Numeros 1 - Jiñi Tsiji' bʌ Wen T'añ cha'añ Estudio

1. TSA' AJÑIYOB TI SINAÍ ( 1.1—10.10 ) I tsicol israelob ya' ti Sinaí

¹ Ti jiñi ñaxan bʌ q'uiñ che' ti' cha'p'ejlel uw, che' i cha'p'ejlelix ja'b i loq'uelob ti Egipto jiñi israelob, lac Yum tsi' pejca Moisés ya' ti' tiquiñal lum ya' ti Sinaí, che' bʌ ya'añ ya' ti Tabernáculo ba' mi' tempañob i bʌ, tsi' su'be:

² “Yom ma' tsic pejtelel wiñicob ti jujump'ejl otot, yom ma' wotsʌben i c'aba' ti jujuntiquil jiñi wiñico' bʌ i yalobilob Israel.

³ Jiñi añobix bʌ junc'al i ja'bilel yic'ot jiñi ñumeñix bʌ ti junc'al, jatet yic'ot Aarón mi caj la' ts'ijbuben i c'aba' pejtelel muq'uix bʌ i mejlelob ti majlel ti guerra che' bajche' mi yʌl jiñi am bʌ ti' wenta.

⁴ Mi caj i yajñel la' wic'ot juntiquil wiñic ti jujunmojt i p'olbal Israel, juntiquil yumʌl bʌ ti junmojt xchumtʌl.

⁵ Jiñʌch i c'aba'ob jiñi wiñicob mu' bʌ caj i yajñel la' wic'ot:” “Elisur i yalobil Sedeur loq'uem bʌ ti' p'olbal Rubén;”

⁶ “Selumiel i yalobil Zurisadai loq'uem bʌ ti' p'olbal Simeón;”

⁷ “Naasón i yalobil Aminadab loq'uem bʌ ti' p'olbal Judá;”

⁸ “Natanael i yalobil Zuar loq'uem bʌ ti' p'olbal Isacar;”

⁹ “Eliab i yalobil Helón loq'uem bʌ ti' p'olbal Zabulón;”

¹⁰ “Elisama i yalobil Amiud loq'uem bʌ ti' p'olbal Efraín; yic'ot Gamaliel i yalobil Pedasur loq'uem bʌ ti' p'olbal Manasés, jiñʌch i yalobilob José;”

¹¹ Abidán i yalobil Gedeoni loq'uem bʌ ti' p'olbal Benjamín;

¹² Ahiezer i yalobil Amisadai loq'uem bʌ ti' p'olbal Dan;

¹³ Pagiel i yalobil Ocrán loq'uem bʌ ti' p'olbal Aser;

¹⁴ Eliasaf i yalobil Deuel loq'uem bʌ ti' p'olbal Gad;

¹⁵ Ahira i yalobil Enán loq'uem bʌ ti' p'olbal Neftalí.

¹⁶ Jiñʌch i c'aba'ob ili wiñicob tsa' bʌ wa'chocontiyob ti' tojlel bajc'ʌl israelob, año' bʌ ñuc bʌ i ye'tel ti' tojlel i tatob.

¹⁷ Moisés yic'ot Aarón tsi' ch'ʌmʌyob ti' wenta i c'aba'ob jiñi wiñicob tsa' bʌ wa'chocontiyob,

¹⁸ yic'ot tsi' tempayob pejtelel israelob ti jiñi ñaxan bʌ q'uiñ ti' cha'p'ejlel uw. Jiñi cha'añ tsa'ix ts'ijbuntiyob i c'aba' ti jujump'ejl xchumtʌl che' bajche' c'amel añ i cʌñʌyo' bʌ jiñi tatʌlob, tsa' ts'ijbuntiyob i c'aba' ti jujuntiquil wiñicob añobix bʌ junc'al i ja'bilel yic'ot ñumeñix bʌ.

¹⁹ Che' bajche' lac Yum tsi' yʌc'ʌ mandar, Moisés tsi' tsiqui ya' ti' tiquiñal lum ya' ti Sinaí.

²⁰ I yalobilob yic'ot i yalobilob i p'olbalob Rubén, ñaxan bʌ i yalobil Israel, tsa' tsijquiyob che' bajche' c'amel i cʌñʌyo' bʌ jiñi tatʌlob tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

²¹ tsa' tsijquiyob i p'olbal Rubén jiñʌch 46,500.

²² I yalobilob yic'ot i yalobilob i p'olbal Simeón, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

²³ tsa' tsijqui i p'olbalob Simeón jiñʌch 59,300.

²⁴ I yalobilob yic'ot i yalobilob i p'olbal Gad, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

²⁵ tsa' tsijqui i p'olbalob Gad jiñʌch 45,650.

²⁶ I yalobilob yic'ot i yalobilob i p'olbal Judá, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

²⁷ tsa' tsijqui i p'olbalob Judá jiñʌch 74,600.

²⁸ I yalobilob yic'ot i yalobilob i p'olbal Isacar, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

²⁹ tsa' tsijqui i p'olbalob Isacar, jiñʌch 54,400.

³⁰ I yalobilob yic'ot i yalobilob i p'olbal Zabulón, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

³¹ tsa' tsijqui i p'olbalob Zabulón, jiñʌch 57,400.

³² I yalobilob José: I yalobilob yic'ot i yalobilob i p'olbal Efraín, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

³³ tsa' tsijqui i p'olbal Efraín, i yalobil José jiñʌch 40,500.

³⁴ I yalobilob yic'ot i yalobilob i p'olbal Manasés, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

³⁵ tsa' tsijqui i p'olbal Manasés, jiñʌch 32,200.

³⁶ I yalobilob yic'ot i yalobilob i p'olbal Benjamín, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

³⁷ tsa' tsijqui i p'olbal Benjamín jiñʌch 35,400.

³⁸ I yalobilob yic'ot i yalobilob i p'olbal Dan, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

³⁹ tsa' tsijqui i p'olbal Dan jiñʌch 62,700.

⁴⁰ I yalobilob yic'ot i yalobilob i p'olbal Aser, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

⁴¹ tsa' tsijqui i p'olbal Aser jiñʌch 41,500.

⁴² I yalobilob yic'ot i yalobilob i p'olbal Neftalí, tsa' tsijquiyob che' bajche' c'amel i cʌñʌyo' bʌ jiñi tatʌlob, tsa' ts'ijbubentiyob i c'aba' ti jujuntiquil wiñicob añobix bʌ junc'al i ja'bilel o ñumeñix bʌ, jiñi muq'uix bʌ i mejlel i majlelob ti guerra;

⁴³ tsa' tsijqui i p'olbal Neftalí jiñʌch 53,400.

⁴⁴ Jiñʌch tsa' bʌ i tsiquiyob Moisés yic'ot Aarón temel yic'ot jiñi wiñicob wa'chocobilo' bʌ ti' tojlel israelob loq'uemo' bʌ ti jujunmojt i p'olbal Israel.

⁴⁵ Yic'ot pejtelel i yalobilob Israel añobix bʌ junc'al i ja'bilel o ñumeñix bʌ, muq'uix bʌ i mejlel i majlelob ti guerra ti Israel,

⁴⁶ ti' pejtelel jiñi tsa' bʌ tsijquiyob ti' mojt ti' mojt jiñʌch 603,550.

I wa'chocontelob ti ye'tel jiñi levijob

⁴⁷ Pero jiñi levijob ma'añic tsa' ch'ʌjmiyob ti tsic yic'otob,

⁴⁸ come lac Yum tsi' su'be Moisés:

⁴⁹ “Cojach ma'añic ma' tsicben i p'olbal Leví, mach ma' wotsʌbeñob i c'aba' ti juñ yic'ot i pi'ʌlob ti Israel,

⁵⁰ mi caj a wʌq'ueñob ti' wenta levijob jiñi Tabernáculo ba' lotol jiñi Mandar yic'ot pejtelel mu' bʌ i c'ʌjñel tac yic'ot pejtelel añ tac bʌ ya'i. Jiñob mi caj i cuchob majlel jiñi Tabernáculo yic'ot pejtelel i bʌl, ya'i mi caj i melob i ye'tel yic'ot ya' mi' caj i chumtʌlob ti' joytʌlel jiñi Tabernáculo.

⁵¹ Ba' ora mi' ch'ʌjmel majlel jiñi Tabernáculo, añ ti' wenta jiñi levijob cha'añ mi' chejob yic'ot mi' cha' wa'chocoñob ya' ba' mi' la' c'otel ti jijlel. Mi tsi' lʌc'tesa i bʌ yam bʌ wiñic mach bʌ levijic, mi caj i chʌmel.

⁵² Pejtelel jiñi israelob ti' mojt ti' mojt la' chumlecob ti lʌc'ʌl ba'añ i bandera che' bajche' mi yʌl jiñi x'e'tel i cha'añ.

⁵³ Pero jiñi levijob mi caj i chumtʌlob ti' joytʌlel jiñi Tabernáculo ba' lotol jiñi Mandar cha'añ ma'añic mi' tilel i mich'ajel Dios ti' tojlel israelob. Añ ti' wenta jiñi levijob cha'añ mi' cʌntañob jiñi Tabernáculo ba' lotol jiñi Mandar.”

⁵⁴ Che'ʌch tsi' meleyob pejtelel israelob che' bajche' lac Yum tsi' su'be Moisés.