Numeros 12 - Jiñi Tsiji' bʌ Wen T'añ cha'añ Estudio

María yic'ot Aarón tsi' cha'leyob wulwul t'añ ti' contra Moisés

¹ Awilan, María yic'ot Aarón tsi' cha'leyob wulwul t'añ ti' contra Moisés cha'añ tsi' pʌyʌ juntiquil xch'oc cha'añ i yijñam ch'oyol bʌ ti Cus.

² Tsi' yʌlʌyob: “¿Cojach ba ti' tojlel Moisés mi' mejlel i cha'len t'añ lac Yum? ¿Mach ba añic tsi' pejcayonla ja'el?” Ili wulwul t'añ tsi' yu'bi lac Yum.

³ Uts i pusic'al Moisés ñumen bajche' pejtelel wiñicob ti pañimil.

⁴ Ti wi'il lac Yum tsi' su'be Moisés, Aarón yic'ot María: “Cucula ti la' wuxticlel ya' ti Tabernáculo ba' mi la' tempan la' bʌ.” Jiñi uxtiquilob tsa' majliyob.

⁵ Jiñi cha'añ lac Yum tsa' ju'bi tilel ti wa'al bʌ tocal, tsa' wa'le ti ti' Tabernáculo. Tsi' pʌyʌ Aarón yic'ot María, tsi' lʌc'tesayob i bʌ ti' cha'ticlelob.

⁶ Lac Yum tsi' su'beyob: “Ñʌch'tanla ili c t'añ. Che' bʌ añix x'alt'añ ti la' tojlel mi caj c pejcañob ti' ñajal. Mi caj c pejcañob che' añob ti' wʌyib.

⁷ Pero mach che'ic mic pejcan c wiñic Moisés come jiñi jach xuc'ul bʌ x'e'tel ti' tojlel c cha'año' bʌ.

⁸ Mic caj c cha'len t'añ quic'ot Moisés che' bajche' mi la' pejcan la' bʌ ti jamʌl. Mach muculic c t'añ ti' tojlel. Mi caj i cʌñon che' bajche' quilal. ¿Chucoch ma'añic tsa' la' cha'le bʌq'uen che' bʌ tsa' la' wulwul a'le c wiñic Moisés?”

⁹ Jiñi cha'añ tsa' tili i mich'ajel lac Yum cha'añ mi' contrajiñob; ti wi'il tsa' cha' majli.

¹⁰ Ti ora jach tsi' tʌts'ʌ i bʌ jiñi tocal ti' tojlel jiñi Tabernáculo. Awilan María añix i cha'añ jiñi leco bʌ tsoy, i pʌchʌlel wen sʌsʌc tsa' sujti che' bajche' i ña'al tsʌñal. Che' bʌ tsi' q'uele Aarón añix leco bʌ tsoy ti' pʌchʌlel María,

¹¹ tsi' su'be Moisés: “¡Awocolic c yum! mach a wʌq'ueñon lojon c toj ili mulil, come tontojtic tsa' c mele lojon c bʌ, tsa' c cha'le lojon mulil.

¹² Mach a cʌy María che' bajche' jiñi chʌmeñ bʌ mi yilan pañimil, ame lajalic mi' cʌytʌl che' bajche' chʌmeñ bʌ alʌl lamital jilemix bʌ i bʌc'tal che' mi yilan pañimil.”

¹³ Che' jiñi Moisés tsi' pejca lac Yum ti wocol t'añ, tsi' su'be: “C Yum Dios, awocolic, cha' lajmesan ti ora jiñi c chich.”

¹⁴ Lac Yum tsi' jac'be Moisés: “Tsa'ic tujbʌbenti i wut jiñi x'ixic cha'añ i tat, ¿mach ba muq'uic i yʌjq'uel ti quisin wucp'ejl q'uiñ? La' chojquic loq'uel wucp'ejl q'uiñ ya' ba' chumuletla, ti wi'il, yom mi' cha' ochel ya' ba' chumuletla.”

¹⁵ Jiñi cha'añ wucp'ejl q'uiñ tsa' chojqui loq'uel María ti' tojlel i pi'ʌlob. Jiñi wiñicob x'ixicob tsi' pijtayob wucp'ejl q'uiñ, ma'añic tsi' poj techeyob i xʌmbal jinto che' cha' ya'ix añ yic'otob.

¹⁶ Ti wi'il jiñi tejclum tsa' majliyob ti Hazerot. Tsa' c'otiyob ti jijlel ya' ti colem bʌ i tiquiñal lum i c'aba' Parán.