Lucas 8 - Jiñi Tsiji' bʌ Wen T'añ cha'añ Estudio

X'ixicob tsa' bʌ i coltayob Jesús

¹ Ti wi'il Jesús tsa' ñumi majlel ti pejtelel tejclum yic'ot ti pejtelel xchumtʌl tac, tsi' su'bu jiñi wen t'añ cha'añ i yumʌntel Dios, jiñi lajchʌntiquil xcʌnt'añob i cha'añ tsi' tsajcayob majlel.

² Tsi' tsajcayob majlel ja'el cha'tiquil uxtiquil x'ixicob tsa' bʌ c'oq'uesʌntiyob cha'añ i xi'bʌjlel yic'ot i chʌmel: juntiquil x'ixic i c'aba' María, mu' bʌ i pejcʌntel ti Magdalena, tsa' loq'ui wuctiquil xi'bajob ti' pusic'al.

³ Ya'añ ja'el Juana, i yijñam Chuza, jiñi Chuza xq'uel e'tel i cha'añ Herodes, ya'añ ja'el Susana, yic'ot ca'bʌl yaño' bʌ x'ixicob tsa' bʌ i c'ʌñʌyob i chu'bʌañ cha'añ mi' coltañob.

Lajiya cha'añ xwejch'uya pac'

⁴ Tsi' tempayob i bʌ bajc'ʌl wiñicob x'ixicob, tsa' tiliyob ba'añ Jesús loq'uemo' bʌ ti ca'bʌl tejclum tac, Jesús tsi' pejcayob ti lajiya:

⁵ Juntiquil wiñic tsa' majli ti wejch'uya pac', che' woli' wejch'un majlel pac', tsa' yajli ts'ita' ti ti' bij; tsi' t'uchtayob wiñicob x'ixicob yic'ot tsi' c'uxuyob te'lemut.

⁶ Yam bʌ tsa' yajli ti xajlelol, che' bʌ tsa' coli, tsa' tiqui, come mach ach'ic i lumil.

⁷ Yam bʌ tsa' yajli ti ch'ixol, temel tsa' coli yic'ot jiñi ch'ix, jiñi ch'ix tsi' tsʌnsa.

⁸ Yam bʌ tsa' yajli ti wen bʌ lum, che' bʌ tsa' coli, tsi' yʌc'ʌ i wut ti jo'jo'c'al ti jujump'ejl. Che' bʌ tsa' ujti i su'b ili t'añ, tsi' yʌlʌ ti c'am bʌ t'añ: Jiñi am bʌ i chiquin cha'añ mi' yu'bin, la' i yu'bin.

⁹ Jiñi xcʌnt'añob i cha'añ Jesús tsi' c'ajtibeyob: —¿Chuqui isujmlel jiñi lajiya?

¹⁰ Jesús tsi' yʌlʌ: —Aq'uebiletla cha'añ mi la' cʌmben isujmlel i yumʌntel Dios mach bʌ tsictiyemic ti yam bʌ ora. Pero yaño' bʌ mic pejcañob ti lajiya, che' bʌ mi' q'uelob, ma'añic mi' c'otelob i wut. Che' mi' yu'biñob, ma'añic mi' ch'ʌmbeñob isujm.

¹¹ Jiñʌch isujmlel jiñi lajiya: Jiñi pac' jiñʌch i t'añ Dios.

¹² Jiñi am bʌ ti ti' bij jiñobʌch mu' bʌ i yu'biñob t'añ, pero mi' tilel xi'ba cha'añ mi' chil loq'uel jiñi t'añ ti' pusic'al cha'añ ma'añic mi' ñopob ame mi' coltʌntelob.

¹³ Jiñi tsa' bʌ coli ti' pam xajlel jiñobʌch mu' bʌ i yu'biñob jiñi t'añ. Ti' tijicñʌyel i pusic'al mi' bʌc' jac'ob, pero ma'añic i wi' ti' pusic'alob. Mi' ñopob jumuc', pero che' mi' yilʌbentelob i pusic'al mi' cha' cʌyob.

¹⁴ Jiñi tsa' bʌ yajli ti ch'ixol jiñobʌch mu' bʌ i yu'biyob jiñi t'añ. Che' añix ora tsi' ñopoyob, mi' caj i c'unte' jilel jiñi año' bʌ ti' pusic'al cha'añ ti' caj añ ca'bʌl i mel pusic'al cha'añ chu'bʌañʌl yic'ot i mulʌntel jiñi am bʌ ti pañimil. Ma'añic mi' yʌc'ob i wut.

¹⁵ Jiñi tsa' bʌ yajli ti wen bʌ lum jiñobʌch mu' bʌ i yu'biñob jiñi t'añ, uts'atob i pusic'al, tojob i pusic'al, mi' lotob jiñi t'añ tsa' bʌ i yu'biyob yic'ot mi' yʌc'ob i wut ti' xuc'tʌlel i pusic'al.

Lajiya cha'añ Candil

¹⁶ Ma'añic majqui mi' tsuc' candil cha'añ ti wi'il mi' mʌc ti p'ejt, mi cha'añic mi' yʌc' ti ye'bal wʌyibʌl, pero mi' joc'chocon ti' joc'lib cha'añ mi' pʌsbeñob i sʌclel jiñi mu' bʌ i yochelob.

¹⁷ Ma'añic mucul tac bʌ mach bʌ añic mi' caj ti pʌstʌl, yic'ot mach bʌ añic mi' caj ti cʌjñel, come mi' caj ti tsictiyel ti' sʌclel pañimil.

¹⁸ Chʌcʌ q'uele la' bʌ cha'añ mi la' wen u'bin jiñi t'añ, come majqui jach añ i cha'añ mi caj i yʌq'uentel yam bʌ. Majqui jach ma'añic i cha'añ mi caj i laj chilbentel chuqui tac añ i cha'añ.

I ña', yic'ot i yijts'iñob Jesús

¹⁹ Che' jiñi tsa' tiliyob ba'añ Jesús i ña' yic'ot i yijts'iñob, pero ma'añic tsa' mejliyob ti ochel cha'añ ti caj ca'bʌl wiñicob x'ixicob.

²⁰ Tsa' su'benti Jesús: —Ya' wa'alob a ña' yic'ot a wijts'iñob ti' pat otot, yomob i q'uelet.

²¹ Jesús tsi' su'beyob: —Jiñi mu' bʌ i yu'biñob i t'añ Dios mu' bʌ i jac'ob jiñobʌch c ña' yic'ot querañob.

Jesús tsi' tiq'ui p'ʌtʌl bʌ ic'

²² Ti yam bʌ q'uiñ Jesús tsa' ochi ti barco yic'ot jiñi xcʌnt'añob i cha'añ, tsi' su'beyob: —La' c'axiconla ti junwejl mar. Tsa' cajiyob ti majlel.

²³ Pero che' woliyob ti xʌmbal majlel ti ja', tsa' caji ti wʌyel Jesús. Tsa' tili p'ʌtʌl bʌ ic' ti mar, yomix ochel ja' ti mal barco, bʌbʌq'uen jach mi' chʌmelob.

²⁴ Tsa' tiliyob ba'añ Jesús tsi' ñijcayob ch'ojyel, tsi' su'beyob: —Maestro, Maestro, mi caj lac jilel. Tsa' ch'ojyi Jesús, tsi' tiq'ui jiñi ic' yic'ot jiñi wamlaw ch'inlaw bʌ ja'. Tsa' lajmi ñʌch'ʌcña pañimil tsa' majli.

²⁵ Jesús tsi' su'beyob: —¿Baqui añ i xuc'tʌlel la' pusic'al? Tsi' cha'leyob bʌq'uen, tsa' toj sajtiyob i pusic'al, tsi' su'beyob i bʌ: —¿Majqui jiñi? Come jiñi ic' yic'ot jiñi mar mi' jac'ben i t'añ.

Jiñi am bʌ i xi'bʌjlel ti' lumal gadarenojob

²⁶ Tsi' ñijcayob majlel barco c'ʌlʌl ti' lumal geraseñob ya' ti junwejl Galilea.

²⁷ Che' bʌ tsa' c'oti ti lum Jesús, tsa' tili juntiquil wiñic ch'oyol bʌ ti tejclum, añix ora añ i xi'bʌjlel, ma'añic i pislel, ma'añic mi' yajñel ti otot, ya' jach añ ti' yotlel ch'ujlelʌl.

²⁸ Che' bʌ tsi' q'uele Jesús, jiñi wiñic tsi' cha'le c'am bʌ oñel tsi' ñocchoco i bʌ, tsi' yʌlʌ: —¿Chuqui a wom yic'oton Jesús, i Yalobilet bʌ Dios, jiñi C'ax Ñuc bʌ? Awocolic mach a tic'lañon.

²⁹ Come Jesús tsi' su'be loq'uel jiñi xi'ba ti' pusic'al wiñic, añix ora chucul i cha'añ, tsi' cʌchʌyob ti cadena tac yic'ot ti' ñejt'il i c'ʌb i yoc, pero jiñi wiñic tsi' ts'oco jiñi cadena tac, jiñi xi'ba tsi' wersa pʌyʌ majlel ti jochol bʌ lum.

³⁰ Jesús tsi' c'ajtibe: —¿Chuqui a c'aba'? Tsi' yʌlʌ: —J c'aba' Legión. Come tsa' ochi ca'bʌl xi'bajob ti' pusic'al jiñi wiñic.

³¹ Tsi' c'ajtibeyob ti wocol t'añ cha'añ ma'añic mi' chocob ju'bel ti ch'eñ mach bʌ añic i ye'bal.

³² Ya'añ ca'bʌl chitam woli bʌ ti buc'bal ya' ti wits, jiñi xi'bajob tsi' c'ajtibeyob Jesús ti wocol t'añ cha'añ mi' yʌc'ob ti ochel ti chitam, Jesús tsi' yʌc'ʌ i t'añ.

³³ Jiñi xi'bajob tsa' loq'uiyob ti jiñi wiñic, tsa' ochiyob ti chitam, ti ajñel tsa' laj ju'bi chitam ti xitil bʌ wits, tsa' ochi ti mar, ya'i tsa' laj chʌmiyob.

³⁴ Jiñi xcʌnta chitamob che' bʌ tsi' q'ueleyob chuqui tsa' ujti, ti ajñel tsa' majliyob ya' ti tejclum yic'ot ti xchumtʌl tac, tsi' su'buyob chuqui tsa' ujti.

³⁵ Tsa' loq'uiyob tilel wiñicob x'ixicob cha'añ mi' q'uelob jiñi wiñic, tsa' tiliyob ba'añ Jesús, ya' tsi' tajayob jiñi wiñic tsa' bʌ loq'ui i xi'bʌjlel, buchul ti' tojlel Jesús, lʌpʌlix i bujc, wolix i ch'ʌmben isujm pañimil; tsi' cha'leyob bʌq'uen.

³⁶ Jiñi tsa' bʌ i q'ueleyob tsi' su'buyob bajche' tsa' coltʌnti jiñi wiñic am bʌ i xi'bʌjlel.

³⁷ Pejtelel wiñicob x'ixicob ch'oyolo' bʌ ti' joytʌlel i lumal geraseñob tsi' su'beyob Jesús ti wocol t'añ cha'añ mi' loq'uel majlel ya' ba' añob, come tsi' cha'leyob ca'bʌl bʌq'uen. Tsa' cha' ochi Jesús ti barco, tsa' majli.

³⁸ Jiñi wiñic tsa' bʌ chojqui loq'uel i xi'bʌjlel tsi' c'ajtibe Jesús ti wocol t'añ cha'añ mi' yʌc' i t'añ cha'añ mi yajñel yic'ot, pero Jesús tsi' choco sujtel, tsi' su'be:

³⁹ —Sujten ti a wotot, su'ben a pi'ʌlob chuqui tac ñuc tsi' melbeyet Dios. Che' jiñi tsa' majli jiñi wiñic, tsa' caji i puc t'añ ti pejtelel tejclum cha'añ chuqui tac ñuc tsi' melbe Jesús.

I yalobil Jairo yic'ot jiñi x'ixic tsa' bʌ i tʌlbe i bujc Jesús

⁴⁰ Che' bʌ tsa' cha' tili Jesús, jiñi wiñicob x'ixicob tsi' ch'ʌmʌyob ti' wenta yic'ot ti tijicñʌyel i pusic'al come ti pejtelelob woli pijtañob.

⁴¹ Che' jiñi, tsa' tili juntiquil wiñic i c'aba' Jairo, i yum sinagoga, tsi' ñocchoco i bʌ ba'añ Jesús, tsi' c'ajtibe ti wocol t'añ cha'añ mi' yochel Jesús ti' yotot.

⁴² Come añ jach juntiquil xch'oc bʌ i yalobil, yomix i taj lajchʌmp'ejl i ja'bilel, wolix i chʌmel. Che' woli' toj i majlel Jesús, jiñi wiñicob x'ixicob tsi' joy ñet'eyob.

⁴³ Añ juntiquil x'ixic mach bʌ añic tsa' wis tijq'ui i bec' i ch'ich'el lajchʌmp'ejl ja'b, tsi' laj jisa pejtelel i chu'bʌañ cha'añ i tojol i ts'ʌcʌntel, pero ma'añic majqui tsa' mejli i c'oq'uesan.

⁴⁴ Tsi' lʌc'tesa i bʌ ti' pat Jesús, tsi' tʌlbe i yoc i pislel, ti ora tsa' tijq'ui i bec' i ch'ich'el.

⁴⁵ Jesús tsa' caji yʌl: —¿Majqui tsi' tʌlʌyon? Ti pejtelelob tsi' yʌlʌyob cha'añ ma'añic tsi' tʌlʌyob. Pedro tsi' su'be yic'ot jiñi ya' bʌ añob: —Maestro, jiñi wiñicob x'ixicob ti a joytʌlel, woli' ñet'etob i woli a c'ajtin. ¿Majqui tsi' tʌlʌyon?

⁴⁶ Pero Jesús tsi' yʌlʌ: —Añ majqui tsi' tʌlʌyon, come tsa' cu'bi tsa' c'ʌjñi c p'ʌtʌlel.

⁴⁷ Che' yujilix jiñi x'ixic cha'añ mach mejlix i muc i bʌ, tsiltsilña tsa' tili, tsi' pʌcchoco i bʌ ti' tojel i yoc Jesús; tsi' su'bu ti' tojlel pejtelel wiñicob x'ixicob chucoch tsi' tʌlʌ. Che' bʌ tsi' tʌlʌ, tsa' lajmi ti ora.

⁴⁸ Jesús tsi' su'be: —Calobil, tsa' c'oc'ayet cha'añ tsa' ñopoyon, cucu ti' ñʌch'tʌlel a pusic'al.

⁴⁹ Che' bʌ woli to ti t'añ, tsa' tili wiñic loq'uem bʌ ti' yotot i yum sinagoga, tsi' yʌlʌ: —Tsa'ix chʌmi a walobil, mach a chʌn wolts'iñ jiñi Maestro.

⁵⁰ Che' bʌ tsi' yu'bi jiñi t'añ, Jesús tsi' su'be jiñi yumʌl: —Mach a cha'len bʌq'uen, chʌn ñopo ti a pusic'al, che' jiñi, mi' caj i coltʌntel jiñi xch'oc.

⁵¹ Che' bʌ tsa' ochi Jesús ti' yotot jiñi yumʌl, ma'añic tsi' yʌc'ʌ ti ochel yaño' bʌ, jiñi jach Pedro yic'ot Jacobo yic'ot Juan yic'ot i tat i ña' jiñi xch'oc.

⁵² Woliyob ti uq'uel pejtelel wiñicob x'ixicob, woli' yuc'tañob jiñi xch'oc, Jesús tsi' yʌlʌ: —Cʌyʌx la' wuq'uel, mach chʌmeñic, woli jach ti wʌyel.

⁵³ Tsi' wajleyob come yujilob chʌmeñix jiñi xch'oc.

⁵⁴ Pero Jesús tsi' chucbe i c'ʌb jiñi xch'oc, tsi' yʌlʌ ti c'am bʌ t'añ: —Xch'oc, ch'ojyen.

⁵⁵ Tsa' cha' ochi i ch'ujlel, tsa' ch'ojyi ti ora; Jesús tsi' su'beyob cha'añ mi' we'sañob.

⁵⁶ Tsa' toj sajtiyob i pusic'al i tat i ña' jiñi xch'oc. Jesús tsi' su'beyob cha'añ ma'añic mi' su'beñob mi juntiquilic i pi'ʌlob chuqui tsa' ujti.