Numeros 13 - Jiñi Tsiji' bʌ Wen T'añ cha'añ Estudio

Jiñi lajchʌntiquil xtsajiyajob ti Canaán

¹ Lac Yum tsi' pejca Moisés, tsi' su'be:

² “Choco majlel wiñicob cha'añ mi' tsajiñob jiñi lum i c'aba' Canaán mu' bʌ caj cʌq'ueñob israelob; choco majlel jujuntiquil yumʌlob loq'uemo' bʌ ti jiñi lajchʌnmojt i yalobilob Israel.”

³ Jiñi cha'añ Moisés tsi' chocoyob majlel ya' ti colem bʌ i tiquiñal lum i c'aba' Parán che' bajche' tsi' yʌlʌ lac Yum. Ti pejtelel ili wiñicob añob ñuc bʌ i ye'telob ti' tojlel i pi'ʌlob.

⁴ Jiñʌch i c'aba'ob: Samúa i yalobil Zacur, loq'uem bʌ ti' p'olbal Rubén.

⁵ Safat i yalobil Horí, loq'uem bʌ ti' p'olbal Simeón.

⁶ Caleb i yalobil Jefone, loq'uem bʌ ti' p'olbal Judá.

⁷ Igal i yalobil José, loq'uem bʌ ti' p'olbal Isacar.

⁸ Oseas i yalobil Nun, loq'uem bʌ ti' p'olbal Efraín.

⁹ Palti i yalobil Rafú, loq'uem bʌ ti' p'olbal Benjamín.

¹⁰ Gadiel i yalobil Sodi, loq'uem bʌ ti' p'olbal Zabulón.

¹¹ Gadi i yalobil Susi, loq'uem bʌ ti' p'olbal Manasés, i yalobil bʌ José.

¹² Amiel i yalobil Gemali, loq'uem bʌ ti' p'olbal Dan.

¹³ Setur i yalobil Micael, loq'uem bʌ ti' p'olbal Aser.

¹⁴ Nahbi i yalobil Vapsi, loq'uem bʌ ti' p'olbal Neftalí.

¹⁵ Guel i yalobil Maqui, loq'uem bʌ ti' p'olbal Gad.

¹⁶ Jiñʌch i c'aba'ob jiñi wiñicob tsa' bʌ i chocoyob majlel Moisés cha'añ mi' tsajiñob jiñi lum. Moisés tsi' q'uextʌbe i c'aba' Oseas i yalobil Nun, tsi' yotsa ti Josué.

¹⁷ Che' bʌ Moisés tsi' chocoyob majlel cha'añ mi' q'uelob bajche' yilal i lum Canaán, tsi' su'beyob: “Cucula c'ʌlʌl ti Neguev, ti wi'il letsenla majlel ti wits.

¹⁸ Wen q'uelela jiñi lum bajche' yilal yic'ot bajche' yilalob jiñi wiñicob ya' bʌ chumulob, mi ch'ejlob, mi mach ch'ejlobic, mi ts'ita'ob o mi ca'bʌlob;

¹⁹ bajche' yilal jiñi lum, mi uts'at o mi mach uts'atic; bajche' yilal jiñi tejclum tac, mi pisil otot tac ba' chumulob o mi joy ñup'ulob ti ts'ajc jiñi tejclum tac,

²⁰ yic'ot bajche' yilal jiñi lum, mi mux i colel pʌc'ʌbʌl tac o ma'añic, mi añ tac i te'elal, o ma'añic. Ch'ejl-esan la' bʌ yic'ot ch'ʌmʌla tilel i wut pʌc'ʌbʌl tac am bʌ ti jiñi lum.” Ti jiñi bʌ ora i yorajlelʌch jiñi ñaxan bʌ i wut ts'usub.

²¹ Jiñi cha'añ tsa' cajiyob ti majlel, tsa' caji i tsajiñob majlel jiñi lum c'ʌlʌl ti' tiquiñal lum i c'aba' Zin c'ʌlʌl ti Rehob, am bʌ ti' t'ejl i bijlel Hamat.

²² Tsa' ñumiyob majlel ti Neguev c'ʌlʌl tsa' c'otiyob ti Hebrón, ya' ba' chumul i p'olbalob Anac ti' mojt ti' mojt: Ahimán yic'ot Sesai yic'ot Talmai. Tsa' wa'choconti jiñi tejclum i c'aba' Hebrón che' añ to yom wucp'ejl ja'b cha'añ mi' wa'chocontel Zoán am bʌ ti Egipto.

²³ Tsa' c'otiyob c'ʌlʌl ya' ti pa' am bʌ ti joctʌl i c'aba' Escol, ya'i tsi' tuc'uyob jumpajl ts'usub, tsi' q'uecheyob sujtel ti junts'ijt te' cha'tiquil wiñicob yic'ot ja'el i wut te' lajal bʌ che' bajche' alaxax yic'ot i wut higuera te'.

²⁴ Jiñi cha'añ tsi' yotsʌbeyob i c'aba' jiñi lum: joctʌl am bʌ ti Escol, cha'añ jiñi jumpajl ts'usub tsa' bʌ i tuc'uyob ya'i jiñi i yalobilob Israel.

²⁵ Che' bʌ tsa' ñumi cha'c'al q'uiñ i tsajiñob jiñi lum tsa' cha' sujtiyob jiñi wiñicob ba'añ i pi'ʌlob.

²⁶ Tsa' cha' c'otiyob ti Cades am bʌ ya' ti colem bʌ i tiquiñal lum i c'aba' Parán. Tsi' su'beyob Moisés yic'ot Aarón yic'ot pejtelel israelob bajche' yilal i lumal Canaán, yic'ot tsi' pʌsbeyob i wut jiñi pʌc'ʌbʌl tac am bʌ ti jiñi lum.

²⁷ Che' ja'el tsi' su'beyob: “Tsa' c'otiyon lojon ya' ba' tsa' chocoyon lojon majlel, isujm añʌch ca'bʌl leche yic'ot cha'b; iliyi jiñʌch i wut jiñi pʌc'ʌbʌl tac.

²⁸ Pero jiñi wiñicob ya' bʌ chumulob wen ch'ejlob yic'ot wen colem jiñi tejclum tac, joyolob ti ts'ajc wen tsʌts bʌ melbil; che' ja'el tsa' j q'uele lojon ya' añob ja'el i yalobilob Anac.

²⁹ Ya' chumulob i yalobilob Amalec ti Neguev; jiñi heteojob yic'ot jebuseojob yic'ot amorreojob chumulob ti wits; jiñi cananeojob chumulob ti ti' mar, yic'ot ti ti' Jordán ja'.”

³⁰ Che' jiñi Caleb tsa' caji i su'ben i pi'ʌlob cha'añ mi' ñʌjch'elob ti' tojlel Moisés, tsi' yʌlʌ: —Conla ti ora cha'añ mi lac ch'ʌm jiñi lum, come muc'ʌch i mʌjlel lac cha'añ ti' tojlelob.

³¹ Pero jiñi yaño' bʌ wiñicob tsajñiyo' bʌ yic'ot, tsi' yʌlʌyob: —Mach mejliconla ti letsel majlel cha'añ mi laj contrajiñob jiñi tejclum, come ñumen p'ʌtʌlob bajche' joñonla.

³² Jiñi wiñicob tsi' yʌlʌyob ti' tojlel i pi'ʌlob cha'añ mach uts'atic jiñi lum tsajñi bʌ i q'uelob: —Jiñi lum tsajñi bʌ j q'uel lojon mach weñic, mi' mʌsan jiñi ya' bʌ chumulob. Pejtelel jiñi ya' bʌ chumulob, tsa' bʌ j q'uele lojon, wen chañob.

³³ Che' ja'el tsa' j q'uele lojon wen chañ tacob jiñi wiñicob, jiñʌch i yalobilob Anac, i p'olbal wen chaño' bʌ wiñicob. Joñon lojon, ti' tojlelob, lajalon lojon bajche' sajc', yic'ot che'ʌch tsi' q'ueleyon lojon ja'el.