Levitico 6 - Jiñi Tsiji' bʌ Wen T'añ cha'añ Estudio

¹ Lac Yum tsi' pejca Moisés, tsi' su'be:

² “Che' añ majqui mi' cha'len mulil tij contra, yic'ot mi tsi' cha'le xujch' tij contra, cha'añ ti' caj ma'añic tsi' cha' sutq'ui jiñi tsa' bʌ poj aq'uenti ti' wenta cha'añ mi' cʌntan, mi tsi' xujch'ibe i chu'bʌañ, o mi tsi' wersa chilbe i chu'bʌañ i pi'ʌl,

³ o mi tsi' loto chuqui tsa' sajti pero ma'añic tsi' tsictesa, mi tsi' lon ac'ʌ xuc'ul bʌ i t'añ che' mach isujmic, che' bajche' i tilel mi' cha'leñob mulil wiñicob;

⁴ che' jiñi, jiñi tsa' bʌ i cha'le mulil, yom mi' cha' sutq'uin jiñi tsa' bʌ i xujch'i, yom mi' toj jiñi tsa' bʌ i ch'ʌmʌ, yom mi' cha' sutq'uin jiñi tsa' bʌ aq'uenti ti' wenta cha'añ mi' cʌntan, yom mi cha' sutq'uin jiñi sajtem bʌ tsa' bʌ i loto,

⁵ yom mi' cha' sutq'uin jiñi tsa' bʌ i ch'ʌmʌ anquese tsi' lon ac'ʌ xuc'ul bʌ i t'añ cha'añ mach isujmic. Jiñi tsa' bʌ i cha'le xujch', che' mi' c'otel i yorajlel mi yʌc' jiñi tsʌnsʌbil bʌ majtañʌl cha'añ i ñusʌntel i mul, yom ts'ʌcʌl mi' sutq'uiben i chu'bʌañ i yum jiñi tsa' bʌ i xujch'i yic'ot yom i cha'yajlel i diezmojlel jiñi chu'bʌañʌl che' bajche' c'amel i tojol jiñi tsa' bʌ i xujch'i.

⁶ Cha'añ i ñusʌbentel i mul jiñi wiñic, yom mi' ch'ʌmbeñon tilel juncojt wen uts'at bʌ i tat tʌñʌme' mach bʌ wis añic i c'am-ʌjel, che' bajche' uts'at ma' q'uel, che' jiñi mux i yʌq'uentel jiñi motomaj cha'añ i tojol ili mulil.

⁷ Jiñi motomaj mi caj i yʌq'ueñon tsʌnsʌbil bʌ c majtañ cha'añ i tojol i mul jiñi wiñic. Che' jiñi mi caj i taj i ñusʌbentel pejtelel i mul.”,

Che' bajche' yom mi yʌjq'uel tsʌnsʌbil bʌ majtañʌl

⁸ Lac Yum tsi' pejca Moisés, tsi' su'be:

⁹ “Su'ben Aarón yic'ot i yalobilob che' bajche' yom jiñi pulbil bʌ c majtañ: Jiñi c majtañ mi caj i yajñel ti c'ajc c'ʌlʌl mi' ñumel ac'ʌlel c'ʌlʌl mi' sʌc'an pañimil. Yom mi' laj pulel jiñi majtañʌl ya' ti pulʌntib.

¹⁰ Jiñi motomaj mi caj i lʌp lino bʌ i pislel yic'ot i borwex, che' bʌ tsa'ix ujti ti pulel jiñi majtañʌl, mi caj i much'quiben i tʌñʌl ya' ti' pam pulʌntib, che' jiñi much'ul mi' cʌy ya' ti' t'ejl pulʌntib.

¹¹ Ti wi'il yom mi' cha' q'uextan i pislel yom mi' lʌp yam bʌ, che' jiñi yom mi' loc'san jiñi tañ cha'añ mi yʌc' ya' ti' pat ba' mi tempañob i bʌ ba' ma'añic chuqui añ.”

¹² “Jiñi c'ajc am bʌ ya' ti pulʌntib mach yomic mi' yajpel, jiñi motomaj yom mi yotsʌben i si'il ti jujump'ejl sʌc'ajel, mi caj i yʌc' jiñi majtañʌl ti' pam cha'añ mi' pulel yic'ot pejtelel i lewil jiñi tsʌnsʌbil bʌ majtañʌl cha'añ ñʌch'tʌlel.

¹³ Jiñi c'ajc yom mi' chʌn lejmel ti' pam jiñi pulʌntib, mach yomic mi' yajpel.”

¹⁴ “Jiñʌch jiñi mandar cha'añ majtañʌl bʌ i wut pʌc'ʌbʌl: Añ ti' wenta i yalobilob Aarón cha'añ mi' pulbeñon ti' pam jiñi pulʌntib.

¹⁵ Jiñi motomaj mi caj i ch'ʌm junmujch' harina mu' bʌ cʌq'uentel tic majtañ, olivo aceite yic'ot pom, che' jiñi mi caj i pulbeñon c majtañ ya' ti pulʌntib cha'añ c ña'tʌntel jiñʌch xojocña bʌ i yujts'il mi cu'bin.

¹⁶ Aarón yic'ot i yalobilob mi caj i c'uxob i colojbal mu' bʌ i cʌytʌl; mach yomic mi' c'uxtʌl yic'ot levadura ya' ti Ch'ujul bʌ Ajñibʌl; la' i c'uxob i colojbal c majtañ ya' ti' pat jiñi pisil bʌ cotot.

¹⁷ Mach yomic mi' ch'ʌxtʌl yic'ot levadura, come tsa'ix cʌq'ueyob i yalobilob Aarón cha'añ mi' c'uxob pulbil bʌ c majtañ; come wen ch'ujulʌch che' bajche' jiñi majtañʌl cha'añ mulil yic'ot cha'añ i ñusʌntel mandar.

¹⁸ Pejtelel wiñic bʌ i p'olbal Aarón mi' mejlel i c'uxob jiñi loq'uem tac bʌ tic majtañ. Jiñʌch xuc'ul bʌ mandar cha'añ la' walobilob che' bajche' yom mi cʌq'uentel pulbil bʌ c majtañ. Pejtelel mu' bʌ i xʌb i bʌ yic'ot ili majtañʌl ch'ujul mi yajñel.”

¹⁹ Lac Yum tsi' pejca Moisés, tsi' su'be:

²⁰ “Jiñʌch jiñi ofrenda yom bʌ mi yʌq'ueñon Aarón yic'ot i yalobilob ba ora mic wa'chocoñob ti' ye'tel ti motomaj: jiñʌch cha'p'ejl kilo majtañʌl bʌ harina, la' i yʌc'ob ojlil ti sʌc'ajel yic'ot ojlil ti ic'ajel; jiñʌch c majtañ ti pejtelel ora.

²¹ Yom mi' ch'ijlel ti sartén yic'ot olivo aceite; ch'ilbil yom mi yʌjq'uel yic'ot yom bic'ti xut'bil jiñi majtañʌl xojocña bʌ i yujts'il tic tojlel.

²² Jiñi motomaj mi caj i yʌq'ueñon ili majtañʌl ba' ora mi' wa'chocontel ti' ye'tel i yalobilob Aarón. Jiñʌch xuc'ul bʌ c mandar: Yom mi' laj pulel jiñi majtañʌl.

²³ Pejtelel jiñi majtañʌl mu' bʌ i yʌc'ob jiñi motomajob yom mi' laj pulel: Mach yomic mi' c'uxtʌl.”

²⁴ Lac Yum tsi' pejca Moisés, tsi' su'be:

²⁵ “Su'ben Aarón yic'ot i yalobilob jiñʌch jiñi mandar cha'añ mi' ñusʌntel mulil: Ya' ba' mi' tsʌnsʌntel jiñi alʌc'ʌl mu' bʌ i pulel, ya' yom mi' tsʌnsʌntel jiñi majtañʌl cha'añ i tojol mulil; come ch'ujulʌch.

²⁶ Mi caj i c'ux jiñi motomaj jiñi majtañʌl mu' bʌ i yʌjq'uel cha'añ mulil; mi caj i c'uxe' ya' ti ch'ujul bʌ ajñibʌl, ya' ti' pat jiñi pisil bʌ cotot ba' mi la' tempan la' bʌ.

²⁷ Pejtelel mu' bʌ i tʌl i bʌc'tal jiñi majtañʌl ch'ujul mi' cʌlel yic'ot mi' tsa' wijts'i i ch'ich'el ti' pislel, yom mi' wuts' ya' ti Ch'ujul bʌ Ajñibʌl.

²⁸ Jiñi p'ejt ba' tsa' ch'ʌxle jiñi we'elʌl, yom mi' tojp'el; mi tsa' ch'ʌxle ti p'ejt melbil bʌ ti tsucul taq'uiñ, yom mi' wen jujq'uel yic'ot mi' wen pojquel yic'ot ja'.”

²⁹ “Pejtelel ch'itoñ bʌ i yalobilob jiñi motomaj mi' mejlel i c'uxob jiñi we'elʌl, come c'ax ch'ujulʌch.

³⁰ Pero mach yomic mi' wis c'uxtʌl jiñi majtañʌl tsa' bʌ ch'ʌjmi majlel i ch'ich'el ya' ti Tabernáculo ba' mi la' tempan la' bʌ, mu' bʌ i c'ʌjñel cha'añ i ñusʌntel mulil ya' ti Ch'ujul bʌ Ajñibʌl. Ili majtañʌl yom mi' laj pulel ti c'ajc.”