Marcos 4 - Jiñi Tsiji' bʌ Wen T'añ cha'añ Estudio

Lajiya cha'añ xwejch'uya pac'

¹ Jesús tsa' cha' caji ti cʌntesa ti ti' mar, tsi' tempayob i bʌ ca'bʌl wiñicob x'ixicob ba'añ; jiñi cha'añ tsa' ochi Jesús ti buchtʌl ti barco am bʌ ti mar. Ya' añob ti lum wiñicob x'ixicob ti' t'ejl mar.

² Jiñi cha'añ tsa' caji i cʌntesañob ti lajiya tac. Tsi' su'beyob ti' cʌntesa:

³ —U'binla: Jiñi xpac' tsa' majli i wejch'un pac'.

⁴ Che' woli i wejch'un majlel tsa' yajli ts'ita' ti ti' bij, tsa' tili te'lemut, tsi' c'uxu.

⁵ Yam bʌ tsa' yajli ti xajlelol ba' ma'añic ca'bʌl lum, ti ora jach tsa' pasi come ma'añic i lumil.

⁶ Che' bʌ tsa' chañ-a q'uiñ, ticʌw tsi' yu'bi, tsa' tiqui come ma'añic i wi'.

⁷ Yam bʌ tsa' yajli ti ch'ixol, che' bʌ tsa' coli jiñi ch'ix, tsi' tsʌnsa, ma'añic tsi' yʌc'ʌ i wut.

⁸ Yam bʌ tsa' yajli ti wen bʌ lum, tsa' pasi, tsa' coli, tsi' yʌc'ʌ i wut. Ti jujump'ejl pac' tsi' yʌc'ʌ i wut ti lujump'ejl i cha'c'al, ti uxc'al, ti jo'c'al.

⁹ Jiñi cha'añ Jesús tsi' su'beyob: —Jiñi am bʌ i chiquin cha'añ mi' yu'bin, la' i yu'bin.

Isujmlel tac jiñi lajiya

¹⁰ Baqui ora añ ti' bajñelil, jiñi año' bʌ ti' joytʌlel yic'ot jiñi lajchʌntiquil tsi' c'ajtibeyob isujmlel jiñi lajiya.

¹¹ Jesús tsi' su'beyob: —Tsa'ix aq'uentiyetla la' cʌn isujmlel i yumʌntel Dios mach bʌ tsictiyemic ti yam bʌ ora. Pero jiñi mach bʌ ochemobic mic su'beñob ti lajiya tac,

¹² cha'añ ma'añic mi' c'otel i wut jiñi woli bʌ i q'uelob, cha'añ ma'añic mi' ch'ʌmbeñob isujm jiñi woli bʌ i yu'biñob, cha'añ ma'añic mi sutq'uiñob i bʌ, ame ñusʌbenticob i mul.

Jesús tsi' yʌq'ue isujmlel lajiya cha'añ xwejch'uya pac'

¹³ Jesús tsi' su'beyob: —¿Mach ba añic mi la' ch'ʌmben isujm ili lajiya? ¿Bajche' mi mejlel la' ch'ʌmben isujm jiñi yan tac bʌ lajiya?

¹⁴ Jiñi xwejch'uya pac', jiñʌch mu' bʌ i su'b jiñi t'añ.

¹⁵ Jiñi año' bʌ ti ti' bij jiñobʌch jiñi otsʌbil bʌ jiñi t'añ ti' pusic'al, che' mi' yu'biñob jiñi t'añ, ti ora mi' tilel Satanás i chilbeñob loq'uel jiñi t'añ tsa' bʌ ochi ti' pusic'al.

¹⁶ Che' ja'el, jiñi wejch'ubil bʌ ti xajlelol jiñobʌch mu' bʌ i yu'biñob jiñi wen t'añ, tijicñayob mi' bʌc' jac'ob,

¹⁷ pero ma'añic i wi' ti' pusic'al; jiñi cha'añ mach wen xuc'ulic mi' yajñelob, come che' mi' tilel wocol yic'ot i tic'lʌntel cha'añ jiñi wen t'añ, ti ora mi' tejchel tilebixel bʌ i pusic'al.

¹⁸ Jiñi wejch'ubil bʌ ti ch'ixol jiñobʌch mu' bʌ i yu'biñob jiñi wen t'añ,

¹⁹ pero i ye'tel ti pañimil, yic'ot i mulʌntel chu'bʌañʌl, yic'ot i mulʌntel chuqui tac yomob, mi' yochel ti' pusic'al, mi' jisan jiñi t'añ cha'añ ma'añic mi' yʌc' i wut.

²⁰ Jiñi wejch'ubil bʌ ti wen bʌ lum jiñobʌch mu' bʌ i yu'biñob jiñi wen t'añ, mi' jac'ob, mi' yʌc'ob i wut ti jujuntiquil ti lujump'ejl i cha'c'al, ti uxc'al, ti jo'c'al.

Jiñi mucul tac bʌ mi' caj ti pʌstʌl

²¹ Che' ja'el tsi' su'beyob: —¿Mu' ba la' ch'ʌm tilel candil cha'añ mi la' ñup' ti chiquib mi ti' ye'bal wʌyibʌl? ¿Mach ba añic mi la' joc'chocon ti' chañ bʌ i joc'lib?

²² Come ma'añic chuqui mucul mach bʌ añic mi' caj ti pʌstʌl. Pejtelel jiñi mach bʌ tsictiyemic mi caj i yʌjq'uel ti tsictiyel.

²³ Jiñi am bʌ i chiquin cha'añ mi' yu'bin, la' i yu'bin.

²⁴ Jesús tsi' su'beyob ja'el: —Wen ñʌch'tanla chuqui mu' bʌ la' wu'bin, come che' bajche' mi la' p'isben wiñicob che'ʌch mi caj la' p'isbentel. Ñumen ca'bʌl mi caj la' p'isbentel jatetla mu' bʌ la' wu'bin.

²⁵ Come jiñi am bʌ i cha'añ mi caj i yʌq'uentel yam bʌ; pero jiñi mach bʌ añic i cha'añ mi caj i laj chilbentel chuqui añ i cha'añ.

Lajiya cha'añ pac'

²⁶ Jesús tsi' yʌlʌ: Lajalʌch i yumʌntel Dios bajche' wiñic mu' bʌ i wejch'un pac' ti lum.

²⁷ Mi' wʌyel, mi' ch'ojyel, che'ʌch mi' ñumel ac'ʌlel yic'ot q'uiñil, jiñi pac' mi' bots-añ, mi' colel, jiñi wiñic ma'añic mi' ña'tan bajche' mi' colel.

²⁸ Come jiñi lum mi' yʌc' ti colel jiñi pac' ti' bajñelil, ñaxan i yopol, wi'il i te'el, ti wi'il i wut.

²⁹ Che' c'ʌñix i wut, ti ora jiñi wiñic mi' tsep ti rocol bʌ machit che' i yorajlelix mi' lojtel i wut.

Lajiya cha'añ pac' mostaza

³⁰ Jesús tsi' yʌlʌ: ¿Chuqui yic'ot mi mejlel lac lajin i yumʌntel Dios? ¿Chuqui ti lajiya yom mi lac c'ʌn?

³¹ Lajalʌch bajche' i bʌc' mostaza. Ma'añic yam bʌ pac' ti pañimil ñumen biq'uit bʌ bajche' jiñi mu' bʌ i wejch'untel ti lum.

³² Che' wejch'ubilix, mi' colel jinto mi' ñusan i chañlel pejtelel yan tac bʌ pimel, mi' yʌc' colem tac bʌ i c'ʌb, jiñi te'lemut mi' t'uchtʌl ti' yʌxñʌlel.

Jesús tsi' cha'le cʌntesa ti lajiya

³³ Tsi' su'beyob i t'añ Dios ti ca'bʌl lajiya tac che' bajche' jiñi. I p'isol jach tsi' su'beyob bajche' tsa' mejli i yu'biñob.

³⁴ Ti lajiya jach tsi' pejcayob. Che' añob ti' bajñelil yic'ot xcʌnt'añob i cha'añ tsi' laj su'beyob isujmlel.

Jesús tsi' tiq'ui p'ʌtʌl bʌ ic'

³⁵ Ti jiñi jach bʌ q'uiñ ti ic'ajel Jesús tsi' su'beyob: —La' c'axiconla ti junwejl mar.

³⁶ Che' bʌ tsa'ix i laj su'beyob sujtel wiñicob x'ixicob. Tsi' pʌyʌyob majlel Jesús che' ya' to añ ti barco. Ya'añ ja'el yam bʌ barco tac yic'ot.

³⁷ Tsa' tejchi wen p'ʌtʌl bʌ ic', tsa' caji i wec'ulan ochel ja' ti barco jinto wolix ti bujt'el.

³⁸ Wʌyʌlix Jesús ti c'ʌnjol ti wi'ipat ti' mal barco. Tsa' tili i ñijcañob. Tsi' su'beyob: —Maestro, ¿mach ba wolic a p'is ti a wenta mi caj lac jilel?

³⁹ Tsa' ch'ojyi Jesús. Tsi' tiq'ui jiñi ic', tsi' su'be jiñi mar: —Ñʌjch'en, lajmen. Tsa' lajmi jiñi ic'. Ñʌch'ʌcña tsa' majli pañimil.

⁴⁰ Jesús tsi' su'beyob: —¿Chucoch woliyetla ti bʌq'uen? ¿Chucoch ma'añic mi la' ñop?

⁴¹ Wen ca'bʌl woliyob ti bʌq'uen, tsi' c'ajtibeyob i bʌ: —¿Majqui jiñi? Come jiñi ic' yic'ot jiñi mar mi' jac'ben i t'añ. Xsu'b mulil Ap 12.10 Laj contra 1 P 5.8 Oñiyix bʌ lucum Ap 12.9 I yángel ch'eñ mach bʌ añix mi tajben i ye'bal Ap 9.11 Beelzebú i yum xi'bajob Mt 10.25 Xi'ba (Belial) 2 Cor 6.15 Colem ajin Ap 12.9 Xi'ba Mt 4.1 Xjontolil Mt 13.19 I dios jiñi jontolo' bʌ ti pañimil 2 Cor 4.4 I tat xlotiya Jn 8.44 I yum xi'bajob Mt 9.34 I yum pañimil mu' bʌ i yumañob xi'bajob Ef 2.2 I yum pañimil Jn 12.31 Satanás Ap 12.9 Xpʌy mulil Mt 4.3