'lel.

⁴⁰ Che' jiñi mi caj la' chʌn ña'tan yic'ot mi caj la' jac' ti ts'ʌcal ti' pejtelel jiñi c mandar, cha'añ ch'ujul mi la' wajñel tic tojlel.

⁴¹ Joñoñʌch la' Yumon, la' Dioson tsa' bʌ c loc'sayetla ti' lumal Egipto cha'añ mi cochel ti la' Dios. Joñon la' Yumon, la' Dioson.”