Mateo 3 - Jiñi Tsiji' bʌ Wen T'añ cha'añ Estudio

2. I TEJCHIBAL I YE'TEL JESÚS ( 3.1—4.11 ) I subt'añ Juan tsa' bʌ i yʌc'ʌ ch'ʌmja'

¹ Ti jim bʌ q'uiñ tsa' tili Juan tsa' bʌ i yʌc'ʌ ch'ʌmja'. Woli' ti subt'añ ti jochol bʌ lum ya' ti Judea,

² tsi' yʌlʌ: Cʌyʌx la' mul come lʌc'ʌlix i yumʌntel jiñi am bʌ ti panchan,

³ come jiñʌch jiñi Juan tsa' bʌ taja ti t'añ jiñi x'alt'añ Isaías che' bʌ tsi' yʌlʌ: “C'am bʌ i t'añ juntiquil wiñic ti jochol bʌ lum: Chajpanla i bijlel lac Yum. Toj-esanla majlel jiñi mucu bij i cha'añ.”

⁴ Juan lʌpʌl i cha'añ i bujc melbil bʌ ti' tsutsel camello. Añ i cajchiñʌc' melbil bʌ ti pʌchi. Juan tsi' c'uxu xc'ajba sajc' yic'ot te'lecha'b.

⁵ Tsa' tiliyob ba'añ Juan jiñi ch'oyolo' bʌ ti Jerusalén yic'ot ti pejtelel i lumal Judea yic'ot ti' joytʌlel Jordán ja'.

⁶ Juan tsi' yʌq'ueyob ch'ʌmja' ya' ti Jordán ja'. Jiñi wiñicob x'ixicob tsi' su'buyob i mul.

⁷ Che' bʌ tsi' q'uele woli' tilelob ca'bʌl fariseojob yic'ot saduceojob cha'añ mi' ch'ʌmob ja', Juan tsi' su'beyob: I p'olbaletla lucum. ¿Majqui tsi' su'beyetla cha'añ mi la' puts'tan jiñi tojmulil mu' bʌ caj i tilel?

⁸ Melela toj bʌ la' melbal mi woli la' cʌy la' mul.

⁹ Mach mi la' wʌl ti la' pusic'al: “C tat lojon jiñʌch Abraham”, come mic su'beñetla, Dios mi mejlel i pʌntesan jiñi xajlel tac ti' yalobilob Abraham.

¹⁰ Wʌle ac'bil jacha ti' ye'bal te'. Mi caj i sejq'uel pejtelel jiñi te' mach bʌ añic mi' yʌc' wen bʌ i wut. Che' jiñi mi' chojquel ti c'ajc.

¹¹ Joñon mi cʌq'ueñetla ch'ʌmja' cha'añ mi la' cʌy la' mul. Pero tal to tic pat jiñi ñumen p'ʌtʌl bʌ. Joñon mach ñucoñic cha'añ mic ch'ʌmben majlel i warach. Jiñi mi caj i yʌq'ueñetla la' ch'ʌm Ch'ujul bʌ Espíritu yic'ot c'ajc.

¹² Añ i wejlʌjib ti' c'ʌb cha'añ mi' wen sʌc-esan i yajñib trigo. Mi caj i lot trigo ti' yotlel. Mi caj i pulben i sujl ti c'ajc mach bʌ yujilic yajpel.

Tsi' ch'ʌmʌ ja' Jesús

¹³ Tsa' loq'ui tilel Jesús ti Galilea. Tsa' c'oti ti Jordán ja' cha'añ mi' ch'ʌmja' ti' c'ʌb Juan.

¹⁴ Juan tsi' ñopo i tic', tsi' yʌlʌ: —Jatet yom ma' wʌq'ueñon ch'ʌmja'. ¿Mu' ba a tilel a ch'ʌmja' tic tojlel?

¹⁵ Jesús tsi' su'be Juan: —La' aq'uenticon ch'ʌmja' wʌle. Come che'ʌch yom mi lac mel cha'añ mi lac ts'ʌctesan pejtelel chuqui toj. Juan tsi' jac'ʌ i yʌq'ueñ ch'ʌmja' che' bajche' tsi' c'ajti.

¹⁶ Che' bʌ tsa'ix i ch'ʌmʌ ja' Jesús tsa' loq'ui ti ja'. Ti jim bʌ ora, tsa' jajmi panchan. Tsi' q'uele i yEspíritu Dios woli' ju'bel tilel che' bajche' x'ujcuts, tsa' t'uchle ti' tojlel Jesús.

¹⁷ Awilan, tsa' loq'ui tilel t'añ ti panchan, tsi' yʌlʌ: “Jiñʌch Calobil mu' bʌ j c'uxbin, mu' bʌ i yʌq'ueñon c tijicñʌyel.”