Numeros 14 - Jiñi Tsiji' bʌ Wen T'añ cha'añ Estudio

Jiñi israelob tsi' contrajiyob lac Yum

¹ Che' jiñi pejtelel jiñi tempʌbilo' bʌ tsa' cajiyob ti oñel yic'ot ti c'am bʌ t'añ; jiñi wiñicob x'ixicob tsi' cha'leyob uq'uel ti' jump'ejlel ac'ʌlel.

² Ti pejtelel israelob tsa' caji i contrajiñob Moisés yic'ot Aarón. Jiñi wiñicob x'ixicob tsi' yʌlʌyob: “¡Uts'at tsa'ic chʌmiyon lojon ti' lumal Egipto! ¡uts'at muq'uic lac chʌmel wʌ' ti tiquiñal lum!

³ ¿Chucoch woli' pʌyon lojon tilel lac Yum ti ili lum cha'añ mic tsʌnsʌntel lojon ti espada, yic'ot chucoch jiñi quijñam lojon yic'ot calobilob lojon mi' chujquelob majlel cha'añ ti' caj guerra? ¿Mach ba uts'atic che' mic cha' sujtel lojon ti Egipto?”

⁴ Yic'ot tsa' caji i yʌl tacob: “La' lac yajcan juntiquil lac yum cha'añ mi lac cha' sujtel ti Egipto.”

⁵ Moisés yic'ot Aarón tsi' pʌcchocoyob i bʌ ti' tojlel pejtelel israelob.

⁶ Josué i yalobil Nun, yic'ot Caleb i yalobil Jefone, jiñi tsajñi bʌ i q'uelob jiñi lum, tsi' tsiliyob i pislel

⁷ yic'ot tsi' su'beyob pejtelel jiñi israelob: —Jiñi lum tsajñi bʌ j q'uel lojon, wen uts'atax.

⁸ Mi uts'at mi' q'uelonla lac Yum, jiñi mi caj i pʌyonla majlel ti jiñi lum yic'ot mi caj i yʌq'ueñonla; jiñʌch jump'ejl lum ba'añ ca'bʌl leche yic'ot cha'b.

⁹ Jiñi cha'añ, mach mi la' contrajin lac Yum yic'ot mach mi la' bʌc'ñan jiñi wiñicob ya' bʌ añob ti jiñi lum, come jatetla mi caj la' c'ux che' bajche' mi la' c'ux la' waj; come ma'añix i cʌntʌntel jiñi tejclum yic'ot añ lac Yum ti lac tojlel: mach mi la' bʌc'ñañob.

¹⁰ Jiñi cha'añ, pejtelel wiñicob tsi' ña'tayob i julob ti xajlel. Pero i ñuclel lac Yum tsa' tsictiyi ya' ti' pam jiñi Tabernáculo ba' mi tempañob i bʌ yic'ot ti' tojlel pejtelel israelob.

¹¹ Lac Yum tsi' su'be Moisés: —¿Baqui to ora mi caj i cʌy i chʌn mich'esañoñob ili wiñicob x'ixicob? ¿Baqui to ora mi caj i ñopoñob che' tsa'ix c pʌsbeyob i yejtal tac c p'ʌtʌlel?

¹² Jiñi cha'añ mi caj c jisañob ti c'am-ʌjel tac, ixcu jatet mi caj c wa'chocoñet ti' tojlel ñuco' bʌ wiñicob yic'ot ñumen p'ʌtʌlo' bʌ che' bajche'ob.

¹³ Pero Moisés tsi' jac'be lac Yum: —Mi caj i bʌc' u'biñob jiñi egiptojob, come yujilob tsa' loc'sayob tilel ti ñuc bʌ a p'ʌtʌlel,

¹⁴ yic'ot mi caj i su'beñob jiñi chumulo' bʌ ti Canaán, come u'bibilob i cha'añ, cha'añ jatet c Yum, wʌ'ʌch añet ti ojlil ti' tojlelob, tsa' pʌsbeyob a bʌ che' bajche' mi' q'uelob i bʌ wiñicob x'ixicob, yic'ot jiñi a tocal ya'ʌch añ ti' tojlelob, che' ti q'uiñil mi' majlel a wic'otob ti jiñi colem bʌ tocal yic'ot che' ti ac'ʌlel mi' majlel a wic'otob ti colem bʌ c'ajc.

¹⁵ Mi tsa' wʌc'ʌ ti chʌmel ili wiñicob x'ixicob ti junjajts' jach, jiñi wiñicob x'ixicob tsa'ix bʌ i yu'biyob a ñuclel, mi caj i yʌlob:

¹⁶ Jiñi i Yum ma'añic tsa' mejli i pʌyob majlel ya' ti lum baqui tsi' wʌn su'be cha'añ mi caj i yʌq'ueñ, jiñi cha'añ tsi' yʌc'ʌ ti chʌmel ya' ti tiquiñal bʌ pañimil.

¹⁷ Jiñi cha'añ c Yum, mij c'ajtibeñet ti wocol t'añ cha'añ mi' tsictiyel a p'ʌtʌlel, che' bajche' tsa' wʌn alʌ:

¹⁸ “C Yum, mach orajic mi' mich'an yic'ot ca'bʌl i yutslel i pusic'al, ñusʌbeñob i mul yic'ot i jontolil, anquese ma'añic mi caj a to'ol q'uelben i mul jiñi añobʌch bʌ i mul, come awujil i yʌc'ol i tojolob i mul jiñi tatʌlob yic'ot i yalobilob c'ʌlʌl ti yuxlajmlel yic'ot ti' chʌnlajmlel i p'olbalob.”

¹⁹ Wʌle ñusʌben i mul ili wiñicob x'ixicob che' bajche' añ i yonlel a p'untaya, che' lajal bajche' tsa' ñusʌbeyob i mul c'ʌlʌl che' bʌ tsa' loq'uiyob ti Egipto c'ʌlʌl wʌle.

Lac Yum tsi' yʌq'ue wocol Israel

²⁰ Jiñi cha'añ lac Yum tsi' yʌlʌ: —Tsa'ix c ñusʌbeyob i mul, che' bajche' tsa' c'ajtibeyon.

²¹ A wujil cuxulon yic'ot but'ul pañimil tic ñuclel,

²² mi juntiquilic jiñi tsa' bʌ i q'ueleyob c ñuclel yic'ot ñuc tac bʌ i yejtal c p'ʌtʌlel tsa' bʌ c pʌsbeyob ti Egipto yic'ot ya' ti jochol bʌ lum, yic'ot jiñi lujunyajlix bʌ tsi' yilʌbeyoñob c pusic'al, yic'ot ja'el jiñi mach bʌ añic tsi' p'isiyob ti' wenta c t'añ,

²³ ma'añic mi caj i q'uelob jiñi lum tsa' bʌ c su'beyob i ñojte'elob cha'añ mi caj cʌq'ueñob; ma'añic mi caj i q'uelob jiñi lum mi juntiquilic jiñi tsa' bʌ i ts'a'leyoñob.

²⁴ Pero jiñi c wiñic Caleb mi caj i q'uel jiñi lum cha'añ tsi' ñopoyon ti pejtelel i pusic'al. Jiñi cha'añ mi caj c pʌy ochel ti jiñi lum ya' ba' tsajñi i q'uel. Ya' mi' cajelob ti chumtʌl i p'olbalob ti pejtelel ora.

²⁵ Awilan, jiñi amalecitajob yic'ot jiñi cananeojob chumulob ya' ti joctʌl. Sujtenla, ijc'ʌl mi la' cha' tilel, cha'añ mi la' majlel ti colem bʌ i tiquiñal lum ti' bijlel jiñi Chʌchʌc bʌ Mar.

²⁶ Lac Yum tsi' pejca Moisés yic'ot Aarón, tsi' su'beyob:

²⁷ —¿Jayp'ejl to ora mi caj cuchbeñob i mul ili jontolo' bʌ wiñicob woliyo' bʌ ti wulwul t'añ tij contra? Tsa'ix cu'bibeyob i t'añ jiñi israelob cha'añ woli i contrajiñoñob.

²⁸ Su'beñob: Cuxulon, che'en lac Yum, che' bajche' tsa' la' contrajiyon, che'ʌch mi caj contrajiñetla ja'el.

²⁹ Mi caj la' chʌmel wʌ' ti tiquiñal lum, pejtelel tsa' bʌ ts'ijbunti la' c'aba' ti juñ añix bʌ junc'al la' ja'bilel, tsa' bʌ la' cha'le wulwul t'añ tij contra.

³⁰ Mi juntiquilic ti la' tojlel mi caj i yochel ti jiñi lum tsa' bʌ cʌlʌ cha'añ mi caj la' ch'ʌm, cojach Caleb i yalobil Jefone, yic'ot Josué i yalobil Nun, mi caj i yochelob ti jiñi lum.

³¹ Pero jiñi la' walobilob, tsa' la' wʌlʌ cha'añ mi caj i pʌjyelob majlel ti majtañ e'tel, joñon mi caj c pʌyob ochel ti jiñi lum yic'ot mi caj i cʌñob jiñi lum tsa' bʌ la' ts'a'le.

³² Ixcu jatetla, wʌ' jach mi caj la' chʌmel ila ti' tiquiñal lum.

³³ Jiñi la' walobilob mi caj i cha'leñob xʌmbal ñumel ti colem bʌ i tiquiñal lum cha'c'al ja'b, mi caj i yu'biñob i wocolel cha'añ ti' caj i tsʌtslel la' pusic'al, jinto mi la' chʌmel ya' ti' tiquiñal lum.

³⁴ Che' bajche' cha'c'al q'uiñ tsajñi la' tsajin jiñi lum, che' ja'el cha'c'al ja'b mi caj la' wu'bin ca'bʌl wocol cha'añ la' mul, jump'ejl ja'b cha'añ jujump'ejl q'uiñ. Che' jiñi, mux caj la' cʌn che' bajche' yilal jiñi wocol mu' bʌ cʌq'ueñetla.

³⁵ Joñon la' Yumon, tsa'ix c cha'le t'añ. Che'ʌch mi caj c mel ti' tojlel pejtelel ili jontol bʌ wiñicob tsa' bʌ i tempayob i bʌ cha'añ mi' contrajiñoñob. Ti ili i tiquiñal lum mi caj i jilelob, yic'ot ya'i mi caj i chʌmelob.

³⁶ Jiñi wiñicob tsa' bʌ i chocoyob majlel Moisés cha'añ mi' tsajiñob jiñi lum, che' bʌ tsa' cha' sujtiyob tsi' yʌc'ʌyob ti wulwul t'añ jiñi israelob ti' contra lac Yum,

³⁷ jiñi wiñicob tsa' bʌ i techeyob jontol bʌ t'añ cha'añ jiñi lum, tsa' chʌmiyob ti c'am-ʌjel ti' tojlel lac Yum.

³⁸ Pero Josué i yalobil Nun yic'ot Caleb i yalobil Jefone, cuxul tsa' cʌleyob che' bʌ tsa' chʌmiyob jiñi lujuntiquil i pi'ʌlob tsajñiyo' bʌ i q'uelob jiñi lum.

Tsa' mʌlbentiyob jiñi año' bʌ ti Horma

³⁹ Moisés tsi' su'beyob ili t'añ pejtelel israelob, che' jiñi wen ch'ijiyem tsa' cʌleyob.

⁴⁰ Che' ti yijc'ʌlal, wen se'bto tsa' ch'ojyiyob, tsa' letsiyob majlel ya' ti chañ bʌ wits, tsi' yʌlʌyob: —Wʌle chajpʌbiloñix lojon cha'añ mic majlel lojon ti jiñi lum tsa' bʌ i yʌlʌ lac Yum Dios, come tsa'ix c cha'le lojon mulil.

⁴¹ Moisés tsi' jac'ʌ: —¿Chucoch woli la' ñusʌben i mandar lac Yum? Ti isujm ma'añic mi caj la' loq'uel ti uts'at.

⁴² Mach majliquetla, come lac Yum mach ya'ic añ la' wic'ot, ame jisʌntiquetla ti' tojlel la' contrajob.

⁴³ Come jiñi amalecitajob yic'ot cananeojob ya'añob ya' ba' woli la' lon ña'tan majlel, mi caj i tsʌnsañetla ti espada come lac Yum ma'añic mi caj i yajñel la' wic'ot, come ma'añic tsa' la' jac'ʌ la' tsajcan majlel.

⁴⁴ Pero tsi' wersa ña'tayob i letsel ya' ti wits, anquese ma'añic tsa' letsi majlel Moisés, mi jiñic jiñi Arca ba' lotol jiñi xuc'ul bʌ t'añ i cha'añ lac Yum, tsi' ch'ʌmʌyob majlel.

⁴⁵ Che' jiñi tsa' ju'biyob tilel jiñi amalecitajob yic'ot jiñi cananeojob chumulo' bʌ ti wits, tsi' lowoyob, tsi' mʌlbeyob yic'ot tsi' yajñesayob majlel c'ʌlʌl ti Horma.