Levitico 7 - Jiñi Tsiji' bʌ Wen T'añ cha'añ Estudio

¹ “Jiñʌch ja'el jiñi mandar cha'añ jiñi tsʌnsʌbil bʌ majtañʌl cha'añ mulil:” “Come c'ax ch'ujulʌch jiñi majtañʌl.

² Ya' ti ajñibʌl ba' mi' tsʌnsʌntel jiñi pulbil bʌ majtañʌl, ya' yom mi la' tsʌnsan jiñi majtañʌl cha'añ mulil, yom mi la' tsijcʌben i ch'ich'el ti' joytʌlel jiñi pulʌntib.

³ Ti jiñi majtañʌl mi caj i yʌjq'uel ya' ti pulʌntib pejtelel i lewil yic'ot i ñej yic'ot i lewil i soyta',

⁴ yic'ot i lewil ti' cha'p'ejlel i cuchi'tun, yic'ot am bʌ ya' ti' bʌc'tal i pat yic'ot i lewil am bʌ ti yolmal.

⁵ Ti wi'il jiñi motomaj mi caj i pul ti' pam jiñi pulʌntib che' bajche' pulbil bʌ c majtañ. Jiñʌch majtañʌl cha'añ i ñusʌntel mulil.

⁶ Pejtelel wiñico' bʌ i yalobilob jiñi motomajob mi' mejlel i c'uxob. Yom mi' c'uxob ya' ti Ch'ujul bʌ ajñibʌl, come c'ax ch'ujulʌch jiñi majtañʌl.”

⁷ “Junsujm jach jiñi mandar cha'añ majtañʌl cha'añ mulil yic'ot ja'el jiñi majtañʌl cha'añ i tojol mulil. Jiñi motomaj jiñʌch mu' bʌ i yʌc' ti ñusʌntel jiñi mulil yic'ot jiñi majtañʌl.

⁸ Jiñi motomaj mu' bʌ i pul majtañʌl i cha'añ bʌ juntiquil, mi caj i ch'ʌmben i pʌchʌlel jiñi majtañʌl.

⁹ Che'ʌch ja'el jiñi majtañʌl tiq'uesʌbil bʌ ti horno, yic'ot ch'ilbil tac bʌ ti sartén, o tiq'uesʌbil bʌ ti p'ejt, i cha'añʌch jiñi motomaj tsa' bʌ i pulu jiñi majtañʌl.

¹⁰ Pero pejtelel majtañʌl xajc'ubil bʌ yic'ot olivo aceite, o mi tiquin jach melbil, ti' pejtelel i cha'añobʌch i yalobilob Aarón.”

¹¹ “Jiñʌch jiñi mandar cha'añ c majtañ mu' bʌ la' wʌq'ueñon cha'añ i ñʌch'tʌlel la' pusic'al:

¹² Che' mi cʌq'uentel c majtañ che' mi la' su'beñon wocolix cʌlʌ, yom jiñi waj mach bʌ añic i levadurajlel wen juch'bil bʌ trigo bombil bʌ yic'ot olivo aceite, yic'ot woch'esʌbil bʌ waj mach bʌ añic i levadurajlel bombil bʌ ti olivo aceite, yic'ot waj ch'ilbil bʌ melbil bʌ ti harina xajc'ubil bʌ yic'ot olivo aceite,

¹³ yic'ot yom mi cʌq'uentel caxlan waj am bʌ i levadurajlel che' mi la' su'beñon wocolix cʌlʌ yic'ot cha'añ i ñʌch'tʌlel la' pusic'al.

¹⁴ Ti jiñi majtañʌl i cha'añ bʌ lac Yum mi caj i loc'sʌntel ts'ita' cha'añ mi' ch'ʌm jiñi motomaj mu' bʌ i tsijcʌben i ch'ich'el alʌc'ʌl cha'añ ñʌch'tʌlel.”

¹⁵ “Jiñi alʌc'ʌl mu' bʌ cʌq'uentel cha'añ i ñʌch'tʌlel la' pusic'al che' mi la' su'beñon wocolix cʌlʌ mi caj i c'uxtʌl ti jiñi jach bʌ q'uiñ; ma'añic mi caj i wis cʌytʌl i colojbal cha'añ yam bʌ q'uiñ.

¹⁶ Pero mi jiñi majtañʌl woli bʌ i yʌjq'uel cha'añʌch tsi' yʌc'ʌ xuc'ul bʌ i t'añ o cha'añ tilem ti' bajñel pusic'al, mi' mejlel ti c'uxtʌl ti jiñi jach bʌ q'uiñ che' bʌ tsa' ajq'ui, pero mi tsa' to colojbaji, mi' mejlel i cha' c'uxtʌl che' ti yijc'ʌlal.

¹⁷ Pero mi chʌn añ to i colojbal jiñi majtañʌl che' ti yuxp'ejlel q'uiñ, yomix mi' pulel ti c'ajc.

¹⁸ Mi tsa' to chʌn c'uxle i colojbal jiñi majtañʌl che' ti yuxp'ejlel q'uiñ, che' jiñi lolom jach tsi' yʌc'ʌ. Ma'añix mic ch'ʌm tic wenta come tsa'ix ñumi i yorajlel. Majqui jach mi' c'uxe' mi' taj i mul.”

¹⁹ “Mach mejlic ti c'uxtʌl jiñi we'elʌl mu' bʌ i pʌjq'uel ti chuqui tac jach bi'bi' tic wut. Wersa yom mi' pulel ti c'ajc.” “Majqui jach sʌc tic wut mi' mejlel i c'ux jiñi sʌc tac bʌ we'elʌl mach bʌ pʌjq'uemic.”

²⁰ “Jiñi wiñic che' maxto sʌquic tic wut, mi tsi' c'uxu c majtañ che' mic su'bentel wocolix cʌlʌ, wersa yom mi' chojquel loq'uel ti' tojlel i pi'ʌlob ti' lumal.

²¹ Majqui jach mi' tʌl chuqui tac bi'bi' tic wut, mi i bi'bi'lel wiñic, mi bi'bi' bʌ alʌc'ʌl tac, o chuqui jach bi'bi' tac bʌ; mi tsi' c'uxu jiñi majtañʌl tac aq'uebilon bʌ cha'añ mic su'bentel wocolix cʌlʌ, wersa yom mi' chojquel loq'uel ya' ti' tojlel i pi'ʌlob.”

²² Lac Yum tsi' pejca Moisés, tsi' su'be:

²³ “Su'beñob jiñi israelob: Mach mejlic la' c'ux i lewil wacax, mi i lewil tʌñʌme' mi i lewil chivo.

²⁴ I lewil jiñi chʌmeñ bʌ alʌc'ʌl, mi i lewil bʌte'el tsa' bʌ i tsʌnsa bajlum, mi' mejlel la' c'ʌn ti yan tac bʌ i c'ʌjñibal, pero mach yomic mi la' c'ux.”

²⁵ “Majqui jach mi' c'uxben i lewil alʌc'ʌl mu' bʌ cʌq'uentel cha'añ pulbil bʌ c majtañ, jiñi wiñic mu' bʌ i c'ux wersa mi caj i chojquel loq'uel ti' tojlel i pi'ʌlob.”

²⁶ “Che' ja'el mach mejlic la' c'uxben i ch'ich'el alʌc'ʌl mi te'lemut ya' ba' mi la' chumtʌl.

²⁷ Che' añ juntiquil wiñic mu' bʌ i c'uxben i ch'ich'el baqui jach bʌ alʌc'ʌl, wersa mi caj i chojquel loq'uel ti' tojlel i pi'ʌlob.”

²⁸ Lac Yum tsi' cha' pejca Moisés, tsi' yʌlʌ:

²⁹ “Su'beñob israelob: Jiñi yom bʌ i yʌq'ueñon c majtañ cha'añ mi' su'beñon wocolix cʌlʌ, la' i ch'ʌm tilel c majtañ tic tojel.

³⁰ La' i ch'ʌm tilel ti' c'ʌb jiñi majtañʌl mu' bʌ caj i pulel tic tojlel. Yom mi' ch'ʌmben tilel i lewil i tajñ yic'ot i bʌc'tal i tajñ cha'añ mi' jʌmts'untel tic tojlel ba'añ jiñi pulʌntib.

³¹ Jiñi motomaj mi caj i pulbeñon i lewil ya' ti pulʌntib, pero jiñi i tajñ i cha'añʌch Aarón yic'ot i yalobilob.

³² Aq'uenla jiñi motomaj che' bajche' lotbil bʌ ofrenda, jiñi ñoj bʌ i ya' cha'añ mic su'bentel wocolix cʌlʌ.

³³ Jiñi i yalobilob Aarón mu' bʌ i yʌq'ueñon i ch'ich'el jiñi tsʌnsʌbil bʌ majtañʌl yic'ot i lewil cha'añ mic su'bentel wocolix cʌlʌ, mi caj i ch'ʌmben jiñi ñoj bʌ i ya' che' bajche' i cha'añ.

³⁴ Joñon woli cʌq'ueñob motomajob i tajñ c majtañ mu' bʌ i jʌmts'untel yic'ot i bʌc'tal i ya' mu' bʌ i yʌq'ueñoñob jiñi israelob, tsa' cʌq'ueyob ti' wenta jiñi motomaj Aarón yic'ot i yalobilob. Jiñʌch mandar yom bʌ mi jajq'uel ti pejtelel ora ti' tojlel jiñi israelob.”

³⁵ Ti pejtelel majtañʌl mu' bʌ c pulbentel, mi caj i yʌq'uentel Aarón yic'ot i yalobilob come tsa' c wa'chocoyob ti ye'tel ti motomaj;

³⁶ jiñʌch i mandar lac Yum ti' tojlel i yalobilob Israel cha'añ mi yʌq'ueñob jiñi motomajob tsa' bʌ i wa'chocoyob ti ye'tel. Jiñʌch xuc'ul bʌ t'añ ti' tojlel i p'olbalob.

³⁷ Jiñʌch mandar cha'añ jiñi pulbil bʌ majtañʌl, cha'añ jiñi majtañʌl melbil bʌ ti harina, cha'añ jiñi majtañʌl cha'añ mulil yic'ot majtañʌl cha'añ i tojol mulil yic'ot che' añ majqui mi' sʌc-esan i bʌ yic'ot cha'añ i tijicñʌyelob i pusic'al,

³⁸ tsa' bʌ i yʌq'ue lac Yum ti' tojlel Moisés ya' ti wits i c'aba' Sinaí, che' ba' ora lac Yum tsi' su'be jiñi israelob ya' ti jochol bʌ lum cha'añ mi' yʌq'ueñob i majtañ.