Levitico 9 - Jiñi Tsiji' bʌ Wen T'añ cha'añ Estudio

Jiñi majtañʌl tac tsa' bʌ i yʌc'ʌ Aarón

¹ Che' ti' waxʌcp'ejlel q'uiñ, Moisés tsi' pʌyʌ tilel Aarón yic'ot i yalobilob yic'ot jiñi xñoxob ti Israel,

² tsi' su'be Aarón: “Ch'ʌmʌ juncojt tat wacax cha'añ i tojol mulil, yic'ot juncojt tat tʌñʌme' cha'añ pulbil bʌ majtañʌl, ti' cha'cojtlel mach yomic añ i c'am-ʌjel mi i lojwemal, ac'ʌ ti' tojel lac Yum.

³ Ti wi'il mi caj a pejcan jiñi israelob, mi caj a su'beñob: Pʌyʌla tilel juncojt i tat chivo cha'añ i ñusʌntel mulil, yic'ot juncojt tat wacax yic'ot juncojt alʌ tʌñʌme' añ jaxto bʌ jump'ejl ja'b, ti' cha'cojtlel yom jiñi c'oc' bʌ cha'añ pulbil bʌ majtañʌl.

⁴ Che' ja'el pʌyʌla tilel juncojt i tat wacax yic'ot juncojt i tat tʌñʌme' cha'añ tsʌnsʌbil bʌ majtañʌl cha'añ i ñʌch'tʌlel la' pusic'al, mi caj la' tsʌnsan ti' tojlel lac Yum, yic'ot majtañʌl, harina xajc'ubil bʌ ti olivo aceite, come lac Yum mi caj i pʌs i bʌ ti la' tojlel wʌle.”

⁵ Tsi' ch'ʌmʌyob majlel ti' tojel Tabernáculo ba' mi' tempañob i bʌ che' bajche' tsi' yʌlʌ Moisés; tsa' tiliyob ti wa'tʌl pejtelel israelob ti' tojel lac Yum.

⁶ Jiñi cha'añ Moisés tsi' su'beyob: “Jiñʌch tsa' bʌ i yʌlʌ lac Yum; melela, che' jiñi mi caj i tsictiyel i ñuclel lac Yum.”

⁷ Ti wi'il Moisés tsi' su'be Aarón: “Lʌc'tesan a bʌ ya' ti' t'ejl jiñi pulʌntib, aq'uen tsʌnsʌbil bʌ i majtañ cha'añ i ñusʌntel a mul yic'ot jiñi pulbil bʌ majtañʌl cha'añ jiñi tejclum yic'ot cha'añet; aq'uen ja'el i majtañ lac Yum cha'añ i ñusʌntel i mul pejtelel wiñicob x'ixicob, che' bajche' tsi' yʌc'ʌ mandar lac Yum.”

⁸ Jiñi cha'añ Aarón tsi' lʌc'tesa i bʌ ba'añ pulʌntib, tsi' tsʌnsa jiñi tat wacax cha'añ i ñusʌntel i mul.

⁹ I yalobilob Aarón tsi' ch'ʌmʌyob tilel jiñi ch'ich', Aarón tsi' ts'aja i yal i c'ʌb ya' ti ch'ich' tsa' caji i bomben i xulub tac jiñi pulʌntib, i colojbal jiñi ch'ich' tsi' beq'ue ya' ti' ye'bal jiñi pulʌntib.

¹⁰ Ti wi'il tsa' caji i pulben i lewil, yic'ot i cuchi'tun yic'ot i lewil i yolmal jiñi majtañʌl cha'añ i ñusʌntel mulil che' bajche' lac Yum tsi' su'be Moisés.

¹¹ Pero i bʌc'tal yic'ot i pʌchʌlel tsi' pulu ya' ti junwejl tejclum.

¹² Che' jiñi tsi' tsʌnsa jiñi alʌc'ʌl cha'añ mi' pulben lac Yum, i yalobilob Aarón tsi' ch'ʌmʌyob tilel jiñi ch'ich'. Aarón tsi' tsijca ya' ti' pam pulʌntib yic'ot ti' joytʌlel.

¹³ Ti wi'il tsa' caji i ñusañob tilel i bʌc'tal jiñi majtañʌl ti jujump'ejl jiñi bic'ti tsepbil tac bʌ temel yic'ot i jol. Tsi' pulu ya' ti pulʌntib.

¹⁴ Ti wi'il che' bʌ tsa' ujti i sʌc'ben i soyta' yic'ot i ya' tac, tsa' caji i pul ya' ti' pulʌntib i majtañ lac Yum.

¹⁵ Ti wi'il tsa' caji i yʌc' ja'el majtañʌl cha'añ i mul pejtelel wiñicob x'ixicob: Tsi' tsʌnsa juncojt i tat chivo cha'añ mi' ñusʌbentelob i mul wiñicob x'ixicob. Tsi' tsʌnsa jiñi alʌc'ʌl, tsi' yʌq'ue lac Yum, che' bajche' jiñi majtañʌl tsa' bʌ i yʌc'ʌ Aarón cha'añ i bajñel mul.

¹⁶ Che'ʌch tsi' tsʌnsa jiñi alʌc'ʌl cha'añ mi' pulben lac Yum che' bajche' yom mi yʌjq'uel.

¹⁷ Ti wi'il tsi' ch'ʌmʌ junmujch' trigo, tsi' pulu ya' ti pulʌntib yic'ot i majtañ lac Yum mu' bʌ i pulbentel ti jujump'ejl sʌc'ajel.

¹⁸ Tsi' tsʌnsa jiñi tat wacax yic'ot jiñi tat tʌñʌme' cha'añ mi' tajob i ñʌch'tʌlel i pusic'al jiñi wiñicob x'ixicob. I yalobilob Aarón tsi' ch'ʌmʌyob tilel i ch'ich'el jiñi majtañʌl, Aarón tsi' tsijca ti' joytʌlel jiñi pulʌntib.

¹⁹ Tsi' yʌq'ueyob ja'el i lewil tac jiñi tat wacax yic'ot jiñi tʌñʌme', yic'ot i ñej, i lewil i soyta', i lewil i cuchi'tun yic'ot i lewil i yolmal,

²⁰ tsi' much'choco ya' ti' tajñ jiñi alʌc'ʌl tsʌnsʌbil bʌ. Che' jiñi Aarón tsa' caji i pule' ya' ti pulʌntib,

²¹ pero i bʌc'tal tac i tajñ yic'ot ñoj bʌ i ya', tsi' jʌmts'u Aarón, che' bajche' jʌmts'ubil bʌ i majtañ lac Yum, che' bajche' lac Yum tsi' yʌq'ue mandar Moisés.

²² Aarón tsi' letsa i c'ʌb ti' tojlel jiñi wiñicob x'ixicob, tsi' yʌq'ueyob i yutslel i t'añ; che' ujtemix i yʌc' jiñi majtañʌl cha'añ i ñusʌntel mulil yic'ot jiñi pulbil bʌ majtañʌl yic'ot jiñi majtañʌl cha'añ i ñʌch'tʌlelob i pusic'al, tsi' tʌts'ʌ i bʌ ba'añ jiñi pulʌntib.

²³ Ti wi'il jiñi Moisés yic'ot Aarón tsa' ochiyob ti Tabernáculo ya' ba' mi' tempañob i bʌ. Che' bʌ tsa' cha' loq'uiyob tilel, tsi' yʌq'ueyob i yutslel i t'añ jiñi wiñicob x'ixicob. Tsa' tsictiyi i ñuclel lac Yum ti' tojlel pejtelel wiñicob x'ixicob.

²⁴ Tsa' loq'ui tilel c'ajc ti' tojlel lac Yum. Tsi' laj pulu jiñi majtañʌl yic'ot i lewil tac am bʌ ti' pam jiñi pulʌntib. Che' bʌ tsi' q'ueleyob jiñi wiñicob x'ixicob, tsi' ch'ujutesayob lac Yum yic'ot tsa' ñocleyob, tsi' ñucchocoyob i bʌ ti' tojlel.