Lucas 3 - Jiñi Tsiji' bʌ Wen T'añ cha'añ Estudio

2. TSI' CHAJPA I BɅ JESÚS CHA'AÑ I YE'TEL ( 3.1—4.13 ) I su'bal Juan tsa' bʌ i yʌc'ʌ ch'ʌmja'

¹ Che' ti' jo'lujump'ejlix ja'b woli i cha'len yumʌntel Tiberio César, añ i ye'tel ti gobernador Poncio Pilato ya' ti Judea. Woli' cha'len yumʌntel Herodes ya' ti Galilea. I yijts'in Herodes i c'aba' Felipe, woli' cha'len yumʌntel ya' ti Iturea yic'ot ya' ti Traconite. Jiñi Lisanias woli' cha'len yumʌntel ya' ti Abilinia.

² Jiñi ñuc bʌ motomajob jiñobʌch Anás yic'ot Caifás. Tsa' tili i t'añ Dios ba'añ Juan i yalobil Zacarías ya' ti jochol bʌ lum.

³ Tsa' ñumi Juan ti subt'añ ti pejtelel lum ya' ti' joytʌlel Jordán ja'. Tsi' su'be wiñicob x'ixicob cha'añ yom mi' cʌyob i mul cha'añ mi' ñusʌbentelob yic'ot yom mi' ch'ʌmob ja',

⁴ che' bajche' ts'ijbubil ti' juñ jiñi x'alt'añ Isaías. Tsi' yʌlʌ: “I t'añ juntiquil wiñic mu' bʌ i cha'len c'am bʌ t'añ ti jochol bʌ lum: Chajpanla i bijlel lac Yum. Toj-esanla majlel toj bʌ la' bijlel.

⁵ Pejtel jiñi c'omol tac bʌ lum mi' caj ti bujt'intel, pejtelel wits yic'ot bujbujtʌl mi' cajel ti ju'bel; jiñi c'ochol metel tac bʌ bij mi caj ti toj añ, yic'ot jiñi bulul bexel tac bʌ bij pamacña mi caj i majlel.

⁶ Pejtelel wiñicob x'ixicob mi caj i q'uelob jiñi Xcoltaya woli bʌ i choc tilel Dios.”

⁷ Juan tsa' caji i su'ben jiñi bajc'ʌl wiñicob x'ixicob tsa' bʌ loq'uiyob tilel cha'añ mi' ch'ʌmob ja': —¡I p'olbaletla lucum! ¿Majqui tsi' su'beyetla cha'añ mi la' puts'tan i mich'ajel Dios mu' bʌ caj i tilel?

⁸ Melela toj bʌ la' melbal mi woli la' cʌy la' mul. Mach mi la' wʌl ti la' pusic'al: “Jiñʌch c tat lojon Abraham.” Come mic su'beñetla, Dios mi mejlel i pʌntesan jiñi xajlel tac ti yalobilob Abraham.

⁹ Che' ja'el, wʌle ac'bil jacha ti' ye'bal te'. Pejtelel jiñi te' mach bʌ añic mi' yʌc' wen bʌ i wut mi' sejq'uel yic'ot mi' chojquel ochel ti c'ajc.

¹⁰ Jiñi wiñicob x'ixicob tsi' c'ajtiyob: —Che' jiñi, ¿Chuqui yom mic mel lojon?

¹¹ Juan tsi' jac'ʌ: —Jiñi am bʌ i cha'añ cha'p'ejl i bujc la' i yʌq'ueñ jiñi mach bʌ añic i cha'añ. Jiñi am bʌ i bʌl i ñʌc' che'ʌch yom mi' mel ja'el.

¹² Tsa' tiliyob cha'tiquil uxtiquil xch'ʌm tojoñelob ja'el cha'añ mi' ch'ʌmob ja'. Tsi' c'ajtibeyob: —Maestro, ¿chuqui yom mic mel lojon?

¹³ Juan tsi' su'beyob: —Mach yomic ñumen mi la' c'ajtin tojoñel che' bajche' tsa' su'bentiyetla.

¹⁴ Che' ja'el cha'tiquil uxtiquil soldadojob tsi' c'ajtibeyob: —Ixcu joñon lojon, ¿chuqui yom mic mel lojon? Juan tsi' su'beyob: —Mach mi la' chilben i taq'uiñ lac pi'ʌl mi juntiquilic. Mach mi la' pʌc' ti mulil mi juntiquilic. Yom tijicñayetla yic'ot la' tojol ti e'tel.

¹⁵ Che' woliyob to ti pijt, pejtelel wiñicob x'ixicob woli' yʌlob ti pusic'al: ¿Jim ba Cristo jiñi Juan?

¹⁶ Juan tsi' su'beyob ti pejtelelob: —Joñon ti isujm mi cʌq'ueñetla ch'ʌmja', pero tal jiñi ñumen p'ʌtʌl bʌ bajche' joñon. Mach ñucoñic cha'añ mic ticben i ch'ajñal i warach. Jiñʌch mu' bʌ caj i yʌq'ueñetla la' ch'ʌm Ch'ujul bʌ Espíritu yic'ot c'ajc.

¹⁷ Añ i wejlʌjib ti' c'ʌb cha'añ mi wen wejlan i yajñib trigo. Mi caj i lot jiñi trigo ti' yotlel. Mi caj i pulben i sujl ti c'ajc mach bʌ yujilic yajpel ti pejtelel ora.

¹⁸ Che' bʌ tsi' su'beyob wiñicob x'ixicob jiñi wen t'añ, tsi' xic'beyob cha'añ mi' jac'ob.

¹⁹ Juan tsi' su'be i mul Herodes am bʌ i ye'tel ti yumʌl, come Herodes tsi' pʌyʌ Herodías i yijñam Felipe i yijts'in. Juan tsi' su'be pejtelel i jontolil tsa' bʌ i mele.

²⁰ Añ to yam bʌ jontolil tsa' bʌ i mele Herodes: Tsi' mʌcʌ Juan ti cárcel.

Tsi' ch'ʌmʌ ja' Jesús

²¹ Che' bʌ tsi' ch'ʌmʌyob ja' pejtelel wiñicob x'ixicob, tsi' ch'ʌmʌ ja' Jesús ja'el. Che' woli' pejcan Dios ti oración, tsa' cajli panchan,

²² tsa' ju'bi tilel jiñi Ch'ujul bʌ Espíritu ba'añ Jesús, che' yilal che' bajche' x'ujcuts. Tsa' tili t'añ ch'oyol bʌ ti panchan. Tsi' su'bu: “Jatet Calobil mu' bʌ j c'uxbin. Ti a tojlel mi cu'bin c tijicñʌyel.”

I c'aba' tac i ñojte'el Jesús

²³ Añ che' bajche' lujump'ejl i cha'c'al i ja'bilel Jesús che' bʌ tsi' teche i ye'tel. Jiñi Jesús i yalobilʌch José, che' mi' lon alob wiñicob. I tat José jiñʌch Elí.

²⁴ I tat Elí jiñʌch Matat, i tat Matat jiñʌch Leví, i tat Leví jiñʌch Melqui, i tat Melqui jiñʌch Jana, i tat Jana jiñʌch José,

²⁵ i tat José jiñʌch Matatías, i tat Matatías jiñʌch Amós, i tat Amós jiñʌch Nahúm, i tat Nahúm jiñʌch Esli, i tat Esli jiñʌch Nagai,

²⁶ i tat Nagai jiñʌch Maat, i tat Maat jiñʌch Matatías, i tat Matatías jiñʌch Semei, i tat Semei jiñʌch José, i tat José jiñʌch Judá,

²⁷ i tat Judá jiñʌch Joana, i tat Joana jiñʌch Resa, i tat Resa jiñʌch Zorobabel, i tat Zorobabel jiñʌch Salatiel, i tat Salatiel jiñʌch Neri,

²⁸ i tat Neri jiñʌch Melqui, i tat Melqui jiñʌch Adi, i tat Adi jiñʌch Cosam, i tat Cosam jiñʌch Elmodam, i tat Elmodam jiñʌch Er,

²⁹ i tat Er jiñʌch Josué, i tat Josué jiñʌch Eliezer, i tat Eliezer jiñʌch Jorim, i tat Jorim jiñʌch Matat,

³⁰ i tat Matat jiñʌch Leví, i tat Leví jiñʌch Simeón, i tat Simeón jiñʌch Judá, i tat Judá jiñʌch José, i tat José jiñʌch Jonán, i tat Jonán jiñʌch Eliaquim,

³¹ i tat Eliaquim jiñʌch Melea, i tat Melea jiñʌch Mainán, i tat Mainán jiñʌch Matata, i tat Matata jiñʌch Natán,

³² i tat Natán jiñʌch David, i tat David jiñʌch Isaí, i tat Isaí jiñʌch Obed, i tat Obed jiñʌch Booz, i tat Booz jiñʌch Salmón, i tat Salmón jiñʌch Naasón,

³³ i tat Naasón jiñʌch Aminadab, i tat Aminadab jiñʌch Aram, i tat Aram jiñʌch Esrom, i tat Esrom jiñʌch Fares, i tat Fares jiñʌch Judá,

³⁴ i tat Judá jiñʌch Jacob, i tat Jacob jiñʌch Isaac, i tat Isaac jiñʌch Abraham, i tat Abraham jiñʌch Taré, i tat Taré jiñʌch Nacor,

³⁵ i tat Nacor jiñʌch Serug, i tat Serug jiñʌch Ragau, i tat Ragau jiñʌch Peleg, i tat Peleg jiñʌch Heber, i tat Heber jiñʌch Sala,

³⁶ i tat Sala jiñʌch Cainán, i tat Cainán jiñʌch Arfaxad, i tat Arfaxad jiñʌch Sem, i tat Sem jiñʌch Noé, i tat Noé jiñʌch Lamec,

³⁷ i tat Lamec jiñʌch Matusalén, i tat Matusalén jiñʌch Enoc, i tat Enoc jiñʌch Jared, i tat Jared jiñʌch Mahalaleel, i tat Mahalaleel jiñʌch Cainán,

³⁸ i tat Cainán jiñʌch Enós, i tat Enós jiñʌch Set, i tat Set jiñʌch Adán, Adán jiñʌch i yalobil Dios. Jiñi ñuc bʌ Herodes: Yumʌl ti Judea, 37-4 che' maxto tilemic Cristo (Mt 2.1-22; Lc 1.5) Herodes Antipas: (I yalobil Herodes, jiñi ñuc bʌ) Gobernador ti Galilea yic'ot ti Perea, ti ja'bil 4 che' maxto tilemic Cristo; 30 che' tilemix Cristo (Mt 14.1-10; Mc 6.14-29; 8.15; Lc 3.1, 19-20; 8.3; 9.7, 9; 13.31; 23.6-12, 15; Hch 4.27; 13.1) Herodes Agripa I: (I buts jiñi ñuc bʌ Herodes) Gobernador ti Palestina, ti ja'bil 41-44 che' tilemix Cristo (Hch 12.1-6, 11, 19-23) Herodes Agripa II: (I yalobil Agripa I) yumʌl ti norte ya' ti Palestina, ti ja'bil 50-54 che' tilemix Cristo (Hch 25.13-26; 26.1-2, 19, 26, 32) Herodías: (X'ixic bʌ yeran Herodes Agripa I) ñaxan tsi' pʌyʌ ti yijñam Herodes Felipe, jiñʌch i yumijel, chumul bʌ ti Roma, tsa' bʌ i yʌq'ue xch'oc bʌ i yalobil i c'aba' Salomé; ti wi'il tsa' cha' ñujpuñi yic'ot yam bʌ i yumijel i c'aba' Herodes Antipas, (Mt 14.3; Mc 6.17).