Numeros 10 - Jiñi Tsiji' bʌ Wen T'añ cha'añ Estudio

Jiñi trompeta tac melbil bʌ ti sʌsʌc taq'uiñ

¹ Lac Yum tsi' pejca Moisés, tsi' su'be:

² “Mele cha'ts'ijt trompeta ti sʌsʌc taq'uiñ jats'bil bʌ ti martillo. Mi caj i c'ʌjñibʌyel cha'añ ma' pʌy wiñicob x'ixicob ba' ora mi la' tempan la' bʌ yic'ot cha'añ mi' tsictiyel cha'añ i yorajlelix mi' cha' techob xʌmbal jiñi israelob.

³ Che' mi la' wus jiñi trompeta tac, pejtelel israelob mux i tempañob i bʌ a wic'ot ya' ti ti' jiñi Tabernáculo ba' mi la' tempan la' bʌ.

⁴ Pero che' junts'ijt jach mi' wustʌl jiñi trompeta, che' jiñi yom mi' tilelob ba' añet jiñi ñuc taco' bʌ i ye'tel loq'uemo' bʌ ti' tojlel bajc'ʌl israelob.

⁵ Che' ma' ñijcan i yejtal cha'añ mi' ch'ojyelob, che' jiñi muq'uix i techob i xʌmbal jiñi año' bʌ ti' tojel ba' mi' pasel q'uiñ.

⁶ Che' ti' cha'yajlel mi' wustʌl jiñi trompeta, che' jiñi mi' techob i xʌmbal jiñi israelob jijlemo' bʌ ya' ti sur; yom mi la' wus jiñi trompeta ti jujunyajl che' mi' techob i xʌmbal.

⁷ Pero cha'añ ma' tempan jiñi israelob, yom yam bʌ junchajp i t'añ jiñi trompeta.

⁸ I yalobilob jiñi motomaj Aarón mi caj i wusob jiñi trompeta tac: che' bajche' woli cʌq'ueñet c mandar, che'ʌch yom mi' melob la' walobilob ja'el ti pejtelel ora.”

⁹ “Che' mi la' loq'uel ti guerra ya' ti la' lum ti' tojlel la' contra woli bʌ i tic'lañetla, mi caj la' wus trompeta che' ti yorajlel wocol. Che' jiñi mi caj c ña'tañetla, come la' Yumon, la' Dioson; mux caj la' coltʌyel ti' tojlel la' contra.

¹⁰ Che' ti' yorajlel la' q'uiñijel tac, yic'ot che' ti yorajlel ñuc tac bʌ q'uiñijel la' cha'añ, yic'ot che' ti' tejchibal tac tsic, yom mi la' wus jiñi trompeta tac ti' pam jiñi c majtañ mu' bʌ i pulel yic'ot ti' pam jiñi majtañʌl cha'añ i ñʌch'tʌlel la' pusic'al. Che' jiñi mi caj c ña'tañetla. Joñon, la' Yumon, la' Dioson.”

2. TSI' XɅÑɅYOB MAJLEL C'ɅLɅL TI MOAB ( 10.11—21.35 ) Jiñi israelob tsa' loq'uiyob ti Sinaí

¹¹ Che' ti' cha'p'ejlel uw che' i cha'p'ejlelix ja'b, che' ti junc'al jiñi tsic, tsa' letsi jiñi tocal am bʌ ti' pam jiñi Tabernáculo ba' lotol jiñi Mandar,

¹² che' jiñi tsi' techeyob i xʌmbal jiñi israelob ya' ti colem bʌ i tiquiñal lum i c'aba' Sinaí che' bajche' tsa' su'bentiyob. Jiñi tocal tsa' wa'le ya' ti colem bʌ i tiquiñal lum i c'aba' Parán.

¹³ Jiñʌch i tejchibal i xʌmbal israelob che' bajche' lac Yum tsi' yʌq'ue mandar Moisés.

¹⁴ Ñaxan tsi' techeyob i xʌmbal i p'olbal Judá yic'ot i bandera. Jiñi am bʌ ti' wenta cha'añ mi' pʌyob majlel jiñʌch Naasón i yalobil Aminadab.

¹⁵ Jiñi am bʌ ti' wenta cha'añ mi' pʌyob majlel i p'olbal Isacar jiñʌch Natanael i yalobil Zuar.

¹⁶ Yic'ot jiñi am bʌ ti' wenta cha'añ mi' pʌyob majlel i p'olbal Zabulón jiñʌch Eliab i yalobil Helón.

¹⁷ Che' bʌ chejbilix jiñi Tabernáculo, jiñi i yalobilob Gersón yic'ot i yalobilob Merari, tsi' q'uecheyob majlel.

¹⁸ Che' jiñi tsi' techeyob i xʌmbal i p'olbal Rubén yic'ot i bandera. Jiñi am bʌ ti' wenta cha'añ mi' pʌyob majlel jiñʌch Elisur i yalobil Sedeur.

¹⁹ Jiñi am bʌ ti' wenta cha'añ mi' pʌyob majlel i p'olbal Simeón jiñʌch Selumiel i yalobil Zurisadai.

²⁰ Yic'ot jiñi am bʌ ti' wenta cha'añ mi' pʌyob majlel i p'olbal Gad jiñʌch Eliasaf i yalobil Deuel.

²¹ Ti wi'il tsa' loq'uiyob majlel ja'el i p'olbal Coat jiñi woli bʌ i q'uechob majlel jiñi Ch'ujul bʌ i bʌl Tabernáculo; che' bʌ tsa' c'otiyob, jiñi yaño' bʌ tsa'ix i wa'chocoyob jiñi Tabernáculo.

²² Ti wi'il tsa' loq'uiyob majlel i p'olbal Efraín yic'ot i bandera. Jiñi am bʌ ti' wenta cha'añ mi' pʌyob majlel jiñʌch Elisama i yalobil Amiud.

²³ Jiñi am bʌ ti' wenta cha'añ mi' pʌyob majlel i p'olbal Manasés jiñʌch Gamaliel i yalobil Pedasur.

²⁴ Yic'ot jiñi am bʌ ti' wenta cha'añ mi' pʌyob majlel i p'olbal Benjamín jiñʌch Abidán i yalobil Gedeoni.

²⁵ Ti wi'il tsa' loq'uiyob majlel i p'olbal Dan yic'ot i bandera, jiñʌch i yujtibal che' bajche' tsolbilob jiñi israelob. Jiñi am bʌ ti' wenta cha'añ mi' pʌyob majlel jiñʌch Ahiezer i yalobil Amisadai.

²⁶ Jiñi am bʌ ti' wenta cha'añ mi' pʌyob majlel i p'olbal Aser jiñʌch Pagiel i yalobil Ocrán.

²⁷ Yic'ot jiñi am bʌ ti' wenta cha'añ mi' pʌyob majlel i p'olbal Neftalí jiñʌch Ahira i yalobil Enán.

²⁸ Che'ʌch bajche' iliyi tsa' loq'uiyob jiñi israelob ti' mojt ti' mojt.

²⁹ Che' jiñi Moisés tsi' su'be Hobab i ja'añ, jiñʌch i yalobil Ragüel, jiñi madianita: —Joñon lojon mi caj c majlel lojon ya' ti lum ba' tsi' yʌlʌ lac Yum: “Joñon mi caj cʌq'ueñetla.” La' quic'ot lojon, mi caj q'uelet lojon ti uts'at, come lac Yum tsa'ix i su'beyob israelob cha'añ mi caj i pʌsbeñob i yutslel i pusic'al.

³⁰ Pero Hobab tsi' yʌlʌ: —Mach majlicon. Mi caj c sujtel ya' ba'añ c pi'ʌlob tic lumal.

³¹ Moisés tsi' wersa su'be: —Ti wocol t'añ mij c'ajtibeñet cha'añ ma'añic ma' cʌyon lojon, come jatet a cʌñʌyʌch jiñi colem bʌ i tiquiñal lum ya' ba' mic jijlel lojon yic'ot mi caj a toj-esañon lojon majlel.

³² Mi muc'ʌch a majlel quic'ot lojon, ba' ora tsa'ix c tajbe lojon i yutslel lac Yum mu' bʌ caj i yʌq'ueñon lojon, mi caj cʌq'ueñet lojon ja'el.

³³ Che'ʌch tsi' cʌyʌyob jiñi i wits lac Yum, uxp'ejl q'uiñ tsi' xʌñʌyob. Jiñi Arca cha'añ jiñi xuc'ul bʌ i t'añ lac Yum ñaxan tsa' majli, uxp'ejl q'uiñ tsi' tsʌcleyob majlel, cha'añ mi' sʌclʌbeñob jiñi lum ba' mi' c'ajob i yoj.

³⁴ C'ʌlʌl che' bʌ tsa' loq'uiyob ya' ba' jijlemob, jiñi tocal i cha'añ lac Yum temel tsa' majli yic'otob che' ti q'uiñil.

³⁵ Che' bʌ tsa' caji ti majlel jiñi Arca, Moisés tsi' yʌlʌ: “¡C Yum, ch'ojyen! ¡La' pujquic a contrajob! La' puts'icob ti' tojel a wut pejtelel mu' bʌ i ts'a'leñetob.”

³⁶ Che' mi' wa'tʌl jiñi Arca, tsi' yʌlʌ: “¡C Yum, la', ti' tojlel israelob año' bʌ ti pic ti pic!”