Lucas 1 - Jiñi Tsiji' bʌ Wen T'añ cha'añ Estudio

I TEJCHIBAL I T'AÑ: JUÑ CHA'AÑ TEÓFILO ( 1.1-4 )

¹ Añ ca'bʌlob tsa' bʌ i ñopo i ts'ijbañob ti quepecña chuqui tac tsa' ujti ti isujm ti lac tojlel.

² Lajal tsi' ts'ijbayob bajche' tsi' cʌntesayonla jiñi tsa' bʌ i q'ueleyob c'ʌlʌl ti' cajibal. Jiñobʌch mu' bʌ i su'bob jiñi t'añ.

³ Jiñi cha'añ che' bʌ tsa' ujti c ña'tan ti toj isujmlel pejtelel chuqui tsa' ujti c'ʌlʌl ti' cajibal, joñon ja'el tsa' c ña'ta uts'at mic ts'ijbubeñet ti quepecña, uts'at bʌ Teófilo,

⁴ cha'añ ma' wen cʌn isujmlel che' bajche' tsa' cʌntesʌntiyet.

1. CHE' ALɅ TO JUAN TSA' BɅ I YɅC'Ʌ CH'ɅMJA' YIC'OT JESÚS ( 1.5—2.52 ) I tsictesʌntel cha'añ mi caj i yilan pañimil Juan

⁵ Che' ti yorajlel i yumʌntel rey Herodes ti Judea, añ juntiquil motomaj i c'aba' Zacarías lajal bʌ i ye'tel bajche' Abías; añ i yijñam Zacarías i c'aba' Elisabet, loq'uem bʌ ti' p'olbal Aarón.

⁶ Ti' cha'ticlelob tojob ti' tojlel Dios. Ts'ʌcʌl tsi' jac'ʌyob pejtelel i su'bal lac Yum yic'ot i mandar.

⁷ Pero ma'añobic i yalobil, come to'ol wa'al jach bʌ x'ixic jiñi Elisabet. Ca'bʌlix i ja'bilel ti' cha'ticlelob.

⁸ Che' bʌ añob ti' wenta Zacarías yic'ot i pi'ʌlob ti e'tel cha'añ mi' melob ye'tel ti motomaj ti' tojlel Dios,

⁹ come i tilel mi' cha'leñob yajcaya che' mi' q'uexob i bʌ jiñi motomajob. Tsa' c'oti ti' wenta Zacarías cha'añ mi' yochel ti' Templo lac Yum cha'añ mi' pul pom.

¹⁰ Pejtelel wiñicob x'ixicob añob ti jumpat, woli' pejcañob Dios che' ti' yorajlel woli' pulel pom.

¹¹ Che' jiñi tsa' tsictiyi ti wut Zacarías i yÁngel lac Yum, wa'al ti' ñoj ba'añ i pulʌntib pom.

¹² Tsa' toj sajti i pusic'al Zacarías che' bʌ tsi' q'uele, tsa' wen caji ti bʌq'uen.

¹³ Pero jiñi ángel tsi' su'be: —Zacarías, mach a cha'len bʌq'uen, come tsa' u'binti a woración. A wijñam Elisabet mi caj i yʌc' ti pañimil ch'itoñ bʌ a walobil, mi caj a wotsʌben i c'aba' Juan.

¹⁴ Tijicña mi caj a wu'bin yic'ot mi caj i ñuc añ a pusic'al yic'ot tijicñajax mi caj i yu'biñob ca'bʌlob che' mi yilan pañimil a walobil.

¹⁵ Come ñuc mi caj i q'uejlel a walobil ti' tojlel Dios. Ma'añic mi caj i jap vino mi lembal. C'ʌlʌl che' cʌntʌbil, but'ul ti Ch'ujul bʌ Espíritu mi caj i yajñel.

¹⁶ Mi caj i yʌq'ueñob i sutq'uin i bʌ ca'bʌl israelob cha'añ mi' ñopob i Yum Dios.

¹⁷ Mi caj i majlel a walobil ti ñaxan ti' tojlel Lac Yum, lajal i ye'tel yic'ot i p'ʌtʌlel bajche' Elías, cha'añ mi' yʌq'ueñob uts bʌ i pusic'al tatʌl ña'ʌlob cha'añ mi' c'uxbiñob i yalobilob, cha'añ mi' yʌq'ueñob wen bʌ i pusic'al xñusa mandarob cha'añ mi' tajob i ña'tʌbal lajal bajche' jiñi tojo' bʌ. Che' jiñi mi caj i yʌq'ueñob wiñicob x'ixicob i chajpañob i pusic'al cha'añ lac Yum.

¹⁸ Zacarías tsi' c'ajtibe jiñi ángel: —¿Bajche' mi caj c ña'tan mi isujm jiñi? Come joñon ñoxoñix. Che' ja'el quijñam añix ca'bʌl i ja'bilel.

¹⁹ Jiñi ángel tsi' jac'be: —Joñon Gabriel, añon ti' tojlel Dios, chocbilon tilel cha'añ mic pejcañet cha'añ mic su'beñet ili wen t'añ.

²⁰ Awilan, cha'añ ti caj ma'añic tsa' ñopo c t'añ cha'añ jiñi mu' bʌ caj ti ujtel che' ti' yorajlel, mi caj a wochel ti x'uma'. Ma'añic mi caj a mejlel ti t'añ c'ʌlʌl ti jiñi q'uiñ che' mi' yujtel jiñi tsa' bʌ c su'beyet.

²¹ Che' bʌ woli' chʌn pijtañob Zacarías jiñi wiñicob x'ixicob, tsi' c'ajtibeyob i bʌ chucoch woli i chʌn jal-añ Zacarías ti Templo.

²² Che' bʌ tsa' loq'ui tilel Zacarías, ma'añic tsa' mejli i pejcañob, tsa' jach i pejcayob ti' c'ʌb. Che' jiñi tsi' ña'tayob añ chuqui tsi' q'uele Zacarías ti Templo ch'oyol bʌ ti panchan. Che'ʌch tsa' cʌle Zacarías ti x'uma'.

²³ Che' bʌ tsa' ujti i mel i ye'tel, tsa' majli Zacarías ti' yotot.

²⁴ Ti wi'il tsa' caji i cʌntan i yalobil Elisabet. Jo'p'ejl uw ma'añic tsa' loq'ui ti' yotot come tsi' ña'ta:

²⁵ “Lac Yum tsa'ix i yʌq'ueyon calobil cha'añ mi' lajmel c wajlentel ti' tojlel wiñicob x'ixicob.”

I tsictesʌntel cha'añ mi caj i yilan pañimil Jesús

²⁶ Ti' wʌcp'ejlel uw Dios tsi' choco tilel jiñi ángel Gabriel ti jump'ejl tejclum ya' ti Galilea i c'aba' Nazaret.

²⁷ Tsa' tili jiñi ángel ba'añ juntiquil tsiji' bʌ xch'oc, c'ajtibil bʌ i cha'añ José loq'uem bʌ ti' p'olbal David. I c'aba' jiñi xch'oc jiñʌch María.

²⁸ Che' bʌ tsa' ochi ángel ya' ba'añ María tsi' su'be: —¡Cotañet. Uts'at woli' q'uelet Dios! Añ lac Yum a wic'ot. [Uts'at mi caj a q'uejlel ti tojlel x'ixicob.]

²⁹ Pero María, che' bʌ tsi' q'uele jiñi ángel tsa' toj sajti i pusic'al. Tsa' caji ti t'añ ti' pusic'al cha'añ jiñi t'añ tsa' bʌ i yʌlʌ ángel.

³⁰ Jiñi ángel tsi' su'be: —María, mach ma' cha'len bʌq'uen, come uts'at woli' q'uelet Dios.

³¹ Mi caj a cʌntan alʌl, mi caj i yilan pañimil ch'itoñ bʌ a walobil, mi caj a wotsʌben i c'aba' Jesús.

³² Mi caj i q'uejlel ti ñuc. Mi caj i pejcʌntel ti' Yalobil jiñi C'ax Ñuc bʌ. Lac Yum Dios mi caj i yʌq'ueñ i ye'tel ti Rey ti' q'uexol i ñojte'el, i c'aba' David.

³³ Mi caj i mel i ye'tel ti Rey ti' tojlel i p'olbal Jacob ti pejtelel ora, ma'añic mi caj i jilel i yumʌntel.

³⁴ María tsi' c'ajtibe jiñi ángel: —¿Bajche' mi caj i yujtel jiñi? Come maxto añic quic'ot wiñic.

³⁵ Jiñi ángel tsi' su'be: —Mi caj i tilel jiñi Ch'ujul bʌ Espíritu ti a tojlel. I p'ʌtʌlel jiñi C'ax Ñuc Bʌ mi caj i moset. Jiñi cha'añ jiñi ch'ujul bʌ alʌl mu' bʌ caj i yilan pañimil mux i pejcʌntel ti' Yalobil Dios.

³⁶ Awilan, a pi'ʌl Elisabet jiñi a cʌñʌ bʌ wolix i cʌntan ch'itoñ bʌ i yalobil ja'el, anquese ca'bʌlix i ja'bilel. Wʌcp'ejlix uw woli' cʌntan alʌl jiñi tsa' bʌ ajli ti to'ol wa'al jach bʌ x'ixic.

³⁷ Come ma'añic chuqui mach mejlic i mel Dios.

³⁸ Jiñi cha'añ María tsi' yʌlʌ: —Joñon x'e'telon i cha'añ lac Yum. La' melbenticon che' bajche' tsa' wʌlʌ. Tsa' loq'ui majlel jiñi ángel ba'añ María.

María tsa' majli i jula'tan Elisabet

³⁹ Che' ñumeñix cha'p'ejl uxp'ejl q'uiñ tsa' caji ti xʌmbal María. Ti ora tsa' letsi majlel ti wits c'ʌlʌl ti jump'ejl tejclum ya' ti Judá.

⁴⁰ Tsa' ochi ti' yotot Zacarías. Tsi' yʌq'ue cortesía Elisabet.

⁴¹ Che' bʌ tsi' yu'bibe i t'añ María jiñi Elisabet, jiñi alʌl cʌntʌbil bʌ i cha'añ tsʌts tsi' ñijca i bʌ ti' ñʌc'. Jiñi Elisabet tsa' bujt'i ti' Ch'ujul bʌ Espíritu.

⁴² Tsa' caji i cha'len c'am bʌ t'añ, tsi' yʌlʌ: —Mi caj a sujbel ti ñuc cha'añ x'ixicob. Mi caj i sujbel ti ñuc jiñi alʌl cʌntʌbil bʌ a cha'añ.

⁴³ ¿Ñucon ba cha'añ mi' tilel i jula'tañon i ña' c Yum?

⁴⁴ Come ba' ora tsa' cu'bi a t'añ, jiñi alʌl cʌntʌbil bʌ c cha'añ tsʌts tsi' ñijca i bʌ cha'añ i tijicñʌyel.

⁴⁵ Tijicñayet cha'añ tsa' ñopbe i t'añ lac Yum mu' bʌ caj i ts'ʌctiyel.

I c'ay María

⁴⁶ Jiñi cha'añ María tsi' yʌlʌ: Mic su'b i ñuclel lac Yum ti pejtelel c pusic'al,

⁴⁷ tijicña c ch'ujlel ti Dios Xcoltaya c cha'añ,

⁴⁸ come Dios tsi' q'uele mach ñuquic jiñi x'e'tel i cha'añ. Jiñi cha'añ wʌle, wiñicob x'ixicob ti' lajm ti' lajm mi caj i yʌlob tijicñayon.

⁴⁹ Come jiñi am bʌ i P'ʌtʌlel tsi' melbeyon chuqui tac ñuc. Ch'ujul i c'aba'.

⁵⁰ Mi' p'untan wiñicob x'ixicob yic'ot i yalobilob ti' lajm ti' lajm, mu' bʌ i bʌc'ñañob Dios.

⁵¹ Tsa'ix i pʌsʌ ñuc bʌ i melbal ti p'ʌtʌlel i c'ʌb; tsi' jembeyob jontol bʌ i ña'tʌbal jiñi tsa' bʌ i q'ueleyob i bʌ ti ñuc.

⁵² Tsi' chilbeyob i ye'tel jiñi tsa' bʌ buchleyob ti ñuc bʌ i ye'tel yic'ot tsi' yʌq'ueyob i ñuclel jiñi pec' bʌ tsi' meleyob i bʌ.

⁵³ Jiñi wi'ñayo' bʌ tsi' yʌq'ueyob ca'bʌl chuqui tac wen, jiñi wen chumulo' bʌ che' jach tsi' to'ol choco sujtel.

⁵⁴ Tsi' colta israelob, i wiñicob, come c'ajal i cha'añ i p'untaya,

⁵⁵ —che' bajche' tsi' pejcayob lac ñojte'el, ti tojlel Abraham yic'ot pejtelel wi'ilo' bʌ i p'olbal.

⁵⁶ Ya' to tsa' jal-a María che' bajche' uxp'ejl uw yic'ot Elisabet. Ti wi'il tsa' sujti ti' yotot.

Tsi' yila pañimil Juan tsa' bʌ i yʌc'ʌ ch'ʌmja'

⁵⁷ Tsa' c'oti i yorajlel cha'añ mi' yilan pañimil i yalobil Elisabet. Tsi' yʌc'ʌ ti pañimil ch'itoñ bʌ i yalobil.

⁵⁸ Che' bʌ tsi' yu'biyob i pi'ʌlob ti chumtʌl yic'ot i cʌñʌyo' bʌ Elisabet che' bajche' Dios tsi' p'unta, tsi' yu'biyob i tijicñʌyel i pusic'al yic'ot Elisabet.

⁵⁹ Ti' waxʌcp'ejlel q'uiñ tsa' tiliyob cha'añ mi' tsepbentel i pʌchʌlel jiñi alʌ ch'itoñ. Yom i lon otsʌbeñob i c'aba' Zacarías ti' q'uexol i tat.

⁶⁰ Pero i ña' jiñi alʌl tsi' su'beyob: —Mach che'ic yom. Mi caj i yotsʌbentel i c'aba' Juan.

⁶¹ Tsi' su'beyob: —¿Chucoch? Come ma'añic mi juntiquilic a cʌñʌyo' bʌ am bʌ i c'aba' ti Juan.

⁶² Che' jiñi tsa' caji i pejcañob Zacarías ti' c'ʌb cha'añ mi' c'ajtibeñob bajche' yom i yotsʌben i c'aba' i yalobil.

⁶³ Tsi' c'ajti wechel bʌ te' ba' tsi' ts'ijba: “I c'aba'ʌch Juan.” Tsa' toj sajtiyob i pusic'al ti pejtelelob.

⁶⁴ Ti jim bʌ ora tsa' cha' caji ti t'añ Zacarías, tsa' jijti i yac', che' jiñi tsa' caji i su'b i ñuclel Dios.

⁶⁵ Tsa' wen cajiyob ti bʌq'uen pejtelel i pi'ʌlob ti chumtʌl. Ti pejtelel wits ya' ti Judea tsa' caji ti sujbel pejtelel ili tsa' bʌ ujti.

⁶⁶ Pejtelel tsa' bʌ i yu'biyob tsi' lotoyob ti' pusic'al. Tsi' yʌlʌyob: ¿Chuqui i c'ʌjñibal mi caj i majlel jiñi ch'itoñ? Come i c'ʌb lac Yum añ yic'ot.

Tsi' su'bu t'añ Zacarías

⁶⁷ Zacarías, i tat jiñi ch'itoñ, tsa' bujt'i ti Ch'ujul bʌ Espíritu. Tsa' caji ti alt'añ. Tsi' yʌlʌ:

⁶⁸ La' sujbic i ñuclel lac Yum Dios, i Dios Israel. Come tsa'ix tili i mʌñob i cha'año' bʌ.

⁶⁹ Tsa'ix i yʌq'ueyonla p'ʌtʌl bʌ Xcoltaya loq'uem bʌ ti' p'olbal David, x'e'tel bʌ i cha'añ.

⁷⁰ Che' bajche' tsi' cha'le t'añ Dios yic'ot ch'ujul bʌ x'alt'añob i cha'añ ti wajali.

⁷¹ Mi caj laj coltʌntel loq'uel ti' c'ʌb laj contrajob yic'ot ti' c'ʌb pejtelel mu' bʌ i ts'a'leñonla.

⁷² Che' jiñi mi caj i p'untañonla che' bajche' tsi' su'beyob lac ñojte'el. Mi caj i ña'tan jiñi ch'ujul bʌ xuc'ul bʌ t'añ,

⁷³ che' bajche' tsi' su'be lac tat Abraham ba' ora tsi' wa'choco i t'añ.

⁷⁴ Che' coltʌbiloñixla loq'uel ti' c'ʌb laj contrajob, che' jiñi ma'añic bʌq'uen mi caj lac melben i ye'tel

⁷⁵ ti ch'ujul yic'ot toj ti' wut Dios che' cuxulontola.

⁷⁶ Jatet, alʌ ch'itoñ, mi caj a pejcʌntel ti x'alt'añ i cha'añ jiñi C'ax Ñuc Bʌ, come mi caj a majlel ñaxan ti' wut lac Yum cha'añ ma' chajpʌben i bijlel,

⁷⁷ cha'añ ma' wʌq'ueñob i cʌn wiñicob x'ixicob bajche' mi caj i coltʌntelob cha'añ mi' ñusʌbentelob i mul.

⁷⁸ Come ca'bʌl tsi' p'untayonla lac Dios. Mi caj i chocbeñonla tilel i sʌclel pañimil ch'oyol bʌ ti chañ,

⁷⁹ cha'añ mi' yʌq'ueñob i sʌclel pañimil jiñi chumulo' bʌ ti ic'ch'ipan bʌ pañimil, yic'ot jiñi año' bʌ ti yʌxñʌlel chʌmel, cha'añ mi' toj-esan majlel la coc ba' ñʌch'ʌl mi la cajñel, che' tsi' yʌlʌ Zacarías.

⁸⁰ Tsa' coli jiñi alʌ ch'itoñ. Tsi' taja i p'ʌtʌlel i pusic'al. Tsa' ajñi ti colem bʌ i tiquiñal pañimil jinto tsi' pʌsʌ i bʌ ba'añ israelob.